1 Ha ojehu heʼi chéve pe ángel: Emaʼẽ, ha ehecha umi ne ñemoñare, ha avei nde joykeʼykuéra ñemoñare. Ha amaʼẽ ha ahecha pe yvy ñeʼẽmeʼẽngue; ha ahecha hetaiterei yvyporakuéra, heẽ, hetaiterei hikuái pe yvykuʼi oĩva yguasu rembeʼýicha.

2 Ha ojehu ahecha umi atyguasu oñembyatýramo oñorairõ hag̃ua, peteĩva ambue ndive; ha ahecha ñorairõguasukuéra, ha ñorairõguasu rerakuã, ha ahecha pe tuichaite jejuka oikóva kysepukúpe che tavayguakuéra apytépe.

3 Ha ojehu ahecha ohasa heta ñemoñare, ñorairõguasu ha jeikovaípe yvy ape ári; ha ahecha heta tavaguasu, heẽ, hetaiterei ndaikatúiva aipapa.

4 Ha ojehu ahecha peteĩ tatatĩ iñypytũva pe yvy ñeʼẽmeʼẽngue ape ári; ha ahecha aravera, ha ahendu arasunu ha yvyryrýi, ha opáichagua mbaʼe ryapu vai; ha ahecha umi yvy ha itakuéra, ojeka; ha ahecha yvytykuéra pehẽngue hoʼapa; ha ahecha umi yvy ijojaʼasýva, ojoavypáramo; ahecha heta tavaguasu oho yvyguýpe; ha ahecha heta ambuéva okái tatápe; ha ahecha heta hoʼáva yvýpe, umi yvyryrýi rupi.

5 Ha ojehu ahechapa rire koʼã mbaʼe, ahecha pe tatatĩ iñypytũva, ha ojei pe yvy ape árigui; ha péina ápe, ahecha umi atyguasu ndoʼaivaʼekue umi tuicha ha ivaietéva Ñandejára huísio rupi.

6 Ha ahecha pe yvága ojepeʼa, ha pe Tupã Cordero oguejy yvágagui; ha oguejy ha ojehechauka chupekuéra.

7 Ha avei ahecha ha ameʼẽ testimónio pe Espíritu Santo oguejyha ambue doce ári; ha oñeordenákuri chupekuéra Tupã rehe, ha ojeiporavo.

8 Ha pe ángel oñeʼẽ chéve, heʼívo: Péina ápe umi doce Cordero remimboʼe, ojeiporavovaʼekue oministra hag̃ua ne ñemoñarépe.

9 Ha heʼi chéve: Nemanduʼápa umi doce apóstoles del Cordero-re? Péina ápe haʼekuéra haʼe ohusgátava umi doce trívu Israel-pegua; upévare, umi doce ministro ne ñemoñare rehegua ojehusgáta hesekuéra rupi; peẽ haʼe haguére Israel rogapegua.

10 Ha koʼã doce ministro nde rehecháva ohusgáta ne ñemoñarépe. Ha, péina ápe, hekojoja hikuái ára apyraʼỹ meve; ha ijerovia rupi pe Tupã Cordero-re ijaokuéra oñemomorotĩ huguýpe.

11 Ha pe ángel heʼi chéve: Emaʼ ẽ! Ha amaʼẽ ha ahecha omanoha tekojojápe mbohapy ñemoñare; ha ijaokuéra imorotĩ pe Tupã Cordero-icha. Ha heʼi chéve pe ángel: koʼãva oñemomorotĩ pe Cordero ruguýpe, pe ijerovia rupi hese.

12 Ha che, Nefi, ahecha avei heta umi irundy ñemoñareguáva omano tekojojápe.

13 Ha ojehu ahecha umi atyguasu yvy arigua oñembyaty.

14 Ha pe ángel heʼi chéve: Péina ápe ne ñemoñare, ha avei umi nde joykeʼykuéra ñemoñare.

15 Ha ojehu amaʼẽ ha ahecha umi che ñemoñare oñembyaty atyguasúpe umi che joykeʼykuéra ñemoñare rehe; ha ijaty hikuái oñorairõ hag̃ua.

16 Ha pe ángel oñeʼẽ chéve, heʼívo: Péina ápe pe y kyʼa yvu nde ru ohechavaʼekue; heẽ, pe ysyry haʼe oñeʼẽhague; ha umi ipypukukue haʼe pe aña retã pypukukue.

17 Ha umi tatatĩ iñipytũva haʼe pe aña jeipyʼaraʼã, omoypytũva tesa, ha omohatã umi yvyporakuéra raʼy korasõ, ha ogueraha chupekuéra tape pyrusúre, ha péicha okañy, ha oñehundi hikuái.

18 Ha pe óga tuicha ha ipyrusúva, nde ru ohechavaʼekue, heʼise umi mbaʼepotarei ha orgúllo oguerekóva yvyporakuéra raʼy. