រង្វាន់សម្រាប់ការស្វែងរកដ៏ស្មោះត្រង់
ខ្ញុំសូមអញ្ជើញយើងទាំងអស់គ្នាឲ្យបន្តបង្កើនសេចក្តីជំនឿលើព្រះគ្រីស្ទ ដែលបន្តដើម្បីផ្លាស់ប្តូរជីវិតរបស់អស់អ្នកដែលស្វែងរកទ្រង់ ។
នៅដើមឆ្នាំ ១៨៤៦ ពួកអ្នកត្រួសត្រាយផ្លូវរាប់ពាន់នាក់ទាំងបុរស ស្រ្តី និងកុមារបានធ្វើដំណើរឆ្ពោះទៅភាគខាងលិចនៃក្រុងស៊ីយ៉ូន ។ សេចក្តីជំនឿដ៏អស្ចារ្យរបស់ពួកគេបានជំរុញដល់សេចក្តីក្លាហានដ៏គ្មានព្រំដែនរបស់ពួកគេ ។ អ្នកខ្លះបានស្លាប់នៅតាមផ្លូវដោយមិនបានទៅដល់គោលដៅរបស់ពួកគេ ។ អ្នកផ្សេងទៀតបានប្រឈមនឹងសេចក្តីវេទនាយ៉ាងខ្លាំង ប៉ុន្តែបានឆ្ពោះទៅមុខដោយសេចក្ដីជំនឿ ។
ដោយសារពួកគេ នោះជំនាន់ក្រោយៗ ព្រមទាំងគ្រួសាររបស់ខ្ញុំបានរីករាយនឹងពរជ័យនៃសេចក្តីពិតនៃដំណឹងល្អនៃព្រះយេស៊ូវគ្រីស្ទ ។
ដូចជាយុវជនដទៃទៀតផងដែរ កាលខ្ញុំអាយុ ១៤ ឆ្នាំ ខ្ញុំចាប់ផ្តើមមានសំណួរអំពីសាសនា និងសេចក្តីជំនឿរបស់ខ្ញុំ ។ ខ្ញុំបានចូលរួមព្រះវិហារនិកាយផ្សេងដែលនៅជិតផ្ទះខ្ញុំ ប៉ុន្តែខ្ញុំក៏ចង់ទៅលេងព្រះវិហារផ្សេងៗទៀតដែរ ។
នៅរសៀលមួយ ខ្ញុំបានឃើញយុវជនពីរនាក់ពាក់អាវធំពណ៌ខ្មៅ និងអាវក្នុងពណ៌ស បានចូលទៅលេងផ្ទះអ្នកជិតខាងខ្ញុំ ។ យុវជនទាំងនេះមើលទៅ—ពិតជាពិសេសណាស់ ។
នៅថ្ងៃបន្ទាប់ ខ្ញុំបានជួបអ្នកជិតខាងខ្ញុំគឺ លីអនណ័រ ឡូប៉េស ហើយបានសួរនាងអំពីយុវជនទាំងពីរនាក់នោះ ។ លីអនណ័រ បានពន្យល់ថា ពួកគេគឺជាពួកអ្នកផ្សព្វផ្សាយសាសនា មកពីសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ។ នាងបានប្រាប់ខ្ញុំទាំងក្តីរីករាយថា គ្រួសាររបស់នាងបានទទួលពិធីបុណ្យជ្រមុជទឹកចូលក្នុងសាសនាចក្រនេះកាលឆ្នាំមុន ។ ដោយមើលឃើញការចាប់អារម្មណ៍របស់ខ្ញុំ នោះ លីអនណ័រ បានអញ្ជើញខ្ញុំឲ្យជួបពួកអ្នកផ្សព្វផ្សាយសាសនា ហើយបានរៀនអំពីសាសនាចក្រ ។
