1 Ma o lenei sa oo ina o atu atalii o Alema i totonu o le nuu, e tala’i atu le upu ia te i latou. Ma o Alema, o ia lava foi, sa le mafai ona malolō, ma sa alu atu foi o ia.

2 O lenei o le a matou le toe fai atu ni isi mea e uiga i la latou talaiga, vagana ai sa latou tala’i atu le upu, ma le upumoni, e tusa ma le agaga o valoaga ma faaaliga; ma sa latou tala’i atu e tusa ma le faatulagaga paia a le Atua lea na valaaulia i ai i latou.

3 Ma o lenei ou te toe foi i se tala o taua i le va o sa Nifaē ma sa Lamanā, i le lona sefulu ma le valu o tausaga o le nofoaiga a faamasino.

4 Auā faauta, sa oo ina avea sa Soramā ma ni sa Lamanā; o lea, i le amataga o le tausaga e sefulu ma le valu na vaai ai tagata o sa Nifaē ua o mai sa Lamanā ia i latou; o lea na latou faia ai sauniuniga mo le taua; ioe, sa latou faapotopoto faatasi a latou autau i le laueleele o Seasona.

5 Ma sa oo ina o mai sa Lamanā ma a latou afe ma afe; ma sa latou o mai i le laueleele o Anetionuma, o le laueleele lea o sa Soramā; ma o le tagata e igoa ia Sera’emina sa avea ma o latou taitai.

6 Ma o lenei, ona o tagata sa Amalekā, sa sili atu ona amioleaga ma uiga fasioti tagata nai lo sa Lamanā, ia i latou lava, o lea, na tofia ai e Sera’emina kapeteni sili i luga o sa Lamanā, ma o i latou uma o sa Amalekā ma sa Soramā.

7 O lenei sa ia faia lenei mea ina ia mafai ona ia faatumauina lo latou ita e faasaga ia sa Nifaē, ina ia mafai ona ia aumai o i latou i lalo o lana pule e faataunuu ai ana fuafuaga.

8 Auā faauta, o ana fuafuaga o le faaoso lea o sa Lamanā ia feita e faasaga ia sa Nifaē; sa ia faia lenei mea ina ia mafai ona ia ave ai le pule tele i luga o i latou, ma ina ia mafai foi ona ia maua ai o le pule i luga o sa Nifaē i le aumaia o i latou i le pologa.

9 Ma o lenei o le faamoemoe o sa Nifaē o le tausia lea o o latou fanua, ma o latou fale, ma a latou avā, ma a latou fanau, ina ia mafai ona latou faasaoina i latou mai lima o o latou fili; ma ina ia mafai foi ona latou faatumau a latou aia ma o latou avanoa, ioe, ma lo latou saolotoga foi, ina ia mafai ona latou tapuai i le Atua e tusa ma o latou manao.

10 Ona sa latou iloa afai latou te pa’u’ū atu i lima o sa Lamanā, ma soo se tasi e tapuai i le Atua, le Atua moni ma soifua, i le agaga ma le upumoni, e faaumatia e sa Lamanā.

11 Ioe, ma sa latou iloa foi le feita tele o sa Lamanā e faasaga i o latou uso, o e o tagata o Aneti-Nifae-Liae, o e sa ta’ua o le nuu o Amona—ma sa latou le aveina auupega, ioe, sa uma ona latou ulu atu i se feagaiga ma sa latou le fia solia—o lea, afai e pa’u’ū atu i latou i lima o sa Lamanā o le a faaumatia i latou.

12 Ma sa le fia tuua i latou e sa Nifaē ia faaumatiaina; o lea na latou tuu atu ai ia te i latou laueleele mo o latou tofi.

13 Ma sa tuu atu e le nuu o Amona ia sa Nifaē se vaega tele o a latou mea e tausi ai a latou autau; ma sa faapea ona faamalosia sa Nifaē, na’o i latou lava, e tetee atu faasaga ia sa Lamanā, o i latou o se tuufaatasiga o Lamana ma Lemuelu, ma atalii o Isamaeli, ma i latou uma o e na faatuiese mai sa Nifaē, o i latou ia o sa Amalekā ma sa Soramā, ma ē na tupuga mai i faitaulaga a Noa.

