សេចក្ដីសុខសាន្ដផ្ទាល់ខ្លួននៅក្នុងគ្រាលំបាក
ការស្វែងរកសេចក្ដីសុខសាន្ដផ្ទាល់ខ្លួន ពុំធ្លាប់សំខាន់ខ្លាំងដូចពេលនេះទេ ។
ថ្មីៗនេះ ខ្ញុំត្រូវបានចាត់តាំងឲ្យឧទ្ទិសកន្លែងប្រវត្តិសាស្ដ្រមួយកន្លែងនៅក្រុងណៅវូ ។ ផ្នែកមួយនៃការចាត់តាំងនេះ គឺខ្ញុំអាចទៅទស្សនកិច្ចគុកលិបើទីរដ្ឋមិសសួរី ។ កាលខ្ញុំដើរមើលគុកនោះ ខ្ញុំបានគិតអំពីព្រឹត្តិការណ៍ ដែលវាជាផ្នែកមួយដ៏សំខាន់នៃប្រវត្តិសាសនាចក្រ ។ ជីវិតរបស់ពួកបរិសុទ្ធបានត្រូវគំរាមកំហែង ដោយសារបញ្ញត្តិ ដែលបានចេញដោយអភិបាលនៃរដ្ឋមិសសួរីឲ្យកម្ចាត់ពួកគេចោល ។ លើសពីនេះ ព្យាការី យ៉ូសែប ស៊្មីធ និងសហការីជម្រើសពីរបីនាក់បានជាប់គុកនៅក្នុងគុកលិបើទីទាំងអយុត្តិធម៌ ។ មូលហេតុមួយនៃការប្រឆាំងយ៉ាងហិង្សាមកលើសមាជិករបស់យើង គឺដោយសារសមាជិកភាគច្រើនប្រឆាំងនឹងសេវកភាព ។ ១ ការបៀតបៀនដ៏ខ្លាំងទៅលើយ៉ូសែប ស៊្មីធ និងអ្នកដើរតាមលោក គឺជាឧទាហរណ៍ដ៏ធំមួយអំពីការអនុវត្តសិទ្ធិជ្រើសរើសមិនសុចរិត ដែលអាចមានឥទ្ធិពលទៅលើមនុស្សសុចរិត ។ ពេលវេលារបស់យ៉ូសែបនៅក្នុងគុកលិបើទីបង្ហាញថា ទុក្ខវេទនាពុំមែនជាភស្តុតាងនៃការមិនពេញព្រះទ័យរបស់ព្រះ ឬការដកយកពរជ័យរបស់ទ្រង់ឡើយ ។
ខ្ញុំរំជួលចិត្តណាស់ ពេលខ្ញុំអានអ្វីដែលព្យាការី យ៉ូសែប ស៊្មីធ បានប្រកាស កាលលោកជាប់ឃុំនៅគុកលិបើទី ៖ « ឱព្រះអង្គអើយ តើព្រះអង្គគង់នៅទីណា ? ហើយតើព្រះពន្លាដែលគ្របបាំងទីបំពួនទ្រង់នៅទីណា ? » ២ យ៉ូសែបបានសួរថា តើរាស្ដ្ររបស់ព្រះអម្ចាស់នឹងត្រូវ « រងទុក្ខចំពោះកំហុស និងការសង្កត់សង្កិនដ៏ខុសច្បាប់ទាំងនេះ » យូរប៉ុណ្ណាទៅ ។ ៣
ពេលខ្ញុំឈរនៅក្នុងគុកលិបើទី ខ្ញុំបានរំជួលចិត្តខ្លាំង កាលខ្ញុំអានចម្លើយរបស់ព្រះអម្ចាស់ ៖ « បុត្រយើងអើយ ចូរមានសេចក្ដីសុខសាន្តដល់ព្រលឹងបុត្រចុះ សេចក្ដីទំនាស់ និងសេចក្ដីទុក្ខលំបាករបស់បុត្រ នោះគ្រាន់តែមួយភ្លែតប៉ុណ្ណោះទេ ។ ហើយខណៈនោះ បើសិនជាបុត្រស៊ូទ្រាំការណ៍នោះដោយហ្មត់ចត់ នោះព្រះទ្រង់នឹងតម្កើងបុត្រឡើងនៅស្ថានខ្ពស់ » ។ ៤ ច្បាស់ថា ការផ្ទុយអាចសម្រិតសម្រាំងយើងសម្រាប់ជោគវាសនាដ៏អស់កល្ប និងសេឡេស្ទាលមួយ ។ ៥
