1 Ha koʼág̃a, péina ápe, che joykeʼykuéra, añeʼẽ peẽme, pe espíritu heʼi haguéicha chéve; upévare, aikuaa añetehápe oikovaʼerãha.

2 Ha umi mbaʼe ojehaítava pe kuatiañeʼẽme hepy tuicháta yvyporakuéra raʼýpe g̃uarã, ha ñane ñemoñarãpe g̃uarã, haʼéva peteĩ Israel róga rembyre.

3 Ha ojehúta upe árape umi tupao oñemopuʼãvaʼekue, ha ndahaʼéi Ñandejárape g̃uarã, heʼíta ojupe: Péina ápe, che, che haʼe Ñandejára mbaʼe; ha heʼíta umi ambuéva: che, che haʼe Ñandejára mbaʼéva; ha péicha oñeʼẽta opa umi omopuʼãvaʼekue tupao, ha ndahaʼéi Ñandejárape g̃uarã—

4 Ha oñorairõta oñondive; ha isacerdotekuéra oñorairõta oñondive, ha omboʼéta hikuái ikuaapy rehe, ha onegáta hikuái pe Espíritu Santo-pe, omeʼẽva ñeʼẽkuaa.

5 Ha onega hikuái Ñandejára puʼaka, pe Israel-pegua Imarangatúva; ha heʼi tavayguakuérape: Orerendu, ha pehendu romboʼéva; péina ápe ndaipóri Tupã ko árape, pe Ñandejára ha Rredentor ojapopámagui hembiapo, ha omeʼẽ ipuʼaka yvyporakuérape.

6 Péina ápe, pehendu che amboʼéva; heʼíramo hikuái oĩha peteĩ milágro Ñandejára po ojapovaʼekue, ani peguerovia; ko árape haʼe ndahaʼevéimagui peteĩ Tupã ojapóva milágro; haʼe ojapopáma hembiapo.

7 Heẽ, ha oĩta heta heʼítava: Pekaru, peyʼu, ha pevyʼa, koʼẽrõ ñamanótagui; ha oho porãta ñandéve.

8 Ha avei oĩta heta heʼítava: Pekaru, peyʼu, ha pevyʼa; upevére, pekyhyje Tupãgui—haʼe niko ohustifikáta mbovymi angaipakuéra; heẽ, pendejapuʼimi, pembotavy peteĩme iñeʼẽre, pemoĩ ñuhã pene angirũme; koʼãvape ndaipóri mbaʼevai; ha pejapo opa koʼã mbaʼe, koʼẽrõ ñamanótagui; ha ñanerembiapovaíramo, Tupã ñandehaviraʼimíta, ha ipahápe jajesalváta Tupã rréinope.

9 Heẽ, ha oĩta heta péicha omboʼétava, añeteguaʼỹ, vyrorei ha doctrina tavy, ha ojejapótava ikorasõme, ha oñehaʼãta hikuái omokañy hembiapo Ñandejáragui; ha hembiapokuéra ojejapóta pytũmbýpe.

10 Ha imarangatuvakuéra ruguy opuʼãta hesekuéra yvyguy guive.

11 Heẽ, opavave haʼekuéra osẽ tapégui, ha oñembyai.

12 Pe orgúllo rupi, ha umi mboʼehára añeteguaʼỹ, ha pe doctrina añeteguaʼỹva rupi, itupaokuéra oñembyaipa, ha itupaokuéra oñembotuicha; ha pe ijorgúllo rupi ojejapo hikuái.

13 Omonda hikuái imboriahúvape umi itupao jeguaka rupi; omonda hikuái imboriahúvape ijao hepy rupi; ha omuña hikuái umi hekomarangatu ha imboriahúvape ikorasõme, ha ijorgúllore ojejapo hikuái.

14 Haʼekuéra omoĩ ijehe ajúra atã ha akã ñemopuʼã; heẽ, ha pe orgúllo, ha aña, ha tembiapovai, ha tekovai rupi, opavave okañy, ha mbovymínte katu nahániri, umi haʼéva imirĩva Cristo rembiguái; upevére, ojegueraha rupi péicha, pyʼỹi ojavy oñemboʼégui chupekuéra yvyporakuéra omboʼeháicha.

15 O umi iñarandúva, ha oikuaapáva, ha ipirapire hetáva, ojejapóva ikorasõ orgúllope, ha opa umi omboʼéva doctrina añeteguaʼỹ, ha opa umi hekovaíva, ha ombyaíva Ñandejára rape joja, ái, ái, ái haʼekuéragui, heʼi Tupã Ñandejára Ipuʼakapáva, oñemombótagui chupekuéra añaretãme!

