Tupã ojapóta peteĩ mba’e oñeimo’ã’ỹva
Tupã ombosako’íkuri Ita’yrakuéra ha Itupaópe ko momentorã.
Oĝuahẽ riremi Lago Salado vállepe, Santokuéra Ára Pahapegua oñepyrũ omopu’ã itemplo sagrado. Oñandu hikuái ojuhuha ipahápe peteĩ tenda ikatuhápe oitupãitu Tupãme py’aguapýpe ha oñemuña’ỹre.
Upevére, opapotaitévo pe templo simiénto, peteĩ soldadokuéra ehérsito Estados Unidos-gua ou omoĩ haĝua mbaretépe peteĩ gobernador pyahúpe.
Umi tupaogua líder ndoikuaáivo upe ehérsitopa ijostil, Brigham Young o’ordena santokuérape ojerretira haĝua ha oñotỹ haĝua templo simiénto.
Aime seguro oĩ hague tupao miembrokuéra oñeporandúva mba’érepa ojefrustra mante iñeha’ã omopu’ã haĝua Tupã Reino.
Ipahápe, peligro ohasa ha ojo’o ha orrevisa hikuái templo simiénto. Ha’e uperõkuri umi pionero constructor ohechakuaa hague heta umi ita arenisca ñepyrũgua otiriha, ha upévare ndovaléi simientorã.
Upévare, Brigham Young omoĩporãuka pe simiento ikatu hag̃uaicha ogueropu’aka pe1 mahestuoso Lago Salado-gua Templo tapiakuéra.2 Ipahaitépe, umi santo opuraheikuaa pe himno “Qué firmes cimientos”3 ha oikuaa itemplo marangatu oñemopu’ã hague simiento atã ári odurátava heta generación aja.
Ko ñemombe’u ñanembo’ekuaa mba’éicha Tupã ojevale jehasa’asýgui ojapo haĝua Ipropósito.
Peteĩ pandemia mundial
Kóva ipurõ familiar peẽme ko’ã circunstancia jaikohápe ko’ã árape, ha’e upéichagui.
Ndaroviai oĩha peteĩ persona ohendúva che ñe’ẽpu térã omoñe’ẽva che ñe’ẽnguéra ndoje’afectaiva’ekue ko pandemia mundial rehe.
Umi hasẽvape operde haguére ifamilia ha angirũnguéra, orerasẽ penendive. Roñembo’e ñande Ru Yvagaguápe tapenemoangapyhy ha penekonsola.
Ko virus consecuencia-kuéra oho pukuve pe salud físico-gui. Heta familia operde iñingreso ha ohasa ñembyahýi, incertidumbre ha aprensión. Romomba’eguasu umi ñeha’ã’asy ojapóva hetaite hénte ojoko haĝua ko mba’asy jeipyso. Oremomirĩ pe sakrifisio kirirĩ ha ñeha’ã noble ojapóva umi oarriesgáva isegurida personal oipytyvõ, omonguera ha omopu’ã haĝua umi oikotevẽvape. Ore korasõ henyhẽ aguijégui pende py’aporã ha poriahuvereko rehe.
Roñembo’e’asy Tupã oipe’a haĝua yvaga ovetã ha tomyanyhẽ pende rekove Ijehovasakuéra opave’ỹva reheve.
Ñande ha’e yvara’ỹi
Oĩ heta ndojeikuaáiva gueteri ko virus-gui, Ha katu oĩrõ peteĩ mba’e aikuaáva, ha’e ko virus ndojagarrai hague por sorpresa ñande Ru Yvagaguápe. Natekotevẽikuri ombyaty angel-kuéra batallón, ojapo reunión de emergencia ni odesvia recurso creación de mundo-gua departamento-gui omaneha haĝua peteĩ ñeikotevẽ oñeha’arõ’ỹva.
Che mensahe ko árape ha’e, ko pandemia ndaha’éirõ jepe jaipotáva térã ñaha’arõva, Tupã ombosako’íkuri Ita’yrakuéra ha Itupaópe ko momento-rã.