ពីរថ្ងៃក្រោយមក ខ្ញុំបានចូលរួមជាមួយគ្រួសារឡូប៉េស ដើម្បីជួបជាមួយពួកអ្នកផ្សព្វផ្សាយសាសនា ។ ពួកគេបានណែនាំខ្លួនថាជា អែលឌើរ ចន ម៉េសឺលី មកពីអូហ្គឌិន រដ្ឋយូថាហ៍ និងអែលឌើរ គ្រីស្តូហ្វឺ អូសូរីអូ មកពី វលណាត់ ក្រិក រដ្ឋកាលីហ្វ័រញ៉ា ។ ខ្ញុំមិនដែលភ្លេចពួកគេទេ ។
ដោយសារខ្ញុំមានអាយុទើបតែ ១៤ ឆ្នាំ អែលឌើរ ម៉េសឺលី បានទទូចឲ្យខ្ញុំទៅរៀននៅផ្ទះរបស់ខ្ញុំ ដើម្បីឲ្យម្តាយរបស់ខ្ញុំអាចដឹងពីអ្វីដែលពួកគេកំពុងបង្រៀនខ្ញុំ ។ នៅទីនោះ គាត់បានពន្យល់ដោយសុភាពថា ពួកគាត់មកទីនេះដើម្បីចែកចាយសារលិខិតអំពីព្រះយេស៊ូវគ្រីស្ទ ហើយបានសុំការអនុញ្ញាតពីម្ដាយខ្ញុំដើម្បីបង្រៀនខ្ញុំ ។ ម្តាយខ្ញុំបានយល់ព្រម ហើយថែមទាំងបានចូលរួមជាមួយយើង ពេលពួកគាត់បង្រៀនខ្ញុំទៀតផង ។
ដំបូងពួកអ្នកផ្សព្វផ្សាយសាសនាបានសុំឲ្យ លីអនណ័រ ធ្វើការអធិស្ឋាន ។ ការណ៍នេះបានប៉ះដួងចិត្តខ្ញុំយ៉ាងខ្លាំង ព្រោះការអធិស្ឋានរបស់នាងមិនច្រំដែល ចេញពីពាក្យទន្ទេញចាំនោះទេ ប៉ុន្តែជាការបញ្ចេញអារម្មណ៍ពីដួងចិត្តរបស់នាង ។ ខ្ញុំមានអារម្មណ៍ថា នាងបានទូលទៅកាន់ព្រះវរបិតាសួគ៌ របស់នាងពិតមែន ។
បន្ទាប់មក ពួកអ្នកផ្សព្វផ្សាយសាសនាបានបង្រៀនយើងអំពីព្រះយេស៊ូវគ្រីស្ទ ។ ពួកគាត់បានបង្ហាញរូបភាពរបស់ទ្រង់ ដែលធ្វើឲ្យខ្ញុំចាប់អារម្មណ៍ ពីព្រោះជារូបភាពព្រះគ្រីស្ទដ៏មានព្រះជន្មរស់ដែលបានរស់ឡើងវិញ ។
ពួកគាត់បានបន្តបង្រៀនយើងអំពីរបៀប ដែលព្រះយេស៊ូវបានស្ថាបនាសាសនាចក្ររបស់ទ្រង់នៅជំនាន់បុរាណ ដែលមានទ្រង់ជាអ្នកដឹកនាំ ជាមួយពួកសាវកដប់ពីរនាក់ ។ ពួកគាត់បានបង្រៀនយើងពីការក្បត់សាសនា—ពីរបៀបដែលសេចក្តីពិត និងសិទ្ធិអំណាចរបស់ព្រះគ្រីស្ទ ត្រូវបានដកចេញពីផែនដី បន្ទាប់ពីការស្លាប់របស់ពួកសាវកទ្រង់ ។
