1 Ha Che, Tupã Ñandejára, añe’ẽkuri Moisés-pe, ha’évo: Pe Satana, nde remandava’ekuépe che Unihénito rérape, ha’e pe oĩva’ekue voi iñepyrũmby guive, ha pe ouva’ekue che renondépe he’ívo—Péina ápe, ko’ápe aime Che, chemondo chéve, che ha’éta nde ra’y, ha arredimíta opa yvypórape, ha noñehundimo’ãi ni peteĩ ánga, ha katuete ajapóta; upévare eme’ẽ chéve nde rerakuãporã.

2 Ha katu, péina ápe, che Ra’y Ahayhuetéva, ha’éva che Ahayhuetéva ha Aiporavova’ekue iñepyrũmby guive, he’i chéve: Túva, tojejapo ne rembipota, ha tanemba’e upe glória akoiete g̃uarã.

3 Upévare, Satana oñemoĩ rupi cherehe, ha ohundise yvypóra sãso oiporavo hag̃ua, che, Tupã Ñandejára, ame’ẽva’ekue chupe, ha avei oipota ame’ẽ chupe che pokatu tee; che aityukákuri chupe iguýpe, che Unihénito pokatu rupive;

4 Ha oiko chugui Satana, héẽ, jepeve upe aña, opa japu moñepyrũhare, ombotavyy ha ombohecha’ỹ hag̃ua yvypórape, ha ogueraha hag̃ua chupekuéra ñeñapytĩmbýpe ha’e oipotaháicha, jepe opa umi nohenduséivape che ñe’ẽpu.

5 Ha ko’ág̃a, pe mbói ikatupyryvékuri oimeraẽ mymba ñumeguágui, Che, Tupã Ñandejára ajapova’ekuégui.

6 Ha Satana omoĩkuri upéva upe mbói korasõme, (hetápe ha’e ogueraháguikuri hapykuéri,) ha oñeha’ã avei ombotavy Eva-pe, ha’e ndoikuaáigui Tupã akãmegua, upévare oñeha’ã ohundi múndo.

7 Ha ha’e he’i upe kuñáme: Héẽ, he’ípa’e Tupã—Ndere’umo’ãi opa yvotytygua yvyramátagui? (Ha ha’e oñe’ẽkuri pe mbói juru rupive).

8 Ha pe kuña he’i mbóipe: Ikatu ro’u umi yvyramata’a yvotytypeguágui;

9 Ha katu pe yvyramata’a rehechávare yvotyty mbytépe, Tupã he’íkuri—Ndere’umo’ãi kóvagui, ni nderepokomo’ãi hese, ani mba’e pemano.

10 Ha mbói he’i kuñáme: Añetehápe neremanomo’ãi;

11 Tupã oikuaágui ára pe’u vove upévagui, pejehesape’áta, ha ha’éta umi tupãicha, peikuaávo iporãva ha ivaíva.

12 Ha kuña ohechávo pe yvyramáta iporãha oje’u hag̃ua, ha ombovy’aha umi tesa, ha peteĩ yvyramáta ipotapýva omoarandu hag̃ua chupe, ojapyhy hi’águi ha ho’u, ha ome’ẽ avei iménape, ha ha’e ho’u hendive.

13 Ha mokõivéva ojesape’a, ha ohechakuaa hikuái ijopivoha hikuái. Ha ombovyvy igéra rogue ha ojapo delantal ijupe g̃uarã.

14 Ha ohendu hikuái Tupã Ñandejára ñe’ẽpu, oguatávo hikuái yvotytýre ára piro’ýpe; ha Adán ha hembireko oho okañy Tupã Ñandejára renondégui umi yvyramáta yvotytygua apytépe.

15 Ha Che, Tupã Ñandejára, ahenói Adán-pe ha ha’e chupe: Moõ reho?

16 Ha ha’e he’i: Ahendu ne ñe’ẽpu yvotytýpe ha akyhyje, ahechágui che opivoha, ha akañy.

17 Ha Che, Tupã Ñandejára, ha’e Adán-pe: Máva he’i ndéve ndeopivoha? Re’úpara’e yvyramáta Che amandava’ekuégui ndere’uiva’erãha, upéicharamo añetehápe remanotaha?

