1 Ha péina ápe, oĩta heta—upe árape che ajapo vove peteĩ tembiapo techapyrã ijapytepekuéra, chemanduʼa hag̃ua che konvénio ajapovaʼekuére yvypóra raʼykuéra ndive, aipysojey hag̃ua che po mokõiha jey ambyaty hag̃ua che tavayguakuérape, haʼéva Israel rogagua;

2 Ha avei che chemanduʼa hag̃ua umi ñeʼẽmeʼẽ ajapovaʼekue ndéve, Nefi, ha avei nde rúpe, chemanduʼataha ne ñemoñarére; ha ne ñemoñare ñeʼẽnguéra osẽtaha che jurúgui ne ñemoñarépe; ha che ñeʼẽnguéra ohóta mbaretépe yvy paha peve, haʼe hag̃ua aoveve che tavayguakuérape, haʼéva Israel rogagua;

3 Ha che ñeʼẽnguéra ohótagui—heta gentil-kuéra heʼíta: Peteĩ Biblia! Peteĩ Biblia! Roguerekóma peteĩ Biblia, ha ndaikatuvéima oĩ ambue Biblia.

4 Ha péicha heʼi Tupã Ñandejára: O tekove tavy, oguerekóta hikuái peteĩ Biblia; ha oúta judio-kuéragui, che konvénio tavayguakuéra ymaguare. Ha mbaʼe aguyje piko ohechauka hikuái judio-kuérape pe Biblia ohupytyvaʼekue chuguikuérare? Heẽ, mbaʼe piko heʼise péicha umi gentil? Imanduʼa piko haʼekuéra judio-kuéra rembiapo, mbaʼapo ha jehasaʼasy, ha ijesareko chendive g̃uarãre, ogueraha hag̃ua hikuái salvasiõ gentil-kuérape?

5 O gentil-kuéra, penemanduʼa piko judio-kuérare, che konvénio tavayguakuéra ymaguarére? Nahániri; ha katu pemoñeʼẽngái, ha ndapehayhúi chupekuéra, ha napeñehaʼãi pembyatyjey chupekuéra. Ha péina ápe, che ambou jeýta opa koʼã mbaʼekuéra pene akã ári; ha che Ñandejára ndacheresaráiri che tavayguakuéragui.

6 O tekove tavy, eréva: Peteĩ Biblia, roguerekóma peteĩ Biblia, ha noroikotevẽvéima Biblia. Peguerekovaʼerãmoʼã piko peteĩ Biblia ndahaʼéirire judio-kuéra rupi?

7 Ndapeikuaái piko oĩha ambue tetãnguéra? Ndapeikuaái piko che, Ñandejára pene Tupã, ajapohague mayma yvypórape, che manduʼaha umi islas del mar-pe oikóvare; ha aisãmbyhyha yvate yvágape ha iguýpe yvy ári; ha ahechauka che ñeʼẽ yvypóra raʼykuérape, heẽ, jepe opa tetã yvy ariguápe?

8 Mbaʼére pekaguai, oñemeʼẽve haguére peẽme che ñeʼẽ? Ndapeikuaái piko mokõi tetã testimónio haʼeha peẽme peteĩ testígo che haʼeha Tupã, che manduʼáva peteĩ ha ambue tetãre? Upévare, peteĩ ñeʼẽnte che añeʼẽ peteĩ ha ambue tetãme. Ha mokõive tetã ojoaju vove mokõivéva testimónio ojoajúta avei.

9 Ha ajapo koʼãva ahechauka hag̃ua hetápe che haʼeha peteĩnte kuehe, ko árape ha tapiaite; ha ameʼẽ che ñeʼẽ che aipotaháicha. Ha ani peimoʼã añeʼẽ haguére peteĩ ñeʼẽ ndaikatuiha añeʼẽ ambue; ha katu neʼĩra gueteri opa che rembiapo; ni ndopamoʼãi yvypóra opa peve; ni upe guive ára tapiaite peve.

10 Upévare, peguereko haguére peteĩ Biblia napeimoʼãivaʼerã oguerekopaha che ñeʼẽ; ni napeimoʼãivaʼerã che ndahaiukaveiha ambue.

11 Ha haʼe opa yvypórape, kuarahyresẽ, ha kuarahyreiképe, nórte, ha súrpe, ha umi islas del mar-pe, ohai hag̃ua ñeʼẽnguéra che añeʼẽva chupekuéra; ha umi kuatiañeʼẽ ojehaívare che ahusgáta yvórape, opavave yvypóra hembiapóre, ojehaivaʼekuépe oĩháicha.

12 Ha péina ápe, añeʼẽta judio-kuérape ha haʼekuéra ohaíta; ha añeʼẽta avei nefita-kuérape ha haʼekuéra ohaíta; ha avei añeʼẽta ambue trivukuéra Israel rogaguávape, aguerahavaʼekue mombyry, ha haʼekuéra ohaíta; ha avei añeʼẽta opa yvypegua tetãme ha haʼekuéra ohaíta.

13 Ha ojehúta judio-kuéra oguerekóta nefita-kuéra ñeʼẽ, ha nefita-kuéra oguerekóta judio-kuéra ñeʼẽ; ha nefita-kuéra ha judio-kuéra oguerekóta umi trívu Israel-pegua okañyvaʼekue ñeʼẽ; ha umi trívu Israel-pegua okañyvaʼekue oguerekóta nefita-kuéra ha judio-kuéra ñeʼẽ.

14 Ha ojehúta che tavayguakuéra, haʼéva Israel rogapegua, oñembyatýta hógape yvy imbaʼévape; ha che ñeʼẽ avei oñembyatýta peteĩme. Ha ahechaukáta umi oñemoĩvape che ñeʼẽ ha che tavayguakuérare, haʼéva Israel rogagua, che haʼeha Tupã, ha ajapohague konvénio Abraham ndive chemanduʼataha iñemoñarére tapiaite peve.