Ñane korasõite guie
Jaipotárõ pe Salvador ñanemopu’ã yvága gotyo, upéicharõ ñane kompromíso Hendive ha Iñevanhéliore ndaikatúi casual ni sapy’apy’aguánte.
Peteĩ ofrenda Chupe ĝuarã
Pokã ára oikuave’ẽ mboyve Hekove ñanderehe, Jesucristo oĩkuri Jerusalén templo-pe, omaña hína hentekuéra ome’ẽvo idonasiõ templo mba’erepykuéra atýpe. “Heta ipirapire hetáva oity heta”, ha katu upérõ oĝuahẽ peteĩ viuda mboriahu “ha ha’e oity mokõi blanca”. Upéva pokãiterei, ndovaléi voi la pena ojerregistra.
Upevére, upe donasiõ vale’ỹvaicha ohenói pe Salvador atención. Añetehápe, opoko pypukuete Hese “Ha ha’e ohenói idiscipulokuérape, ha he’i chupekuéra, Añetehápe ha’e peẽme, ko viúda mboriahumi hetaiteve oity, opa umi oityva’ekuégui ko arca-pe:
“Umíva oitýguikuri imba’ehetágui; ha katu ha’e, hembipotágui, oitypaite orekomíva, jepe opa hekoverã.”1
Upe jehechakuaa isencíllova reheve, pe Salvador ñanembo’e mba’éichapa oñemedi Irréinope umi ofrenda—ha idiferente’ite ñamediháichagui jepi umi mba’e. Ñandejárape ĝuarã, pe donasiõ valor noñemedíri efecto orekóvare pe mba’erepy atýpe, ha katu efecto orekóvare pe ome’ẽva korasõme.
Omomba’eguasúvo pe viuda hekojojávape, pe Salvador ome’ẽ ñandéve peteĩ modélo ñamedi haĝua ñande discipulado opa ijehechaukaitápe. Jesús ombo’e ñane ofrenda ikatu tuicha térã michĩ, ha katu opáichane ha’eva’erã opaite ñane korasõ reheve.
Ko principio ojehecha Amalekí, Mormón kuatiañe’ẽgua proféta, jerure’asýpe: peju Cristo-pe, haʼéva Israel-pegua Imarangatúva, ha peike isalvasiõme ha pe irredensiõ puʼakápe. Heẽ, peju hendápe, ha peikuaveʼẽmbaite chupe pene ánga temikuaveʼẽramo.”2
Ha katu ¿mba’éicha ikatukuaa upéva? Heta ñandéve ĝuarã, upe kompromiso modélo “opaite ñane ánga reheve” ndaikatúivaicha ojehupyty. Jajeipyso pererĩma voi. ¿Mba’éicha ikatu ñambojoja umi heta mba’e tekove odemandáva ñane ñeikuave’ẽsembaite ñane ánga Ñandejárape rehe?
Ikatu ñande desafio ha’e ñapensaha ñembojoja he’iseha jadividi joja ñane tiempo umi interés oñoha’ãva apytépe. Upéicha ñamañárõ, ñane kompromiso Jesucristo ndive ha’eva’erã peteĩ umi heta mba’e apytépe tekotevẽva oike ñane rembiapoita apytépe. Ha katu ñamañakuaa ambuéicha.
Equilibrio: Ojeikoháicha bicicleta ári
Che rembireko Harriet ha chéve oregustaiterei roiko bicicleta ári oñondive. Ha’e peteĩ manera hechapyrãva rojapo haĝua ehersisio’imi ha avei rohasa haĝua tiempo oñondie. Roiko aja, ha ndaha’éi ajapuraitereíva, roguerovy’a ko mundo porãite oĩva ore jerére ha jepeve roñemongeta kyre’ỹ. Rara ves rojesarekova’erã romantene haĝua ore equilibrio ore bicicleta ári. Roiko hetaporãma ha natekotevẽi ni ropensa upévare, oikóma naturalmente oréve ĝuarã.
Ha katu ahechávo peteĩ mávape oikokuaa ramóva hina bicicleta ári, chemomandu’a hasyha ñamantene pe equilibrio umi mokõi rueda po’i ári. Tekotevẽ tiempo. Ha tekotevẽ práctika Tekotevẽ paciencia Jepe tekotevẽ ja’a peteĩ térã mokõi jave.
Opa mba’e ári, umi omantenekuaáva pe equilibrio bicicleta ári oikuaa ko’ã momarandu guasu:
Ani remaña nde pýre.
Emaña tenode gotyo.
Ani reipe’a nde resa tape ne renonderãgui. Eñekonsentra nde destino-pe. Ha epedalea meme. Equilibrio ñemantene ojehupyty ojehóvo tenonde gotyo.