ព្រះបន្ទូលដ៏មានតម្លៃរបស់ព្រះអង្គសង្គ្រោះថា « បុត្រយើងអើយ ចូរមានសេចក្ដីសុខសាន្តដល់ព្រលឹងបុត្រចុះ » ៦ មានអត្ថន័យជាពិសេសសម្រាប់ខ្ញុំផ្ទាល់ និងសំខាន់សម្រាប់ជំនាន់យើង ។ វារំឭកខ្ញុំអំពីការបង្រៀនទាំងឡាយរបស់ទ្រង់ ទៅកាន់ពួកសិស្សអំឡុងការងារបម្រើក្នុងជីវិតរមែងស្លាប់របស់ទ្រង់ ។
មុនពេលការរងទុក្ខរបស់ព្រះគ្រីស្ទនៅសួនច្បារគែតសេម៉ានី និងនៅលើឈើឆ្កាង ទ្រង់បានបង្គាប់ពួកសាវករបស់ទ្រង់ថា « នាដែរ » ៧ ហើយបានបន្ដលួងលោមពួកគេដោយបន្ទូលទាំងនេះ ៖ « ខ្ញុំទុកសេចក្តីសុខនៅនឹងអ្នករាល់គ្នា គឺខ្ញុំឲ្យសេចក្តីសុខសាន្តរបស់ខ្ញុំដល់អ្នករាល់គ្នា ហើយដែលខ្ញុំឲ្យ នោះមិនមែនដូចជាលោកីយ៍ឲ្យទេ ។ កុំឲ្យចិត្តអ្នករាល់គ្នាថប់បារម្ភ ឬភ័យឡើយ » ។ ៨
ព្រះបរមងារជាទីស្រឡាញ់មួយរបស់ព្រះអម្ចាស់ និងព្រះអង្គសង្គ្រោះនៃយើង ជាព្រះយេស៊ូវគ្រីស្ទ គឺ « ម្ចាស់នៃមេត្រីភាព » ។ ៩ នៅទីបំផុត នគររបស់ទ្រង់នឹងស្ថាបនាឡើង ដោយមានទាំងភាពសុខសាន្ដ និងសេចក្ដីស្រឡាញ់ ។ ១០ យើងទន្ទឹងរង់ចាំការសោយរាជ្យនៅសហស្សវត្សរ៍របស់ព្រះមែស៊ី ។
ថ្វីបើមានចក្ខុវិស័យអំពីការសោយរាជ្យនៅសហស្សវត្សរ៍នេះក្ដី ក៏យើងដឹងថា នៅជំនាន់របស់យើងនេះគ្មានសេចក្ដីសុខសាន្ដ និងភាពសុខដុមរមនាក្នុងពិភពលោកនេះទេ ។ ១១ ក្នុងជីវិតខ្ញុំ ខ្ញុំពុំដែលបានឃើញការខ្វះសុជីវធម៌ដូចឥឡូវនោះទេ ។ យើងរងការវាយប្រហារពីភាសាដ៏ខឹងសម្បារ ការទាស់ទែងគ្នា និងសកម្មភាពរករឿងគ្នា យ៉ាងហិចហោច ដែលបំផ្លាញដល់សេចក្ដីសុខសាន្ដ និងសេចក្ដីស្ងប់ ។
គ្មានការសន្យា ឬធានាថា មានសេចក្ដីសុខសាន្ដក្នុងពិភពលោកនេះទេ រហូតដល់ការយាងមកជាលើកទីពីររបស់ព្រះយេស៊ូវគ្រីស្ទ ។ ព្រះអង្គសង្គ្រោះបង្រៀនពួកសាវករបស់ទ្រង់ថា បេសកកម្មលើផែនដីរបស់ទ្រង់នឹងពុំសម្រេចបាននូវសេចក្ដីសុខសាន្ដជាសាកលនោះទេ ។ ទ្រង់បានបង្រៀនថា « កុំឲ្យស្មានថា ខ្ញុំមកនឹងតាំងឲ្យមានសេចក្តីមេត្រីនៅផែនដីឡើយ » ។ ១២ សេចក្ដីសុខសាន្ដជាសាកលពុំជាផ្នែកមួយនៃការចាប់ផ្ដើមការងារបម្រើក្នុងជីវិតរមែងស្លាប់របស់ព្រះអង្គសង្គ្រោះឡើយ ។ សេចក្ដីសុខសាន្ដជាសាកលពុំមាននៅសព្វថ្ងៃនេះទេ ។
