Rrekomendádo Ñandejárape
Pemoñepyrũ ko’ág̃a pende guata ha’e hag̃ua “rrekomendádo Ñandejárape”, Hi’espíritu oĩmbaite hag̃ua penendive.
Mba’éicha pendepyhareve, hermano ha hermana-kuéra. Ñande Salvador Jesucristo discípulo ramo, torýpe aha’arõkuri ñañembyaty virtualmente opa mundo rendágui ko conferencia-pe.
Kóva ha’e peteĩ ary oñeha’arõ’ỹvéva. Chéve g̃uarã oñepyrũkuri peteĩ asignasiõ reheve Primera Presidencia-gui adedika hag̃ua Ñandejára témplo marangatu Durban, Sudáfrica-pe. Araka’eve ndacheresaraimo’ãi pe óga porãnguégui. Ha katu pe mba’e ahecháva rãngue, akóinte amomba’éta tavayguakuéra dignida, umi oñembosako’i porãiteva’ekue oike hag̃ua upe óga marangatúpe. Ha’ekuéra oúkuri ñembosako’ípe oparticipa hag̃ua peteĩ umi Rrestaurasiõ jehovasa tuichavévape: Peteĩ Ñandejára róga jededika. Oúkuri hikuái korasõ henyhẽva mborayhúgui Hese ha Iñexpiasiõ reheve. Oúkuri hikuái henyhẽvo aguijégui ñande Ru Yvagaguápe ome’ẽ haguére ordenanza marangatu oporogueraháva exaltasiõme. Oúkuri hikuái tekomarangatúpe.
Umi témplo, toĩ oĩháme, ijyvateve múndo rapekuéragui. Opaite Santokuéra Ára Pahapegua témplo ko mundo-pegua—opa umi 168—oñemopu’ã testimonio ramo jerovia jarekóvagui vida eterna-re ha vy’apavẽ javivi hag̃ua upépe ñane familia ha ñande Ru Yvagagua ndive. Témplope jeho ombotuichave ñeikũmby jarekóva trinida ha evanhélio opave’ỹvagui, kompromiso jarekóva javivi ha ñambo’e hag̃ua pe añetegua, ha disposisiõ jarekóva jasegi hag̃ua Ñandejára ha ñande Salvador Jesucristo ehémplo.
Opa Tupao témplo renondépe oĩ umi ñe’ẽ iporãitéva, “Santida Ñandejárape”. Témplo ha’e Ñandejára róga ha peteĩ santuario ñañemo’ã hag̃ua múndo-gui. Hi’espíritu oañua umi otupãitũvape itápia marangatu ryepýpe . Ha’e omoĩ umi estándar ohejáva jaike Iñinvitádo ramo.
Che suegro, Blaine Twitchell, peteĩva umi kuimba’e rechapyrãve che aikuaáva, chembo’eva’ekue peteĩ lección guasu. Hermana Rasband ha che rohoakue rovisita chupe opa potávo ije’ói yvy arigua. Roikévo ikotýpe, ijobispo osẽmbota. Rosaludávo obispo-pe, apensákuri, “Iñamablete ko obispo. Ha’e ojapo hína ko’ápe imistrasiõ peteĩ miembro i’barrio-gua ijeroviarekóvape”.
Ha’e Blaine-pe, “Ajepa Iñamablete pe obispo ou ndevisita”.
Blaine oma’ẽ cherehe ha ombohovái, “Ndaha’éi oúnteva che recha. Che ajerurékuri obispo-pe ou hag̃ua aipotágui che entrevista témplo rrekomendasiõrã. Che ahaserrekomendádo Ñandejárape”. Ha péicha ojapókuri!
