Ejapo iñimportantevéva
Ñamoĩvo Cristo-pe ñande rekove mbytépe, jajehovasáta mbarete espiritual, tory ha vy’a reheve.
Nda’aréi, che angirũ oñandúkuri ovisita hag̃ua peteĩ kuña i’barriogua. Ha’e oipe’ákuri ijehegui oñandúva, ndoikuaa porãigui chupe—na isentídoi ningo. Ha katu ou memégui chupe upe temiandu, odesidíkuri ojapo ispirasiõ oñandúva. Noñeñandu porãimagui voi pe visita ojapótavare, he’i ijupe ogueraháramo peteĩ mba’e upe hermana-pe ikatu ombovevúi ijepy’apy. Añetehápe ndaikatúikuri ohóvo po nandi! Upéicha, ojogua peteĩ eládo ryru ha oho omoñepyrũ upe ojepy’apývare ha’etaha visíta idegusto’ỹva.
Ombota pe kuña rokẽ, pya’e ombohovái pe hermana. Che angirũ ombohasa pe eládo peteĩ vosápe, ha oñepyrũ upe ñemongeta. Ndohasa pukúi che angirũ ohechakuaa mba’érepa oñeikotevẽra’e pe visíta. Oguapy aja hikuái pe óga renondépe, upe kuña oikuaauka heta desafío ombohovakevahína. Oñe’ẽ rire una hora puku, veráno akúpe, che angirũ ohecha pe eládo hykuhahína vosápe.
Ha’e osapukái, “ambyasyete, ha katu hykuhína nde eládo”!
Pe kuña kyrỹime ombohovái, “Oĩ porã! Che ndaikatúi ha’u laktósa!”
Peteĩ kerarechápe, Ñandejára he’i proféta Lehi-pe, “Rejehovasáva nde Lehi, umi mbaʼe rejapovaʼekue rehe”.1
Ha’évo Jesucristo discípulo, ojerureve ñeha’arõnte térã jegueroviáguinte. Ojerure ñeha’ã, ñemongue’e ha kompromíso. Oikotevẽ jajapo peteĩ mba’e, ha’évo, “ñe’ẽ apoha, ha ndaha’éi ohendúnteva”.2
Pe eládo hukývape, mba’épa imba’eguasuve? Pe eládo? Térã che angirũ ojapohague peteĩ mba’e?
Arekókuri tembiasakue he’ẽva peteĩ mujer jónven-ndi añetehápe oporandu’akue: “Hermana Craven, mba’éicha reikuaa añeteguaha peteĩ mba’e Tupao-pegua? Che ningo nañandúi mba’eve”.
Ambohovái pya’e mboyve, che aporandu raẽ chupe. “Eremi chéve nde estudio personal escritura-guigua”.
Ha’e ombohovái, “Che namoñe’ẽi umi escritura”.
Che aporandu,“Ha nde rogayguakuéra? Pestudiápa Eju, Chesegí oñondive?”
Ha’e he’i, “Nahániri”.
Aporandu iñembo’ekuérare, “Mba’e reñandu reñembo’e jave?”
Ha’e ombohovái: “Che nañembo’éi”.
Che ñembohovái ndahasýikuri: “Reikuaaséramo oimeraẽ mba’e, rejapova’erã peteĩ mba’e”.
Na añetéipa kóva oimeraẽ mba’e na’aprendese térã jaikuaasévape? Ainvita che angirũ pyahúpe toñepyrũ tojapo Jesucristo Evanhélio: oñembo’évo, ostudia, oservi ambuekuéra, ha ojeroviávo Ñandejárare. Konversiõ ndoumo’ãi mba’eve jajapo ỹre. Ou Espíritu Santo pu’aka rupive, jajapóramo ñeha’ã jaikuaase añetégui, ñaporandu, jaheka, ha ñahenóivo. Ou jajapo rupi.3
Doctrina ha Konveniokuérape Ñandejára he’i jepi, “mba’eve’ỹ ningo”.4 Chemopy’mongeta, oĩramo umi mba’e naimba’eguasúiva, térã mba’e’ivéva, oiméne oĩ umi mba’e iñimportantevéva. Ñañeha’ãvo jajapo peteĩ mba’e, térã oimeraẽ mba’e, ñañeporanduva’erã, “Mba’épa iñimportanteve”?
