1 Ha koʼág̃a che, Nefi, añeʼẽʼimíta umi ñeʼẽ ahaivaʼekuére, ojeʼevaʼekue Isaías juru rupive. Péina ápe, Isaías oñeʼẽ heta mbaʼe che tavayguakuéra noikũmbýiva; ndoikuaáigui mbaʼéichapa judio-kuéra oprofetisa.

2 Ha katu, che Nefi, namboʼéi chupekuéra heta mbaʼe umi judio-kuéra ojepokuaaháicha; hembiapokuéra haʼégui tembiapo pytũmegua, ha hembiapokuéra tembiapovai.

3 Upévare, ahai che tavayguakuérape, opa umi upe rire ohupytýtavape koʼã mbaʼe che ahaíva, oikuaa hag̃ua Tupã huisiokuéra, ha oikuaa hag̃ua hikuái ouha opa tetãnguéra ári, pe ñeʼẽ haʼe heʼi haguéicha.

4 Upévare, pehendu, O che tavayguakuéra, haʼéva Israel rogagua, ha pejapysaka che ñeʼẽnguérare; jepe umi Isaías ñeʼẽ nahesakãi peẽme, upevére hesakã opa umi henyhẽvape espíritu de profesíagui. Ha katu haʼe peẽme peteĩ profesía, pe espíritu oĩva che pype rupi; upévare aprofetisáta pe tesakã oĩ haguéicha chendive asẽ guive che ru ndive Jerusalén-gui; ha péina ápe, che ánga hory tesakãme che tavayguakuéra ndive g̃uarã, ikatu hag̃uáicha oñehekomboʼe hikuái.

5 Heẽ, che ánga hory Isaías ñeʼẽre, asẽgui Jerusalén-gui, ha che resa ohecha umi judio-kuéra mbaʼe, ha aikuaa judio-kuéra oikũmbyha umi profetakuéra mbaʼe, ha ndaipóri ambue tavayguakuéra oikũmbýva umi mbaʼe ojeʼevaʼekue judio-kuérape haʼekuéraicha, oñemboʼeʼỹramo chupekuéra umi mbaʼe judio-kuéra ojepokuaaháicha.

6 Ha péina ápe, che, Nefi, namboʼéivaʼekue che raʼykuérape umi judio-kuéra ojepokuaaháicha; ha katu péina ápe, che, chete niko, aikovaʼekue Jerusalén-pe, upévare aikuaa umi tenda upérupi oĩvagui; ha amombeʼu che raʼykuérape umi Tupã huisiokuéra rehegua, oikovaʼekue judio-kuéra apytépe, ha amombeʼu che raʼykuérape, opa Isaías oñeʼẽ haguéicha, ha ndahaíri umíva.

7 Ha katu, péina ápe, ameʼẽ che profesiaite, chéve hesakãháicha; ha pévape aikuaa avave ndaikatuiha ojavy; upevére, ára oñekumpli vove Isaías ñeʼẽnguéra yvyporakuéra oikuaáta añetehápe, pe ára oiko vove.

8 Upévare, hepy yvypóra raʼykuérape g̃uarã, ha umi oimoʼãva ndaʼupeichaiha, umívape che añeʼẽta, ha ameʼẽta che ñeʼẽnguéra che tavayguakuérape; aikuaágui hepytaha chupekuéra g̃uarã ára pahápe; ha upe árape oikũmbýta hikuái; upévare, imbaʼe porãrã ahaivaʼekue umíva.

9 Ha oñehundi haguéicha peteĩ ñemoñare judio-kuéra apytépe tembiapovai rupi, jepe upéicha avei haʼekuéra oñehundivaʼekue ñemoñareʼatýgui ñemoñareʼatýpe hembiapovaikuére; ha avave ijapytepekuéra noñehundirivaʼekue oñemomaranduʼỹre Ñandejára profetakuérare.

10 Upévare, ojeʼe chupekuéra pe ñehundi oútavagui hiʼarikuéra, che ru osẽ riremi Jerusalén-gui; upevére, omohatã hikuái ikorasõ; ha aprofetisa haguéicha haʼekuéra oñehundi, ha umi ojegueraháva ñeñapytĩmby Babilonia-pe katu nahániri.

11 Ha añeʼẽ koʼãva pe espíritu oĩva chendive rupi. Ha jepeve ojegueraha chupekuéra oujeýta hikuái, ha ohupytýta hikuái tetã Jerusalén; upévare, oñemoĩ jeýta chupekuéra ijyvy jehejapyrépe.

