1 Ha koʼág̃a che, Nefi, ambopaha che profesía peẽme, che joykeʼykuéra ahayhuetéva. Ha ndaikatúi ahai ndahaʼéiramo mbovymi mbaʼénte, aikuaa porãva oikovaʼerãha; ni ndaikatúi ahai ndahaʼéiramo mbovymínte che joykeʼy Jacob ñeʼẽnguéra.

2 Upévare, umi mbaʼe ahaivaʼekue iporãntema chéve, ndahaʼéiramo mbovymi ñeʼẽ haʼevaʼerã Cristo doctrina-re; upévare, añeʼẽsakãta peẽme, che profesiakuéra hesakãháicha.

3 Che ánga horýgui tesakãme; Tupã Ñandejára ombaʼapo haguére upéicha yvypóra raʼykuéra apytépe. Tupã Ñandejára omyesakãgui pe kuaapy; ha haʼe oñeʼẽ yvyporakuérape iñeʼẽme, oikũmby hag̃ua hikuái.

4 Upévare, aipota penemanduʼa añeʼẽhague peẽme pe proféta Ñandejára ohechaukavaʼekue chéve rehe, omongaraítava Tupã Cordero-pe, oipeʼátava angaipa yvóragui.

5 Ha koʼág̃a, Tupã Cordero, imarangatúva, oikotevẽramo oñemongarai ýpe, okumpli hag̃ua opa tekojoja, O upéicharamo, mbaʼeichaiteve piko ñaikotevẽ ñande, ñaneangaipáva, ñañemongarai, heẽ, ýpe jepeve!

6 Ha koʼág̃a, aporanduse peẽme, che joykeʼykuéra ahayhuetéva, mbaʼéicha piko pe Tupã Cordero okumpli opa tekojoja ýpe oñemongaraívo?

7 Ndapeikuaái piko imarangatuha? Ha jepe haʼe imarangatu, haʼe ohechauka yvypóra raʼykuérape, haʼe oñemomirĩha hetépe Túva renondépe, ha otestifika Túvape iñeʼẽrendutaha ojapóvo hembiapoukapykuéra.

8 Upévare, haʼe oñemongarai rire ýpe pe Espíritu Santo oguejy hiʼári pykasúicha.

9 Ha avei, kóva ohechauka yvypóra raʼykuérape ipoʼiha pe tape, ha ipoʼiha pe okẽ, oikevaʼerãhárupi hikuái, omoĩvo haʼe tenonderã upe techapyrã.

10 Ha heʼi yvypóra raʼykuérape: Peju chendive. Upévare, che joykeʼykuéra ahayhuetéva, ikatu piko jaha Jesús ndive nañaneñeʼẽrenduséiramo Túva rembiapoukapykuérare?

11 Ha pe Túva heʼi: Peñearrepenti, peñearrepenti, ha peñemongarai che Raʼy Ahayhuetéva rérape.

12 Ha avei, ou chéve Taʼýra ñeʼẽ, heʼívo: Oñemongaraíva che rérape, Túva omeʼẽta chupe pe Espíritu Santo, chéve omeʼẽ haguéicha; upévare, peju chendive, ha pejapo umi mbaʼe pecherechavaʼekue ajapo.

13 Upévare, che joykeʼykuéra ahayhuetéva, che aikuaa pehóramo Taʼýra ndive, korasõ añetépe, ndahaʼéi tova mokõi ni japúpe Tupã renondépe, ha katu añetehápe, peñearrepentívo pende angaipakuéragui, ha pemeʼẽ testimónio Túvape pemoĩseha pende ári Cristo réra, ñemongarai rupi—heẽ, pehóvo Ñandejára ñande Salvador ndive peguejývo pe ýpe, iñeʼẽme heʼiháicha, péina ápe, upérõ oñemeʼẽta peẽme pe Espíritu Santo; heẽ, ha upérõ oúta pe ñemongarai tatápe ha Espíritu Santo-pe; upérõ ikatúta peñeʼẽ angelkuéra ñeʼẽme, ha pehupi ñemomorã Israel-pegua Imarangatúvape.