Heẽ, Jagueropu’akáta kóva. Ha katu jajapovéta, japyta rangue jajopývo ñane rãi, ña’aguanta ha ñaha’arõ umi mba’e toiko jey oikohaguéicha yma. Jaháta tenonde gotyo ha, resultado ramo, ñanemehorvéta.
Peteĩ lájape, ñande ha’e yvara’ỹi. Ha pe yvara’ỹi ohupyty haĝua ipotencial, oñeñotỹva’erã heñói mboyve. Che ha’e testigo, ñañeñandurõ jepe sapy’ánte ñañeñotỹha umi tekovegua jeiko’asy guýpe térã ojere ñanderehe umi ypytũ emocional, Tupã mborayhu ha umi Jesucristo evanhélio restaurado jehovasa omoheñóita peteĩ mba’e ñaimo’ã’ỹva.
Umi jeiko’asy ome’ẽ resultado ramo jehovasakuéra
Káda dispensasiõ ombohovake i-prueba ha jeiko’asykuéra.
Enoc ha itavayguakuéra oiko peteĩ ára ñaña, ñorairõguasu ha tuguy ñeñohẽ reheguápe. “ha katu Ñandejára ou ha oiko Itavayguakuéra ndive”. Ha’e oguerekókuri iñakãme peteĩ mba’e oñeimo’ã’ỹva chupekuéra ĝuarã. Oipytyvõ chupekuéra omopu’ã haĝua Sión, peteĩ tavaygua ha’éva “peteĩcha korasõ ha voluntad-pe” ha “oikóva tekojojápe.”4
Mitãkaria’y José, Jacob ra’y, oñemombo peteĩ yvykuápe, oñevende tembiguái ramo, ho’a ñuhãme ha ojehejarei.5 José oiméne oñeporandu Tupã hesaráipara’e chugui. Ha katu Tupã oguereko iñakãme peteĩ mba’e oñeimo’ã’ỹva chupe ĝuarã. Oiporu upe ijeiko’asy ára omombarete haĝua José caracter ha omoĩ haĝua chupe peteĩ tendápe ohejátava osalva ifamiliape.6
Pepensa proféta José Smith rehe oĩ jave Liberty ka’irãime, mba’éichapa ha’e ojerure’asy alivio umi santo ohasa’asývape ĝuarã. Oiméne oñeporandu mba’éichapa ikatúne oñemoĩ Sión umi circunstancia-pe. Ha katu Ñandejára oñe’ẽ chupe py’aguapy ñe’ẽ reheve ha pe revelacíon igloriósova oseguiva’ekue ome’ẽ py’aguapy santokuérape ha ome’ẽ meme gueteri py’aguapy peẽme ha chéve.7
¿Mboy vese piko umi Jesucristo Tupao Santokuéra Ára Pahapegua ary ñepyrũme ipy’aropu umi santo ha oñeporandu Tupã piko hesarái raka’e chuguikuéra? Ha katu umi ñemuña, peligro ha jejuka amenasa pukukue aja, Ñandejára pe Israel Tupã oguerekókuri iñakãme ambue mba’e hymba’atymíme ĝuarã. Peteĩ mba’e oñeimo’ã’ỹva.
¿Mba’e ña’aprende ko’ã ehémplogui ha cientos ambuekuéragui oĩva Escriturakuérape?
Peteĩha: Umi hekojojávape noñeme’ẽi peteĩ pase libre ojapóva ani ohasa hikuái valle ypytũ rupi. Opavave ñande jahasava’erã momento hasýva rupi, ha’égui umi jehasa’asy moméntope ña’aprendeha umi principio omombaretéva ñande carácter ha ojapo tañañemo’aĝuive Tupãre.
Mokõiha: Ñande Ru Yvagagua oikuaa jahasa’asyha ha, ha’e haguére ñande Ita’yrakuéra nañandereja reimo’ãi.8
Pepensa pe oporoiporiahuverekóvare, pe Salvador, ohasava’ekue hetave Hekove oministrávo umi hasykatúva, ha’eñóva, odudáva ha iñesperansa’ỹvape.9 ¿Peimo’ã piko Ha’e ojepy’apy’ive pende rehe ko árape?