14 O lenei o ia tagata na tupuga mai i faitaulaga a Noa, sa matua toatele lava, toetoe, e pei o le toatele o sa Nifaē; ma sa faapea ona faamalosia ai sa Nifaē e tau ma o latou uso, e oo lava i le faamasaaina o le toto.

15 Ma sa oo ina a’o faapotopoto faatasi autau a sa Lamanā i le laueleele o Anetionuma, faauta, sa sauni autau a sa Nifaē e fetaiai ma i latou i le laueleele o Seasona.

16 O lenei, o le ta’ita’i o sa Nifaē, po o le tagata o le na tofia e avea ma kapeteni sili ia sa Nifaē—o lenei o le kapeteni sili na taitaiina autau uma a sa Nifaē—ma o lona igoa o Moronae.

17 Ma sa ave e Moronae le pule atoa, ma le puleaina o a latou taua. Ma sa na’o le luasefulu ma le lima ona tausaga ina ua tofia o ia e avea ma kapeteni sili i autau a sa Nifaē.

18 Ma sa oo ina ia faafetaiai sa Lamanā i tuaoi o Seasona, ma sa faaauupegaina ona tagata i pelu, ma simetea, ma ituaiga o auupega eseese uma o taua.

19 Ma ina ua vaai mai autau a sa Lamanā ua sauni le nuu o Nifae, pe ua sauni e Moronae ona tagata ma ufifatafata ma talita-ogālima, ioe, ma talitā foi e puipui ai o latou ulu, ma sa latou oofu foi i ofu mafiafia—

20 O lenei sa lei saunia le autau a Sera’emina i ni mea faapea; sa na’o a latou pelu, ma a latou simetea, ma a latou aufana, ma a latou ufanafana, ma a latou maa ma a latou maata sa ia te i latou; ma sa latou le lavalavā, vagana ai se pa’u manu sa fusi i o latou sulugatiti; ioe, sa le lavalavā uma i latou, vagana ai sa Soramā ma sa Amalekā;

21 Ae sa lei faaauupegaina i latou i ni ufifatafata, po o ni talitā—o lea, sa latou matuā fefefe tele ai i autau a sa Nifaē ona o o latou ofutau, e ui ina sa silisili mamao atu lo latou toatele nai lo sa Nifaē.

22 Faauta, o lenei sa oo ina latou fefefe e o mai e faasaga ia sa Nifaē i tuaoi o Seasona; o lea na latou o ese atu ai mai le laueleele o Anetionuma i le vao, ma alu la latou malaga taamilo atu i le vao, e mamao i tafatafa ane o le mata o le vaitafe o Saitonu, ina ia mafai ona latou o mai i le laueleele o Maneti ma fai le laueleele mo i latou lava; ona sa latou le manatu e iloa e autau a Moronae le mea ua latou o i ai.

23 Peitai sa oo ina o le taimi lava na latou o ese atu ai i le vao na auina atu ai e Moronae ni sipai i le vao e mata’i la latou togalauapi; ma o Moronae, i lona iloa foi e uiga i valoaga a Alema, sa ia auina atu ni tagata faapitoa ia te ia, e manao ia te ia ia ole atu o ia i le Alii po o fea e tatau ona o i ai autau a sa Nifaē e puipuia ai i latou lava e faasaga ia sa Lamanā.

24 Ma sa oo ina oo mai le afioga a le Alii ia Alema, ma sa ta’u atu e Alema i avefeau a Moronae, o loo savavali faataamilo atu autau a sa Lamanā i le vao, ina ia mafai ona latou o mai i le laueleele o Maneti, ina ia mafai ona latou amata se osofaiga i luga o le vaega sili ona vaivai o le nuu. Ma sa o atu ia avefeau ma avatu le savali ia Moronae.

25 O lenei, sa tuu e Moronae se vaega o lana autau i le laueleele o Seasona, ina nei o mai se vaega o sa Lamanā i le laueleele ma latou ave le aai mo i latou, ma sa ia ave le vaega na totoe o lana autau ma savavali atu i le laueleele o Maneti.

26 Ma sa ia faatonu atu e tatau i tagata uma o loo i lena vaega o le laueleele ona latou faapotopoto faatasi i latou lava e tau e tetee ia sa Lamanā, e puipui ai o latou laueleele ma lo latou atunuu, o a latou aia ma o latou saolotoga; o lea na latou saunia ai auā le taimi e o mai ai sa Lamanā.

