1 Ha koʼág̃a, Che, Nefi, añeʼẽta umi profesiakuéra che ru oñeʼẽvaʼekuére, José, Egipto-pe ojeguerahavaʼekue reheguáre.

2 Ha péina ápe, haʼe añetehápe oprofetisavaʼekue opa umi iñemoñare rehe. Ha ndahetái ambue profesiakuéra tuichavéva, umi haʼe ohaivaʼekuégui. Ha haʼe oprofetisa ñanderehe, ha umi ñane ñemoñareʼaty oútava rehe; ha koʼãva ojehai umi pláncha bronce-guigua ári.

3 Upévare, che ru oñeʼẽmba rire José profesiakuérare, haʼe ohenói Lamán rogaguakuérape, taʼyrakuéra, ha tajyrakuérape, ha heʼi chupekuéra: Péina ápe, che raʼykuéra, ha che rajykuéra, peẽ haʼéva che raʼy ypykue raʼy ha tajyrakuéra, aipota pehendu che ñeʼẽnguéra.

4 Tupã Ñandejára heʼígui: Peneñeʼẽrendu aja che rembiapoukapykuérare peñakãrapuʼãta ko tetãme; ha napeneñeʼẽrendúiramo che rembiapoukapykuérare peñemosẽta che renondégui.

5 Ha péina ápe, che raʼy ha che rajykuéra, ndaikatúi aguejy che ñeñotỹháme aheja mboyve pende ári peteĩ jehovasa; ha péina ápe, che aikuaa peñemoarandúramo pe tape peguatavaʼerãme ndapejeimoʼãiha chugui.

6 Upévare, peñemoñeʼẽngáiramo, péina ápe, aheja che jehovasa pende ári, ojepeʼa hag̃ua pendehegui upe ñeʼẽngái ha toʼa pende rukuéra akã ári.

7 Upévare, che jehovasa rupi Tupã Ñandejára ndohejamoʼãi pemano; upévare, haʼe pende poriahuverekóta peẽme ha pene ñemoñarépe tapiaite peve.

8 Ha ojehu che ru oñeʼẽmba rire Lamán raʼy ha rajykuérape, ogueruka henondépe Lemuel raʼy ha rajykuérape.

9 Ha oñeʼẽ chupekuéra, heʼívo: Péina ápe, che raʼy ha che rajykuéra, peẽ haʼéva che raʼy mokõiha raʼy ha rajykuéra; péina ápe aheja avei peẽme jehovasa ahejavaʼekue Lamán raʼy ha rajykuérape; upévare, napeñehundipamoʼãi; ha katu ipahápe pene ñemoñarekuéra ojehovasáta.

10 Ha ojehu che ru oñeʼẽmba rire chupekuéra, péina ápe, oñeʼẽ Ismael raʼykuérape, heẽ, ha opavave hogaguápe.

11 Ha oñeʼẽmba rire chupekuéra, haʼe oñeʼẽ Sam-pe, heʼívo: Rejehovasapyréva nde, ha ne ñemoñare; rehupytýtagui upe tetã nde joykeʼy Nefi-cha. Ha ne ñemoñare ojeipapáta iñemoñare ndive; ha nde haʼéta nde joykeʼýicha, ha ne ñemoñare haʼéta iñemoñaréicha; ha nde rejehovasáta opa nde ára pukukue aja.

12 Ha ojehu che ru, Lehi, oñeʼẽmba rire hogaguakuérape, pe ikorasõme oñanduháicha ha pe Ñandejára Espíritu oĩva ipype rupi, haʼe ituja. Ha ojehu omano, ha oñeñotỹ.

13 Ha ojehu ndahetái ára omano rire, Lamán ha Lemuel ha Ismael raʼykuéra ipochy chendive umi Ñandejára rekomboʼe rehe.

14 Ha che, Nefi, ahecha tekotevẽha añeʼẽ chupekuéra, pe iñeʼẽme heʼiháicha; ha che añeʼẽkuri heta mbaʼe chupekuéra, ha avei che ru, omano mboyve; ha heta umi mbaʼe roʼevaʼekue ojehai ambue che pláncha ári; hetave tembiasakue ojehaígui umi ambue che pláncha ári.

15 Ha koʼãva ári ahai umi mbaʼe che ángapegua, ha heta umi escritura ojehaíva umi pláncha bronce-guigua ári. Che ánga horýgui escritura-kuérape, ha che korasõ tuicha ojepyʼamongeta hesekuéra, ha ahai che raʼykuéra tekomboʼe ha mbaʼe porãrã.

16 Péina ápe, che ánga hory Ñandejára mbaʼekuérape; ha che korasõ ojepyʼamongeta meme umi mbaʼe ahecha ha ahenduvaʼekuére.

