1 Péina ápe, ojehu che, Nefi, heta ajerureʼasy Ñandejára che Tupãme, che joykeʼykuéra pochy rupi.

2 Ha péina ápe, ipochyve hikuái chendive, oipeʼase peve hikuái chehegui che rekove.

3 Heẽ, okaguai hikuái cherehe, heʼívo: Ñande joykeʼy ipahaguéva ñaneisãmbyhyse; ha hese rupi heta jajepyʼapy; upévare, koʼág̃a jajuka chupe, anive hag̃ua jaikoʼasy iñeʼẽnguéra rupi. Ha péina ápe, ndajaguerekomoʼãi chupe sãmbyhyháraramo; ñande niko, haʼéva ijoykeʼy ijypykuéva, ñaisãmbyhyvaʼerã kóva ko tavayguakuéra ári.

4 Ha koʼág̃a ndahaipái koʼã pláncha ári opa mbaʼe okaguaivaʼekue hikuái cherehe. Ha katu iporãntema chéve haʼe, oipeʼasehague hikuái chehegui che rekove.

5 Ha ojehu Ñandejára cheñatõi, che, Nefi-pe, ajei hag̃ua chuguikuéra ha akañy hag̃ua pe taveʼỹme, ha opa umi chemoirũséva ndive.

6 Upévare, ojehu che, Nefi, ajagarra che rogaguakuérape, ha avei Zoram ha hogaguakuéra, ha Sam, che joykeʼy ypykuéva ha hogaguakuéra, ha Jacob ha José, che joykeʼy imitãvéva, ha avei che reindykuéra, ha opa umi ohoséva chendivépe. Ha opa umi ohoséva chendive haʼe umi ogueroviáva Tupã momarandu ha rrevelasiõnguéra; upévare, ohendu hikuái che ñeʼẽ.

7 Ha rogueraha ore ogaaokuéra ha opa mbaʼe ikatumíva, ha roguata rohóvo pe taveʼỹre heta ára pukukue aja. Ha roguata rire heta ára pukukue aja romoĩ ore rogaaokuéra.

8 Ha che tavayguakuéra omboherase upe tendápe Nefi; upévare, rombohéra Nefi.

9 Ha mayma umi oĩva chendive oñembohéra Nefi tavayguakuéra.

10 Ha roñehaʼã oreñeʼẽrendu umi Ñandejára huísio, ha rembipota, ha rembiapoukapýre opa mbaʼépe, pe Moisés léipe heʼiháicha.

11 Ha Ñandejára oĩ orendive; ha tuicha roñakãrapuʼã; roñotỹgui yvaʼa, ha heta romonoʼõ ore ñemitỹnguégui. Ha roñepyrũ romongakuaa mymba atýra, ha opáichagua mymba.

12 Ha che, Nefi, aguerúkuri avei umi kuatiajehaipyre ojehaíva umi pláncha bronce-guigua ári; ha avei pe esfera, térã pe brújula, Ñandejára po ombosakoʼivaʼekue che rúpe g̃uarã, upe ojehaivaʼekuépe oĩháicha.

13 Ha ojehu roñepyrũ tuichaiterei roñakãrapuʼã, ha roñemoña upe tetãme.

14 Ha che, Nefi, ajagarra pe Labán kysepuku, ha ajapo heta kysepuku opaichaguáva, ani hag̃ua umi tavayguakuéra koʼág̃a hérava lamanita-kuéra hoʼa mbaʼe ore ári ha orerundi; che aikuaágui ijehayhuʼỹkuéra cherehe ha che raʼykuérare ha umi ojeheróva che tavayguakuéraramo.

15 Ha amboʼe che tavayguakuérape omopuʼã hag̃ua ogaguasu, ha ombaʼapo hag̃ua opáichagua yvyra rehe, ha iérro, ha cobre, ha aséro, ha óro, ha pláta ha umi mineral iporãitereívare, oĩva hetaiterei.

16 Ha che, Nefi, amopuʼã peteĩ témplo; ha ajapo pe Salomón témploicha ha katu noñemopuʼãinte hetaiterei mineral iporãvagui; ndaipórigui umíva upe tetãme, upévare, ndaikatúi ojejapo pe Salomón temploichaite. Ha katu pe iñemopuʼãháicha ojogua Salomón témplope; ha pe hembiapo iporãiterei.

