1 Avei, Ñandejára ñeʼẽ heʼi chéve: Ejagarra peteĩ yvyra tuicháva, ha ehai ipype kuimbaʼe ohaiháicha, Maher-shalal-hash-baz rehegua.

2 Ha ajagarra testigokuéra ijeroviarekóva ojapo hag̃ua kuatiajehaipyre, sacerdote Urías-pe, ha Zacarías-pe Jeberequías raʼy.

3 Ha aiko pe profetísa ndive, ha hyeguasu ha imemby peteĩ kuimbaʼe. Upéramo heʼi chéve Ñandejára: Emoĩ chupe herarã, Maher-shalal-hash-baz.

4 Ha péina ápe, pe mitã heʼikuaa mboyve, Che ru, ha che sy, ojeipeʼáta Damasco-gui imbaʼehepy ha Samaria mondapyre pe Asiria-gua rréi renondégui.

5 Ha Ñandejára oñeʼẽ jey chéve, heʼívo:

6 Kóva ko tavayguakuéra ndoipotáigui Siloe-pegua y osyrýva pyʼaguapýpe, ha ovyʼaiterei Rezín ha Samaria raʼy ndive;

7 Koʼág̃a upévare, péina ápe, Ñandejára ohupíta hiʼarikuéra ysyrypegua y, mbarete ha hetáva, upéva haʼe Asiria-gua rréi ha opa iverapy; ha haʼe ojupíta opa hiʼy rape ári, ha ohóta opa hiʼy rembeʼy ári.

8 Ha ohasáta Judá rupi; ha oñehẽ ha omyenyhẽta; ha og̃uahẽta ijajúra peve; ha pe ipepo jepyso omyenyhẽta nde yvy tuichakue, O Emanuel.

9 Peñembyaty, O tavayguakuéra, ha peñemonguʼíta; ha pehendu opavave peẽ tetã mombyryguáva; peñembosakoʼi, ha peñemonguʼíta; peñembosakoʼi ha peñemonguʼíta.

10 Peñembyaty consejo-pe, ha ndaʼemoʼãi mbaʼeve; peje ñeʼẽ ha ndopytamoʼãi; Tupã oĩgui orendive.

11 Péicha Ñandejára oñeʼẽgui chéve po mbarete reheve, ha chemboʼe ani hag̃ua aiko kóva ko tavayguakuéra rapére, heʼívo:

12 Ani ere, guyryry, opa mbaʼe ko tavayguakuéra ohenóivape, guyryry, ha ani ekyhyje haʼekuéra okyhyjévagui, ani ekyhyje.

13 Pemomarangatu Señor de los Ejércitos-pe; ha haʼe tahaʼe pendekyhyje, ha haʼe tahaʼe pendekyhyjeha.

14 Ha haʼéta peẽme ñetupaitũháramo; ha katu ita ñepysangaha, ha ita ñekoʼõiha umi mokõi Israel rógape g̃uarã, ñuhã ha lásoramo umi Jerusalén-pe oikóvape g̃uarã.

15 Ha heta ijapytepekuéra oñepysanga ha hoʼáta, ha ojeipyʼajopýta, ha oñemoñuhãta, ha oñeñapytĩta.

16 Ejokua pe testimónio; esella pe léi che remimboʼekuéra apytépe.

17 Ha che ahaʼarõta Ñandejárape, oñomíva hova Jacob rógagui, ha chupe ahekáta.

18 Péina ápe, che ha umi taʼýra Ñandejára omeʼẽvaʼekue chéve haʼe Israel-pe g̃uarã techaukaha ha techapyrãramo Señor de los Ejércitos-gui, oikóva Monte de Sión-pe.

19 Ha ojeʼe vove peẽme: Peporandu umi ohenóiva omanovaʼekue ángape, ha umi adivíno heʼipávape ha oñeʼẽva hãi paʼũ rupive—ndohekaivaʼerã piko tavayguakuéra Itupãme umi oikovéva ohendu hag̃ua omanovaʼekuégui?

20 Pe léi ha testimóniope; ha noñeʼẽiramo hikuái kóva ko ñeʼẽme heʼiháicha, upéva haʼe ndaipórigui tesape ipypekuéra.

21 Ha ohasáta hikuái yvy ári jeipyʼajopyʼatã ha ñembyahýi; ha ojehu iñembyahýi vove hikuái, ipochýta, ha omoñeʼẽngáita irréipe ha Itupãme, ha ohupíta hikuái hesa yvate gotyo.

22 Ha omaʼẽta hikuái yvýre ha ohecháta angekói, ha pytũmby, ha ypytũ jeipyʼajopýgui; ha oñemosẽta chupekuéra pytũmbýpe.