Servicio misional ohovasa che rekove tapiaite ĝuarã
Añembo’e peẽ, mitãkuimba’e ha mitãkuñanguéra, ha pende tuvakuéra, tapehecha ha peikuaa mba’éichapa servicio misional ohovasáta pende rekove tapiaite ĝuarã.
Aguije presidente Nelson rekomparti jeyhaguére pe tekombo’e servicio misional rehegua.
Hermano ha hermanakuéra, ojapo heta ary, añe’ẽ aja conferencia general-pe, che resa izquierdo jehecha oñembyai sapy’a peteĩ mba’e hérava degeneración macular rupi, upeguive ivaive ohóvo ha chereja ahecha’ỹre upe tesa reheve.
Ambohovakévo ko desafio, cheaguijevete ambueichagua visiõ rehe, jepe pe visiõ retrospectivo. Amañávo tapykué gotyo, ahechakuaa tembiasakue ojapóva’ekue peteĩ tuicha diferencia. Peteĩ umi tembiasakue ha’e mba’éichapa che servicio misional de tiempo completo che mitãkaria’yrõguare Inglaterra-pe ohovasa ha omoldea che destíno espiritual.
Ajepy’amongeta mba’éichapa umi desafio económico ouva’ekue pe Depresión Guasu reheve ogueraha che tuvakuéra ha ore familia-pe peteĩ cambio naiporãmbáivape. Che ru oñeinvolukraiterei osalva haĝua iconcesionaria de auto ha oipytyv͂õ haĝua peteĩ familia upe époka hasývape ha upévare peteĩ tiempo aja che tuvakuéra ndohovéi tupaópe.
Ndorohóirõ jepe tupaópe familia-icha, upéva ndachejokói aha haĝua sapy’ánte che angirũnguéra ndie.
Umi árape, misiõme jeho oĩ che akãme, ha katu nañe’ẽi umívagui che tuvakuéra ndie.
Aha aja universidad-pe, heta che angirũ ha che rodesidi roservitaha peteĩ misiõ. Avisitávo che obispo-pe, amyanyhẽ che solicitud misional che tuvakuéra noĩri aja ciudad-pe. Ha’ekuéra ou jey vove, asorprende chupekuéra noticia reheve añehenói hague aservi haĝua peteĩ misiõ Gran Bretaña-pe. Cheaguijeterei chepytyvõ kyre’ỹ haguére hikuái upe desisiõme ha umi che angirũ guenoitére chepytyvõva’ekue adesidi haĝua aservi.
Che servicio misional chembosako’i ha’e haĝua ména ha túva porãve ha ajapo porã haĝua negocio-kuérape. Chembosako’i avei aservi haĝua Ñandejárape Itupaópe opa che rekove pukukue.
Conferencia General Abril 1985-pe, ojejerure chéve añe’ẽ haĝua sacerdocio sesiõme. Añe’ẽ mitãkaria’ykuérape. Añe’ẽ ñembosako’i rehe oservi haĝua misionero-icha. Ha’e chupekuéra: “ Opaite capacitación arresiviva’ekuégui che asignación-kuéra tupaópe, ni peteĩ iñimportanteve chéve ĝuarã capacitación arresiviva’ekuégui peteĩ elder de diecinueve áño ramo oservíva hína peteĩ misiõ de tiempo completo.”1
Ñandejára pendekuaa. Peservívo hína pene misiõme, peguerekóta tembiasa penepytyvõtava peikuaa porãve haĝua Chupe. Pekakuaáta espiritualmente peservívo Chupe. Hérape peñemboúta peservi haĝua ambuekuérape. Ha’e ome’ẽta peẽme experiencia Espiritu Santo ñe’ẽmbegue reheve. Ñandejára ome’ẽta peẽme autorida pembo’e haĝua Hérape. Pehechaukakuaa Chupe Ha’e ojerovia ha ojekokuaaha penderehe.
Ojapo cinco mese-nte, élder Jeffrey R. Holland ha élder Quentin L. Cook, oserviva’ekue avei misionero ramo Islas Británicas-pe, ojoaju chendie rovisita haĝua miembro ha misionerokuéra upe tetã porãitéme. Aĩ aja upépe, ajepy’amongeta che rembiasakuére peteĩ misionero ramo. Atestifika che misiõ ha’e aikuaahaguépe che Ru Yvagagua ha che Salvador, Jesucristo, cheikuaa ha cherayhuha.
Ajehovasa mokõi presidente de misiõ hechapyrãitéva reheve Selvoy J. Boyer ha Stayner Richards, idedikáda compañera-kuéra ndie, Gladys Boyer ha Jane Richards. Amañávo tapykue gotyo ahecha hesakã porã ojeroviahague cherehe hikuái ha cherayhuhague. Ha’ekuéra chembo’e pe evanhélio. Oha’arõ heta chehegui. Ome’ẽkuri chéve hikuái heta asignación hasýva ha liderazgo responsabilida chepytyvõ haĝua akakuaa ha añembosako’i haĝua peteĩ tekove de servicio-pe ĝuarã.