ទោះយ៉ាងណា សេចក្ដីសុខសាន្ដ ផ្ទាល់ខ្លួន អាចកើតមានឡើង ទោះជាមានកំហឹង ការទាស់ទែងគ្នា និងការបែងចែកគ្នា ដែលធ្វើឲ្យពិភពលោករបស់យើងសព្វថ្ងៃត្រូវអន្ដរាយ និងពុករលួយក្ដី ។ ការស្វែងរកសេចក្ដីសុខសាន្ដផ្ទាល់ខ្លួន ពុំធ្លាប់សំខាន់ខ្លាំងដូចពេលនេះទេ ។ ទំនុកតម្កើងថ្មីដ៏ពិរោះ និងជាទីពេញចិត្តមួយ ដែលបាននិពន្ធសម្រាប់យុវវ័យនៅជំនាន់នេះដោយបងប្រុស និក ដេយ មានចំណងជើងថា « ក្ដីសុខក្នុងទ្រង់ » ប្រកាសថា « នៅពេលគ្មានសេចក្ដីសុខសាន្ដនៅលើផែនដី នោះមានសេចក្ដីសុខសាន្ដនៅក្នុងព្រះគ្រីស្ទ » ។ ១៣ យើងមានពរជ័យដែលមានទំនុកតម្កើងនេះ មុនពេលជំងឺរាតត្បាតកូវីដ-១៩ កើតឡើង ។
ទំនុកតម្កើងនេះឆ្លុះបញ្ចាំងពីការប្រាថ្នាចង់បានសេចក្ដីសុខសាន្ដក្នុងរបៀបដ៏ស្រស់ត្រកាលមួយ និងគូសបញ្ជាក់ដោយសមរម្យថា សេចក្ដីសុខសាន្ដចាក់គ្រឹះលើជីវិត និងបេសកកម្មរបស់ព្រះយេស៊ូវគ្រីស្ទ ។ ប្រធាន យ៉ូសែប អេហ្វ ស៊្មីធ បានប្រកាសថា « វិញ្ញាណនៃក្ដីសុខសាន្ត និងក្ដីស្រឡាញ់នឹងមិនកើតមានក្នុងពិភពលោកនេះបានឡើយ … លុះត្រាតែមនុស្សលោកទទួលសេចក្ដីពិត និងសារលិខិតរបស់ព្រះ … ហើយទទួលស្គាល់ព្រះចេស្ដា និងសិទ្ធិអំណាចរបស់ទ្រង់ដែលមកពីព្រះ » ។ ១៤
ខណៈដែលយើងនៅតែបន្ដខិតខំធ្វើឲ្យមានសេចក្ដីសុខសាន្ដជាសាកល នោះយើងដឹងថា យើងអាចមានសេចក្ដីសុខសាន្ដផ្ទាល់ខ្លួន ដូចដែលព្រះគ្រីស្ទបានបង្រៀន ។ គោលការណ៍នេះមាននៅក្នុងគម្ពីរគោលលទ្ធិ និង សេចក្ដីសញ្ញា ៖ « ប៉ុន្តែចូររៀនចុះថា អ្នកណាដែលប្រព្រឹត្តកិច្ចការទាំងឡាយដោយសេចក្ដីសុចរិត នោះនឹងបានទទួលរង្វាន់របស់ខ្លួន គឺសេចក្ដីសុខសាន្តនៅនាលោកិយនេះ និងជីវិតដ៏នៅអស់កល្បជានិច្ចនៅបរលោក » ។ ១៥
តើ « កិច្ចការទាំងឡាយដោយសេចក្ដីសុចរិត » ណាខ្លះ ដែលនឹងជួយយើងឲ្យដោះស្រាយជម្លោះ និងកាត់បន្ថយការទាស់ទែងគ្នា ហើយរកឃើញសេចក្ដីសុខសាន្តនៅនាលោកិយនេះ ? ការបង្រៀនទាំងអស់របស់ព្រះគ្រីស្ទចង្អុលទៅកាន់ទិសដៅនេះ ។ ខ្ញុំនឹងលើកឡើងការបង្រៀនពីរបី ដែលខ្ញុំជឿថាមានសារៈសំខាន់ជាពិសេស ។
