Mokõiha Nefi Kuatiañeʼẽ

1 Ha koʼág̃a ojehu upe rire Che, Nefi, amboʼepa vove che joykeʼykuérape, ore ru, Lehi, oñeʼẽ avei heta mbaʼe chupekuéra, ha omomanduʼa chupekuéra, heta mbaʼe guasu Ñandejára ojapovaʼekue hesekuéra oguenohẽvo chupekuéra Jerusalén retãgui.

2 Ha oñeʼẽ chupekuéra opuʼãramoguare hikuái roime aja yguasu ári, ha umi Tupã poriahuvereko osalvavaʼekue chupekuéra hekove, ani hag̃ua oñemoñapymi chupekuéra pe yguasúpe.

3 Ha oñeʼẽ avei chupekuéra pe yvy ñeʼẽmengue, ohupytyvaʼekuére—ha mbaʼeichaitépa Ñandejára iporiahuvereko orendive oremomarandúvo rosẽ hag̃ua Jerusalén retãgui.

4 Upévare, péina ápe, haʼe heʼi, ahecha peteĩ techauka, ha upéichagui aikuaa Jerusalén oñehundimahague; ha japytárire Jerusalén-pe ñamanovaʼerãmoʼã avei.

5 Ha katu, haʼe heʼi, roikoʼasýramo jepe, rohupyty pe yvy ñeʼẽmeʼẽngue, peteĩ yvy ojeiporavovaʼekue opa ambue yvykuéra ári; peteĩ yvy Ñandejára ojapovaʼekue chendive konvénio haʼetaha peteĩ yvy jehejapyre che ñemoñarépe g̃uarã. Heẽ, Ñandejára omeʼẽvaʼekue chéve kóva ko yvy peteĩ konvénio rupi, ha che raʼykuérape tapiaite peve, ha avei opavave umi Ñandejára po oguerúvape ambue tetãnguéragui.

6 Upévare, Che, Lehi, aprofetisa ombaʼapoháicha cherehe pe Espíritu oĩva chendive, avave ndoumoʼãiha kóva ko yvýpe ndojeguerúiramo Ñandejára po rupi.

7 Upévare, ko yvy oñekonsagra umi haʼe oguerútavape g̃uarã. Ha ombaʼapóramo hikuái chupe g̃uarã heʼiháicha umi tembiapoukapy haʼe omeʼẽvaʼekue chupekuéra, haʼéta chupekuéra peteĩ yvy isãsóva; upévare, arakaʼeve ndojeguerahamoʼãi hikuái ñeñapytĩmbýpe; ha upéicharamo, haʼéta tembiapovai rupi; ha hetáramo tembiapovai oñemoñeʼẽngáita pe yvy hesekuéra rupi, ha katu umi hekojojávape g̃uarã ojehovasáta tapiaite peve.

8 Ha péina ápe, iñarandúnte hína ko yvy toñeñongatúgueteri ambue tetãnguéra jeikuaágui; ha péina ápe, heta tetãnguéra niko omyenyhẽmbáta ko yvy, ha péicha rupi ndaiporimoʼãi tenda peteĩ jehejapyrerã.

9 Upévare, Che, Lehi, ahupytýkuri ñeʼẽmeʼẽ, umi Tupã Ñandejára oguerútava Jerusalén retãgui iñeʼẽrendúramo hembiapoukapykuérare, oñakãrapuʼãtaha kóva ko yvy ape ári; ha oñeñongatúta chupekuéra mayma ambue tetãnguéragui, oguereko hag̃ua kóva ko yvy imbaʼerãnguéra. Ha iñeʼẽrendúramo hikuái hembiapoukapykuérare ojehovasáta chupekuéra ko yvy ape ári, ha ndaiporimoʼãi avave omoangekoivaʼerã chupekuéra, ni oipeʼávaʼerã chuguikuéra ijyvy jehejapyre; ha oikóta ipype kyhyjeʼỹme tapiaite peve.

