1 Ha ha’ékuri opa Enoc ára cuatrocientos treinta áño.

2 Ha ojehu Matusalén, Enoc ra’y, ndojegueraháikuri, oñekumpli hag̃ua Ñandejára konveniokuéra, ha’e ojapova’ekue Enoc-pe; añetehápe ha’e ojapógui konvénio Enoc ndive, Noé outaha iñemoñare lómogui.

3 Ha ojehu Matusalén oprofetisa peteĩ umi ilómogui heñoitaha opa yvy arigua rréino (Noé rupive), ha ojapyhy glória ijupe g̃uarã.

4 Ha ou yvy ári ñembyahýi vai, ha Ñandejára omoñe’ẽngái pe yvy ñe’ẽngái vaiete reheve, ha heta upépe oikóva omano.

5 Ha ojehu Matusalén oikove ciento ochenta y siete áño, ha omoheñói Lamec-pe;

6 Ha Matusalén oikove, Lamec-pe omoheñói rire, setecientos ochenta y dos áño, ha omoheñói ta’ýra ha tajyrakuéra;

7 Ha opa Matusalén ára ha’ékuri novecientos sesenta y nueve áño ha omano.

8 Ha Lamec oikove ciento ochenta y dos áño, ha omoheñói peteĩ ta’ýra,

9 Ha ombohéra chupe Noé, he’ívo: Ko ta’ýra ñanemoangapyhýta ñane rembiaporãme ha ñande po rembiapópe, pe yvy Ñandejára omoñe’ẽngaiva’ekuére.

10 Ha oikókuri Lamec, Noé omoheñói rire, quinientos noventa y cinco áño, ha omoheñói ta’ýra ha tajyrakuéra;

11 Ha opa Lamec ára ha’ékuri setecientos setenta y siete áño ha omano.

12 Ha Noé orekókuri cuatrocientos cincuenta áño ha omoheñói Jafet-pe; ha cuarenta y dos áño upe rire, ha’e omoheñói Sem-pe, upe ha’évakuri Jafet sy, ha kiniénto ánope, omoheñói Cam-pe.

13 Ha Noé ha ita’yrakuéra ohendúkuri Ñandejárape, ha iñe’ẽrendu, ha oñehenói hikuái Tupã ra’ykuéra.

14 Ha ko’ã kuimba’e oñepyrũvo oñemboheta yvy ape ári, ha heñói chupekuéra tajyrakuéra, yvypóra ra’ykuéra ohechákuri ko’ã tajýra iporãha, ha ojapyhy ijupe g̃uarã tembireko, jepeve oiporavoháicha hikuái.

15 Ha Ñandejára he’i Noé-pe: Nde ra’y ra’ykuéra oñevendékuri; upévare, péina ápe hendy che pochy yvypóra ra’ykuérare, nohenduséigui hikuái che ñe’ẽpu.

16 Ha ojehu Noé oprofetisa ha ombo’e Tupã mba’ekuéra, jepeve iñepyrũmbypeguáicha.

17 Ha Ñandejára he’i Noé-pe: Che Espíritu noñorairõmo’ãi tapiaite yvypóra ndive, ha’e oikuaava’erãgui opa tete omanotaha; upevére, hi’arakuéra ha’éta ciento veinte áño, ha tekovekuéra noñearrenpentíriramo, Che amboúta umi amaguasu hi’arikuéra.

18 Ha umi árape oĩva’ekue gigante-kuéra yvy ári, ha oheka hikuái Noé-me oipe’a hag̃ua chugui hekove; ha katu Ñandejára oikókuri Noé ndive, ha Ñandejára pokatu oĩkuri hendive.

19 Ha Ñandejára oordena Noé-pe hi’orden teepeguáicha, ha omanda chupe osẽ hag̃ua omombe’u Iñevanhélio yvypóra ra’ykuérape, oñeme’ẽ haguéicha Enoc-pe.

20 Ha ojehu Noé ohenói yvypóra ra’ykuérape oñearrepenti hag̃ua; ha katu nohendúi hikuái umi iñe’ẽ;

21 Ha avei, ohendu rire chupe, ou hikuái hendondépe, he’ívo: Péina ápe, ore ha’e Tupã ra’y; ndorojapyhýipa oremba’erã yvypóra rajykuérape? Ndorokaruipahína, noromboy’úipa ha noromendáipa, ha noroñeme’ẽipa ñemendápe? Ore rembireko ome’ẽ oréve mitã, ha ko’ãva kuimba’e ipu’akapáva, ymaguare kuimba’ekuéraicha, yvypóra herakuãporãva. Ha naiñe’ẽrendúi hikuái Noé ñe’ẽnguérare.

22 Ha Tupã ohechákuri tuichaha yvypóra ra’ykuéra rekoñaña yvy ári; ha opa tekove oñembovu opensávo ipy’a oipotávare, ojapo memévonte ivaíva.

23 Ha ojehu Noé ombo’evénte tavayguakuérape, he’ívo: Pejapysaka ha pehendu che ñe’ẽnguéra;

24 Peguerovia ha peñearrepenti umi pene angaipágui, ha peñemongarai Jesucristo rérape, Tupã Ra’y, jepeve ñande rukuéraicha, ha pehupytýta Espíritu Santo, opa mba’e ojehechauka hag̃ua peẽme; ha kóva ndapejapóiramo, oúta umi amaguasu pende ári; upevére, nohendúi hikuái.

25 Ha ombyasy Noé, ha ojejopy ikorasõ Ñandejára ojapohague yvypórape yvy ári, ha ndovy’ái ikorasõme.

26 Ha Ñandejára he’íkuri: Che ahundíta yvypóra ajapova’ekue yvy ape ári, yvypóra ha mymba, ha umi otyryrýva, ha guyrakuéra yvytugua; ombyasýgui Noé Che ajapohague umíva, ha che ajapohague chupekuéra; ha ha’e cherenóikuri; oipe’aségui hikuái chugui hekove.

27 Ha upéicha Noé ojuhúkuri grásia Tupã resa renondépe; Noé ha’éguikuri peteĩ kuimba’e ijojáva, ha hekoporãmbáva iñemoñarépe; ha ha’e oguatákuri Tupãndi, ha upéicha avei mbohapyve ita’ýra, Sem, Cam ha Jafet.

28 Pe yvy oñembyaipákuri Tupã renondépe, ha henyhẽ violénsiagui.

29 Ha Tupã omaña yvýre, ha, péina ápe, oñembyaipaitékuri, opa tete ombyaipágui yvy ári hape.

30 Ha Tupã he’i Noé-pe: Og̃uahẽma chéve g̃uarã opa tete ñembopaha, pe yvy henyhẽgui violénsiagui, ha péina ápe, Che ahundíta yvy árigui opa tete.