27 Ma sa oo ina faatonu atu e Moronae ia lalafi lana autau i le vanu lea sa latalata ane i le auvai o le vaitafe o Saitonu, lea sa i le itu i sisifo o le vaitafe o Saitonu i le vao.

28 Ma sa tuu e Moronae sipai e faataamilo ai, ina ia mafai ona ia iloa le taimi e o mai ai le togalauapi a sa Lamanā.

29 Ma o lenei, ina ua iloa e Moronae le faamoemoe o sa Lamanā, ma o lo latou faamoemoe o le faaumatia lea o o latou uso, po o le pulea lea o i latou ma aumai i latou i le pologa ina ia mafai ona latou faatu o se malo mo i latou lava i luga o le laueleele atoa;

30 Ma ona ua ia iloa foi ona pau lava le manao o sa Nifaē o le faasaoina lea o o latou laueleele, ma lo latou saolotoga, ma la latou ekalesia, o lea na ia manatu ai e le o se agasala le tatau ai ia te ia le puipuia o i latou i se togafiti; o lea, sa ia iloa mai i ana sipai le ala o le a ui atu ai sa Lamanā.

31 O lea, na ia vaelua ai lana autau ma aumai se vaega i totonu o le vanu, ma faalalafi i latou i le itu i sasae, ma le itu i saute o le maupuepue o Ripela;

32 Ma o le vaega na totoe sa ia faalalafi i le vanu i sisifo, i le itu i sisifo o le vaitafe o Saitonu, ma faapea lava ona fai sei oo atu i lalo i tuaoi o le laueleele o Maneti.

33 Ma ina ua uma ona faapea ona ia tuu o lana autau e tusa ma lona manao, sa saunia o ia e faafetaiai i latou.

34 Ma sa oo ina o a’e sa Lamanā i le itu i matu o le maupuepue, lea sa lalafi ai se vaega o le autau a Moronae.

35 Ma ina ua te’a ese sa Lamanā mai le maupuepue o Ripela, ma o mai i totonu o le vanu, ma amata ona latou sopoia le vaitafe o Saitonu, o le autau lea sa lalafi i le itu i saute o le maupuepue, lea sa ta’ita’i e se tagata e igoa ia Liae, ma sa ia ta’ita’i atu lana autau ma siomia mai tua o sa Lamanā i le itu i sasae.

36 Ma sa oo ina ua vaai mai sa Lamanā, ua o mai sa Nifaē ia i latou i o latou tua, sa latou liliu mai ma amata ona tau ma le autau a Liae.

37 Ma sa amata ona faia o le galuega o le fasioti o tagata i itu uma e lua, ae sa sili atu ona matautia i le itu a sa Lamanā, ona sa aliali lo latou le lavalavā i ta mamafa a sa Nifaē i a latou pelu ma a latou simetea, lea na fasiotia ai toetoe o ta taitasi uma lava.

38 A’o i le isi itu, sa i ai i lenei ma lena taimi se tagata na pa’ū ifo i totonu o sa Nifaē, mai ia latou pelu ma le toto masaa, ona sa puipuia i latou mai vaega taua sili o le tino, pe ona o vaega taua sili o le tino ua puipuia mai ta a sa Lamanā, e o latou ufifatafata, ma a latou talita-ogālima, ma a latou puloutau; ma sa faapea ona faia e sa Nifaē le galuega o le fasioti o sa Lamanā.

39 Ma sa oo ina fefefe sa Lamanā, ona o le tele o le faafanoga i totonu o i latou, seia oo ina amata ona latou sosola agai atu i le vaitafe o Saitonu.

40 Ma sa tuliloa i latou e Liae ma ona tagata; ma sa tutuli i latou e Liae i le vaitafe o Saitonu, ma sa latou sopoia le vaitafe o Saitonu. Ma sa taofi e Liae lana autau i luga o le auvai o le vaitafe o Saitonu ina ia latou le sopoiaina.

41 Ma sa oo ina faafetaiai sa Lamanā e Moronae ma lana autau i le vanu, i le isi itu o le vaitafe o Saitonu, ma amata ona osofai i latou ma fasioti i latou.