10 Ha katu péina ápe, og̃uahẽvo ára hoʼaha hikuái jegueroviaʼỹme, ohupyty rire tuichaite jehovasa Ñandejára pógui—oikuaapýpe hikuái mbaʼéichapa ojejapovaʼekue pe yvy, ha mayma yvyporakuérape, ha oikuaapýpe hikuái umi tuicha ha hechapyrãva Ñandejára rembiapokuéra ojejapo ypy guive pe yvóra; ha oñemeʼẽ rire chupekuéra puʼaka ojapo hag̃ua opa mbaʼe ijerovia rupive; oguerekopýpe opa tembiapoukapykuéra iñepyrũmby guive, ha ojegueraha rire chupekuéra pe ipyʼaporã opaveʼỹva rupive ko iporãitéva yvy ñeʼẽmeʼẽnguéme—péina ápe, Che haʼe, og̃uahẽramo ára orrechasáramo hikuái pe Israel-pegua Imarangatúvape, pe Mesías añeteguáva, Irrendentor ha Itupã, péina ápe, pe hekojojáva huisiokuéra hoʼáta hiʼarikuéra.

11 Heẽ, haʼe oguerúta ambue tetãnguérape hiʼarikuéra, ha omeʼẽta chupekuéra puʼaka, ha oipeʼáta chuguikuéra umi yvy imbaʼéva, ha ohejáta oñemosarambi ha ojepyʼajopy chupekuéra.

12 Heẽ, ohasávo peteĩgui ambue ñemoñareʼatýpe oĩta tuguy ñeñohẽ, ha tuicha tembiasaʼasy ijapytepekuéra; upévare, che raʼykuéra, aipota penemanduʼa; heẽ, aipota pehendu che ñeʼẽnguéra.

13 O pepáymona; pepáymona upe jeke atãgui, heẽ, pe añaretã jekégui, ha pejetyvyro pe itasã ivaietéva pende jokuávagui, itasã ojokuáva yvyporakuéra raʼýpe, ojegueraha hag̃ua chupekuéra ñeñapytĩmbýpe yvykua pypuku opaveʼỹvape oĩháme tekoʼasy ha jepyʼapy.

14 Pepáy! ha pepuʼã yvytimbógui, ha pehendu peteĩ túva imarachachãva ñeʼẽnguéra, hete pyaʼéma pemoĩtava yvykua roʼysã ha kirirĩme, avave umi ohóva ndaikatuveihágui ou; mbyky ára riremi ha che ahátama opa pe yvy rapére.

15 Ha katu péina ápe, Ñandejára ojora che ánga añaretãgui; che ahechákuri iverapy, ha añeañuã ára apyraʼỹ meve umi imborayhu jyvápe.

16 Ha aipota penemanduʼa pejapo hag̃ua umi Ñandejára rembipota ha huisiokuéra; péina ápe, kóva haʼe pe che ánga oipotavévakuri iñepyrũmby guive.

17 Che korasõ ojejopýkuri vyʼaʼỹgui sapyʼa pyʼa, akyhyjégui pene korasõ atãre Ñandejára pene Tupã oúramo g̃uarã opa iñekoʼõi reheve pende ári, ha peñemosẽ ha peñehundi tapiaite peve.

18 Térã, toʼa pende ári peteĩ ñeʼẽngái heta ñemoñareʼaty aja; ha toñembou peẽme kysepuku, ha ñembyahýi, ha tapejehayhuʼỹ, ha tapejegueraha aña rembipota ha ñeñapytĩmbýpe.

19 O che raʼykuéra, aníkena ou pende ári koʼã mbaʼe, ha katu toiko pendehegui peteĩ tavayguakuéra jeiporavopyre ha ojehecha porãva Ñandejárare. Ha péina ápe, toiko hembipota; hapekuéra ijoja haguére tapiaite.

20 Ha haʼe heʼi: Peneñeʼẽrendúramo che rembiapoukapykuérare peñakãrapuʼãta pe yvýpe; ha katu napeneñeʼẽrendúiramo che rembiapoukapykuérare peñemosẽta che renondégui.

21 Ha koʼág̃a che ánga ovyʼa hag̃ua pende rehe, ha vyʼápe osẽ hag̃ua che korasõ penderehe ko yvóragui, ani hag̃ua ajegueraha vyʼaʼỹ ha ñembyasy reheve yvyguýpe, pepuʼã pe yvytimbógui, che raʼykuéra, ha peiko kuimbaʼéicha, ha peñemoĩmba peteĩ ñeʼẽ ha peteĩ korasõme, pejoajupa opa mbaʼépe, ani hag̃ua peʼa ñeñapytĩmbýpe.