12 Ha katu, péina ápe, oikóta ijapytepekuéra ñorairõguasu, ha ñorairõguasu terakuã; ha og̃uahẽvo ára pe Unihénito del Padre, heẽ, pe yvága ha yvypegua Túva, ojehechaukataha haʼete chupekuéra hoʼópe, péina ápe, orrechasáta chupe hikuái, hembiapovaikuéra rupi, ha ikorasõ atã rupi, ha pe ijajúra atã rupi.

13 Péina ápe, ojukáta hikuái chupe kurusúre; ha oñemoĩ rire chupe peteĩ ñeñotỹháme mbohapy ára aja opuʼãta umi omanóva apytégui, ñemonguera ipepópe reheve; ha mayma umi ojeroviáva hérare ojesalváta pe Tupã rréinope. Upévare, che ánga hory aprofetisávo hese, ahechágui hiʼára, ha che korasõ ombotuicha héra marangatu.

14 Ha péina ápe ojehúta pe Mesías oikovejey rire omanóva apytégui, ha ojehechauka itavayguakuérape, mayma ojeroviátavape hérare, péina ápe, Jerusalén oñehundi jeýta; ha ái umi oñorairõva Tupã ha itupaopegua tavayguakuéra ndive.

15 Upévare, judio-kuéra oñemosarambíta opa tetãnguéra apytépe; heẽ, ha avei Babilonia oñehundíta; upévare, ambue tetãnguéra omosarambíta judio-kuérape.

16 Ha oñemorasambi rire, ha Tupã Ñandejára ohavira rire chupekuéra ambue tetãnguéra rupi heta ñemoñareʼaty pukukue aja, heẽ, jepeve ñemoñareʼatýgui ñemoñareʼatýpe ojeipyʼamovã meve chupekuéra oguerovia hag̃ua Cristo-pe, Tupã raʼy, ha pe expiasiõ, opaveʼỹva, opa yvyporakuéra rehe—ha og̃uahẽ vove upe ára oguerovia vove hikuái Cristo-pe, ha otupaitũ Túvape hérape, korasõ maraʼỹ ha po potĩ reheve, ha nohaʼarõvéi vove ambue Mesías-pe, upéramo, upe árape, og̃uahẽta ára oñeikotevẽtaha oguerovia hikuái koʼã mbaʼe.

17 Ha Ñandejára oipyso jeýta ipo mokõiha jey omoĩjey hag̃ua itavayguakuérape iñeime kañy ha jeʼágui. Upévare, haʼe ojapóta peteĩ tembiapo techapyrã ha mbaʼeguasu yvypóra raʼykuéra apytépe.

18 Upévare, haʼe omeʼẽta chupekuéra iñeʼẽ, ha umi ñeʼẽre ojehusgáta chupekuéra ára pahápe, oñemeʼẽtagui chupekuéra oñekonvense hag̃ua hikuái pe Mesías añeteguaha, upe haʼekuéra orrechasavaʼekue; ha oñekonvense hag̃ua chupekuéra anive hag̃ua ohaʼarõ peteĩ Mesías ouvaʼerãme, ndoumoʼãvéitamagui ambue, ndahaʼéiramo peteĩ Mesías añeteguaʼỹ ombotavýva tavayguakuérape; oĩgui peteĩ Mesías añónte umi proféta oñeʼẽhague, ha upéva upe Mesías haʼe pe orrechasátava judio-kuéra.

19 Ha umi proféta ñeʼẽme heʼiháicha, pe Mesías ou 600 ary che ru osẽ rire Jerusalén-gui; ha umi proféta ñeʼẽme heʼiháicha, ha avei pe Tupã ángel ñeʼẽme heʼiháicha, hérata Jesucristo, Tupã Raʼy.

20 Ha koʼág̃a, che joykeʼykuéra, añeʼẽ porã peẽme ani hag̃ua pejavy. Ha oikoveháicha Tupã Ñandejára oguenohẽvaʼekue Israel-pe Egipto retãgui, ha omeʼẽ puʼaka Moisés-pe omonguera hag̃ua tetãnguérape oisuʼu rire chupekuéra umi mbói ipopĩava, omoĩramo hikuái hesa pe mbói haʼe omopuʼãvaʼekue henondepekuérape, ha avei omeʼẽ chupe puʼaka oikutu hag̃ua pe ita ha osẽ y; heẽ, péina ápe haʼe peẽme, koʼã mbaʼe añeteguaháicha, ha Tupã Ñandejára oikoveháicha, ndaipóri ambue térã oñemeʼẽva yvága guýpe ndahaʼéiramo kóva ko Jesucristo añónte, añeʼẽ haguére, ikatu hag̃uáicha yvypóra ojesalva.