ពួកគាត់ប្រាប់យើងអំពីយុវជនអាយុ ១៤ ឆ្នាំម្នាក់ឈ្មោះ យ៉ូសែប ស៊្មីធ ក្នុងអំឡុងដើមទសវត្សរ៍ឆ្នាំ ១៨០០ ដែលបានទៅព្រះវិហារខុសៗគ្នា ដើម្បីស្វែងរកសេចក្តីពិត ។ កាលដែលពេលវេលាកន្លងទៅ យ៉ូសែបកាន់តែច្របូកច្របល់ខ្លាំងឡើង ។ បន្ទាប់ពីការអានក្នុងព្រះគម្ពីរប៊ីបថា យើងអាច « សូមដល់ព្រះ » ១ ដើម្បីមានប្រាជ្ញា នោះយ៉ូសែប បានធ្វើសកម្មភាពដោយជំនឿ ចេញទៅក្នុងព្រៃពិសិដ្ឋអធិស្ឋាន ហើយទូលសួរថា តើលោកគួរចូលរួមក្នុងព្រះវិហារមួយណា ។
ពួកអ្នកផ្សព្វផ្សាយសាសនាមា្នក់បានអានដំណើររឿងរបស់យ៉ូសែប អំពីអ្វីដែលបានកើតឡើង ពេលលោកបានអធិស្ឋាន ៖
« ខ្ញុំបានឃើញបង្គោលពន្លឺមួយនៅចំលើក្បាលខ្ញុំ មានរស្មីចែងចាំងលើសជាងសុរិយាទៅទៀត ដែលចុះសន្សឹមៗមកចំលើរូបខ្ញុំ ។
« … កាលពន្លឺស្ថិតចំពីលើរូបខ្ញុំ ខ្ញុំបានឃើញតួអង្គពីរដែលមានរស្មី និងសិរីរុងរឿងដែលពុំអាចពណ៌នាបានឡើយ ឈរនៅអាកាសពីលើរូបខ្ញុំ ។ តួអង្គមួយមានព្រះបន្ទូលមកខ្ញុំ ដោយហៅខ្ញុំតាមឈ្មោះ ហើយចង្អុលទៅតួអង្គមួយទៀត ដោយមានព្រះបន្ទូលថា—នេះជាព្រះរាជបុត្រាដ៏ស្ងួនភ្ងារបស់យើង ។ ចូរស្តាប់តាមទ្រង់ចុះ ! » ២
ក្នុងអំឡុងពេលមេរៀននោះ ព្រះវិញ្ញាណបានបញ្ជាក់ដល់ខ្ញុំនូវសេចក្តីពិតមួយចំនួន ។
ទីមួយ ព្រះស្តាប់ឮការអធិស្ឋានដ៏ស្មោះត្រង់របស់បុត្រាបុត្រីទ្រង់ ហើយស្ថានសួគ៌បើកសម្រាប់គ្រប់គ្នា—មិនមែនសម្រាប់តែមនុស្សមួយចំនួននោះទេ ។
ទីពីរ ព្រះជាព្រះវរបិតា ព្រះយេស៊ូវគ្រីស្ទ និងព្រះវិញ្ញាណបរិសុទ្ធ គឺជាតួអង្គបីផ្សេងគ្នា ប៉ុន្តែមានព្រះរាជបំណងតែមួយ « ដើម្បីនាំឲ្យមានអមតភាព និងជីវិតដ៏នៅអស់កល្បជានិច្ចដល់មនុស្ស » ។ ៣
ទីបី យើងត្រូវបានបង្កើតតាមរូបភាពនៃព្រះ ។ ព្រះវរបិតាសួគ៌របស់យើង និងព្រះរាជបុត្រាទ្រង់គឺ ព្រះយេស៊ូវគ្រីស្ទ មានព្រះកាយជាសាច់ និងឆ្អឹង ប៉ុន្តែទ្រង់ទាំងទ្វេគឺជាអង្គដ៏រុងរឿង និងល្អឥតខ្ចោះ ហើយព្រះវិញ្ញាណបរិសុទ្ធគឺជាតួអង្គនៃវិញ្ញាណ ។ ៤