17 Ha ojehu che, Nefi, amombaʼapo umi che tavayguakuérape, ha ombaʼapo hikuái ipópe.

18 Ha ojehu haʼekuéra chemoĩse irréiramo. Ha katu che, Nefi, ndaipotái oguereko hikuái rréi; upevére, ajapo hesekuéra opa che puʼakaháicha.

19 Ha péina ápe, Ñandejára ñeʼẽ oñekumpli che joykeʼykuéra ndive, oñeʼẽvaʼekue hesekuéra, che haʼetaha isãmbyhyha ha imboʼehára. Upévare, che haʼékuri isãmbyhyha ha imboʼehára, pe Ñandejára rembiapoukapykuérape oĩháicha, og̃uahẽ meve ára oipeʼasehague hikuái chehegui che rekove.

20 Upévare, oñekumpli pe ñeʼẽ Ñandejára heʼivaʼekue chéve, heʼívo: Haʼekuéra nohenduséi haguére ne ñeʼẽ ojeipeʼáta Ñandejára renondégui. Ha péina ápe, ojeipeʼa chupekuéra henondégui.

21 Ha haʼe oitýkuri pe ñeʼẽngái hiʼarikuéra, heẽ, peteĩ ñeʼẽngái ipohýiva, hekovai haguére hikuái. Ha péina ápe, omohatã hikuái hese ikorasõkuéra, ha upévare oiko chuguikuéra peteĩ mbaʼe hatãitereíva; upévare, imorotĩgui, ha iporãitereígui, jaipota hag̃uáicha, ha ani hag̃ua che tavayguakuéra oipota chupekuéra Tupã Ñandejára omohũ ipirekuéra.

22 Ha upéicha heʼi Tupã Ñandejára: Ahejáta taijaʼeʼỹ hesekuéra nde tavayguakuéra, noñearrepentíriramo hikuái hembiapovaikuéragui.

23 Ha oñemoñeʼẽngáita pe ñemoñare ojeheʼáva iñemoñarekuérare; oñemoñeʼẽngáitagui chupekuéra upeichaguaite ñeʼẽngái reheve. Ha Ñandejára oñeʼẽ, ha upéicha ojejapókuri.

24 Ha upe iñeʼẽngái ouvaʼekue hiʼarikuéra rupi oiko chuguikuéra peteĩ tavaygua ateʼỹ, henyhẽva aña ha katupyrýgui, ha oheka hikuái pe taveʼỹme mymba saite ojuka hag̃ua.

25 Ha Tupã Ñandejára heʼi chéve: Haʼéta hikuái peteĩ tukumbo ne ñemoñarekuérape, omokyreʼỹ hag̃ua chupekuéra imanduʼa hag̃ua cherehe; ha naimanduʼáiramo hikuái cherehe, ha nohendúiramo hikuái che ñeʼẽnguéra, haʼekuéra ohaviráta chupekuéra oñehundipa peve.

26 Ha ojehu che, Nefi, akonsagra Jacob ha José-pe, haʼe hag̃ua hikuái sacerdote ha mboʼehára che tavayguakuéra retã ári.

27 Ha ojehu roiko vyʼápe.

28 Ha ohasámakuri 30 ary rosẽ rire Jerusalén-gui.

29 Ha che, Nefi, ahaivaʼekue upe peve che tavayguakuéra kuatiajehaipyre che planchakuéra ári, umi che ajapovaʼekue.

30 Ha ojehu Tupã Ñandejára heʼi chéve: Ejapo ambue planchakuéra; ha ehaíta hiʼári heta mbaʼe iporãva che resápe g̃uarã, ojapo porã hag̃ua nde tavayguakuérare.

31 Upévare, che, Nefi, cheñeʼẽrendu hag̃ua Ñandejára rembiapoukapykuérare, aha ha ajapo koʼã planchakuéra ha hiʼári ahaíkuri koʼã mbaʼe.

32 Ha ahai pe Ñandejára oguerohorýva. Ha che tavayguakuéra oguerohorýramo umi Tupã mbaʼe avei oguerohorýta koʼã che jehaipyre oĩva koʼã planchakuéra ári.

33 Ha che tavayguakuéra oikuaasevéramo pe che tavayguakuéra rembiasakuégui ohekavaʼerã umi ambue che plánchape.

34 Ha iporãntema chéve haʼe ohasahague 40 ary, ha roguerekómakuri ñorairõguasu ha joavy ore joykeʼykuéra ndive.