Pe ñe’ẽ, “rrekomendádo Ñandejárape”, opytava’ekue chendive. Omoĩkuri peteĩ jehecha pyahu pe py’ỹi ñañe’entrevista ñande Tupao lider-kuérare. Imba’eguasuetégui templogua rrekomendasiõ, pe Tupao ñepyrũme, 1891 peve, opaite templogua rrekomensadiõ ofirmava’ekue Tupaogua Presidente. 1
Taha’e huventu térã kakuaa, pene entrevista templogua rrekomendasiõrã nde’iséi mba’épa ojejapóta térã ndojejapomo’ãi. Peteĩ rrekomendasiõ ndaha’éi lista jarrevisava’erã, peteĩ permiso, térã peteĩ boléto asiento especial-rã. Oreko propósito ijyvateve ha imarangatuvéva. Pehupyty hag̃ua tekoporã peguereko hag̃ua témplo rrekomendasiõ, peviviva’erã Jesucristo Tupao Santokuéra Ára Pahapegua rekombo’épe he’iháicha.
Pene entrevista aja, peguereko oportunida peheka hag̃ua pene ángape, jerovia peẽ peguerekóvare Jesucristo ha Iñexpiasiõre. Pejehovasa peme’ẽ hag̃ua pene testimónio evanhélio rrestaurádogui, disposisiõ peguerekóva pe’sostene hag̃ua umi Ñandejára ohenoiva’ekue oisãmbyhy hag̃ua Itupao, pende jerovia evanhélio doctrina-re, pene rresponsabilida familiar ñekumpli; ha mba’éicha pende rekoporã, peguereko kastida, pejeroviareko, peneñe’ẽrendu, ha pekumpli palabra de Sabiduria, ha léi del diezmo, ha día de reposo santida. Ko’ãva ha’e principio tekotevẽva peteĩ vida ojededikávape Jesucristo ha Hembiapópe.
Pene témplo rrekomendasiõ ohechauka intensiõ espiritual pypuku peñeha’ãha hína pevivi Ñandejára leikuéra, ha pehayhu umi Ha’e ohayhúva: humilda, tekomarangatu, ñemova’ỹ, karida, py’aguasu, poriahuvereko, perdón ha ñe’ẽrendu. Ha peñekompromete pevivitaha ko’ã estándar, pehaívo pende réra upe documento sagrádope.
Pene templogua rrekomendasiõ oipe’a yvagakuéra rokẽ peẽme ha ambue tapichakuérape g̃uarã, rrito ha ordenanza isignifikádo eternova reheve, umíva apytépe oĩ bautismo, investidura, matrimonio ha sellamiento.
Ha’évo “rrekomendádo Ñandejárape” ñañemomandu’a mba’épa oñeha’arõ peteĩ Santo Ára Pahapegua ikonvénio oñongatuvágui. Che suegro Blaine, ohechava’ekue péva ñembosako’i hepýva ramo, pe ára mirĩme oñembo’ýta vove g̃uarã Ñandejára renondépe.
Pehechami Moisés ojupívo guare Monte Horeb ha Jehová Ñandejára ojehechauka chupe peteĩ ñuatĩ máta hendývape. Tupã he’i chupe, “Eipe’a nde pyrehegua, pe yvy repyrũva ha’égui yvy marangatu.” 2
Jaipe’ávo ñande sapatu témplo rokẽme he’ise jaheja okápe mundogua potapy, ha umi placer ñande distraéva ñane crecimiento espiritual-gui, ñamboyke umi mba’e omokarẽva ñande rekove porãite yvy arigua, jahejávo umi tekoñemoĩ, ha ñamoĩ tiempo ñane santo hag̃ua.
Designio divino rupi, ñande rete físico ha’e Tupã apopyre, peteĩ témplo ñande espíritupe g̃uarã, ha ojetratava’erã reverencia reheve. Añetete Primaria-gua purahéi ñe’ẽnguéra, “Che rete ha’e peteĩ témplo akóinte añangarekova’erã.” 3 Ñandejára ojehechaukárõ guare Nefita-kuérape, Ha’e omanda, “Peñemomarangatu Espíritu Santo ñemog̃uahẽ rupive, peñembo’y hag̃ua mara’ỹme cherenondépe”. 4 “Mbe’éichagua yvypóra ha’eva’erã peẽ?” Ñandejára oporandu ha upéi ombohovái, “Chéicha jepeve”. 5 Ha’e hag̃ua “rrekomendádo Ñandejárape”, ñañeha’ãva’erã ha’e hag̃ua Ha’éicha.