ទីបួន តាមរយៈយ៉ូសែប ស៊្មីធ ព្រះយេស៊ូវគ្រីស្ទបានស្ដារដំណឹងល្អ និងសាសនាចក្រពិតរបស់ទ្រង់មកលើផែនដីនេះឡើងវិញ ។ សិទ្ធិអំណាចបព្វជិតភាព ដែលបានប្រទានឲ្យពួកសាវករបស់ព្រះគ្រីស្ទកាលពី ២០០០ ឆ្នាំកន្លងទៅ គឺជាបព្វជិតភាពតែមួយដែលបានប្រទានឲ្យយ៉ូសែប ស៊្មីធ និង អូលីវើរ ខៅឌើរី ដោយពេត្រុស យ៉ាកុប និងយ៉ូហាន ។ ៥
ជាចុងបញ្ចប់ យើងបានរៀនអំពីសក្ខីបទមួយទៀតនៃព្រះយេស៊ូវគ្រីស្ទ ៖ គឺព្រះគម្ពីរមរមន ។ ព្រះគម្ពីរមរមនត្រូវបានសរសេរដោយព្យាការីបុរាណ វាតំណាលអំពីប្រជាជន ដែលបានរស់នៅទ្វីបអាមេរិក មុនពេល អំឡុងពេល និងបន្ទាប់ពីការប្រសូតរបស់ព្រះយេស៊ូវ ។ ចាប់ពីនោះមក យើងបានរៀនអំពីរបៀបដែលពួកគេបានដឹង បានស្រឡាញ់ និងថ្វាយបង្គំព្រះគ្រីស្ទ ដែលបានយាងមកជួបពួកគេជាព្រះអង្គសង្គ្រោះ ដែលមានព្រះជន្មរស់ឡើងវិញ ។
ព្រះវិញ្ញាណបានធ្វើឲ្យខ្ញុំរំជួលចិត្តយ៉ាងខ្លាំង កាលដែលខ្ញុំបានរៀនអំពីការប្រកាសរបស់ព្រះអង្គសង្គ្រោះដល់ពួកគេ ៖ « មើលចុះ យើងគឺព្រះយេស៊ូវគ្រីស្ទ ដែលពួកព្យាការីបានធ្វើបន្ទាល់ថានឹងយាងមកឯលោកិយ » ។ ៦
ពួកអ្នកផ្សព្វផ្សាយសាសនាបានឲ្យព្រះគម្ពីរមរមនដល់យើង ។ យើងបានអាន ហើយបានយល់ព្រមទទួលយកការអញ្ជើញ ដែលមាននៅចុងបញ្ចប់នៃព្រះគម្ពីរមរមន ដែលអាន ៖
« ហើយកាលណាអ្នករាល់គ្នាទទួលនូវការណ៍ទាំងនេះ នោះខ្ញុំសូមទូន្មានដល់អ្នករាល់គ្នាឲ្យសូមសួរដល់ព្រះជាព្រះវរបិតាដ៏គង់នៅអស់កល្បជានិច្ច ដោយនូវព្រះនាមនៃព្រះគ្រីស្ទ បើសិនជាការណ៍ទាំងនេះមិនពិត ហើយបើសិនជាអ្នករាល់គ្នាសូមសួរដោយចិត្តស្មោះសរគឺ ដោយស្មោះអស់ពីចិត្ត ដោយមានសេចក្តីជំនឿជឿដល់ព្រះគ្រីស្ទ នោះទ្រង់នឹងសម្ដែងសេចក្តីពិតនៃការណ៍នេះដល់អ្នកដោយព្រះចេស្តានៃព្រះវិញ្ញាណបរិសុទ្ធ ។
ហើយដោយព្រះចេស្តានៃព្រះវិញ្ញាណបរិសុទ្ធ នោះអ្នករាល់គ្នាអាចស្គាល់សេចក្តីពិតនៃគ្រប់ការណ៍ទាំងអស់ » ។ ៧
