1 Pe Babilonia mbaʼepohýi, Isaías Amós raʼy ohechavaʼekue.

2 Pemopuʼã peteĩ poyvi yvyty yvate ári, pehupi chupekuéra ñeʼẽ, emonguʼe nde po, oike hag̃ua hikuái umi hekoporãva rokẽ rupi.

3 Ameʼẽvaʼekue tembiapoukapy che marangatukuérape, ha avei ahenói che pyʼaguasukuérape, che pochy noĩrigui umi ovyʼáva ndive che verapýre.

4 Atyguasu ryapu yvytykuérape ojogua peteĩ tavaygua tuicha ryapúpe, peteĩ tyapu tuicha umi tetã rréino oñembyatýva rehegua, pe Señor de los Ejércitos ombosakoʼi ehersitokuéra ñorairõrã.

5 Ou hikuái tetã mombyrýgui, yvága pahágui, heẽ, Ñandejára, ha iñekoʼõijoja arma-kuéra, ohundipaite hag̃ua yvy.

6 Peguahu peẽ, Ñandejára ára hiʼag̃uímagui; oúta haʼeramoguáicha Ipuʼakapáva ñehundi.

7 Upévare maymáva po ikangypáta, opavave yvypóra korasõ hykúta;

8 Ha okyhyjéta hikuái; jepyʼapy ha ñembyasy oñemombaʼéta hesekuéra; omañáta hikuái ojuehe ñemondýipe; hovakuéra haʼéta tatarendýicha.

9 Péina ápe, Ñandejára ára ou, pyʼahatã ha ñekoʼõi ha pochy hendýva reheve, ombotapere hag̃ua pe yvy; ha haʼe ohundíta ipypégui iñangaipávape.

10 Ha mbyjakuéra yvagagua ha imbyjaʼatykuéra nomeʼẽmoʼãi hesape; pe kuarahy iñypytũta osẽnguévo, ha pe ñasaindy nomimbimoʼãi.

11 Ha che ahaviráta yvórape iñañágui, ha umi hekoñañávape hembiapovaíre; ha umi ijorgullósova jejapo ambopaháta, ha aitýta umi oporomondýiva ñembotuicha.

12 Ha amoporãvéta yvypórape óro ojejapoporãvagui; ha ajapoporãveta Afir-guigua órogui yvypórape.

13 Upévare, amonguʼéta yvagakuéra, ha pe yvy ojeíta hendágui, pe Señor de los Ejércitos ñekoʼõire, ha pe ipochyvai árape.

14 Ha haʼéta kórsa oñemuñávaicha, ha ovecha herekuaʼỹvaicha; ha opavave yvypóra ohojeýta itávape, ha opavave oñaníta hetãme.

15 Ha maymáva ijorgullósova ojejapyharáta; heẽ, ha opa umi iñañávandi oikóva hoʼáta kysepukúre.

16 Imitãnguéra avei oñemonguʼíta hesa renondépe; hogakuéra oñemondapáta ha hembirekokuéra oñerairõta.

17 Péina ápe, umi Medo-pe amoĩta hesekuéra, ha haʼekuéra ndohecharamomoʼãi óro ni pláta, ha ndoipotamoʼãi umíva.

18 Ihuʼykuéra avei oikutúta umi mitãrusúpe; ha ndoiporiahuverekomoʼãi nde ryégui osẽvaʼekuépe; ha hesakuéra ndohejareimoʼãi umi mitãme.

19 Ha Babilonia, rreinokuéra verapy, caldeo-kuéra mbaʼejegua paha, haʼéta Tupã ohundiramoguaréicha Sodoma ha Gomorra-pe.

20 Arakaʼeve ndojeikomoʼãvéima ipype, ni noñeimemoʼãvéima ipype ñemoñareʼatýgui ñemoñareʼatýpe: pe Árabe nomoĩmoʼãi upépe hogaao; ha umi ovecharerekua ndoguerekomoʼãi upépe ovechaʼaty.

21 Ha katu mymba saite taveʼỹmegua oñenóta upépe; ha hogakuéra henyhẽta mymba saitégui; ha upépe oikóta ñakurutũ, ha ojerokýta umi itieʼỹva.

22 Ha umi mymba saite kaʼaguypegua oĩva umi isla-pegua oguahúta hóga haʼeñóme, ha umi dragón-kuéra hóga porãme; ha hiʼára hiʼag̃uíma, ha hiʼára noñembopukumoʼãi. Che ahundi pyaʼétagui chupe; heẽ, aiporiahuverekótagui che tavayguakuérape, ha katu umi iñañáva omanóta.