Jajeipy’ara’ã, jajeprova ha ñañemoapesỹi
Jehovasa tuichavéva jahupytýva jahechauka vove ñanderekojojaha ñane konveniokuérape ñande pruevakuéra aja ha’e peteĩ ñemoambue ñane naturaleza-pe.
Che hermano ha hermana-kuéra pohayhuetéva, che aguije ikatu haguére añe’ẽ peẽme ko árape. Aha’arõ pomombarete tekove ha’etévaicharõ hasyeterei ha iñinsierto. Heta peẽme g̃uarã upe ára ha’e ko’ág̃a; Ha ndaha’éirõ ko’ág̃a, oúta ag̃ave.
Ndaha’éi peteĩ jehecha iñypytũva, Ha’e realista ha katu optimista jepeve, Tupã propósito ojapo hag̃ua ko múndo rupi . Upe propósito ha’ékuri ome’ẽ Ita’yrakuérape oportunidad ojeprova hag̃ua ijupe ikatuha ha oiporavoseha iporãva, hasy vove ojejapo hag̃ua. Upéicha, inaturalesa oñemoambuéta ha ojoguavéta Chupe. Ha’e oikuaa upéva oikotevẽtaha peteĩ fe Hese oñemova’ỹva.
Hetave umi mba’e aikuaáva ou che familia-gui. Aguerokóvo 8 áño rupi, che sy iñaranduetéva ojerure che ryke’y ha chéve roho hag̃ua hendive roguenohẽ hag̃ua ñana ore familia kokuégui. Ikatu upéva tembiapo isencillo vaicha, ha katu ore roiko Nueva Jersey-pe. Upépe oky mante. Pe yvy ha’e arcilla atã. Ha umi ñana okakuaa pya’eve umi ka’avógui.
Chemandu’a mba’eichaitepa ajepicha umi ñana operõ che pópe, opytávo hapo oñeñotỹ hatãva pe yvýpe. Che sy ha che ryke’y oho meme tenonde gotyo isúrkore. Ha che katu, añeha’ãvérõ, apytave tapykuépe
“ ¡Hasyeterei ningo!” asapukái.
Oñembyasy rãngue chendie, che sy opukavy ha he’i: “O, Hal, añetehápe hasy. Upeichava’erã voi; Ko tekove ha’e peteĩ pruéva.”
Upérõ, aikuaa iñe’ẽnguéra añeteguaha ha añetéta gueteri umi che ára oútavape.
Mba’érepa che sy opukavýra’e mborayhu reheve antende heta ary rire, amoñe’ẽvo mba’éicha ñande Ru Yvagagua ha Ita’ýra ohayhuetéva Jesucristo, omyesakã Ipropósito ojapo hag̃ua ko múndo, ome’ẽ hag̃ua Ita’yrakuérape, omoheñoiva’ekue espiritualmente, oportunidad oguereko hag̃ua tekove mortal:
“Ha pévape jaipy’ara’ãta chupekuéra, jahecha hag̃ua ojapótapa hikuái opa mba’e Ñandejára Itupã he’íva chupekuéra;
“Ha umi oñongatúvape ijestado peteĩha oñeme’ẽvéta; ha umi noñongatúiva ijestádo peteĩha ndoguerekomo’ãi gloria upe rréinope umi oñongatúva ijestado peteĩha ndive; ha umi oñongatúvape ijestado mokõiha, oñeme’ẽvéta gloria iñakã ári tapiaite g̃uarã.”1
Peẽ ha che ja’acepta upe invitación jajeipy’ara’ã ha jajeprova hag̃ua ñandejupe jaiporavotaha ñaneñe’ẽrendu Tupã rembiapoukapykuérare, nañaimevéi vove ñande Ru Yvagagua renondépe.
Jepe upe ñande Ru Yvagagua invitación amoroso, Lucifer oipy’amovã tercera parte umi Ita’yrakuérape heñoiva’ekue espiritualmente, osegui hag̃ua chupe ha ombotove haĝua ñande Ru plan ha’éva ñande jekakuaa ha vya’pavẽ opave’ỹvape g̃uarã. Oñemoĩ haguére Tupãre, Satana oñemosẽ iseguidorkuéra ndive. Ha ko’ág̃a ha’e oñeha’ã hetápe omomombyry Tupãgui hekove terrenal aja.
