Peteĩ normalida pyahu
Poinvita pembojereve hag̃ua pene korasõ, akã ha ánga ñande Ru Yvagagua ha Ita’ýra Jesucristo gotyo.
Che hermano ha hermana-kuéra pohayhuetéva, Ko’ã mokõi conferencia general ára ningo igloriosoitékuri! Aime de acuerdo élder Jeffrey R. Holland ndive. He’ívo umi mensáhe, ñembo’e ha puraheikuéra oñeinspiraha Ñandejára rehe. Che aguije opavave umi oimeháicha oparticipava’ekuépe.
Ko’ã reunión aja, poimagina pehendúvo ko conferencia. Ajerure Ñandejárape tachepytyvõ aikuaa hag̃ua mba’épa peñandu hína, mba’épa pendepy’apýva térã peñeha’ãva hína perresolve. Añeporandu mba’épa ikatu ha’e peẽme opakuévo ko conferencia, ojapokuaáva tapesẽ optimismo reheve umi ára oútavare aikuaáva Ñandejára oipotaha peñandu.
Jaiko peteĩ époka igloriosoitévape, ojehechava’ekue profetakuéra rehe siglo aja. Kóva ha’e pe dispensasiõ ndojejokomo’ãihápe ni peteĩ jehovasa espiritual umi hústogui.1 Jepeve ko múndo oĩ en conmoción,2Ñandejára oipota ñama’ẽ tenonderã “vy’a ñemotenonde reheve.”3 Ani japerde ñane tiempo umi mandu’a ymaguare reheve. Israel ñembyaty oho tenonde gotyo. Ñandejára oisãmbyhy ko Itupao asuntokuéra ha kóva ohupytýta umi ipropósito divino.
Pe desafio peẽme ha chéve g̃uarã ha’e peteĩteĩ ñande tajahupyty ñane potencial divino. Ko’ã árape py’ỹi ñahendu “peteĩ normalida pyahu-gui”. Añetehápe pe’adoptasérõ peteĩ normalida pyahu, poinvita pembojereve hag̃ua pene korasõ, akã ha ánga ñande Ru Yvagagua ha Ita’ýra Jesucristo gotyo. Peheja upéva taha’e pende normalida pyahu.
Peñañua pende normalida pyahu peñearrepentívo ára ha ára. Peñeha’ãve káda ves penepotĩve hag̃ua pensamiento, ñe’ẽ ha tembiapópe. Peministra ambuekuérape. Pemantene peteĩ perspectiva eterna. Pemagnifika pene llamamiento. Ha taha’e ha’éva pende desafio-kuéra, che hermano ha hermanakuéra pohayhuetéva, pevivi ára ha ára peimehag̃uáicha preparado peẽ peñembo’y hag̃ua pende Apohare renondépe.4
Upévare jaguereko templo-kuéra. Umi Ñandejára ordenanza ha konveniokuéra ñanembosako’i tekove opave’ỹvarã, ha’éva Tupã jehovasa tuichavéva.5 Peikuaaháicha, pe Covid pandemia ojapókuri templo-kuéra toñemboty temporalmente. Upéi ñañepyrũkuri peteĩ reapertura cuidadosa, coordinada ha gradual. Fase mokõiha reheve heta templo-pe, miles de pareha ojesella ha miles orresivi iñinvestidura personal ko’ã mese pahápe. Roha’arõ’asy ára opavave tupaogua miembrokuéra digno ikatutahápe oho jey oservi ijypykuérape ha o’adora templo-pe.
Ko’ág̃a avy’a amomarandúvo plan oñemopu’ã hag̃ua séi templo pyahu, Ko’ã tendápe: Tarawa, Kiribati; Port Vila, Vanuatu; Lindon, Utah; Gran Ciudad de Guatemala, Guatemala; São Paulo Este, Brasil; y Santa Cruz, Bolivia.
Ñamopu’ã ha ñamantenévo umi templo, roñembo’e peteĩteĩ peẽ tapeñemopu’ã ha peñemantene pendejupe penedigno hag̃ua peike hag̃ua santo templo-pe.
Ko’ág̃a, che hermano ha hermanakuéra, pohovasa penerenyhẽ hag̃ua Ñandejára Jesucristo py’aguapýgui. Ohasáva opa entendimiento ko yvy árigua.6 Pohovasa deseo tuichavéva ha katupyry peneñe’ẽredu hag̃ua Tupã leikuérare. Apromete peẽme pejapóramo upéicha, oñehẽta pende’ári jehovasa, umíva apytépe, py’aguasuve, revelación personal tuichavéva, peteĩ armonía he’ẽvéva pende rógape, ha vy’apavẽ jepe incertidumbre mbytépe.
Ajerure’asy tajaha o͂ñondive tenonde gotyo ñakumpli hag̃ua ñane mandato divino, ñañembosako’ívo ñandejupe ha ko múndope Ñandejára Jejujey mokõihápe g̃uarã. Kóva ha’e che jerure’asy, che mborayhu penderehe reheve, Jesucristo réra sagrado-pe. Amén.