ទីមួយ ៖ ស្រឡាញ់ព្រះ រស់នៅតាមព្រះបញ្ញត្តិរបស់ទ្រង់ និងអភ័យទោសឲ្យមនុស្សគ្រប់គ្នា
ប្រធាន ចច អ័លប៊ើត ស៊្មីធ បានក្លាយជាប្រធានសាសនាចក្រនៅឆ្នាំ ១៩៤៥ ។ អំឡុងពេលលោកបម្រើជាសាវក គេស្គាល់លោកថាជាអ្នកដឹកនាំដែលស្រឡាញ់សន្ដិភាព ។ រយៈពេល ១៥ ឆ្នាំមុនពេលលោកបានក្លាយជាប្រធានសាសនាចក្រ គឺមានឧបសគ្គ និងការសាកល្បងក្នុងពេលវិបត្តិសេដ្ឋកិច្ចពិភពលោកដ៏ធំ គ្មានសន្តិភាព ហើយវាបន្ដដោយមានការស្លាប់ និងការបំផ្លាញនៃសង្គ្រាមលោកលើកទីពីរ ។
នៅចុងបញ្ចប់នៃសង្គ្រាមលោកលើកទីពីរ អំឡុងសន្និសីទទូទៅលើកដំបូងរបស់លោកក្នុងនាមជាប្រធានសាសនាចក្រនៅ ខែ តុលា ឆ្នាំ ១៩៤៥ ប្រធាន ស្ម៊ីធ បានរំឭកពួកបរិសុទ្ធអំពីការអញ្ជើញរបស់ព្រះអង្គសង្គ្រោះ ឲ្យស្រឡាញ់អ្នកជិតខាងរបស់ពួកគេ ហើយអភ័យទោសឲ្យពួកខ្មាំងសត្រូវ រួចបង្រៀនថា « នោះគឺជាវិញ្ញាណដែលពួកបរិសុទ្ធថ្ងៃចុងក្រោយទាំងអស់ គួរតែព្យាយាមទទួលបាន ប្រសិនបើពួកគេសង្ឃឹមចង់ឈរនៅក្នុងវត្តមានរបស់ទ្រង់ និងទទួលស្វាគមន៍ដោយព្រះហស្ដទ្រង់ឲ្យចូលគេហដ្ឋានដ៏រុងរឿងនៅថ្ងៃណាមួយនោះ » ។ ១៦
ទីពីរ ៖ ស្វែងរកផលផ្លែនៃព្រះវិញ្ញាណ
នៅក្នុងសំបុត្ររបស់លោកទៅកាន់ពួកកាឡាទី សាវកប៉ុលបានប្រាប់ពីភាពចែកដាច់ពីគ្នារវាងកិច្ចការនៃសេចក្ដីសុចរិត ដែលធ្វើឲ្យយើងស័ក្ដិសមនឹងគ្រងនគរព្រះ និងកិច្ចការដែលអាចធ្វើឲ្យយើងមិនស័ក្ដិសម បើគ្មានការប្រែចិត្តទេនោះ ។ ក្នុងចំណោមកិច្ចការដែលធ្វើឲ្យយើងស័ក្ដិសម គឺជាផលផ្លែនៃព្រះវិញ្ញាណ « សេចក្តីស្រឡាញ់ អំណរអរ មេត្រីភាព អត់ធ្មត់ សុភាព សប្បុរស [ និង ] ស្មោះត្រង់ » ។ ១៧ ប៉ុលក៏រួមបញ្ចូលនូវការរែកបន្ទុករបស់គ្នាទៅវិញទៅមក និងការមិននឿយហត់ក្នុងការធ្វើល្អផងដែរ ។ ១៨ ក្នុងចំណោមកិច្ចការទាំងឡាយ ដែលមិនសុចរិតនោះ លោករួមបញ្ចូលទាំងការស្អប់គ្នា កំហឹង និង ការទាស់ទែងគ្នា ។ ១៩