Umi omba’evendeséva py’ỹinte oiporu ñe’ẽ he’íva “Tekotevẽterei” térã “Eguerekova’erã”, oha’arõvo jaguerovia umi mba’e ovendéva tekotevẽha javy’a térã ñeimeporã hag̃ua. Ha katu tekotevẽpa añetehápe umi ovendéva? Jaguerekova’erãpa añetehápe umíva? Imba’guasúpa añetehápe?
Kóina temimo’ã jahechami hag̃ua. Mba’épa pe imba’eguasuvéva?
-
Mboy “me gústa” jahypyty red social-pe ñamoĩvare? Térã mboýpa ñande rayhu ha ñande valora ñande Ru Yvagapegua?
-
Jaiporu umi ao oĩvahína módape? Térã jehechauka rrespéto ñande retére ñañemonde deséntevo?
-
Jajuhu ñembohovái internet-pe jeheka rupi? Térã jahupyty ñembohovái Tupãgui, Espíritu Santo rupi?
-
Jaipotavépa? Térã javy’a pe mba’e oñeme’ẽvare ñandéve?
Presidente Russell M. Nelson ombo’e:
“Espíritu Santo reheve pene irũramo, ikatu pehecha porã umi celebrida cultura rupive, ohungava’ekue ñande socieda. Ikatu peneakãporãve ñemoñareaty mboyveguakuéra araka’eve ha’e haguéichagui. …
“Pemoĩ peteĩ modélo múndo rembyrépe g̃uarã”!5
Tekotevẽ ñeha’ã mbarete ñaime hag̃ua enfokádo upe añetehápe tekotevẽvare peteĩ vy’a pukurã. Mba’eve ombovy’ave Satanáme japerdégui ñande valor eterno, ñande reraháva jeperde tiempo porãite, talénto, térã mbarete espiritual umi imba’eguasu’ỹvape. Ainvita opa ñandekuérape, ñembo’épe jahechami umi mba’e ñande distraéva jajapo hag̃ua imba’eguasuvéva.
Ore familia ijedavéva, tercer grado-gua mbo’ehára, ombo’ékuri i-clásepe “pemanda pende apytu’ũre” Ha’ékuri ñemomandu’a hemimbo’ekuérape orekoha hikuái kontrol iñakãmeguáre, ha upévare ikatuha okontrola umi ojapóva. Che mandu’a chejehe “amandávoguareche apytu’ũme”, ajejuhúvo ahareihahína umi mba’e naimba’eguasúiva gotyo.
Nda’aréi colegio-gua estudiante he’íkuri chéve ipopularha Tupaogua huventu apytépe noñepenái mandamiento-kuére oñe’planeágui oñearrentitaha upéi. “Peteĩ mba’e nemoherakuã porãva” he’íkuri chéve. Añetehápe Ñandejára operdona meméta umi oñearrepenti mirĩvape “añetehápe”.6 Ha katu, Salvador Expiasiõ poriahuvereko araka’eve ndojeiporuiva’erã ñembohorýicha. Jaikuaa ovecha kañymbyre parávola. Jaikuaa ningo pe ovecha rerekua ohejataha 99 ovecha ojuhu hag̃ua pe osẽva’ekue. Ha katu ikatúpa peimo’ã vy’a oguerúva Ovecharerekua Mba’eporãme umi oiporavóva ha’e hag̃ua pe 99? Umi ojoajúva ha oñopytỹvõva ovivi ikonveniokuéra? Ikatúpa pehecha mba’éichata pe múndo térã pende colégio, térã pende trabajo, térã pende rogapy, ñe’ẽrendu ha’éramo mba’e ipopularvéva? Ndaha’éi jajapo porãmbáre ko tekovépe—ha’e jajuhúre vy’a jajapo aja iporãveháicha javivi hag̃ua konveniokuéra jajapova’ekue Ñandejárandi.