Umi ja’aseptáva pe plan, jajapo upéva ñande jerovia rupi Jesucristo-re, oñeikuave’ẽva’ekue ha’e hag̃ua ñande Salvador ha Redentor. Uperõ, oiméne ñande jaguerovia, ñanekangýrõ jepe ko mortalidad-pe ha oĩrõ jepe umi aña mbarete oñemoĩva ñanderehe, umi iporãva mbaretekue tuichaitereivéta.
Ñande Ru Yvagagua ha Jesucristo pendekuaa ha penderayhu. Ha’ekuéra oipota peho jey Hendápe ha taha’e Ha’ekuéraicha. Pende éxito ha’e Hi’exitokuéra. Peẽ peñandu upe mborayhu ñemoañete oúva Espiritu Santo rupive, pemoñe’ẽvo ko’ã ñe’ẽ: “Péina ápe, kóva ha’e che obra ha che gloria: ajapo yvypóra ñemano’ỹ ha tekove opave’ỹva.”2
Tupã oguereko pu’aka ombohasyve’ỹ hag̃ua ñande rape. Ha’e omongaru maná reheve Israel ra’ykuérape oje’ói aja tierra prometida gotyo. Iministerio terrenal aja, Ñandejára omonguera hasykatúvape, omopu’ã umi omanova’ekuépe ha okalma pe yguasu. Ijeykovejey rire, Ha’e oipe’a “ka’irãi umi oñeñapytĩvape g̃uarã.”3
Jepe proféta José Smith, peteĩ umi tuichavéva Iprofetakuéra apytépe, ohasa’asy ka’irãime ha oñembo’e chupe peteĩ lección iporãva opavavépe g̃uarã ha ñaikotevẽva umi ñande jerovia pruévape: “Ha re´aramo yvykuápe, pe iñañáva po rupive, ha reñekondena remanóvo; ndereitý ramo yvykuápe; yvytu vai oñemoĩ ramo nde rehe; yvága oñemohũmba ramo ha opavave oîva ombotysérô nde rape; pe infierno rokê ojeipe´árõ ndéve nemokõ hag̃ua, eikũmby che ra´y, opa umi mba´e ha´éta ndéve tembiasakue, ha ha´éta mba´e porã ndéve g̃uarã”4
Ikatu peñeporandu razonablemente mba’érepa peteĩ Tupã ñanderayhúva ha ipu’akapáva oheja ñande prueva terrenal tahasyeterei. Upéva Ha’e oikuaágui jakakuaava’erãha potĩme ha estatura espiritual-pe ikatukuaa hag̃uáicha jaiko Hendive, familia-icha, tapiaite g̃uarã. Ojapo haĝua upéva posible, ñande Ru Yvagagua ome’ẽ ñandéve peteĩ Salvador ha pu’aka jaiporavo haĝua ñandejehegui, fe rupive, ñaneñe’ẽrendutaha Hembiapoukapykuérare ha ñañearrepentíta, upéicha jaju haĝua Hendápe.
Ñande Ru plan de felicidad oguereko objetivo central ramo ñande taha’eve Ita’ýra Ohayhuetéva Jesucristo-icha. Pe Salvador ehemplo ha’e ñande guía porãve opa mba’épe. Ha’e avei ojeprovava’erã ijupe. Ha’e opersevera opaite ñande Ru Yvagagua ta’yrakuéra rehe ha ohepyme’ẽ ñane angaipakuérare. Ha’e oñandu opaite umi ouva’ekue ha oútava ko tekove terrenal-pe jehasa’asykuéra.
Peñeporandu vove mboy ñembyasýpa ikatu pegueropu’aka porã, pepensa Hese. Ha’e ohasa’asy penderehe oikuaa hag̃ua mba’éichapa penemopu’ãta. Ikatu Ha’e noguenohẽi pendehegui pene mba’e pohýi, ha katu ome’ẽta peẽme mbarete, angapyhy ha esperanza. Ha’e oikuaa porã upe tape; Ha’e hoy’u pe kópa iróva. Ha’e ohasa opavave jehasa’asy.