មានមេរៀនដ៏អស្ចារ្យមួយនៅជំនាន់ព្រះគម្ពីរសញ្ញាចាស់ ទាក់ទងនឹងលោកឪពុកអ័ប្រាហាំ ។ អ័ប្រាហាំ និង ឡុត ដែលជាក្មួយប្រុសរបស់លោក មានទ្រព្យសម្បត្តិជាច្រើន ប៉ុន្ដែឃើញថា ពួកគេមិនអាចរស់នៅជាមួយគ្នា ។ ដើម្បីលុបបំបាត់ការទាស់ទែងគ្នា អ័ប្រាហាំអនុញ្ញាតឲ្យ ឡុត ជ្រើសរើសដីដែលគាត់ចង់បាន ។ ឡុត បានជ្រើសរើសយកវាលទន្លេយ័រដាន់ ដែលជាដីមានទឹកល្មមផង និងល្អស្រស់ផង ។ អ័ប្រាហាំ បានយកវាលទន្លេដែលមិនសូវមានជីជាតិនៅម៉ាមរេ ។ ព្រះគម្ពីរចែងថា ក្រោយមក អ័ប្រាហាំបានបោះត្រសាលរបស់លោក និងបានសង់ « អាសនា ១ ថ្វាយព្រះយេហូវ៉ា » ។ ២០ ឯឡុតវិញ « ក៏ផ្លាស់ត្រសាលគាត់ទៅត្រឹមសូដុំម » ។ ២១ មេរៀននេះប្រាប់ច្បាស់ណាស់ ថាយើងគួរតែស្ម័គ្រចិត្តសម្រុះសម្រួលគ្នា និងលុបបំបាត់ការទាស់ទែងគ្នា ទាក់ទងនឹងបញ្ហាដែលមិនសុចរិត ដើម្បីមានទំនាក់ទំនងដ៏សុខសាន្ដ ។ ដូចជាស្ដេចបេនយ៉ាមីនបានបង្រៀន « អ្នករាល់គ្នានឹងពុំមានគំនិតចង់ព្យាបាទគ្នាទៅវិញទៅមកឡើយ ប៉ុន្តែចង់រស់នៅដោយសុខសាន្ត » វិញ ។ ២២ ប៉ុន្ដែទង្វើទាក់ទងនឹងសេចក្ដីសុចរិត និងការចាំបាច់ខាងគោលលទ្ធិ នោះយើងត្រូវតែបន្ដនៅរឹងមាំ និងខ្ជាប់ខ្ជួន ។
បើយើងចង់មានសេចក្ដីសុខសាន្ដ ដែលជារង្វាន់នៃកិច្ចការទាំងឡាយដោយសេចក្ដីសុចរិត នោះយើង មិន ត្រូវបោះត្រសាលរបស់យើងបែរទៅខាងលោកិយឡើយ ។ យើងត្រូវបោះត្រសាលរបស់យើងបែរឆ្ពោះទៅព្រះវិហារបរិសុទ្ធវិញ ។
ទីបី ៖ អនុវត្តសិទ្ធិជ្រើសរើសដើម្បីរើសយកសេចក្ដីសុចរិត
សេចក្ដីសុខសាន្ដ និងសិទ្ធិជ្រើសរើស គឺជាធាតុសំខាន់ដែលរួមគ្នាតែមួយក្នុងផែនការនៃសេចក្ដីសង្គ្រោះ ។ ដូចបានពិពណ៌នានៅក្នុងប្រធានបទដំណឹងល្អស្ដីពី « សិទ្ធិជ្រើសរើស និងការទទួលខុសត្រូវ » « សិទ្ធិជ្រើសរើសជាសមត្ថភាព និងឯកសិទ្ធិដែលព្រះទ្រង់ប្រទានដល់មនុស្ស ដើម្បីជ្រើសរើស ហើយដើម្បីប្រព្រឹត្តដោយខ្លួនឯង » ។ ២៣ ដូច្នេះហើយ សិទ្ធិជ្រើសរើសគឺជាចំណុចសំខាន់នៃការរីកចម្រើន និងបទពិសោធន៍ផ្ទាល់ខ្លួន ដែលផ្ដល់ពរជ័យដល់យើង ពេលយើងធ្វើតាមព្រះអង្គសង្គ្រោះ ។ ២៤