Che amigokuéra, hermano ha hermanakuéra pohayhuetéva, Tupã oñangarekóta pende rehe ha pendeguiáta ko’ã incertidumbre ha kyhyje árape. Ha’e pendeikuaa. Ha’e ohendu pende jerure’asy. Ha’e ifiel ha i-confiable. Ha’e okumplita ipromesakuéra.
Tupã oguereko iñakãme peteĩ mba’e oñeimo’ã’ỹva peẽme ĝuarã individualmente ha avei tupaópe ĝuarã colectivamente: peteĩ obra hechapyrãva ha peteĩ prodigio.
Ñandejára, rome’ẽ ndéve aguije
Umi ñande ára porãve oĝuahẽpota, ndohasái gueteri. ¡Upévare Tupã ome’ẽ ñandéve revelación ko’áĝagua! Upéva’ỹre, ikatu ñañandu ko tekove javeverõguáicha peteĩ ñeha’arõ circuito-pe, ñaha’arõvo pe aratimbo tojei ikatu haĝua ja’aterrisa segurida reheve. Ñandejára propósito ñandéve ĝuarã tuicha ijyvateve. Kóva ha’égui pe Cristo oikovéva tupao ha Ha’e oisambyhýgui Iprofetakuérape, jaha hína tenonde gotyo ha jajupi tenda araka’eve ñaime haguépe, ijyvatekue hasýpe ñaimo’ãne jahupytytaha!
Ko’áĝa, upéva nde’iséi naña’experimentamo’ãiha turbulencia ñande vuelo-pe ko tekove terrenal rupi. Nde’iséi ndaiporimo’ãiha falla oñeha’arõ’ỹva umi instrumento-pe, falla mecánica térã desafio meteorológico isériova. Añetehápe, ikatu umi mba’e ohovaive omehora rangue.
Piloto de combate ramo ha capitán peteĩ aerolínea-pe, a’aprende, ndaikatúiramo jepe aiporavo pe jehasa’asy ajuhútava peteĩ vuelo aja, aiporavokuaa mba’éichapa añembosako’íta ha arreaccionáta. Oñeikotevẽva momento de crisis-pe ha’e peteĩ confianza tranquila ha hesakãva.
¿Mba’éicha jajapo upéva?
Ñambohovake umi oikóva ha jaha jey umi ifundamentálvape, umi evanhélio principio básico-pe, umi oimportavéva. Pemombarete pene rembiapo religioso privado, ñembo’e, escritura je’estudia ha ñaneñe’ẽrendu Tupã rembiapoukapykuérare. Pejapo decisión pejepytasóvo umi práctica porãvéva ojeprovava’ekue.
Peñekonsentra umi mba’e ikatúvape pejapo ha ani umi ndaikatúivape pejapo.
Peguereko jerovia Ha pehendu umi Ñandejára ha Iproféta ñe’ẽ pendeguia ha pendegueraha haĝua tenda seguro-pe.
Penemandu’áke, kóva ha’e Jesucristo tupao: Ha’e omotenonde Itupao.
Pepensami umi heta avance inspirado oikova’ekue ko década paha ohasava’ekuépe. Ñamensiona haĝua pokãnte:
-
Oñemoĩ jey énfasis Santa Cena-pe ñande dia de reposo adoracíon mbyte ramo.
-
Oñeme’ẽ Eju, chesegui peteĩ tembiporu ramo oñesentráva ógape ha oñeipytyvõva tupaóre oñemombarete haĝua persona ha familiakuérape.
-
Ñañepyrũ peteĩ manera ijyvateve ha imarangatuvéva ñaministra haĝua opavavépe.
-
Pe tecnología jeipuru ñakomparti haĝua pe evanhélio ha jajapo haĝua Ñandejára rembiapo ojeipyso opa tupaóre.
Jepe ko’ã conferencia general sesión ndaikatuichéne oiko umi herramienta tecnológica hechapyrãite’ỹre.
Hermano ha hermanakuéra, Cristo reheve timón-pe, ndaha’éi osẽporãmbatante: ha katu oñeimo’ã’ỹháicha.
Israel ñembyaty rembiapo oho tenonde gotyo.
Iñepyrũháme, ikatu vaicha peteĩ pandemia mundial ojokotaha Ñandejára rembiapo. Ehemplo ramo, umi método ojeipurúva jepi oñekomparti haĝua pe evanhélio ndaikatúi ojeipuru. Upevére, pe pandemia ohechauka hína forma pyahu ha ikatupyryvéva oñeĝuahẽ haĝua umi ikorasõ añetévape. Israel ñembyaty rembiapo okakuaa hína pu’aka ha kyre’ỹme. Cientos ha miles tembiasakue otestifika upévagui.
Peteĩ ore amigaite oikóva Noruega porãme ohai Harriet ha chéve omombe’úvo umi bautismo hetaveha ko’áĝa. “Umi tenda Tupao michĩhápe, ¡umi rramitagui oikóta rráma ha umi rrámagui barrio!”.
Letonia-pe, peteĩ kuña ojuhuva’ekue tupao ojapóvo click peteĩ internet momarandúpe oñe’emosionaiterei oñemoarandu haĝua Jesucristo evanhéliope ha oĝuahẽ pe cita-pe peteĩ aravo voive, ha umi misionero ombopaha mboyve pe lección peteĩha, ha’e ojeruréma fecha oñemongarai haĝua.
Europa del Este-pe, peteĩ kuña orresivíva misionera-kuéra ñehenói he’i: “Hermana-kuéra ¿mba’ére piko napehenói voivéra’e? ¡Aha’arõkuri hína!”.
Heta ñande misionero-kuéra hembiapove araka’evégui. Heta ombo’eve hentekuérape araka’evégui. Oĩve conexión umi miembro ha misionero-kuéra apytépe.
Yma, ikatúkuri ñañeñapytĩ eterei umi enfoque tradicional-re ha tekotevẽkuri peteĩ pandemia ñanderesape’a haĝua. Ikatu ñamopu’ã gueteri hína ita arenisca reheve oĩháme disponible granito. Tekotevẽgui, ko’áĝa ñañemoarandu hína mba’éichapa jaipurukuaa ambueichagua método, oikévape tecnología, ña’invita haĝua hentekuérape, normal ha naturalmente, ou haĝua ha ohecha, ou haĝua ha oipytyvõ ha ou haĝua ha opertenese.
Hembiapo, Hapekuéra
Kóva ha’e Ñandejára rembiapo. Ha’e ñane’invita jajuhu haĝua Hapekuéra jajapo haĝua upéva, ikatúva idiferente jaikuaava’ekuégui yma.
Upéva ojehúkuri Simón Pedro ha ambue discípulo-kuérape oho jave oikutu pira Tiberias mar-pe.
“…upe pyharépe noguenohẽi mba’evete.
“Ha ko’ẽmbávo, Jesús oĝuahẽ yguasu remba’ýpe. …
“Ha ha’e he’i chupekuéra: Peity pende red pe canóa [ambue] gotýo ha penohẽta.”
Oity hikuái irred ambue gotyo “ha ndaikatúi oguenohẽ,hetaiterei pira oikémagui.”10
Tupã ohechaukava’ekue ha ohechauka meme gueteri Ipo ipu’akapáva. Oĝuahẽta ára ñamañatahápe tapykuévo ha jaikuaáta, ko jehasa’asy árape, Tupã ñanepytyvõkuri hína jajuhu haĝua tape porãve, Hape, ñamopu’ã haĝua Irreino simiento ñemovã’ỹ ári.
Ame’ẽ che testimonio kóva ha’eha Tupã rembiapo ha Ha’e ojapo meméta gueteri heta mba’e oñeimo’ã’ỹva Ita’yrakuéra, Itavayguakuéra apytépe. Tupã ñandegueraha Ipo poriahuvereko ha py’aporã mbytépe.
Atestifika presidente Russell M. Nelson ha’eha Tupã proféta ñande árape ĝuarã.
Ñandejára apóstol ramo, poro’invita ha porohovasa “[pe]japo haĝua kyre’ỹme opa mba’e [peẽ] ikatúva; ha upérõ ikatu [pe]pyta trankílo, segurida meme reheve, pehecha haĝua Tupã salvasiõ ha tojehechauka Ijyva.”11 Ha apromete Ñandejára ojapótaha toiko umi mba’e oñeimo’ã’ỹva Hembiapo jojágui. Jesucristo rérape, Amén.