Peẽ peñenutri ha peñemoangapyhy peteĩ Salvador penderayhuetereívare, oikuaáva mba’éichapa penepytyvõta oimeraẽ pruéva pembohovakévape. Alma ombo’e:
“Ha haʼe osẽta, ohasávo mbaʼeʼasy ha jeikoʼasy ha jeipyʼaraʼã opaichaguáva; ha kóva oñekumpli hag̃ua pe ñeʼẽ heʼíva ojagarrataha hiʼári itavayguakuéra mbaʼeʼasy ha imbaʼasykuéra.
“Ha haʼe ojagarráta hiʼári ñemano, ojora hag̃ua umi ñemano jokuaha ojopýva itavayguakuérape; ha haʼe ojagarráta hiʼári imbaʼasykuéra, ipyʼa henyhẽ hag̃ua poriahuverekógui, pe tete rupive, oikuaa hag̃ua pe tete rupive mbaʼéichapa oipytyvõvaʼerã itavayguakuérape, mbaʼasy oguerekoháicha hikuái.”5
Peteĩ forma Ha’e ome’ẽtaháicha peẽme socorro ha’e pene’invitávo penemandu’a tapiaite hag̃ua Hese ha peju Hendápe. Ha’e ñanemokyre’ỹ:
“Peju cherendápe opaite peẽ peñeha’ãmbáva ha pegueraháva mba’e pohýi, ha che porombopytu’úta.
“Pemoĩ che yugo pende ári ha pe’aprende chehegui; chemánsova ha humilde che korasõme; ha pejuhúta pytu’u pene ángape g̃uarã.”6
Jajuháicha Hendápe ha’e jajedeleitávo Iñe’ẽnguérape, ñamomba’apo jerovia arrepentimientorã, jaiporavo ñañemongarai ha ñañekonfirma umi Isiervo oje’autorisávare, ha upéi, ñañongatu ñane konveniokuéra Tupã ndive. Ha’e ombou peẽme Espiritu Santo ha’e hag̃ua pene kompañéro, moangapyhyha ha guía.
Peiko aja digno peguereko hag̃ua Espiritu Santo don, Ñandejára peneisambyhykuaáta seguridad-pe, ndaikatúiramo jepe pehecha pe tape. Che kásope, hetave vése Ha’e ohechauka chéve peteĩ térã mokõi umi páso ame’ẽva’erã. Pokã jave ohechauka chéve peteĩ vista pe ouva’erã aĝavégui, ha katu jepe umi vistáso sapy’agua chegia umi aiporavóvape ajapo hag̃ua tekove diario-pe.
Ñandejára omyesakã:
“Ko’áĝa rupi ndaikatúi pehecha pende resa natural reheve pene Tupã designio umi mba’e oútava tenondeve rehegua, ni upe gloria oútava … heta jeiko’asy rire.
“Heta jeiko’asy rire oúgui umi jehovasa.”7
Jehovasa tuichavéva jahupytýva jahechauka vove ñanderekojojaha ñane konveniokuérape ñande pruevakuéra aja ha’e peteĩ ñemoambue ñane naturaleza-pe. Jaiporavóramo ñañongatu ñane konveniokuéra, Jesucristo pu’aka ha Iñexpiasiõ jehovasakuéra ikatu omba’apo ñandepype. Oñemohu’ũ ñane korasõ jahayhu, ñaperdona ha ña’invita haĝua ambuekuérape ou haĝua pe Salvador-pe. Ñane confianza Ñandejárare okakuaáta. Ñande kyhyjekuéra pokãvéta.
Ko’áĝa, oñeprometerõ jepe ñandéve umi jehovasa jehasa’asy rupi, ñande ndajahekái jehasa’asy. Ko tekove terrenal-pe káda uno jaguerekóta heta oportunidad jajeprova hag̃ua ñandejupe, jahasa hag̃ua umi prueva hasy porãva ikatu hag̃uáicha ha’eve ñande Salvador ha ñande Ru Yvagaguáicha.