21 Upévare, kóva rupi Tupã Ñandejára oñeʼẽmeʼẽ chéve koʼã mbaʼe ahaíva oñeñongatúta, ha oñeñangarekotaha, ha oñemeʼẽtaha che ñemoñarekuérape, ñemoñareʼatýgui ñemoñareʼatýpe, oñekumpli hag̃ua ñeʼẽmeʼẽ ojejapovaʼekue José-pe, iñemoñare nomanomoʼãiha arakaʼeve yvy oĩ aja.

22 Upévare, koʼã mbaʼe ohóta ñemoñareʼatýgui ñemoñareʼatýpe oĩ aja pe yvy; ha ohóta Tupã oipotaháicha; ha tetãnguéra oguerekótava umíva ojehusgáta umi ñeʼẽ ojehaivaʼekuére.

23 Ore niko rombaʼapo jesarekópe rohai hag̃ua, roipyʼamovã hag̃ua ore raʼykuérape, ha avei ore joykeʼykuérape, ojerovia hag̃ua Cristo-re, ha oñemoĩporã hag̃ua Tupã ndive; ha roikuaa niko haʼeha pe grásia rupi rojesalvaha, rojapo rire opa mbaʼe ikatúva.

24 Ha, jepeve roguerovia Cristo-pe, oreñeʼẽrendu Moisés léire, ha rohaʼarõ teko mbaretépe Cristo-pe, oñekumpli peve upe léi.

25 Ha, upevarã niko oñemeʼẽvaʼekue upe léi; upévare pe léi omanóma oréve g̃uarã, ha roñemoingove Cristo-pe ore jerovia rupi; jepeve oreñeʼẽrendu upe léire umi tembiapoukapy rupi.

26 Ha roñeʼẽ Cristo-re, ha rovyʼa Cristo-pe, romboʼe Cristo-gui, roprofetisa Cristo-gui, ha rohai ore profesía-pe oĩháicha, ore raʼykuéra oikuaa hag̃ua moõpa ohekavaʼerã hikuái iñangaipa jora.

27 Upévare, roñeʼẽ upe léire ore raʼykuéra oikuaa hag̃ua upe léi opamaha; ha, oikuaámarõ upe léi opamaha, tomaʼẽ hikuái tenonde gotyo pe tekove oĩva Cristo-rehe, ha oikuaa hag̃ua hikuái maʼerãpa oñemeʼẽvaʼekue upe léi. Ha oñekumpli rire upe léi Cristo-pe, ani hag̃ua omohatã hikuái hese ikorasõ upe léi opa vove.

28 Ha koʼág̃a péina ápe, che tavayguakuéra, peẽ haʼe tavayguakuéra ojeroviaʼỹva; upévare, añeʼẽ porãkuri peẽme, ani hag̃ua pejavy. Ha umi ñeʼẽ haʼéva opuʼãta testimónioramo pende rehe; koʼãva oĩ porãmagui ñamboʼe hag̃ua opavave yvypórape tape ikareʼỹva; ha katu tape ikareʼỹva niko haʼe Cristo-pe jeguerovia ha ani oñenega chupe; ha penegáramo chupe avei penega umi proféta ha upe léi.

29 Ha koʼág̃a péina ápe, haʼe peẽme tape ikareʼỹva haʼeha Cristo-pe jeguerovia, ha ani ñambotove chupe; ha Cristo niko haʼe pe Israel-pegua Imarangatúva; upévare peñakãityvaʼerã henondépe, ha petupaitũ chupe opa pende puʼaka, apytuʼũ, ha mbarete reheve, ha opa pene ánga reheve; ha pejapóramo koʼãva mbaʼevéicharamo napeñemosẽmoʼãi.

30 Ha, oñeikotevẽha peve, pejapovaʼerã umi Tupã rembipota ha ordenansakuéra oñekumpli peve upe léi oñemeʼẽvaʼekue Moisés-pe.