សិទ្ធិជ្រើសរើសគឺជាបញ្ហាខាងគោលការណ៍មួយនៅឯ « ក្រុមប្រឹក្សានៅស្ថានសួគ៌មុនជីវិតរមែងស្លាប់ » និងជាជម្លោះរវាងអ្នកដែលបានជ្រើសរើសធ្វើតាមព្រះគ្រីស្ទ និងអ្នកដើរតាមសាតាំង ។ ២៥ ចូរបោះបង់អំនួត និងការចង់គ្រប់គ្រងគេចោល ហើយការជ្រើសរើសព្រះអង្គសង្គ្រោះ បានអនុញ្ញាតឲ្យយើងមានពន្លឺ និងសេចក្ដីសុខសាន្ដរបស់ទ្រង់ ។ ប៉ុន្ដែសេចក្ដីសុខសាន្ដផ្ទាល់ខ្លួននឹងមានឧបសគ្គ នៅពេលមនុស្សអនុវត្តសិទ្ធិជ្រើសរើសរបស់ពួកគេ តាមរបៀបដែលបង្កឲ្យមានគ្រោះថ្នាក់ និងការឈឺចាប់ ។
ខ្ញុំជឿជាក់ថា ការអះអាងដ៏សុខសាន្ដដែលយើងមានក្នុងដួងចិត្តយើង នឹងត្រូវពង្រឹងបាន តាមរយៈការដឹងពីអ្វីដែលព្រះអង្គសង្គ្រោះនៃពិភពលោកនេះ សម្រេចបានជំនួសឲ្យយើងរាល់គ្នា ។ ការណ៍នេះមានរៀបរាប់យ៉ាងល្អនៅក្នុង ប្រកាសដំណឹងល្អរបស់យើង ៖ « អែកទៅលើដង្វាយធួននៃព្រះយេស៊ូវគ្រីស្ទ នោះទ្រង់អាចជួយយើងឲ្យស៊ូទ្រាំការសាកល្បង ជម្ងឺ និងការឈឺចាប់របស់យើង ។ យើងអាចពេញដោយក្ដីអំណរ ភាពសុខសាន្ដ និងការលួងលោមចិត្ត ។ អ្វីៗទាំងអស់ដែលអយុត្តិធម៌នៅក្នុងជីវិតនេះ អាចត្រូវបានធ្វើឲ្យយុត្តិធម៌តាមរយៈដង្វាយធួនរបស់ព្រះយេស៊ូវគ្រីស្ទ » ។ ២៦
ទីបួន ៖ ស្ថាបនាទីក្រុងស៊ីយ៉ូននៅក្នុងដួងចិត្ត និងលំនៅដ្ឋានរបស់យើង
យើងគឺជាបុត្រាបុត្រីរបស់ព្រះ និងជាផ្នែកមួយនៃគ្រួសាររបស់ទ្រង់ ។ យើងក៏ជាផ្នែកមួយនៃគ្រួសារ ដែលយើងបានកើតមកផងដែរ ។ ស្ថាប័នគ្រួសារគឺជាមូលដ្ឋានគ្រឹះនៃសុភមង្គលផង និងសេចក្ដីសុខសាន្ដផង ។ ប្រធាន រ័សុល អិម ណិលសុន បានបង្រៀនយើង ហើយអំឡុងជំងឺរាតត្បាតសាកលនេះ យើងក៏បានរៀនដែរថា ការប្រតិបត្តិតាមសាសនានៅក្នុងគេហដ្ឋាន ហើយមានការគាំទ្រពីសាសនាចក្រអាច « បើកសម្ដែងឡើងនូវអំណាចនៃក្រុមគ្រួសារ … ដើម្បីផ្លាស់ប្រែគេហដ្ឋានរបស់ [ យើង ] ទៅជាទីបរិសុទ្ធ [ ទាំងឡាយ ] នៃសេចក្ដីជំនឿ » ។ ២៧ បើយើងមានការប្រតិបត្តិតាមសាសនានេះនៅក្នុងគេហដ្ឋានរបស់យើង នោះយើងក៏នឹងមានសេចក្ដីសុខសាន្ដរបស់ព្រះអង្គសង្គ្រោះផងដែរ ។ ២៨ យើងដឹងថា បងប្អូនជាច្រើនមិនមានពរជ័យនៃគេហដ្ឋានសុចរិតទេ ហើយប្រឈមមុខជាប្រចាំនឹងអ្នកដែលជ្រើសរើសសេចក្ដីឥតសុចរិត ្យទៅដល់ទីសុវត្ថិភាព និងជាជម្រកពីព្យុះជីវិតនៅទីបំផុតបាន ។