Upeichagua principio-kuéra ojeipuru ojehupytysévo equilibrio ñande rekovépe Jesucristo discípulo ramo. Mba’eichapa ñame’ẽ pe tiempo ha mbaretekue umi heta tembiapo apytépe ovariáta peteĩ persona ambuévagui ha peteĩ tekove epókagui ambuévape. Ha katu ñande objetivo común ha general ha’e jasegi Jesucristo ñane Mbo’ehára rape, ha jaha jey ñande Ru Yvagagua jahayhuetéva rendápe. Ko objetivo opytáva’erã oku’e’ỹ ha oñemova’ỹme, taha’e ha’e mávapa ñande ha mba’épa oiko hína ñande rekovépe.3
Ñepu’ã: oñembovevérõguáicha peteĩ aviõ.
Ko’áĝa, umi ha’éva ciclista katupyrýpe ĝuarã, ñakomparávo discipulado bicicleta-pe jeiko rehe oĩporãiterei. Umi ndaha’éivape ĝuarã, ani pejepy’apy. Areko ambue analogia aime seguro opavave kuimba’e, kuña ha mitã ikatúvare oñeidentifika.
Pe discipulado, hetave mba’éicha ko tekovegua, ikatu avei oñekompara aviõ ñemboveve rehe.
¿Pepyta piko araka’eve pepensa haĝua hechapyrãitépa peteĩ aviõ orekóva pasaherokuéra ikatuha ojei yvýgui ha oveve? ¿Mba’épa upe ojapóva ko’ã mákina ovevéva tojupi elegantemente yvága rupi ohasávo mar ha continente-kuéra ári?
Pokã ñe’ẽme, peteĩ aviõ oveve aire omýirõnte ipepokuéra ári . Upe ñemomýi ojapo diferencia aire presión-pe omopu’ãva pe aviõ. ¿Ha mba’éicha ojehupyty aire oñemomýiva umi pepo ári iporãmava ojapo haĝua pe ñepu’ã? Ñembohovái ha’e jeho tenonde gotyo.
Pe aviõ ndohupytýi yvatekue oguapývo pe pístape. Jepe peteĩ yvytu atã árape, pe ñepu’ã ndoikói pe aviõ ndohóirõ tenonde gotyo, hatãporã ogueropu’aka haĝuaicha umi mbarete ojokóva chupe.
Pe impulso tenonde gotyo omanteneháicha peteĩ bicicleta en equilibrio ha toiko joja, upéicha avei tenonde gotyo jeho ojapo peteĩ aviõ tovense fuerza de gravedad ha arrastre.
¿Mba’e he’ise upéva ñandéve ĝuarã Jesucristo discípulo ramo? He’ise jahupytyséramo equilibrio ñande rekovépe, ha jaipotárõ pe Salvador ñanemopu’ã yvága gotyo, upéicharõ ñane kompromíso Hendive ha Iñevanhéliore ndaikatúi casual ni sapy’apy’aguante. Upe viuda-icha Jerusalén-pe, ñame’ẽva’erã Chupe opaite ñane ánga. Ñande ofrenda ikatu michĩ, ha katu oúva’erã ñane korasõ ha ángagui.
Ha’évo Jesucristo discípulo ndaha’éinte peteĩva umi heta mba’e jajapóva apytépe. Pe Salvador ha’e pe pu’aka ñanemokyre’ỹva oĩva opa jajapóva rapykuéri. Ha’e ndaha’éi peteĩ parada japytu’u haĝua ñande je’óipe. Ha’e ndaha’éi peteĩ paisahe ñamaña haĝua, ni siquiera peteĩ markador oñemomba’eguasúva. Ha’e ningo “hína upe tape, upe añetegua ha upe tekovete. Avave yvypóra ikatu oĝuahẽ Túva rendápe ndaha’éirõ [Jesucristo] rupi mante.”4 Upéva ha’e pe tape ha ñande supremo destino.
Equilibrio ha ñepu’ã oĝuahẽ “[ña]ñemotenondé[vo] ñemovãʼỹme Cristo-pe, [ja]guerekóvo peteĩ ñehaʼarõporã mimbi, ha mborayhu Tupãre ha mayma yvypórare. ”.5
Sacrificio ha konsagrasiõ
¿Ha mba’éiko oiko umi heta tembiaporã ha responsabilidágui ojapóva ñande rekove tahempiapoite? Tiempo jehasa ñanemborayhukuéra ndie, escuela-pe jeho térã ñembosako’i empleo-rã, familia-re ñeñangareko, comunidad-pe jeservi, ¿mo’õpa ijapa umi mba’e? Pe Salvador ñanembopy’aguapy:
“Pende Ru yvagapegua oikuaágui peikotevẽha opa koʼã mbaʼe.
“Ha katu peheka raẽve Tupã rréino ha hekojoja, ha opa koʼã mbaʼe oñemeʼẽta peẽme.”6
Ha katu upéva nde’iséi ndahasyiha.7 Oikotevẽ mkõivéva, sacrificio ha konsagrasiõ.
