1 Ohechavaʼekue Isaías, Amós raʼy, Judá ha Jerusalén rehegua:

2 Ha ojehúta ára pahápe, Ñandejára róga yvyty oñemoĩta yvytykuéra ruʼãme ha oñemopuʼãta yvytykuéra ári, ha opa tetãnguéra oñaníta haʼe oĩháme.

3 Ha heta tetãnguéra ohojoáta ha heʼíta, Peju, ha jajupi Ñandejára yvytýpe, Jacob Tupã rógape; ha ñanehekomboʼéta hapekuérare, ha jaguatáta iguataha rupi; Sión-gui niko osẽta pe léi, ha Ñandejára ñeʼẽ Jerusalén-gui.

4 Ha haʼe ohusgáta tetãnguéra apytépe, ha ojaʼóta tavayguakueraitápe; ha haʼekuéra ojapóta ikysepukúgui arádo rréha, ha lansakuéragui óses—Ndohupimoʼãvéima tetã ikysepuku ambue tetãre, ha noñembosakoʼimoʼãvéima hikuái ñorairõrã.

5 O Jacob róga, peju ha jaguata Ñandejára resapépe; heẽ, peju, maymáva niko pejavy, opavave pende rape vaíre.

6 Upévare, O Ñandejára, rehejákuri nde tavayguakuérape, Jacob róga, henyhẽgui hikuái kuarahyresẽmeguakuéra rembiapógui, ha ohendu umi agorérope filisteo-kuéraicha, ha pytagua raʼykuéra ndive ojoaju.

7 Ijyvy avei henyhẽ pláta ha órogui, imbaʼerepykuéra ndopái; avei ijyvy henyhẽ kavajúgui, ha ikarrokuéra hetaiterei.

8 Ijyvy henyhẽ avei ídolokuéragui; otupaitũ hikuái umi mbaʼe ipópe ojapovaʼekuépe, umi ikuãme ojapovaʼekuépe.

9 Ha pe yvypóra iñañáva noñakãitýi, ni pe tuicháva noñemomirĩri, upévare, ani reperdona chupe.

10 O peẽ peneñañáva, peike pe itakuápe, ha pekañy pe yvytimbópe. Ñandejára kyhyje ha pe imahesta verapy pendepyʼajopýta.

11 Ha ojehúta yvypóra jesaupi oñemomirĩta, ha yvyporakuéra ñembotuicha oñemotindýta, ha Ñandejára añónte oñemombaʼeguasúta upe árape.

12 Pe Señor de los Ejércitos ára pyaʼe oútagui opa tetãnguéra ári, heẽ, opavave ári; heẽ, pe ijorgullóso ha oñembotuicháva ári, ha opa oñemombaʼeguasúva ári, ha oñemomirĩta chupekuéra.

13 Heẽ, ha Ñandejára ára oúta opa cedro líbano-pegua ári, haʼekuéra ijyvate haguére; ha oñemopuʼãgui; ha opa ensina Basan-pegua ári;

14 Ha opa yvytyrusu ári, ha opa yvyty ári; ha opa tetãnguéra oñembotuicháva, ha opavave tavayguakuéra ári;

15 Ha opa tórre ijyvatéva ári, ha opa tápia mbarete ári;

16 Ha opa yga yguasupegua ári, ha opa yga Tarsis-pegua ári, ha opa ojehecháva ári.

17 Ha pe yvypóra ñemombaʼeguasu ojeitýta, yvyporakuéra ñembotuicha oñemotindýta; ha Ñandejára añónte oñemombaʼeguasúta upe árape.

18 Ha haʼe oipeʼapáta umi idolokuéra.

19 Ha yvyporakuéra oikéta itakuápe, ha umi yvykuápe, pe Ñandejára kyhyje hoʼátagui hiʼarikuéra ha pe imahesta verapy oipyʼajopýta chupekuéra, opuʼã vove omboryrýi vaipaite hag̃ua pe yvy.

20 Upe árape yvypóra omombóta anguja ha mbopípe umi hi ídolo pláta, ha órogui, ojapovaʼekue otupaitũ hag̃ua;

21 Toike itakuápe, ha umi itaguasukuérape, Ñandejára kyhyje oútagui hiʼarikuéra, ha iverapy mahesta oipyʼajopýta chupekuéra, opuʼã vove haʼe omboryrýi vaipaite hag̃ua pe yvy.

22 Pejeheja yvypóragui, ipytu oĩva itĩme; ha mbaʼére katu piko oñemombaʼevaʼerã?