1 Faauta o’u uso pele e, talu ai ona ua faamatuu mai a’u ou te sau ia te outou, o lea ou te taumafai ai e tautala atu ia te outou i la’u gagana; ioe, e lo’u lava gutu, talu ai ona o le taimi muamua lenei ua ou tautala atu ai ia te outou i upu a lo’u gutu, ona sa ou faaalu le taimi atoa i le nofoa-faamasino, ona o le tele o tiute sa lē mafai ai ona ou sau ia te outou.

2 Ma sa oo lava semanu po ua lē mafai ona ou sau nei ia te outou i le taimi nei pe a na lē tuuina atu le nofoa-faamasino i se tasi, e pule e sui ia te a’u; ma ua tuuina mai e le Alii i lona alofa mutimutivale tele ia ou sau ia te outou.

3 Ma faauta, ua ou sau ma faamoemoega silisili ma le naunau tele o le a ou maua mai ua outou faamaualaloina outou lava i luma o le Atua, ma o loo outou aioi atu pea e lē aunoa mo lona alofa tunoa, ma o le a ou maua mai ua outou lē pōnā i ona luma, o le a ou maua mai ua outou lē o i ai i faigata matuiā sa i ai o tatou uso i Sara’emila.

4 Ae ia faamanuina lava le suafa o le Atua, ona ua ia tuuina mai ia te a’u ia ou iloa, ioe, tuuina mai ia te a’u le olioli tele na’uā, i le iloa ua toe faatutūina i latou i le ala o lana amiotonu.

5 Ma ou te talitonu, e tusa ma le Agaga o le Atua ua ia te au, o le a ou maua foi le olioli ia te outou; ae ui i lea ou te lē naunau e maua lo’u olioli ia te outou e ala i puapuaga e tele ma le faanoanoa sa ou maua mo le au uso i Sara’emila, auā faauta, sa oo mai lo’u olioli ia i latou, ina ua mavae ona ou asaina aafiaga e tele o puapuaga ma le faanoanoa.

6 Ae faauta, ou te talitonu tou te lē o i ai i se tulaga o le lē talitonu tele e pei ona sa i ai o outou uso; ou te talitonu e lē o faafefeteina outou i le faamaualuluga o o outou loto; ioe, ou te talitonu tou te le’i pupū o outou loto i oa ma mea lē aoga o le lalolagi; ioe, ou te talitonu tou te lē o tapua’i i tupua, ae o loo outou tapua’i atu i le Atua moni o loo soifua, ma o loo outou tulimatai i luma mo le faamagaloina o a outou agasala, ma le faatuatua tumau e faavavau, lea o le a oo mai.

7 Auā faauta, ou te fai atu ia te outou, e tele mea o le a oo mai; ma faauta, e i ai se mea e tasi ua sili atu ona taua nai lo ia mea uma—auā faauta, ua lē o toe mamao le taimi o le a soifua ma afio mai ai le Togiola i totonu o ona tagata.

8 Faauta, ou te lē o fai atu o le a afio mai o ia i totonu o i tatou i le taimi o lona soifuaga i lona fale apitaga faaletino; auā faauta, sa le’i fetalai mai le Agaga ia te a’u o le tulaga lena o le a i ai. O lenei e faatatau i lenei mea ou te lē iloa; ae o le tele lenei o le mea ua ou iloa, ua i ai i le Alii le Atua le mana na te faia ai mea uma e tusa ai ma lana afioga.

9 Ae faauta, o mea nei na fetalai mai e le Agaga ia te au, e faapea: Alaga atu i lenei nuu, ia fai atu—Ia outou salamo, ma teuteu le ala o le Alii, ma savavali i ona ala, ua sa’o ia; ona faauta, ua lata mai le malo o le lagi, ma ua afio mai le Alo o le Atua i luga o le fogaeleele.

10 Ma faauta, o le a fanau mai o ia ia Maria, i Ierusalema, le laueleele lea o tua’ā o o tatou tua’ā, ona o ia o se taupou, o se ipu pele ma filifilia, o lē o le a faamalumaluina ma to i le mana o le Agaga Paia, ma fanau mai se atalii, ioe, o le Alo lava o le Atua.

11 Ma o le a afio atu o ia, ma mafatia i tigā ma puapuaga ma faaosoosoga o ituaiga eseese uma; ma o le a oo ia te ia nei mea, ina ia mafai ona faataunuuina o le upu e faapea, o le a ia ave i ona luga tigā ma ma’i o ona tagata.

12 Ma o le a ia ave i ona luga le oti, ina ia mafai ona ia tatalaina fusi o le oti ia ua noatia ai ona tagata; ma o le a ia ave i ona luga o latou vaivaiga, ina ia mafai ona faatumulia ona lagona i le alofa mutimutivale, e tusa ai ma la le tino, ina ia mafai ona ia silafia e tusa ai ma la le tino, le ala e fesoasoani ai i ona tagata, e tusa ai ma o latou vaivaiga.

13 O lenei ua silafia e le Agaga mea uma; ae ui i lea, e mafatia le Alo o le Atua e tusa ai ma la le tino, ina ia mafai ona ia ave i ona luga agasala a ona tagata, ina ia mafai ona ia soloi ese a latou solitulafono e tusa ai ma le mana o lana lavea’iina; ma o lenei faauta, o le molimau lenei ua i ai ia te au.

