1 Ha koʼág̃a che, Jacob, añeʼẽ jey peẽme, che joykeʼykuéra ahayhuetéva, kóva ko yvyra rakã hekojojáva añeʼẽma haguére.

2 Ha péina ápe, umi ñeʼẽmeʼẽ jahupytyvaʼekue haʼe ñeʼẽmeʼẽ toʼopegua ñandéve g̃uarã; upévare, ojehechauka haguéicha chéve heta ñande raʼykuéra omanotaha hoʼópe pe ijeroviaʼỹ rupi, upevére, Tupã oiporiahuverekóta hetápe, ha ñande raʼykuérape oñemoĩjeýta, ohupyty hag̃ua hikuái umi mbaʼe omeʼẽtava chupekuéra jeikuaa añete pe Irredentórgui.

3 Upévare, haʼe haguéicha peẽme, oñeikotevẽ pe Cristo—ha ange pyhare niko heʼi chéve upe ángel peichataha pe héra—oumantevaʼerã umi judio-kuéra apytépe, umi yvorapegua hekovaivéva apytépe; ha haʼekuéra ojukáta chupe kurusúre—ha upéicha niko oĩ porã ñande Tupãme, ha ndaipóri ambue tetã yvy ariguáva ojukavaʼerãkuri kurusúre pe Itupãme.

4 Ha ojejapórire ambue tetã apytépe umi techapyrã tuichaitéva oñearrepentivaʼerãmoʼã hikuái, ha oikuaavaʼerãmoʼã haʼe haʼeha Itupã.

5 Ha katu sacerdote-kuéra mbaʼevaiñemi ha rembiapovaikuéra rupi, umi Jerusalén-gua omohatãta ijajúra hese, ojejuka hag̃ua haʼe kurusúre.

6 Upévare, hembiapovaikuére, oúta hiʼarikuéra ñehundi, ñembyahýi, mbaʼasyguasu, ha tuguy ñeñohẽ; ha umi noñehundíriva oñemosarambíta opa tetãnguéra apytépe.

7 Ha péina ápe, péicha heʼi Tupã Ñandejára: Og̃uahẽ vove ára ojeroviaha hikuái che rehe, che haʼeha Cristo, ajapovaʼekue konvénio ituvakuéra ndive oñemoĩjeytaha chupekuéra hoʼópe, yvy ári, pe ijyvy jehejapyrépe.

8 Ha ojehu oñembyatýta chupekuéra pe iñemosarambi pukúgui, umi islas del mar, ha irundy yvy renda guive; ha tuicháta che resa renondépe umi Gentil-kuéra retã, heʼi Tupã, agueraha hag̃ua chupekuéra ijyvy jehejapyrépe.

9 Heẽ, umi gentil-kuéra rréi haʼéta imongakuaahakuéra, ha irreinakuéra imboherekuaha; upévare, tuicha umi Ñandejára ñeʼẽmeʼẽ gentil-kuérape g̃uarã, haʼe heʼíkuri, ha máva piko oñorairõta hendive?

10 Ha péina ápe, kóva ko yvy, heʼi Tupã, haʼéta nde yvy jehejapyre, ha umi gentil-kuéra ojehovasáta upe yvy ári.

11 Ha kóva ko yvy haʼéta peteĩ yvy isãsóva umi gentil-kuérape g̃uarã, ha ndaiporimoʼãi rréi upe yvy ári, opuʼãva gentil-kuéra ári.

12 Ha amombaretéta kóva ko yvy opa ambue tetãnguéra rehe.

13 Ha pe oñorairõva Sión ndive omanóta, heʼi Tupã.

14 Ha pe omopuʼãva rréi cherehe, omanóta, ha che, Ñandejára, rréi yvagapegua, haʼéta irréi, ha tapiaite haʼéta peteĩ tesapehára umi ohendúvape g̃uarã che ñeʼẽnguéra.