Avei, jahechakuaava’erã ambuekuéra jehasa’asy ha ñañeha’ãva’erã ñaipytyvõ. Upéva hasyvéta ñandete jajeipy’ara’ã hatã vove hína. Ha katu jahechakuaáta ñambovevýivo ambue tapicha kárga, taha’e jepe michĩmi, ñane lómo oñemombarete ha jahecha peteĩ tesape pytũmbýpe.
Upévape, Ñandejára ha’e ñane modélo ha ehemplo. Gólgota kurusúpe, ohasa’asy rire ñembyasy tuichaitéva ikatuva’ekue ojuka chupe ndaha’éirõ Ha’e Tupã Ra’y Unihénito, Ha’e omaña umi ojukávare chupe hína ha he’i Itúvape: “Eperdona chupekuéra, ndoikuaái ningo pe ojapóva.”8 Ohasa’asy aja opavave umi oikotávare opa árape, Ha’e omaña kurusu guive Juan ha Isýre oñembyasýva hína, ha oministra chupe ipruévape:
“Ha Jesús ohechávo Isýpe ha ijypýpe hemimbo’e Ha’e ohayhúvape, he’i Isýpe: Nde kuñakarai, péina pépe ne memby!
“Upéi he’i hemimbo’épe: Péina pépe nde sy!” Ha upete guive pe temimbo’e ogueraha chupe hógape”9
Hembiapo rupi upe ára isagradovévape opaitégui, Ha’e ome’ẽ voluntariamente Hekove peteĩ teĩ ñanderehe, oikuave’ẽvo ñandéve ndaha’éi socorro añónte ko tekovépe, ha katu tekove opave’ỹva pe oúvape.
Ahechákuri hénte opu’ãva yvate hekojoja rire umi prueva hasyetéva aja. Oĩ heta ehemplo upévagui tupaópe ko’ã árape. Jehasa’asy rupi, hentekúera oñesũ. Iñeha’ã ha hekojoja meme rupi, ha’eve ñande Salvador ha ñande Ru Yvagaguáicha.
A’aprende ambue lección che sýgui. Ha’e imitãrõguare, ojagarra chupe difteria ha haimete omano. Uperire, ojagarra chupe meningitis. Itúva imitã gueteri omano vove, upévare che sy ha ijoyke’ykuéra oipytyvõ isýpe.
Hekove pukukue aja che sy oñandu umi mba’asy pruéva efecto. Umi diez áño paha hekovépe, oje’opera heta vése. Ha katu opa ko’ã mba’e rupi, ha’e ohechauka ijeroviarekohague Ñandejára ndive, oĩrõ jepe tupápe. Uniko pintura oĩva ikotýpe ha’e peteĩ pe Salvador reheguáva. Iñe’ẽ paha chéve g̃uarã omanombotávo ha’ékuri: “Hal, ojogua rejerrefriataha. Eñeñangarekókena.”
Ifuneralpe pe oñe’ẽ paháva ha’ékuri élder Spencer W. Kimball. Oñe’ẽ rire’imi umi prueva ha’e oguerekova’ekue ha ijeroviarekógui, kóva ha’e he’iva’ekue: “Oiméne oĩ pende apytépe oñeporandúva mba’érepa Mildred ohasa’asyeterei ha pukuete ajákuri. Ha’éta peẽme mba’érepa. Ñandejára omoapesỹiseve’imi haguére chupe”
Ame’ẽ che aguije umi heta Jesucristo tupaogua miembro ijeroviarekóva, ogueraháva umi kárga pohýi jerovia meme reheve ha oipytyvõ hapichápe ogueraha haĝua imba’éva, Ñandejára omoapesỹive’imi aja chupekuéra. Aipyso avei che mborayhu ha momorã umi oporoñangarekóvape ha umi líder opa ko múndope oservíva ambuekuérape ha’ekuéra ha ifamilia oñemoapesỹi aja hína.
Atestifika ñande ha’eha peteĩ Túva Yvagagua ñanderayhúva ta’yrakuéra. Añandu presidente Russell M. Nelson mborayhu opavave ñande rehe. Ha’e Ñandejára proféta ko múndope ko árape. Upévagui atestifika Ñandejára Jesucristo réra sagrado-pe. Amén.