16 Ái umi ndaijaʼéiva hekojojávare peteĩ mbaʼe michĩre ha oñembohorýva pe oĩporãvare, ha heʼi ndahaʼeiha mbaʼeve! Og̃uahẽtagui ára Tupã Ñandejára oúta oñehaʼarõʼỹre umi yvýpe oikóvape; ha upe árape henyhẽmarõ hikuái tembiapovaígui omanóta.

17 Ha péina ápe, umi yvýpe oikóva oñearrepentíramo hekoñaña ha hekovaikuéragui noñehundimoʼãi, heʼi pe Señor de los Ejércitos.

18 Ha péina ápe, pe tuicha ha ijejaʼeʼỹvéva tupao, hekovaivéva opa yvy ári, hoʼamantevaʼerã ha tuicháta ijeʼa.

19 Pe aña rréino okuʼétagui, ha umi ipype oĩva oñearrepentimantevaʼerã, térã pe aña ojagarráta chupekuéra isã opaveʼỹvape, ha oñemokyreʼỹta pochyrã, ha omanóta hikuái;

20 Ha péina ápe, upe árape haʼe omoñekoʼõita yvypóra raʼykuéra korasõ, ha ombopochýta chupekuéra umi mbaʼe iporãva rehe.

21 Ha ambuévape katu ombopyʼaguapy, ha omongéta tete jeroviápe, ha péicha heʼíta hikuái: Opa mbaʼe oĩporã Sión-pe; heẽ, Sión oñakãrapuʼã, opa mbaʼe oĩporã—ha péicha aña ombotavy hiʼangakuéra, ha ogueraha chupekuéra katupyrýpe añaretãme.

22 Ha péina ápe, ambuévape ombojuruheʼẽ, ha heʼi chupekuéra ndaiporiha añaretã; ha heʼi chupekuéra: Che ndahaʼéi aña, ndaipórigui—ha péicha oñeʼẽguy chupekuéra ijapysápe, ojagarra peve chupekuéra itasã vaípe, ndaikatuihágui oñemosãso.

23 Heẽ, oñemombaʼéta hesekuéra ñemano, ha añaretã; ha pe ñemano, ha añaretã, ha aña, ha mayma umi hoʼavaʼekue ipoguýpe oñemboʼyvaʼerã Tupã apykajegua renondépe, ojehusga hag̃ua hembiapokuére, ha oho hag̃ua tenda oñembosakoʼivaʼekue chupekuérape g̃uarã, jepe peteĩ tata lágo ha asufreguiguávape, haʼéva peteĩ jehasaʼasy opaveʼỹva.

24 Upévare, ái pe Sión-pe hekoreíva!

25 Ái pe heʼíva: Opa mbaʼe oĩporãmba!

26 Heẽ, ái pe ohendúva yvyporakuéra omboʼéva, ha onegáva Tupã puʼaka, ha pe Espíritu Santo don!

27 Heẽ, ái pe heʼíva: Oñemeʼẽma oréve, ha noroikotevẽvéima!

28 Ha ipahápe, ái opavave umi oryrýiva, ha ipochýva pe Tupã añetegua rupi! Ha péina ápe, pe oñemopuʼãva ita ári omog̃uahẽ upéva torýpe; ha pe oñemopuʼãva yvykuʼi ári katu oryrýi okyhyjégui hoʼataha.

29 Ái pe heʼíva: Roguerekóma Tupã ñeʼẽ, ha noroikotevẽvéima ambue Tupã ñeʼẽ, iporãma niko roguerekóva!

30 Ha péina ápe, péicha heʼi Tupã Ñandejára: Ameʼẽta yvypóra raʼykuérape saʼi saʼi, mboʼepy mboʼepy ári, michĩmi ápe ha michĩmi amo; ha ojehovasa umi ohendúva che mboʼepy, ha ojesarekóva che ñemoñeʼẽre, oñehekomboʼétagui arandúpe; ha pe oñemeʼẽvape ameʼẽvéta; ha umi heʼívagui, hetáma roguereko, ojeipeʼáta chuguikuéra pe oguerekóva jepe.

31 Taiñeʼẽngái pe omoĩva ijerovia yvypórare, térã ojapóva toʼógui ijyva, térã ohendúva yvyporakuéra omboʼéva, koʼãva noñemeʼẽiramo chupekuéra Espíritu Santo puʼaka rupi.

32 Ái umi gentil-gui, heʼi pe Señor Dios de los Ejércitos! Ha jepe aipysóta chupekuéra che jyva ára ha ára, chenegáta hikuái; upevére, che aiporiahuverekóta chupekuéra, heʼi Tupã Ñandejára, oñearrepentíramo ha oúramo hikuái cherendápe; che jyva niko ojepyso opa ára pukukue, heʼi pe Señor Dios de los Ejércitos.