Chemandu’a ahendúvo guare Presidente Howard W. Hunter i’primer mensáhe conferencia general-pe, décimo cuarto Tupao Presidente ramo. Ha’e he’i: “Mba’e che korasõite guive aipotáva ha’e, opa Tupao miembro-kuéra tahekopotĩ oike hag̃ua témplope. Ñandejára horyetéta opa miembro adulto hekopotĩramo orrecibi hag̃ua peteĩ templogua rrekomendasiõ actual, ha toguereko ijehe.” 6 Ha che ambojoapy, peteĩ rrekomendasiõ de uso-limitado omoĩtaha tape hesakãva umi ñane huventu porãitépe.
Presidente Russell M. Nelson imandu’ava’ekue Presidente Hunter ñe’ẽre: “Upe ára, Junio 6, 1994-pe, pe témplo rrekomendasiõgui ioko peteĩ mba’e idiferénteva che billetera-pe. Upe mboyve, ha’ékuri peteĩ medio ahupyty hag̃ua peteĩ fin. Ha’ékuri peteĩ médio ohejáva chéve aike Ñandejára róga marangatúpe; ha katu ha’e ojapo rire upe momarandu, oiko chugui peteĩ fin ijehegui. Oiko chugui peteĩ ñe’ẽrendu rechaukaha Tupã profétape.” 7
Ndapeguerekoirõ gueteri peteĩ rrekomendasiõ térã o’vencéma, pejapo fila obispo rokẽme, Santokuéra oñembo’y haguéicha Nauvoo Témplo rokẽme ary 1846-pe. 8 Che ypykuéra oĩva’ekue ko’ã ijeroviarekóva apytépe. Ha’ekuéra ohejákuri itáva porãite ha oho oeste gotyo, ha katu ha’ekuéra oikuaa Témplope oĩha tembiasa marangatu oha’arõva chupekuéra. Sarah Rich oñe’ẽvo Iowa rape vaietére ohai, “Ndaha’éi rire jerovia ha kuaapy rohupytyva’ekue upe témplope … , pe ore je’ói ha’étakuri … pytũmbýpe rojepoirõguáicha.” 9 Péva ha’e jajeperdéva jaguatárõ ko jeikovére ñane año, inspirasiõ ha py’aguapy, témplope oñeprometéva ỹre.
Pemoñepyrũ ko’ág̃a pende guata , ha’e hag̃ua “rrekomendádo Ñandejárape”, Hi’espíritu oĩmbaite hag̃ua penendive ha umi Hi’estándar ogueru hag̃ua peẽme “akãngeta guapy”. 10
Pene huventu lider-kuéra, presidente de cuórum de élderes, presidenta Sociedad de Socorro-gua, ha pene hermano ha hermana-kuéra ministrante, penepytyvõta peñembosako’i hag̃ua ha pende obispo térã presidente de rráma, mborayhúpe pene sãmbyhýta.
Jahasa hina ára umi témplo oñemboty térã oĩnteha ára ikatuha ojeiporu. Presidente Nelson ha roservívape ijykére, pe desisiõ inspiráda oñemboty hag̃ua umi témplo “hasýkuri” ha “oremyehyhẽ jepy’apýgui”. Presidente Nelson oñeporandu ijupe, “Mba’épa ha’éta Proféta José Smith-pe? Mba’épa ha’éta Brigham Young, Wilford Woodruff ha ambue presidente-kuérape, Presidente Monson peve?” 11
Ko’ág̃a, sa’isa’i ha aguijépe ro’abri jey hína umi témplo, sellamiento ha investidura-pe g̃uarã, escala limitada-pe.
Upevére, ñanedigno témplope jaike hag̃ua, noñe’suspendéikuri. Ta’ejeymi peẽme, taha’e ikatu térã ndaikatúi peho témplope, peikotevẽ peteĩ témplope g̃uarã rrekomendasiõ vihénte, peime hag̃ua ñemovã’ỹme umi konvénio rapére.
