1 Ha ojehu upéi che, Nefi, amoñeʼẽ rire koʼã mbaʼe ojehaíva umi pláncha bronce-guigua ári, che joykeʼykuéra ou cherendápe ha heʼi chéve: Mbaʼe heʼise koʼã mbaʼe remoñeʼẽvaʼekue? Péina ápe, koʼãva piko oñeikũmbyvaʼerã haʼeramoguáicha mbaʼe espíritu reheguáva, oikótava pe espíritu-pe ha ndahaʼéiva ñande retépe?

2 Ha che, Nefi, haʼe chupekuéra: Péina ápe koʼãva ojehechauka profétape upe espíritu ñeʼẽ rupive; ha pe espíritu rupive niko ojeikuaauka opa mbaʼe profetakuérape, mbaʼe oútava yvyporakuéra raʼy ári oikove aja hetépe.

3 Upévare, umi mbaʼe amoñeʼẽvaʼekue haʼe mbaʼe tete ha espíritu reheguáva; haʼetévaicha pe Israel róga oñemosarambítava, koʼág̃a térã upe rire, opa yvy ape ári, ha avei mayma tetãnguéra apytépe.

4 Ha péina ápe, oĩ heta okañýmava umi Jerusalén-pe oikóvagui. Heẽ, hetave mayma umi avaretãnguerapeguáva ojeguerahavaʼekue; ha oñemosarambi koʼápe ha amo umi islas del mar ári; ha moõpa oĩ hikuái avave ore ndoroikuaái, roikuaánte ojeguerahahague chupekuéra.

5 Ha ojegueraha guive chupekuéra, ojeprofetisa koʼã mbaʼe hesekuéra, ha upéicha avei umi upe rire oñemosarambi ha oñemoapañuãitavare, pe Israel-pegua Imarangatúva rupi; omohatãtagui hikuái ikorasõkuéra hese; upévare, oñemosarambíta chupekuéra opa tetãnguéra apytépe ha ojehayhuʼỹta opa yvyporakuérare.

6 Upevére, oñemongakuaa rire hikuái gentil-kuérare, ha Ñandejára omopuʼã rire ipo gentil-kuéra ári ha omoĩ rire chupekuéra aovevéramo, ha taʼyrakuéra ojegueraha rire gentil-kuéra jyva ári, ha tajyrakuéra ijatiʼy ári, péina ápe koʼã mbaʼe oñeñeʼẽha hína haʼe tete reheguáva; péicha haʼégui umi Ñandejára konvénio ñande rukuéra ndive; ha oñeʼẽ ñande rehe umi ára oútavare, ha avei mayma ñande joykeʼykuéra haʼéva Israel rogagua rehe.

7 Ha heʼise outaha ára opa Israel róga oñemosarambi ha oñemoapañuãi rire, Tupã Ñandejára omopuʼãtaha peteĩ tetã ipuʼakapáva gentil-kuéra apytépe, heẽ, opa ko yvy ape ári; ha ñane ñemoñarekuérape haʼekuéra omosarambíta.

8 Ha upéi ñane ñemoñare oñemosarambi rire Tupã Ñandejára ojapóta peteĩ tembiapo tuicha ha hechapyrãva gentil-kuéra apytépe, mbaʼe hepýtava ñane ñemoñarekuérape g̃uarã; upévare, oñembojoja omongakuaataha chupekuéra gentil-kuéra ha oguerahataha ijyva ári ha ijatiʼy ári.

9 Ha avei mbaʼe hepýtava gentil-kuérape g̃uarã; ha ndahaʼéi gentil-kuérape añónte ha katu avei opa Israel rogaguávape, ojeikuaauka hag̃ua umi konvénio Túva yvagapegua ojapovaʼekue Abraham ndive, heʼívo: Ne ñemoñarépe ojehovasáta opa avaretãnguéra yvy arigua.

10 Ha aipota, che joykeʼykuéra, peikuaa ndaikatuiha ojehovasa mayma avaretãnguéra yvy arigua Ñandejára ndohechaukáiramo ijyva tetãnguéra resa renondépe.

11 Upévare, Tupã Ñandejára ohechaukáta ijyva opa tetãnguéra resa renondépe, ojapóvo ikonveniokuéra ha iñevanhélio umi Israel rogagua ndive.

12 Upévare, oguenohẽ jeýta chupekuéra ñeñapytĩmbýgui, ha oñembyatýta chupekuéra ijyvy jehejapyrépe; ha ojeipeʼáta chupekuéra ypytũ ha tatatĩ ypytũgui; ha oikuaáta hikuái Ñandejára haʼeha Isalvador ha Irredentor, pe Israel-gua Ipuʼakapáva.

13 Ha pe tuicha ha ijejaʼeʼỹvéva tupao ruguy, haʼéva pe hekovaivéva opa yvy arigua, ojeréta iñakãre; oñorairõtagui oñondive, ha ipopegua kysepuku ojeréta iñakãnguérare, ha huguykuérape okaʼúta hikuái.

14 Ha opa tetã oñorairõva nendive, O Israel róga, ojeréta ojuehe, ha hoʼáta hikuái pe yvykua ojoʼovaʼekuépe oity hag̃ua umi Ñandejára tavayguakuérape. Ha mayma oñorairõva Sión ndive oñehundíta, ha upe tuicha hekovaíva, ombyaivaʼekue Ñandejára rape porã, heẽ, upe tuicha ha ijejaʼeʼỹvéva tupao, hoʼáta yvýpe ha tuicháta pe ijeʼa.