14 O lenei ou te fai atu ia te outou e ao ina outou salamo, ma toe fanauina; ona o loo fetalai mai le Agaga afai e lē toe fanauina outou, e lē mafai ona outou mautofi i le malo o le lagi; o lea ia o mai ia ma papatiso i le salamo, ina ia mafai ona faamamaina outou mai ia outou agasala, ina ia mafai ona outou maua le faatuatua i le Tamai Mamoe a le Atua, o lē na te aveesea agasala a le lalolagi, o lē ua malosi e faaola ma faamamā mai i amioletonu uma.

15 Ioe, ou te fai atu ia te outou, ia o mai ia, ma aua le fefefe, ma tuu ese agasala taitasi uma, ia ua faigofie ona siomia ai outou, ia ua noatia ai outou i lalo i le faafanoga, ioe, o mai ia ma o atu, ma faaali atu i lo outou Atua ua outou loto e salamo ia outou agasala, ma ulu atu i se feagaiga faatasi ma ia e tausi i ana poloaiga, ma molimau atu lenei mea ia te ia i le asō i lo outou o ifo ai i totonu o vai o le papatisoga.

16 Ma o soo se tasi e faia lenei mea, ma tausi i poloaiga a le Atua mai le taimi lena ma le agai i luma, o ia lava lea o le a ia manatua ua ou fai atu ia te ia, ioe, o le a manatua e ia na ou fai atu ia te ia, o le a maua e ia le ola e faavavau, e tusa ma le molimau a le Agaga Paia, lea ua molimau mai ia te au.

17 Ma o lenei o’u uso pele e, tou te talitonu ea i nei mea? Faauta, ou te fai atu ia te outou, ioe, ua ou iloa ua outou talitonu i ai; ma o le ala ua ou iloa ua outou talitonu i ai, o le molimau lea a le Agaga ua i totonu ia te au. Ma o lenei ona o le malosi o lo outou faatuatua e uiga i lena mea, ioe, e uiga i mea ua ou tautala atu ai, ua tele lava lo’u olioli.

18 Ona e pei ona sa ou fai atu ia te outou mai le amataga, sa ou naunau tele lava ia outou lē i ai i le tulaga ogaoga e pei o o outou uso, ua faapea lava ona ou iloa ua faamalieina o’u moomooga.

19 Ona ua ou vaai atu ua outou i ai i totonu o le ala o le amiotonu; ua ou vaai atu ua outou i ai i totonu o le ala e tau atu i le malo o le Atua; ioe, ua ou vaai atu ua outou faasa’osa’oina ona ala.

20 Ua ou vaai atu ua uma ona faailoa mai ia te outou, e ala i le molimau a lana afioga, e lē mafai ona savali o ia i ala pi’opi’o; pe alu ese o ia mai le mea na ia fetalai mai ai; pe o ia te ia se foliga o le liliu mai le itu taumatau i le itu tauagavale, pe mai le mea sa’o i le mea sesē; o lea, o lona ala o se taamilosaga faavavau e tasi.

21 Ma e lē afio o ia i ni malumalu ua lē paia; pe mafai foi ona talia se mea eleelea po o se mea ua lē mamā i le malo o le Atua; o lea ou te fai atu ai ia te outou, o le a oo mai le taimi, ioe, ma o le aso gataaga lea o le a oo mai ai, o ia o lē ua eleelea o le a tumau pea i lona eleelea.

22 Ma o lenei o’u uso pele e, ua ou fai atu nei mea ia te outou ina ia mafai ai ona ou fagua o outou i se lagona o lo outou tiute i le Atua, ina ia mafai ona outou savavali ma le lē ponā i ona luma, ina ia mafai ona outou savavali e tusa ai ma le faatulagaga paia a le Atua, lea ua talia i ai outou.

23 Ma o lenei ou te manao ina ia outou lotomaualalalo, ma augofie ma agamalu; e faigofie ona faaoleoleina; tumu i le onosai ma le tali-tigā; ma faautauta i mea uma; ma filigā i le tausiga o poloaiga a le Atua i taimi uma; ma ole atu mo soo se mea tou te manaomia, faaleagaga ma faaletino; ma faafoi atu i taimi uma le faafetai i le Atua mo soo se mea o mea uma tou te maua.

24 Ma vaai ua i ai ia te outou le faatuatua, faamoemoe, ma le alofa mama, ona tumu ai lea o outou i galuega lelei i taimi uma.

25 Ma talosia ia faamanuia mai le Alii ia te outou, ma tausi o outou ofu ia lē pisipisia, ina ia mafai ona aumai o outou i le taimi mulimuli e nonofo faatasi i lalo ma Aperaamo, Isaako, ma Iakopo, ma perofeta paia o e na i ai talu mai le amataga o le lalolagi, ma le lē pisipisia o o outou ofu e pei lava o le lē pisipisia o o latou ofu, i totonu o le malo o le lagi e lē toe o ese atu i fafo.

26 Ma o lenei o’u uso pele e, ua ou tautala atu nei upu ia te outou e tusa ma le Agaga lea ua molimau mai i totonu ia te a’u; ma ua olioli tele lava lo’u agaga, ona o le filigā tele ma le gauai ua outou tuuina mai i a’u upu.

27 Ma o lenei, talosia ia mau i o outou luga le filemu o le Atua, ma luga o o outou fale ma laueleele, ma luga o a outou lafu ma fagaga, ma a outou mea uma ua maua, o outou fafine ma a outou fanau, e tusa ma lo outou faatuatua ma a outou galuega lelei, mai le taimi nei e oo atu i luma ma le faavavau. Ma ua faapea ona ou tautala atu ai. Amene.