42 Ma sa toe sosola sa Lamanā i o latou luma, agai i le laueleele o Maneti, ma sa toe faafetaiai i latou e autau a Moronae.

43 O lea i le tulaga lenei, sa matuā tau malolosi ai lava sa Lamanā; ioe, sa lei iloa lava se tau faapea o sa Lamanā ma le malolosi tele ma le totoa, e leai, sa lei faapea lava mai le amataga.

44 Ma sa musuia i latou e sa Soramā ma sa Amalekā, o e o o latou kapeteni sili ma ta’ita’i, ma Sera’emina, o lē o lo latou kapeteni sili, po o lo latou ta’ita’i silisili ma le ta’ita’i au; ioe, sa latou tau e pei o ni tarako, ma e toatele sa Nifaē na fasiotia i o latou lima, ioe, ona sa latou isiluaina le tele o o latou puloutau, ma sa latou tuiati le tele o o latou ufifatafata, ma sa latou vavae ese le tele o o latou lima; ma sa faapea ona taia e sa Lamanā i lo latou ita tele.

45 Ae ui i lea, sa musuia sa Nifaē i se pogai e sili atu ona lelei, ona sa latou le tau mo se pule toatasi po o le pule, ae sa latou tau mo o latou aiga ma o latou saolotoga, a latou avā, ma a latou fanau, ma a latou mea uma, ioe, mo a latou sauniga o tapuaiga ma la latou ekalesia.

46 Ma sa latou faia le mea sa latou lagona o se tiute ua latou nonofo aitalafu ai i lo latou Atua; ona sa fetalai mai le Alii ia te i latou, ma i o latou tamā foi, e faapea: Talu ai ona tou te le’i nofosala i le soligatulafono muamua, pe o le lona lua, ia aua ne’i tuu atu outou lava ia fasiotia e lima o o outou fili.

47 O lenei foi, sa fetalai mai le Alii e faapea: Ia outou puipui o outou aiga e oo lava i le faamasaaina o le toto. O lea o le pogai lenei na tau ai sa Nifaē e faasaga ia sa Lamanā, e puipui i latou lava, ma o latou aiga, ma o latou laueleele, lo latou atunuu, ma a latou aia, ma la latou tapuaiga.

48 Ma sa oo ina ua vaai atu tagata a Moronae i le fe’ai ma le feita o sa Lamanā, sa latou tau solomuli ma sosola ese mai ia te i latou. Ma o Moronae, ina ua iloa e ia o latou faamoemoe, sa ia auina atu se faalototelega ma musuia o latou loto i manatu nei—ioe, o manatu i o latou laueleele, lo latou tuusaoloto, ioe, lo latou saolotoga mai le pologa.

49 Ma sa oo ina latou liliu atu ia sa Lamanā, ma sa latou alalaga atu faatasi i le leo e tasi i le Alii lo latou Atua, mo lo latou tuusaoloto ma lo latou saolotoga mai le pologa.

50 Ma sa amata ona latou tutulai faasaga atu ma le malosi ia sa Lamanā; ma i totonu o lena lava itula na latou alalaga atu ai i le Alii mo lo latou saolotoga, na amata ai ona sosola o sa Lamanā mai i o latou luma; ma sa latou sosola sei oo lava i vai o Saitonu.

51 O lenei, sa sili atu le toatele o sa Lamanā, ioe, sa sili atu i le faaluaina o le aofai o sa Nifaē; ae ui i lea, sa tutuli ese i latou lava ma oo ai ina latou faapotopoto faatasi o se tino e tasi i le vanu, i luga o le auvai i tafatafa o le vaitafe o Saitonu.

52 O lea na si’o faataamilo ai i latou e autau a Moronae, ioe, i itu uma e lua o le vaitafe, auā faauta, o le itu i sasae sa i ai tagata a Liae.

53 O lea ina ua vaai mai Sera’emina i tagata o Liae i le itu i sasae o le vaitafe o Saitonu, ma autau a Moronae i le itu i sisifo o le vaitafe o Saitonu, ma ua si’o faataamilo i latou e sa Nifaē, sa taia i latou i le mata’u tele.

54 O lenei o Moronae, ina ua vaai atu o ia i lo latou matata’u tele, sa ia faatonu ai ona tagata ia latou taofi le faamasaaina o o latou toto.