Oĩ umi mba’e oikotevẽva oñemboykeha ambuekuéra katu tokakuaa.
Sacrificio ha konsagrasiõ mokõi yvagagua léi jajapóva konvénio santo templo-pe ñañongatutaha. Ko’ã mokõi léi ojojogua ha katu ndaha’éi idéntica. Sacrificar he’ise oñemboyke peteĩ mba’e ambue mba’e ovalevévare. Yma, Tupã tavayguakuéra osacrifica umi irrebañokuéra primogénito pe Mesías oútava honor-pe. Historia pukukue, umi Santo hekojojáva osacrifica tembipota personal, comodidad ha jepe hekovekuéra pe Salvador rehe.
Opavave ñande jareko umi mba’e, tuicha ha michĩva, jasacrifikava’erã jasegive haĝua Jesucristo-pe.8 Ñande sacrificio-kuéra ohechauka mba’épa ovale añetéva ñandéve ĝuarã. Umi sacrificio isagrádo ha Ñandejára omomorã umíva.9
Kosagrasiõ idiferente sacrificio-gui a lo meno peteĩ mba’e guasúpe. Ñakonsagrávo peteĩ mba’e, ndajahejái oñekonsumi altar ári. Uvei, ñamoĩ Ñandejára servicio-pe. Jadedika Chupe ha umi Ipropósito marangatúpe.10 Upéva diferencia entre ñañotỹ ñane talento térã ñambokakuaa tuicha, ñaipytyvõ porãve haĝua Ñandejára rréino ñemopu’ãme.11
Pokãme ñande apytépe ojejeruréne tajasakrifica ñande rekove pe Salvador rehe. Ha katu opavavépe ñaneinvita ñakonsagra haĝua ñande rekove Chupe.
Peteĩ tembiapo, peteĩ vy’apavẽ, peteĩ propósito.
Ñañeha’ãvo ñamopotĩporã ñande rekove ha ñamaña Cristo-re opa pensamiento-pe, 12 opa ambue mba’e oñepyrũ oñealinea. Tekove ndojoguavéima peteĩ lista puku ñeha’ã separado-gui jajapóva peteĩ equilibrio pererĩme.
Tiempo ohasávo, opa mba’e ha’e peteĩ tembiapo añónte.
Peteĩ vy’apavẽ
Peteĩ propósito marangatu.
Ha’e pe tembiapo jahayhu ha jaservi haĝuaTupãme. Ha’e jahayhu ha jaservi Tupã ta’yrakuérape.13
Ñamañávo ñande rekove ha jahecha cien mba’ekuéra jajapova’erã, ñandepy’aropu. Jahechárõ peteĩ mba’e —jahayhu ha jaservi Tupã ha Ita’yrakuérape, cien diferente manérape — upéicharõ ñamba’apokuaa umi mba’épe vy’a reheve.
Upéicha ha’e ikatuháicha ñaikuave’ẽ opaite ñane ánga, jasacrifikávo oimeraẽ mba’e ñandejokóva hína ha ñakonsagra upe opytáva Ñandejára ha Ipropositokuérape.
Peteĩ ñemokyre’ỹ ñe’ẽ ha testimonio
Che hermano ha hermana ha angirũnguéra pohayhuetéva oĩta ára pejaposevehápe. Pende Ru Yvagagua penderayhuetéva oikuaa mene korasõ. Ha’e oikuaa ndaikatuiha pejapo opa mba’e pene korasõ oipotáva pejapo. Ha katu pehayhu ha peservikuaa Tupãme. Ikatu pejapo porãve peñongatúvo Hembiapoukapykuéra. Pehayhu ha peservikuaa Ita’yrakuérape. Pene ñeha’ã opurifika pene korasõ ha penembosako’i peteĩ futuro glorioso-rã.
Upéva ha’e pe viuda templo mba’ehepy atýpe oentendévaicha. Oiméne oikuaa iñofrénda nomoambuemo’ãiha Israel po’a, ha katu omoambuekuaa ha ohovasakuaa chupe, ha’égui upéva, michĩrõ jepe, opa ha’e orekomíva.
Upéicha che angirũnguéra pohayhuéteva ha che consiervo Jesucristo discípulo ramo, ani ñanekane’õ “jajapohaguére iporãva”, [ña]moĩgui hína “peteĩ tuicha tembiapo pyendakuéra”. Ha umi mba’e michĩvagui oúta “umi tuicha mba’e”14
Atestifika kóva añetegua, ha avei atestifika Jesucristo ha’eha ñane Maestro, ñane Redentor ha ñande úniko tape jaha jey haĝua ñande Ru Yvagagua jahayhuetévape. Jesucristo réra sagrado-pe. Amén.