Ajepy’amongeta avei presidente Spencer W. Kimball cherenoirõguare apresidi haĝua Canada Toronto Misiõ che rembireko ahayhuetéva Barbara ndie ha ore ta’yrakuéra ore ykére. Presidente Kimball orerenói roservi haĝua Abril 1974-pe, nda’arei’imi ome’ẽ rire imensáhe misional inspirado ojetituláva “Cuando el mundo se convierta.”2 Upe mensáhepe, Presidente Kimball omohesakã ivisiõ mba’éichapa ojeguerahataha pe evanhélio opaite mundo-pe. Oñenói hetave misionerokuéra opa ko mundo jeréregui. Ha’e oremomandu’a Ñandejára expectatíva “opa tekove… tomopuʼã amonestasiõ ñeʼẽpu umi yvy ári oikovévape.”3 Presidente Kimball rekombo’e expectativágui mitãkaria’ykuéra oserviva’erãha peteĩ misiõ ha’ékuri téma ñemongetarã ogakuérape opa múndope. Upe expectativa noñemoambuéi. Cheaguije presidente Russell M. Nelson avei omoañete haguére ko pyharevépe upe Ñandejára expectativa.
Ohasáma haimete 10 áño presidente Thomas S. Monson oanunsiahague oguejyha edad misional mitãkuimba’e ha mitãkuñanguérape ĝuarã.4 Chéve ĝuarã, peteĩ principal mba’érepa upe cambio-gui ha’ékuri oñeme’ẽ haĝua hetave ñane mitãrukuérape oportunidad oservi haĝua misionero ramo.
Ñandejára Jesucristo Apóstol ramo, ko’áĝa pohenói peẽme mitãkaria’y, ha umi mitãkuñame oserviséva peteĩ misiõ, tapeñepyrũ ko’áĝaite peñe’ẽ pende tuvakuéra ndie peserviseha peteĩ misiõ. Avei poinvita peñe’ẽ haĝua pene angirũnguéra ndie misiõ jeservi rehe, ha peteĩ pene angirũ noĩriramo seguro oserviseha, pemokyre’ỹ oñe’ẽ haĝua ijobispo ndie.
Peñekompromete penendie ha pende Ru Yvagagua ndie peservitaha peteĩ misiõ ha ko’áĝa guive peñeha’ãtaha pereko pene korasõ, po ha apytu’ũ potĩ ha digno. Poinvita pehupyty haĝua peteĩ testimonio firme Jesucristo evanhélio rrestaurádogui.
Ko’ã mitãrusu hechapyrãva túva ha sykuéra, peẽ pereko peteĩ función vital ko ñembosako’i proceso-pe. Peñepyrũ ko áraitépe peñe’ẽ pende ta’yrakuéra ndie servicio misional-gui. Jaikuaa familia ha’eha influencia tuichavéva oñeipytyvõ haĝua ñane mitãkuimba’e ha mitãkuñanguéra oñembosako’i haĝua.
Peimerõ gueteri servicio misional rango de edad-pe, ha katu ndapeservíri gueteri pandemia térã ambue mba’ére rupi, poinvita peservi haĝua ko’áĝa. Peñe’ẽ pende obispo ndie ha peñembosako’i peservi haĝua Ñandejárape.
Pomokyre’ỹ peẽme obispo-kuéra, peipytyvõ haĝua opavave mitãkuimba’e ha mitãkuña hi’aĝuiva edad misional-re toñembosako’i oservi haĝua, ha avei pomokyre’ỹ peẽme obispo-kuéra pehechakuaa haĝua umi ika’arúmava ha katu ne’ĩrã gueteri oservi. Peinvita peteĩ teĩ mitãrusúpe oñekonverti haĝua misionero-pe, upeicha avei mitãkuñanguéra oserviséva.
Peẽme ha’éva hína misionero ko’áĝa, rome’ẽ aguije pe͂eme. Pene misiõ ha’ékuri peteĩ pandemia mundial aja. Resultado ramo, pende experiencia misiõme idiferente che experienciagui che misiõme térã oimeraẽ misionero experiencia oservíva’ekue 2020 mboyve. Aikuaa hasy’imiha. Ha katu jepe ko’ã áry hasýva jave, Ñandejára oreko peteĩ tembiapo peẽme ĝuarã ha peẽ pejapo porãiterei. Por ehémplo, peipuru pe tecnología manera pyahúpe pejuhu haĝua umi oĩvape listo oaprende haĝua Jesucristo evahélio rrestaurado. Peservívo jesarekópe ha pendekatupyryháicha, aikuaa Ñandejára ovy’aha pene ñeha’a reheve. Aikuaa pende servicio ojohasáta pende rekove.
Penemandu’áke pejerreleva vove, ndapejerrelevai tupao actividad-gui. Peñemopu’ã umi jepokuaa porã ári pehupytyva’ekue misiõme, pemombarete meme pende testimonio, pemba’apo hatã, peñembo’e ha peneñe’ẽrendu Ñandejárare. Pe’onrra konveniokuéra pejapova’ekue. Pehovasa ha peservi meme ambuekuérape.
Añembo’e peẽ, mitãkuimba’e ha mitãkuñanguéra, ha pende tuvakuéra, tapehecha ha peikuaa mba’éichapa servicio misional ohovasáta pende rekove tapiaite ĝuarã. Tapeikuaa pene akãme ha tapeñandu pene korasõme pu’aka oĩva Ñandejára invitasiõme umi tuicha misionero Mosíah ta’yrakuérape. Ha’e he’i: “ha katu pehaʼarõkuaáta pyʼaporãme ha jehasaʼasykuérape, pemeʼẽ hag̃ua chupekuéra techapyrã porã chéve g̃uarã; ha ajapóta pendehegui tembiporu che pópe, heta ánga ojesalva hag̃ua.”5
Tupã tohovasa tupaogua mitãrusukuérape oñembosako’i ha oservise haĝua Chupe, añembo’e asy ko pyharevépe Ñandejára Jesucristo réra sagrado-pe. Amén.