ខ្ញុំសូមសន្យានឹងបងប្អូនថា អំណរ សេចក្ដីស្រឡាញ់ និងការបំពេញដែលកើតមាននៅក្នុងក្រុមគ្រួសារដ៏សុចរិត និងពេញដោយក្ដីស្រឡាញ់ បង្កើតឲ្យមានទាំងសេចក្ដីសុខសាន្ដ និងសុភមង្គល ។ សេចក្ដីស្រឡាញ់ និងការមានចិត្តល្អ គឺជាគ្រឹះនៃការមានក្រុងស៊ីយ៉ូននៅក្នុងដួងចិត្ត និងលំនៅដ្ឋានរបស់យើង ។ ២៩
ទីប្រាំ ៖ ធ្វើតាមការព្រមានរបស់ព្យាការីយើងក្នុងពេលថ្មីៗនេះ
សេចក្ដីសុខសាន្ដរបស់យើងកើនឡើងយ៉ាងខ្លាំង នៅពេលយើងធ្វើតាមព្យាការីរបស់ព្រះអម្ចាស់គឺ ប្រធាន រ័សុល អិម ណិលសុន ។ យើងនឹងមានឱកាសស្ដាប់លោកក្នុងពេលបន្ដិចទៀតនេះ ។ លោកត្រូវបានរៀបចំតាំងពីកំណើតនៃពិភពលោកមកម្ល៉េះ សម្រាប់ការហៅនេះ ។ ការរៀបចំផ្ទាល់ខ្លួនរបស់លោកគឺអស្ចារ្យខ្លាំងបំផុត ។ ៣០
លោកបានបង្រៀនយើងថា យើងអាច « មានអារម្មណ៍សុខសាន្ដ និងអំណរយូរអង្វែង ទោះជានៅគ្រាចលាចលក្ដី »កាលណាយើងខិតខំដើម្បីប្រែក្លាយកាន់តែដូចជាព្រះអង្គសង្គ្រោះរបស់យើង គឺព្រះយេស៊ូវគ្រីស្ទ ។ ៣១ លោកបានប្រឹក្សាឲ្យយើងប្រែចិត្តជារៀងរាល់ថ្ងៃ ទទួលយកព្រះចេស្ដានៃការសម្អាត ការព្យាបាល និងការពង្រឹងរបស់ព្រះអម្ចាស់ ។ ៣២ ខ្ញុំជាសាក្សីផ្ទាល់ម្នាក់ថា ព្យាការីជាទីស្រឡាញ់របស់យើងបានទទួល និងកំពុងបន្ដទទួលបានវិវរណៈមកពីស្ថានសួគ៌ ។
ខណៈយើងគោរព និងគាំទ្រលោកជាព្យាការីរបស់យើង នោះយើងថ្វាយបង្គំដល់ព្រះវរបិតាសួគ៌របស់យើង និងព្រះអង្គសង្គ្រោះនៃយើង គឺព្រះយេស៊ូវគ្រីស្ទ ។ ព្រះវិញ្ញាណបរិសុទ្ធបានផ្ដល់ការងារបម្រើដល់យើង ។
ខ្ញុំសូមថ្លែងទីបន្ទាល់ និងផ្ដល់សាក្សីផ្ទាល់ក្នុងនាមជាសាវកថា ព្រះយេស៊ូវគ្រីស្ទ ព្រះអង្គសង្គ្រោះ និងព្រះប្រោសលោះនៃពិភពលោកនេះ ដឹកនាំ និងណែនាំសាសនាចក្រដែលបានស្ដារឡើងវិញរបស់ទ្រង់ ។ ជីវិត និងបេសកកម្មដ៏ធួនរបស់ទ្រង់ គឺជាប្រភពដ៏ពិតនៃសេចក្ដីសុខសាន្ដ ។ ទ្រង់គឺជាម្ចាស់នៃមេត្រីភាព ។ ខ្ញុំសូមថ្លែងជាសាក្សីដ៏ពិតប្រាកដ និងមុតមាំរបស់ខ្ញុំថា ទ្រង់មានព្រះជន្មរស់ ។ នៅក្នុងព្រះនាមនៃព្រះយេស៊ូវគ្រីស្ទ អាម៉ែន ។