22 Ani hag̃ua peñemoñeʼẽngái peteĩ ivaietereíva ñeʼẽngáipe; ha avei, ani hag̃ua pegueru pende ári peteĩ Tupã ijojáva pochy, peñehundi hag̃ua, heẽ, upe ñande rete ha ánga ñehundi opaveʼỹva.

23 Pepáy, che raʼykuéra; pemoĩ pende jehe pe ñemiñuvã tekojoja rehegua. Pejetyvyro umi itasã pendejokuávagui, ha pesẽ pytũmbýgui, ha pepuʼã yvytimbógui.

24 Anive pepuʼã pende joykeʼy rehe, ijehechakuéra niko tuichaiterei, ha haʼe iñeʼẽrendúkuri tembiapoukapykuérare ára ñasẽ guive Jerusalén-gui; ha haʼékuri peteĩ tembiporu Tupã pópe, ñandegueru hag̃ua pe yvy ñeʼẽmeʼẽnguéme; ha ndahaʼéirire hese, ñamanovaʼerãmoʼã ñembyahýigui pe taveʼỹme; jepeve upéicha, peipeʼasékuri chugui hekove; heẽ, ha haʼe ohasa heta vyʼaʼỹ peẽ rupi.

25 Ha che akyhyjeterei ha aryryipa peẽ rupi, haʼe ohasaʼasy jeýramo g̃uarã; ha péina ápe, peje hese ohekahague puʼaka ha mbarete pende ári; ha che katu aikuaa haʼe ndohekaihague puʼaka ni mbarete pende ári, haʼe niko oipotánte pe Tupãme g̃uarã verapy, ha peẽ peime porã hag̃ua ára opaveʼỹva peve.

26 Ha peẽ pekaguai haʼe hesakã haguére penendive. Peje oipuruha pyʼa hatã; peje ipochyha penendive; ha péina ápe, pe pyʼahatã oguerekóva haʼe pe Tupã ñeʼẽ puʼaka mbarete, oĩva hendive; ha umi peẽ pehenóiva pochy haʼe pe añetegua, Tupãme oĩháicha, ha péva haʼe ndaikatúikuri ojoko, ha ohechauka peẽme kyhyjeʼỹme pene rembiapovaikuéra.

27 Ha tekotevẽ Tupã puʼaka oĩ hendive, heʼi peve peẽme peneñeʼẽrenduvaʼerãha. Ha péina ápe, ndahaʼéikuri haʼe, ha katu pe Ñandejára Espíritu oĩva ipype, pe oipeʼáva ijuru haʼe oñeʼẽ hag̃ua ha upéicha rupi ndaikatúi omboty.

28 Ha koʼág̃a che raʼy, Lamán, ha avei Lemuel ha Sam, ha avei peẽ che raʼykuéra haʼéva Ismael raʼykuéra, péina ápe, pehendúramo Nefi ñeʼẽ napemanomoʼãi. Ha pehendúramo chupe aheja peẽme peteĩ jehovasa, heẽ, che jehovasa peteĩha.

29 Ha katu napehendúiramo chupe ahekýita che jehovasa peteĩha, heẽ, che jehovasa jepeve, ha opytáta hiʼári.

30 Ha koʼág̃a, Zoram, añeʼẽ ndéve: Péina ápe, nde haʼe Labán rembiguái; upevére, rejegueru Jerusalén retãgui, ha che aikuaa nde haʼeha peteĩ angirũ añetegua che raʼy, Nefi-pe g̃uarã, tapiaite peve.

31 Upévare, ndejeroviareko haguére ne ñemoñare ojehovasáta iñemoñare ndive, peiko hag̃ua akãrapuʼãme heta ára kóva ko yvy ape ári; ha mbaʼeve, ndahaʼéiramo pe tembiapovai ijapytepekuéra, ombyaíta térã ombotyaíta iñakãrapuʼãkuéra kóva ko yvy ape ári tapiaite peve.

32 Upévare, neñeʼẽrendúramo Ñandejára rembiapoukapykuérare, Ñandejára okonsagravaʼekue kóva ko yvy ne ñemoñare oĩ hag̃ua kyhyjeʼỹme che raʼy ñemoñare ndive.