18 Ha pe kuimba’e he’i: Pe kuña nde reme’ẽva’ekue chéve, ha remandava’ekue opytava’erãha chendive, ome’ẽ chéve pe yvyramata’a ha che ha’u.

19 Ha Che, Tupã Ñandejára, ha’ékuri kuñáme: Mba’épa ko mba’e rejapova’ekue? Ha kuña ombohovái: Mbói chembotavy, ha che ha’u.

20 Ha Che, Tupã Ñandejára, ha’e mbóipe: Kóva rejapo haguére, neñe’ẽngáita opa mymba’aty ha opa ñumegua mymba ári; nde rye ári retyryrýta ha yvytimbo re’úta opa nde rekove aja;

21 Ha Che amoĩta jeja’e’ỹ nde ha kuña apytépe, ne ñemoñare ha iñemoñare apytépe; ha ha’e ohungáta ne akã ha nde rehungáta ipyta.

22 Kuñáme, Che, Tupã Ñandejára, ha’e: Tuicha ambohetáta ne ñembyasy nememby hag̃ua. Jepy’apýpe nemembýta umi mitã, ha ndepotapy ha’éta ne ménape g̃uarã, ha ha’e neisãmbyhýta;

23 Ha Adán-pe, Che, Tupã Ñandejára, ha’e: Rehendu haguére ne rembireko ñe’ẽpu, ha re’úgui upe yvyramata’a Che amandava’ekuégui ndéve, ha’évo—kóvagui ndere’umo’ãi, nde rupi oñemoñe’ẽngáita yvy; ñembyasýpe re’úta chugui opa reikove aja pukukue.

24 Umi ñuatĩ avei, ha karaguata omoheñóita ndéve, ha re’úta ñumegua ñana.

25 Nde syva ry’áire re’úta pe mbujape, rejevy jey peve yvýpe—añetehápe remanótagui—ichugui reñeguenohẽgui: yvytimbógui nde, ha yvytimbópe reho jeýta.

26 Ha Adán ohenói hembirekópe Eva, ha’e rupi ha’e opa oikovéva sy; upéicha Che, Tupã Ñandejára, ahenoiva’ekue peteĩhã opa kuña apytépe, hetáva hikuái.

27 Adán-pe g̃uarã ha avei hembirekópe g̃uarã, Che, Tupã Ñandejára, ajapókuri ao mymba pireguigua, ha amonde chupekuéra.

28 Ha Che, Tupã Ñandejára, ha’ékuri che Unihénitope: Péina ápe, pe kuimba’e ñandeichaguáma, oikuaávo iporãva ha ivaíva; ha ko’ág̃a, ani oipyso ijyva ha ho’u avei upe tekove yvyramátagui, ha ho’u ha oikove hikuái akoiete g̃uarã,

29 Upévare, Che, Tupã Ñandejára, aguenohẽta chupe pe Jardín de Edén-gui, oñemitỹ hag̃ua yvy ha’e oñeguenohẽ haguégui;

30 Che aikoveháicha, he’i Tupã Ñandejára, jepeve umi che ñe’ẽ ndopareimo’ãi, osẽháicha umíva che jurúgui, oñekumpliva’erã.

31 Upéicha Che amosẽ yvypórape, ha amoĩ Jardín de Edén kuarahyresẽme, keruvĩ ha peteĩ kysepuku hendypáva, ojeréva opárupi, oñongatu hag̃ua tekove yvyramáta rape.

32 (Ha ko’ãva ha’e umi ñe’ẽ Che ha’eva’ekue che rembiguái Moisés-pe, ha ko’ãva añetegua, jepeve Che aipotaháicha; ha Che ha’ékuri ndéve. Ehecháke ani rehechauka avavépe, ndaha’éirõ umi oguereviávape, Che amanda peve ndéve. Amén).