15 Upévare, kóva ko mbaʼe rupi, oñekumpli hag̃ua che konveniokuéra ajapovaʼekue yvyporakuéra raʼy ndive, ajapótava chupekuéra g̃uarã oĩ aja hikuái hoʼópe, ahundivaʼerã umi tembiapoñemi ypytũ, ha jejuka, ha umi tembiapovaikuéra rehegua.

16 Upévare, oñorairõva Sión ndive, tahaʼe judío térã gentil, ojejokuáva ha ojejokuaʼỹva, kuimbaʼe térã kuña, omanóta; ha haʼekuéra niko haʼe umi opa yvy arigua hekovaíva; ha umi ndahaʼéiva chendivegua, haʼe cherehe oñemoĩva, heʼi ñande Tupã.

17 Ha akumplíta che ñeʼẽmeʼẽ ajapovaʼekue yvyporakuéra raʼýpe, ajapótava chupekuéra g̃uarã oĩ aja hikuái hoʼópe—

18 Upévare, che joykeʼykuéra ahayhuetéva, péicha heʼi ñande Tupã: ambohasaʼasýta ne ñemoñarépe gentil-kuéra po rupive; upevére, amohuʼũta gentil-kuéra korasõ, haʼe hag̃ua chupekuéra peteĩ túvaramo; upévare, umi gentil-kuéra ojehovasáta ha ojeipapáta chupekuéra Israel rogagua apytépe.

19 Upévare, akonsagráta kóva ko yvy ne ñemoñarépe g̃uarã, ha umi ojeipapáva ne ñemoñare apytépe, tapiaite, haʼe hag̃ua ijyvy jehejapyre; ha haʼe peteĩ yvy ojeiporavopyre, heʼi chéve Tupã, opa ambue tetãnguéra ári, upévare haʼe che rembipota totupaitũ chéve opa yvypóra oikóva ipype, heʼi Tupã.

20 Ha koʼág̃a, che joykeʼykuéra ahayhuetéva, omeʼẽ haguére ñandéve ñande Tupã ñanderayhúva jeikuaa tuichaite koʼã mbaʼégui, ñanemanduʼáke hese, ha jaheja ñane angaipakuéra peteĩ tenda gotyo, ha ani ñañakãity, nañañemombói niko; upevére, ñañemosẽvaʼekue ñande yvy jehejapyrégui; ha katu jajegueraha peteĩ yvy iporãvévape, ha Ñandejára niko ojapo yguasúgui ñande raperã, ha ñaime peteĩ isla del mar-pe.

21 Ha tuicha Ñandejára ñeʼẽmeʼẽnguéra umi oĩva islas del mar-pe g̃uarã, upévare heʼi haguére islas, oiméne oĩve ambuéva kóvagui, ha avei oikohápe ñande joykeʼykuéra.

22 Ha péina ápe, oĩkuri Tupã Ñandejára oguerahavaʼekue pe Israel rógagui, sapyʼa pyʼa, hembipota ha haʼe oipotaháicha. Ha péina ápe, Ñandejára imanduʼa opa umi oñemosarambivaʼekuére, upévare imanduʼa avei ñanderehe.

23 Upévare, tovyʼáke pene korasõ, ha penemanduʼa penesãsoha peiko hag̃ua pende jehegui—peiporavo hag̃ua pe ñemano opaveʼỹva rape, térã pe jeikove opaveʼỹva rape.

24 Upévare, che joykeʼykuéra ahayhuetéva, peñemoĩporã Tupã rembipota ndive, ani pe aña oipotáva ha toʼo oipotáva ndive; ha penemanduʼáke, peñemoĩporã rire Tupã ndive, pe Tupã grásiape ha hese añoiténte, pejesalvataha.

25 Upévare, Tupã tapenemopuʼã ñemanógui pe jeikovejey puʼaka rupive, ha avei pe ñemano opaveʼỹvagui pe expiasiõ rupive, ikatu hag̃uáicha peike pe Tupã rréino Opaveʼỹvape, ikatu hag̃uáicha pemomorã chupe pe grásia marangatu rupive. Amén.