14 Ha katu, péina ápe, che joykeʼykuéra ahayhuetéva, péicha ou chéve Taʼýra ñeʼẽ, heʼívo: Peñearrepenti rire pende angaipágui, ha pemeʼẽ rire testimónio Túvape peneñeʼẽrenduseha che rembiapoukapykuérare, pe ýpe ñemongarai rupi, ha oñemeʼẽ rire peẽme ñemongarai tatápe ha Espíritu Santo-pe, ha ikatu rire ñeʼẽ pyahúpe peñeʼẽ, heẽ, angelkuéra ñeʼẽme jepe, ha koʼãva rire chenegáramo, iporãventevaʼerãmoʼã peẽme ndachekuaái.

15 Ha ahendu Túva ñeʼẽ, heʼívo: Heẽ, pe che Ahayhuetéva ñeʼẽnguéra añetegua ha ijeroviapy. Pe oñehaʼãmbaitéva ipahaite peve, péva ojesalváta.

16 Ha koʼág̃a, che joykeʼykuéra ahayhuetéva, koʼãvare che aikuaa pe yvypóra noñehaʼãmbaitéiramo ipahaite peve, ojapóvo Tupã Raʼy Oikovéva ojapovaʼekue, ndaikatumoʼãi ojesalva.

17 Upévare, pejapo umi mbaʼe haʼevaʼekue peẽme ahechahague ojapotaha Ñandejára pene Rredentor; ha, pévare ojehechaukavaʼekue chéve umíva, peikuaa hag̃ua mbaʼe okẽrupipa peikevaʼerã. Ha pe okẽ peikevaʼerãha haʼe arrepentimiénto ha ýpe ñemongarai; ha upérõ ou pene angaipa jora tata ha Espíritu Santo rupive.

18 Ha péicha peime ko tape ipoʼietereívape oporogueraháva tekove opaveʼỹvape; heẽ, peikékuri pe okẽ rupi; pejapókuri pe Túva ha Taʼýra rembiapoukapykuérape heʼiháicha; ha oñemeʼẽ peẽme pe Espíritu Santo, omeʼẽva testimónio Túva ha Taʼýragui, oñekumpli hag̃ua pe ñeʼẽmeʼẽ haʼe ojapovaʼekue, oñemeʼẽtaha peẽme peikéramo upe tapépe.

19 Ha koʼág̃a, che joykeʼykuéra ahayhuetéva, peike rire ko tape ipoʼietereívape, aporanduse peẽme ojejapopámapa? Péina ápe, haʼe peẽme, Nahániri; napeg̃uahẽigui koʼã peve ndahaʼéiramo Cristo ñeʼẽ rupi jerovia mbaretépe hese, pejeroviávo pe ipuʼakapáva oporosalva hag̃ua méritore.

20 Upévare, peñemotenondevaʼerã ñemovãʼỹme Cristo-pe, peguerekóvo peteĩ ñehaʼarõporã mimbi, ha mborayhu Tupãre ha mayma yvypórare. Upévare, pehóramo tenonde gotyo, pende rorývo Cristo ñeʼẽme, ha peñehaʼãmbaitéramo ipahaite peve, péina ápe, péicha heʼi pe Túva: Pehupytýta tekove opaveʼỹva.

21 Ha koʼág̃a, che joykeʼykuéra ahayhuetéva, kóva haʼe pe tape; ha ndaipóri ambue tape ni ambue térã yvága guýpe yvypóra ikatu rupi ojesalva Tupã rréinope. Ha koʼág̃a, péina ápe, kóva haʼe Cristo doctrina, ha pévante haʼe Túva, ha Taʼýra, ha Espíritu Santo doctrina añetegua, haʼéva peteĩ Tupã, opaveʼỹva. Amén.