15 Ha péina ápe, heʼi upe proféta, pyaʼe og̃uahẽta ára Satana ndoguerekomoʼãveimaha puʼaka yvyporakuéra raʼy rehe; hiʼag̃uíma ára mayma iñañáva ha oñembotuicháva haʼetaha ñana pirúicha; ha hiʼag̃uíma ára ojehapyvaʼerãha.

16 Hiʼag̃uíma ára opaite Tupã ñekoʼõi oñeñohẽtaha mayma yvyporakuéra raʼy ári; haʼe ndohejamoʼãigui umi iñañáva ohundi hekojojávape.

17 Upévare, haʼe oñongatúta umi hekojojávape ipuʼaka rupive, jepeve oútaramo opaite iñekoʼõi, ha umi hekojojáva oñeñongatúta, oñehundipa peve tatápe umi ohayhuʼỹva chupekuéra. Upévare, umi hekojojáva ndokyhyjeivaʼerã; heʼígui péicha upe proféta, haʼekuéra ojesalváta, jepeve tata rupive.

18 Péina ápe, che joykeʼykuéra, che haʼe peẽme, koʼã mbaʼe pyaʼe ouvaʼerãha, heẽ, tuguy jepeve, ha tata, ha tatatĩ ypytũ ouvaʼerã; ha oumantevaʼerã pe yvy ape ári; ha oúta yvyporakuérape hetépe oĩ aja omohatãramo hikuái ikorasõkuéra Israel-pegua Imarangatúva rehe.

19 Ha péina ápe, umi hekojojáva nomanomoʼãi; añetehápe oútagui ára maymáva umi oñorairõva Sión ndive ojeipeʼataha.

20 Ha Ñandejára añetehápe ombosakoʼíta peteĩ tape itavayguakuérape g̃uarã, oñekumpli hag̃ua Moisés ñeʼẽnguéra, haʼe oñeʼẽvaʼekue, heʼívo: Ñandejára pende Tupã omopuʼãta peẽme peteĩ proféta, cheichagua; ha chupe pehendúta opa mbaʼe heʼívape peẽme. Ha ojehu maymáva umi nohenduséiva upe profétape oñemosẽta umi tavayguakuéra apytégui.

21 Ha koʼág̃a che, Nefi, haʼe peẽme, kóva ko proféta oñeʼẽhague Moisés haʼeha Israel-pegua Imarangatúva; upévare, haʼe oporohusgáta tekojojápe.

22 Ha umi hekojojáva ndokyhyjeivaʼerã, haʼekuéra niko haʼe umi noñemoapañuãmoʼãiva. Ha katu haʼe pe aña rréino, oñemopuʼãtava yvyporakuéra raʼy apytépe, rréino oñemoĩva umi hetépe oĩva apytépe—

23 Pyaʼe og̃uahẽtagui ára maymáva umi tupao oñemopuʼãvaʼekue ohupyty hag̃ua pirapire ñemonoʼõ, ha maymáva umi oñemopuʼãvaʼekue ohupyty hag̃ua puʼaka tekovekuéra ári, ha umi oñemopuʼãvaʼekue oñembokaʼavo hag̃ua pe yvóra resa renondépe, ha umi ohekáva tete jeipota ha mbaʼe yvorapeguáva, ha ojapóva opáichagua tembiapovai; heẽ, ha ipahápe, maymáva haʼéva pe aña rreinogua haʼe hína umi okyhyje, ha oryrýi, ha ipirĩvaʼerã; haʼekuéra haʼe umi oñemotindyvaʼerã yvytimbo peve; haʼekuéra haʼe umi oñemboykuvaʼerã ñana pirúicha; ha koʼãva pe proféta ñeʼẽme heʼiháicha.

24 Ha pyaʼe og̃uahẽ ára umi hekojojáva ojeguerahataha vakaraʼýicha pe atýpe, ha Israel-pegua Imarangatúva orreináta poguy, mbarete ha puʼakápe, ha tuicha verapýpe.

25 Ha haʼe ombyaty itaʼyrakuéra irundy rendágui yvy ape ári; ha oipapa ijovechakuéra, ha haʼekuéra oikuaa chupe; ha oĩta peteĩ ovechaʼaty ha peteĩ ovecharerekua; ha haʼe omongarúta umi ijovechápe, ha hendive ojuhúta hikuái kapiʼipe.

26 Ha itavayguakuéra tekojoja rupi, Satana ndoguerekói puʼaka; upévare, ndaikatúi ojepoi chugui heta ary pukukue aja; ndoguerekóigui haʼe puʼaka tavayguakuéra korasõ ári, oikógui hikuái tekojojápe, ha Israel-pegua Imarangatúva orreina.

27 Ha koʼág̃a péina ápe, che, Nefi, haʼe peẽme opa koʼã mbaʼe oikovaʼerã tetépe ojeiko aja.

28 Ha katu, péina ápe, opa tetãnguéra, avaretãnguéra, ñeʼẽnguéra ha tavakuéra oikóta kyhyjeʼỹme pe Israel-pegua Imarangatúva ndive oñearrepentíramo hikuái.

29 Ha koʼág̃a che, Nefi, ambopaha; nañanimavéimagui añeʼẽvo koʼã mbaʼe rehe.

30 Upévare, che joykeʼykuéra, aipota peikuaa umi mbaʼe ojehaivaʼekue umi pláncha bronce-guigua ári añeteguaha; ha otestifika yvypóra iñeʼẽrenduvaʼerãha Tupã rembiapoukapykuérare.

31 Upévare, ani peimoʼã che ha che ru añónte romeʼẽha testimónio, ha avei romboʼe koʼãva. Upévare, peneñeʼẽrendúramo umi tembiapoukapýre, ha peñehaʼãmbaitéramo ipahaite peve, pejesalváta upe ára pahápe. Ha upéicha. Amén.