Múndo ohechaukavévo dúda Tupã rehe, ha moapañuãi ha jejopy hetavévape, kóva ha’e ára ñañemoag̃ui hag̃ua pe profétare. Ha’égui pe Ñandejára-re oñe’ẽva, ikatu jajerovia pe ha’e he’ijeyjeýva, oñemoñe’ẽva ha ojerurévare jajapo hag̃ua umi mba’e iñimportanvéva.
Hasýramo jepe, akóinte oĩ mba’éicha jajapokuaa oĩporãva. Oñe’ẽ aja peteĩ angirũnguéra atýndi escuela-pe, peteĩ mujer jóven oñandu ikorasõ hasy upe ñemongeta ojerévo Tupao norma-re ñeñe’ẽvaípe. Ohechákuri ndaikatuiha okirirĩ—ojapova’erã peteĩ mba’e. Rrespétope, oñe’ẽ Túva Yvagagua mborayhúre ha mba’éicha tembiapoukapykuéra Ha’e omoĩ’akue ha’eha ohovasa ha omo’ã hag̃ua Ita’yrakuérape. Hasy’ỹvétakuri chupe ndojapóinte hag̃ua mba’eve. Ha katu mba’épa imba’eguasuve? Jajehe’a pe multitúre? Térã ñañembo’y Tupã testígoramo “opa ára, opa mba’épe ha opa tendápe”?7
Jesucristo Tupao rrestaurádo osẽtarõ pytũmbýgui, ñande ñasẽva’erã pytũmbýgui. Kuñanguéra konvenio-oñongatúvaramo, ojajaiva’erã ñane evanhélio resape opa múndore, ñañemotenonde ha jajedestaka rupive. Kóva jajapo oñondivepa Tupã rajýicha—8.2 millón kuña 11 ha hetave edagua mbaratekue, hembiapo peteĩchapáva. Ñambyaty Israel, jaikévo salvasiõ ha exaltasiõ rembiapópe: ñañeha’ãvo javivi Jesucristo evanhélio, ñañangareko ambue oikotevẽvare, ñainvita opavave omog̃uahẽ hag̃ua pe evanhélio ha ñambojoaju familia-kuéra ára apyra’ỹre.8 Jesucristo evanhélio ha’e evanhélio jeku’e ha vy’a rehegua! Ani jajapo’i ñande katupyry jajapo hag̃ua ko’ã mba’e imba’eguasuvéva. Ñande lagádo divíno ome’ẽ ñandéve py’aguasu ha jerovia jajapo ha oiko ñandehegui opa ñande Ru Yvagapegua oikuaáva ñande ikatuha.
Mujeres jóvenes lema ko añogua ha’e Provérbios 3:5-6:
“Ejerovia Ñandejárare nde py’aite guive, ha ani ndejehe añónte.
“Ehechakuaa chupe opaite nde rapépe, ha ha’e ombojojáta nde guataha”.
Peteĩ mba’e kláve jajerovia Ñandejárare ha’e ñañemotenonde, jaroviávo Ha’e ñanemboguatataha, ndajarekóiramo jepe opa mbohovái.
Hermana-kuéra, ndaha’éi eládo rehe. Ha ndaha’éi jajapove rehe. Ha’e jajapo rehe pe imba’eguasuvéva. Ha’e ñamoĩ Cristo doctrina ñande rekovépe, ñañeha’ãvo jajoguave Chupe.
Jajapovévo ñaime hag̃ua ñemovã’ỹme konvénio rapépe, ñande jerovia Jesucristo-re okakuaavéta. Okakuaavévo ñande jerovia, ñañearrepentivéta. Ha ñañearrepentivévo, ñamombaretevéta ñande rrelasiõ konvénio rehegua Tupãndi. Upe rrelasiõ konvénio rehegua ñandegueraha tómplope, témplopegua konveniokuérare ñeñongatu, ha’e rupi mba’éicha jagueropu’aka ipahaite peve.
Ñamoĩramo Jesucristo ñande rekove mbytépe, ñañemboguatáta jajapo hag̃ua upe imba’eguasuvéva. Ha jajehovasáta mbarete espiritual, tory ha vy’a reheve! Jesucristo rérape, Amén.