វាបានកន្លងទៅជិត ៤៥ ឆ្នាំហើយដែលម្តាយរបស់ខ្ញុំ និងខ្ញុំបានស្គាល់អំណរ និងអំណាចនៃការមានសេចក្ដីជំនឿលើព្រះគ្រីស្ទជាលើកដំបូងនោះ ។ គឺដោយសារតែសេចក្ដីជំនឿរបស់គ្រួសារ ឡូប៉េស លើព្រះគ្រីស្ទ ទើបពួកគេបានចែកចាយសេចក្តីជំនឿថ្មីរបស់ពួកគេជាមួយនឹងខ្ញុំ ។ គឺដោយសារតែសេចក្ដីជំនឿរបស់ពួកអ្នកផ្សព្វផ្សាយសាសនាពីររូបនេះលើព្រះគ្រីស្ទ ទើបពួកគេបានចាកចេញពីផ្ទះរបស់ខ្លួននៅសហរដ្ឋអាមេរិក ដើម្បីស្វែងរកខ្ញុំ និងម្តាយរបស់ខ្ញុំ ។ គឺដោយសារសេចក្តីជំនឿរបស់មិត្តសម្លាញ់ទាំងអស់នេះ ដែលបានបណ្តុះគ្រាប់ពូជនៃសេចក្តីជំនឿនៅក្នុងចិត្តយើង ដែលបានដុះក្លាយជាដើមឈើដ៏ធំនៃពរជ័យដ៏អស់កល្បជានិច្ច ។
យើងបានដឹងថា យើងមានពរជ័យអំឡុងពេលប៉ុន្មានឆ្នាំនេះ ដូចដែលប្រធាន រ័សុល អិម ណិលសុន បានប្រកាស ៖ « អ្វីៗគ្រប់យ៉ាងដែលល្អក្នុងជីវិត—គ្រប់ពរជ័យដែលសំខាន់ដ៏អស់កល្ប—ចាប់ផ្ដើមដោយសេចក្ដីជំនឿ នឿថា ទ្រង់ស្ម័គ្រព្រះទ័យដឹកនាំយើង ។ ការប្រែចិត្តដ៏ពិតចាប់ផ្ដើមដោយសេចក្ដីជំនឿថា ព្រះយេស៊ូវគ្រីស្ទមានព្រះចេស្ដាដើម្បីសម្អាត ព្យាបាល និងពង្រឹងយើង » ។ ៨
ខ្ញុំសូមអញ្ជើញយើងទាំងអស់គ្នាឲ្យបន្តបង្កើនសេចក្តីជំនឿលើព្រះគ្រីស្ទ ដែលបានផ្លាស់ប្តូរជីវិតអ្នកម្តាយជាទីស្រឡាញ់របស់ខ្ញុំ និងខ្ញុំ ហើយបន្តផ្លាស់ប្តូរជីវិតរបស់អស់អ្នកដែលស្វែងរកទ្រង់ ។ ខ្ញុំដឹងថា យ៉ូសែប ស៊្មីធ គឺជាព្យាការីនៃការស្ដារឡើងវិញ ហើយថាប្រធាន ណិលសុន គឺជាព្យាការីនៅជំនាន់របស់យើង ថាព្រះយេស៊ូវគឺជាព្រះគ្រីស្ទដ៏មានព្រះជន្មរស់ និងជាព្រះប្រោសលោះរបស់យើង ហើយថាព្រះវរបិតាសួគ៌មានព្រះជន្មរស់នៅ ហើយទ្រង់ឆ្លើយតបការអធិស្ឋានបុត្រាបុត្រីទ្រង់ទាំងអស់គ្នា ។ ខ្ញុំសូមថ្លែងទីបន្ទាល់អំពីសេចក្តីពិតទាំងនេះ នៅក្នុងព្រះនាមដ៏ពិសិដ្ឋនៃព្រះយេស៊ូវគ្រីស្ទ អាម៉ែន ៕