1 Ái umi omoĩva ñeʼẽmondo hekojojaʼỹva, ha ohaíva kuatiáre umi jeipyʼajopy omoĩvaʼekue;

2 Omboyke hag̃ua huísiogui umi oikotevẽvape, ha oipeʼa hag̃ua iderécho che tavayguakuéra mboriahúgui; umi imenaveʼỹmava haʼe hag̃ua hiʼupyrã ha omonda hag̃ua umi tyreʼỹvape.

3 Ha mbaʼépa pejapóta pe jehavira árape, ha pe ñemonandi mombyrýgui oúvape? mávape pehóta penepytyvõ hag̃ua? ha moõ piko pehejáta pende verapy?

4 Chereheʼỹ ojayvýta hikuái umi ojejokuáva renondépe, ha umi omanóva apytépe hoʼáta. Upevére neʼĩra opa ipochy, ha ipo ojepyso gueteri.

5 O Asirio, che pochy vára, ha pe báculo ipópe haʼe iñekoʼõijoja.

6 Amondóta chupe peteĩ tetã hovamokõiva rehe, ha che ñekoʼõi tavayguakuéra rehe ameʼẽta chupe tembiaporã ohekýi hag̃ua pe mondapyre, ha ohekýi hag̃ua pe hiʼupy, ha topyrũ hiʼarikuéra tuju tapereguáicha.

7 Upevére ndahaʼéi upéva haʼe ohekáva, ni pe ikorasõme oipotáva; ha katu ikorasõme oĩ ohundi ha oikytĩ tetãnguérape ha ndahaʼei mbovymi.

8 Ha haʼe heʼi: Ndahaʼéi piko rréi opavave umi che príncipe?

9 Ndahaʼéi piko Calmo Carquemis-cha? Hamat Arfat-cha?, ha Samaria Damasco-icha?

10 Che po omoĩ haguéicha umi idolokuéra rréino, ha umi haʼanga ojejapopyréva ohasa Jerusalén ha Samaria-guápe;

11 Ndajapomoʼãi piko, ajapo haguéicha Samaria idolokuéra ndive, Jerusalén idolokuérare?

12 Upévare ojehúta Ñandejára ojapopa vove opaite hembiapo Monte de Sión ha Jerusalén ári, che ahaviráta pe Asiria-gua rréi korasõ atãgui osẽva, ha pe ijesaupi verapy.

13 Haʼe heʼígui: Che po puʼaka ha che arandu rupive ajapo koʼã mbaʼe; ha che akãguapýgui; ha amonguʼe tavayguakuéra rembeʼy, ha amonda chuguikuéra imbaʼehepy, ha amoĩ yvýre umi ipype oikóvape yvypóra pyʼaguasúicha;

14 Ha che po ojuhu jaitypóicha umi tavayguakuéra mbaʼehepy; ha oñembyatyháicha ryguasurupiʼa ojehejareivaʼekue upéicha che ambyaty opa yvy; ha ndaipóri avave omomýiva ipepo, ni ojejurupeʼáva, ni opiãva.

15 Ojeroviáta piko pe hácha ipype oikytĩvare? Oñemombaʼeguasúta piko pe kytĩha chupe oiporúvagui? Pe vára ikaturõguáicha ojeityvyro imopuʼãháre, térã pe bastón ikaturõguáicha opuʼã ijehegui ndahaʼeiramoguáicha yvyra!

16 Upévare Ñandejára, pe Señor de los Ejércitos, omboúta ñembopiru, umi ikyráva apytépe; ha iverapy guýpe omyendýta peteĩ tata haʼeramoguáicha tata rendy.

17 Ha Israel resape haʼéta tatáramo, ha Imarangatu tatarendýramo, ha ohapy ha ombokusuguéta peteĩ árape ijavorái ha ñuatĩndy;

18 Ha ombokusuguéta ikaʼaguy verapy, ha iñu porãgui, mokõive ánga ha tete; ha haʼéta hikuái peteĩ poyvirerahaha ipyʼamanóramo.

19 Ha umi yvyra hembýva ikaʼaguýgui mbovýta, peteĩ mitã jepe oipapakuaátava.

20 Ha ojehúta upe árape, Israel rembyre, ha umi osẽvaʼekue Jacob rógagui, arakaʼeve ndojejokomoʼãvéima upe oipyʼajopyvaʼekuére chupe, ha katu ojejokóta hikuái Ñandejárare, pe Israel-pegua Imarangatúva, añetehápe.

21 Pe hembyre oujeýta, heẽ, Jacob rembyre, pe Tupã ipuʼakapávape.

22 Jepe nde tavayguakuéra Israel haʼéramo yvykuʼi yguasupeguáicha, upevére peteĩ hembyre oujeýta; pe ñehundipa oñemoĩmavaʼekue henyhẽta tekojoja reheve.

23 Ha Señor Dios de los Ejércitos ojapóta upe ñehundipa, jepe oñemoĩmavaʼekue opa yvýpe.

24 Upévare, péicha heʼi pe Señor Dios de los Ejércitos: O che tavayguakuéra peikóva Sión-pe, ani pekyhyje Asirio-kuéragui; haʼe vára reheve pendepyʼajopýta, ha omopuʼãta ijyvyra penderehe, Egipto-guakuéraicha.

25 Ha koʼágui ára mbykymíme, opáta pe ñekoʼõijoja, ha che pochy iñehundirã.

26 Ha pe Señor de los Ejércitos oguerúta peteĩ tukumbo chupe g̃uarã Madián-pegua jejukaguasúicha Horeb itakuápe; ha ivára oĩ haguéicha yguasu ári upéicha omopuʼãta haʼe ivára Egipto-guakuéraicha.

27 Ha ojehúta upe árape ojeipeʼáta imbaʼepohýi nde atiʼy árigui, ha ijúgo nde ajúragui, ha pe júgo oñehundíta pe ñemoñandyry rupi.

28 Haʼe og̃uahẽ Ayat peve, ohasa Migrón-pe; ha Micmas-pe oheja ikarrokuéra.

29 Ohasa hikuái pe jehasaha rupi; opyta hikuái Geba-pe; Rama oryrýi; Gabaa Saúl-gui okañy.

30 Ehupi ne ñeʼẽ, O Galim rajy; eheja toñehendu Lais peve, O Anatot mboriahu.

31 Madmena ova; Gebim-pe oikóva oñembyaty okañy hag̃ua.

32 Jepeve haʼe opytáta upe árape Nob-pe; omonguʼéta ipo Sión membykuña yvytýre, Jerusalén yvyty.

33 Péina ápe, Ñandejára, pe Señor de los Ejércitos omopẽta pe yvyra rakã kyhyjépe, ha ijyvatéva ojeitýta ha umi oñembotuicháva oñemotindýta.

34 Ha oikytĩta iérrope umi kaʼaguyty, ha pe líbano hoʼáta peteĩ ipuʼakapáva po rupi.