17 Upevére, jepeve tuicha Ñandejára pyʼaporã, ohechaukápe chéve hembiapo guasu ha techapyrãva, che korasõ heʼiʼasy: O kuimbaʼe poriahu niko che! Heẽ, che korasõ oñembyasy che rete rupi; che ánga ojejopy che rembiapovaikuére.

18 Ojere cherehe, umi pyʼaraʼã ha angaipa ndahasyietéva cheahoʼi hag̃ua.

19 Ha avyʼaséramo, che korasõ ipyahẽ umi che angaipa rehe; upevére, che aikuaa mávarepa ajerovia.

20 Ñandejára haʼékuri che jokoha; haʼe cheisãmbyhy umi che jeikoʼasy paʼũme taveʼỹre; ha haʼe cheñongatu yguasukuéra pypykuete ári.

21 Haʼe chemyenyhẽ imborayhúpe, omboypi peve che roʼo.

22 Haʼe omoapañuãikuri cherayhuʼỹvape, omboryrýi peve chupekuéra cherenondépe.

23 Péina ápe, haʼe ohendu che jerureʼasy arakue aja, ha omeʼẽ chéve techaukápe kuaapy pyharekue aja.

24 Ha arakue aja oñemombaretékuri che jerovia ñemboʼe mbaretépe henondépe; heẽ, ahupíkuri che ñeʼẽ yvatete; ha oguejy angelkuéra ha cheministra.

25 Ha che rete ojegueraha Ijespíritu pepóre yvyty yvatete peve. Ha che resa ohecha mbaʼe tuicháva, heẽ, tuichaitereíva yvypórape g̃uarã; upévare ojeʼe chéve ani hag̃ua ahai umíva.

26 Upéicharamo, ahecha rire mbaʼe tuichaitéva, ha Ñandejára imborayhúpe yvyporakuéra raʼýre ou rire hendapekuéra hetaite poriahuvereko reheve, mbaʼérehe piko hasẽvaʼerã che korasõ ha opyta che ánga pe vyʼaʼỹ yvyty paʼũme, ha che roʼo ojehekýi, ha che mbarete ikangy, che jeikoʼasykuérare?

27 Ha mbaʼére piko añemeʼẽta angaipápe, che roʼo rupi? Heẽ, ha mbaʼére piko añemeʼẽta umi pyʼaraʼãme, pe aña oñemohenda hag̃ua che korasõme ohundi hag̃ua che pyʼaguapy ha ojopy hag̃ua che ánga? Mbaʼére piko chepochy che rayhuʼỹvare?

28 Epáy, che ánga! Ani reʼave angaipápe. Evyʼa, O che korasõ, ha anive emeʼẽ hendag̃ua che ánga ohayhuʼỹvape.

29 Anive ndepochy che rayhuʼỹvare. Anive remokangy che mbarete che jeikoʼasýre.

30 Evyʼa, O che korasõ, ha ejerureʼasy Ñandejárape, ha ere: O Ñandejára, roguerohorýta akoiete peve; heẽ, che ánga ovyʼáta nderehe, che Tupã, ha che salvasiõ rróka.

31 O Ñandejára, rerredimítapa che ánga? Cheipeʼátapa che rayhuʼỹva pógui? Chemboryrýitapa ou vove angaipa?

32 Toñemboty meme añaretã rokẽ che renondépe, oñembyasýgui che korasõ ha imirĩ che ánga! O Ñandejára, ani remboty nde rekojoja rokẽ che renondépe, ikatu hag̃uáicha aiko pe yvytypaʼũ rape kirirĩ rupi, aguata hag̃ua pe tape ikareʼỹvare.

33 O Ñandejára, cheañuã pe nde rekojoja ahojápe! O Ñandejára, embosakoʼi peteĩ tape ajei hag̃ua che rayhuʼỹvakuéragui! Embojoja che rape che renondépe! Aníkena emoĩ ñepysangaha che renondépe—ha katu emyesakã che rape che renondépe, ha ani rejoko che rape, ha katu ejoko che rayhuʼỹva rape.

34 O Ñandejára, nderehe ajerovia, ha nderehe ajeroviáta tapiaite peve. Namoĩmoʼãi che jerovia tekove jyváre; aikuaágui iñeʼẽngaiha omoĩva ijerovia tekove jyváre. Heẽ, taiñeʼẽngái pe omoĩva ijerovia yvypórare térã pe ojapóva toʼógui ijyvarã.

35 Heẽ, aikuaa Tupã omeʼẽtaha omeʼẽseháicha ojerurévape. Heẽ, che Tupã omeʼẽta chéve, ndajerureivairíramo; upévare amopuʼãta ndéve che ñeʼẽ; heẽ, ajerureʼasýta ndéve, che Tupã, che rekojoja rróka. Péina ápe, che ñeʼẽ ojupíta tapiaite nerendápe, che rróka ha che Tupã Opaveʼỹva. Amén.