Año pasado, Hermana Rasband ha che roimékuri peteĩ asignasiõ, Nueva Zelanda-pe, roñe’ẽvo aty guasu jóven adulto soltero-kuérape. Hasy chupekuéra oho hag̃ua témplope; pe oĩva Hamilton-pe oñerrenovákuri, ha oha’arõ hikuái Auckland témplo palada inicial. Upevére, che añandu omokyre’ỹva’erãha chupekuéra orrenova térã ojerure hag̃ua témplo rrekomendasiõ.
Ndaikatúirõ jepe opresenta umíva pe témplope, ha’ekuéra ikatúta oñepresenta ijupe Ñandejára renondépe, potĩme ha ñembosako’ípe oservi hag̃ua Chupe. Pene digno peguereko hag̃ua témplo rrekomensiõ vihénte, ha’e peteĩ ñemo’ã pe añágui, pejapo rupi peteĩ konvénio firme Ñandejára ndive, pende rekove rehegua, ha péicha avei, ha’e peteĩ promésa pe Espíritu oĩtaha penendive.
Jajapo témplo rembiapo jahekáramo umi ñane ñemoñare ha ñamondo herakuéra umi ordenansarã. Ñane templokuéra oñemboty aja, ikatu gueteri jaheka umi ñane familia réra. Tupã Espíritu reheve ñane korasõme, ñande ja’actua vikariamente, jarrepresentávo chupekuéra ha’e hag̃ua hikuái “rrekomendádo Ñandejárape ”.
Aservírõ guare Director Ejecutivo ramo Templo Departamento-pe, ahendu Presidente Gordon B. Hinckley imandu’a pe escritura Ñandejára he’iva’ekue Nauvoo Témplore: “Peheja tembiapo che templogua, ha opa umi tembiapo ahechaukava’ekue peẽme, tojejapo meme ha ani oñembopa; ha tatuichave pende jesareko, ha pene perseverancia, ha pene paciencia, ha umi pene rembiapo, ha ndaipóri mba’éicha oñehundívo pende jopói, he’i pe Señor de las Huestes.” 12
Ñane rembiapo templopegua ojoaju ñane jopói ijapyra’ỹvare. Nda’aréi ñeñemoĩhague jeipy’ara’ãme. Ñandejára ñanerenói ñamba’apo hag̃ua umi témplope “jesareko, … ñemova’ỹ, ha py’aguapýpe”. 13 Ha’e hag̃ua “rrekomendádo Ñandejárape” oikotevẽ ko’ã kualida. Jajesarekova’erã javivi hag̃ua umi tembiapoukapy, tapia ñañagareko umi ñane konvénio temploguáre, ha ñame’ẽ aguije pe Ñandejára ñanembo’e memévare umíva rehegua, ha ñande py’aguapy ñaha’arõvo umi témplo ojepe’apaite peve.
Ñandejára ñanerenói jave “ñambotuicha” hag̃ua ñane rembiapo, Ha’e ojerure hína ñande rekojojave hag̃ua. Péicha jahecha, ikatu ñambotuichave ñane ñemoarandu umi escritura-pe, ñande historia familiar jeheka, ha umi ñane ñembo’e jeroviápe, ikatu hag̃ua ñakomparti mborayhu jarekóva Ñandejára rógare umi oñembosako’íva ndive o’rrecibi hag̃ua peteĩ témplo rrekomendasiõ, especialmente umi ñane familiagua.
Ñandejára Jesucristo Apóstol ramo, apromete peẽme, peñeha’ãvo pembotuichave pene ñeha’ã joja, peñandúta oñembopyahuha devosiõ peguerekóva Tupã, pe Túva ha Jesucristo-re, peñandúta pe Espíritu Santo peneisãmbyhy guasuve, pende aguijéta umi pene konvénio marangatúre, ha peñandúta py’aguapy peikuaávo peẽ ha’eha “rrekomendádo Ñandejárape”. Jesucristo rérape, Amén.