1 Cherendúke, peẽ peguatáva tekojojápe. Pemaʼẽ pe ita peñeikytĩ haguégui, ha pe itaty peñeguenohẽ haguégui.

2 Pemaʼẽ Abraham, pende ru, ha Sara, penemoheñoivaʼekuére; chupe añónte ahenoivaʼekue, ha ahovasa chupe.

3 Ñandejára omoangapyhýta Sión-pe, omoangapyhýta opa henda nandi; ha haʼe ojapóta itaveʼỹgui Edéncha, ha itaveʼỹ Ñandejára yvotytýicha. Vyʼa ha tory oĩta upépe, aguyjemeʼẽ ha mbaʼepu porã purahéi.

4 Cherendúke, che tavayguakuéra; ha pejapysaka cherehe, O che retã; chehegui niko osẽta peteĩ léi, ha amoĩta che hustísia ohesape hag̃ua che tavayguakuérape.

5 Hiʼag̃uíma che rekojoja; osẽma che salvasiõ, ha che jyva ohusgáta che tavayguakuérape. Chéve cheraʼarõta umi isla-kuéra, ha che jyváre ojeroviáta hikuái.

6 Pehupi pende resa yvágare, ha pemaʼẽ yvýre iguýpe; umi yvága opa reíta tatatĩcha, ha pe yvy itujáta aóicha; ha upéicha omanombáta umi oikóva ipype. Ha katu che salvasiõ haʼéta tapiaite g̃uarã, ha che rekojoja ndopamoʼãi.

7 Cherendúke, peẽ peikuaáva tekojoja, tavayguakuéra korasõ ahai haguépe che léi, ani pekyhyje yvypóra ñeʼẽreitýgui, ha ani pekyhyje ijejahéigui.

8 Upe ysoʼi aoʼuha hoʼúta chupekuéra aoramoguáicha, ha umi yso hoʼúta chupekuéra lanaramoguáicha. Ha katu che rekojoja opytáta tapiaite peve, ha che salvasiõ ñemoñareʼatýgui ñemoñareʼatýpe.

9 Epáy, epáy! Eñemonde puʼaka reheve, O Ñandejára jyva; epáy ára ymaguaréicha. Ndahaʼéi piko nde pe oikytĩvaʼekue Rahab-pe ha oikutuvaʼekue upe dragón-pe?

10 Ndahaʼéi piko nde rembohypavaʼekue pe yguasu, umi y ipypukuetéva; rejapovaʼekue pe yguasu ruguágui tape ohasa hag̃ua umi ojejoravaʼekue?

11 Upévare, umi Ñandejára orredimivaʼekue ou jeýta, ha purahéipe oúta hikuái Sión-pe; ha vyʼa ha marangatu opaveʼỹva oĩta iñakã arikuéra; ha ohupytýta hikuái vyʼa ha tory; ha vyʼaʼỹ ha tasẽ oñaníta.

12 Che haʼe upéva; heẽ, che haʼe oporomoangapyhýva. Péina ápe, máva piko nde, rekyhyje hag̃ua yvypóragui, omanótava, ha pe yvypóra raʼýgui, oikótava chugui kapiʼipe?

13 Ha nderesarái Ñandejára nde apoharégui, oipysovaʼekue yvagakuéra, ha omoĩvaʼekue pe yvy pyenda, ha rekyhyje meme opa ára, pe oporojopýva pochýgui, oĩramo oporohundi hag̃uáicha? Ha moõ piko oime pe oporojopýva pochy?

14 Pe oñeñapytĩva oñemosẽvaʼekue ojapura, ojejora hag̃ua, ani hag̃ua omano pe kaʼirãime, ha ani hag̃ua opa chugui imbujape.

15 Ha katu che haʼe Ñandejára nde Tupã, ypuʼã omoñarõva; Señor de los Ejércitos haʼe che réra.

16 Ha nde jurúpe amoĩkuri che ñeʼẽnguéra, ha che po ãme romoʼã, aipyso hag̃ua yvagakuéra ha amoĩ hag̃ua yvy pyenda, ha haʼe hag̃ua Sión-pe: Péina ápe, nde haʼe che tavaygua.

17 Epáy, epáy, epuʼã, O Jerusalén, nde reyʼuvaʼekue Ñandejára pógui pe ipochykue kópagui—reyʼuvaʼekue pe kópa jekyhyjégui huguaite peve.

18 Opavave imemby omoheñoivaʼekue apytégui ndaipóri omboguatavaʼerã chupe; ni ojagarravaʼerã chupe ipógui, opavave umi imemby omongakuaavaʼekuégui.

19 Ndéve ou koʼã mokõi memby, haʼekuéra ombyasýta nderehe, ne ñemonandi ha ne ñehundi, ha pe ñembyahýi ha kysepuku—ha máva rupípa che romoangapyhýta?

20 Ne membykuéra ikangypa, koʼã mokõi añónte katu nahániri; ojepyso hikuái opa tape akãme; tóro saitéicha peteĩ ñuhãme, haʼekuéra henyhẽ Ñandejára pochýgui, pe nde Tupã jejaʼógui.

21 Upévare ehendu koʼág̃a kóva, nde rejepyʼapy, ha rekaʼúva, ha ndahaʼéi vínope:

22 Péicha heʼi nde Tupã, Ñandejára ha nde Tupã ojeruréva itavayguakuéra rehe; péina ápe, aipeʼákuri nde pógui pe kópa jekyhyjehágui, pe kópa rugua che pochy rehegua; nde neremboyʼumoʼãvéima.

23 Ha katu amoĩta umi ndejopýva pópe; umi heʼivaʼekue ne ángape: Ejepyso yvýre torohasa hiʼári—ha nde remoĩvaʼekue nde rete haʼeramoguáicha yvy ha haʼeramoguáicha tape umi hiʼári ohasávape g̃uarã.

24 Epáy, epáy, emoĩ ne mbarete, O Sión; emonde nde ao porãnguéra, O Jerusalén, táva marangatu; arakaʼeve ndoumoʼãvéima ndéve pe ipotĩʼỹva ha hekokyʼáva.

25 Ejetyvyro pe yvytĩmbógui; epuʼã, ha eguapy, O Jerusalén; epoi umi nde ajúra jokuahágui, O Sión membykuña oñeñapytĩva.