1 Ha Ñandejára oiporiahuverekóta Jacob-pe, ha oiporavóta gueteri Israel-pe, ha omoĩta chupekuéra ijyvyteépe; ha pytaguakuéra oñembyatýta hendivekuéra, ha ojoajúta hikuái Jacob rógare.

2 Ha tavayguakuéra ojagarráta ha ogueraháta chupekuéra hendápe; heẽ, mombyry guive yvy opaha peve; ha oujeýta hikuái ijyvy ñeʼẽmeʼẽnguéme. Ha Israel róga oikóta ipype, ha Ñandejára retã haʼéta kuimbaʼe ha kuñáva tembiguáirã; ha oñapytĩta hikuái umi chupekuéra oñapytĩvaʼekuépe; ha oisãmbyhýta ijopyharakuérape.

3 Ha ojehúta upe árape Ñandejára nembopytuʼúta, nde jepyʼapy, ha nde kyhyjégui, ha pe ñeñapytĩ atãgui reñemombaʼapo haguépe.

4 Ha ojehúta upe árape, remoĩta kóva ko proverbio Babilonia-pegua rréi rehe, ha eréta: Mbaʼéichapa opa ko oporojopýva, ko táva oroguigua opa.

5 Ñandejára omopẽ iñañávakuéra vára, umi oisãmbyhýva apykajegua.

6 Pe oipyʼajopyvaʼekue tavayguakuérape ñekoʼõire ñembota opaveʼỹvape, upe oisãmbyhyvaʼekue pochýpe tetãnguérape, oñemuña, ha avave ndaikatúi ojoko.

7 Opa yvy opytuʼu, ha oĩ pyʼaguapýpe; yvyporakuéra oñemoĩ opurahéi.

8 Heẽ, avetokuéra ovyʼa nde rupi, ha avei umi cedro Líbano-pegua, heʼívo: Nde reʼa guive ndojupivéi kytĩha orerehe.

9 Añaretã ipirĩ iguýpe nerug̃uaitĩ hag̃ua reg̃uahẽvo; ha omombáy ndéve g̃uarã umi omanovaʼekuépe, opa umi príncipe yvyguápe; opa tetãnguerapegua rréipe omopuʼã ijapykajeguágui.

10 Opavave koʼãva oñeʼẽta heʼívo ndéve: Nde piko avei nekangy oréicha? Oréicha piko nde haʼe?

11 Nde jajáipa oguejy ñeñotỹháme; nerehenduvéima nde lira-kuéra ryapu; yso isarambi nde guýpe, ha yso ndeahoʼi.

12 Mbaʼéicha piko reʼa yvágagui, O Lucifer, koʼẽtĩ raʼy! Reñeikytĩ yvýre, nde remokangyvaʼekue tetãnguérape!

13 Ha erékuri ne korasõme: Ajupíta yvága peve, ha omopuʼãta che apykajegua Tupã mbyjakuéra ári; ha avei aguapýta atyguasu yvyty ári, nórte gotyo;

14 Ajupíta arakuéra ijyvateveha ári; Che haʼéta pe Altísimo-icha.

15 Ha nde katu reñemboguejýta añaretãme, pe yvykua ipypukuveha gotyo.

16 Omaʼẽ ag̃uíta nderehe umi nderecháva, ha omañáta nderehe hikuái ha heʼíta: Kóva piko haʼe kuimbaʼe omboryryivaʼekue pe yvy, omonguʼevaʼekue rréinokuéra?

17 Ha ojapovaʼekue yvóragui taveʼỹicha, ha ohundi itavakuéra, ha arakaʼeve ndoipeʼaivaʼekue okẽ umi kaʼirãime oĩvape?

18 Opavave rréi tetãnguerapegua, heẽ, mayma haʼekuérava, oĩ verapýpe, opavave haʼekuéra hogaitépe.

19 Ha katu nde reñemosẽ ne ñeñotỹhágui yvyra rakã ijejaʼeʼỹvaicha, umi omanomavaʼekue rembyréicha, oñembohasavaʼekue hesekuéra kysepuku, hoʼáva umi ita yvykuápe; teʼõngue oñepyrũmbavaʼekue heséicha.

20 Nereñeñotỹmoʼãi hendivekuéra, rehundi haguére ne retã ha rejuka haguére nde tavayguakuérape; umi heko añáva ñemoñare arakaʼeve ndojehechakuaamoʼãi.

21 Pembosakoʼi jejuka itaʼyrakuérape g̃uarã ituvakuéra rembiapovaikuére, ani hag̃ua opuʼã hikuái, ni ohupyty pe yvy, ni omyenyhẽ hikuái tavaguasukuéra reheve yvóra rova.

22 Ha che apuʼãta hesekuéra, heʼi pe Señor de los Ejércitos; ha aikytĩta Babilonia-gui pe térã, ha tembyre, ha taʼýra, ha joykeʼy raʼy, heʼi Ñandejára.

23 Ha ajapóta avei chugui guyrakuéra jeikoha, ha ynoʼõmegua y; ha aitypeíta chupe typycha ñehundípe, heʼi pe Señor de los Ejércitos.

24 Pe Señor de los Ejércitos oñeʼẽmeʼẽ, heʼívo: Añetehápe ajepyʼamongeta haguéicha, péicha ojehúta; ha haʼehaguéicha, upéicha oikóta—

25 Che aguerúta Asirio-pe che retãme, che yvytykuéra ári apyrũmbáta hesekuéra; upéicha ojeíta chuguikuéra ijúgo, ha pe imbaʼepohýi ojeipeʼáta ijatiʼýgui.

26 Kóva haʼe tembipota oñemoĩvaʼekue opa yvy ári; ha kóva haʼe po ojepysóva opa tetãnguéra ári.

27 Ha pe Señor de los Ejércitos omeʼẽ hembipota, ha máva piko oipeʼáta? Ha ipo ojepyso, ha máva piko omboguevíta?

28 Ary omanoramoguarépe rréi Acaz haʼeʼvakue kóva ko mbaʼepohýi.

29 Ani revyʼa nde, opa Palestina, opẽ haguére pe ndeipyʼajopýva vára; ha katu pe mbói rapógui osẽta peteĩ mbói, ha hiʼa haʼéta peteĩ mbói veve hendypáva.

30 Ha imboriahúva primohénito okarúta, ha umi oikotevẽva opytuʼúta kyhyjeʼỹme; ha ajukáta ñembyahýigui nde rapópe, ha haʼe ojukáta ne rembyrépe.

31 Eguahu, O okẽ; ejerureʼasy, O tavaguasu, opa nde Palestina, reñemosarambipa; ha nórtegui oúta peteĩ tatatĩ, ha avave ndopytamoʼãi haʼeño hiʼárape.

32 Mbaʼe piko ombohováita upérõ umi maranduhára tetãnguéragua? Ñandejára omopuʼãhague Sión-pe, ha umi itavayguakuerapegua imboriahúva ojeroviáta hese.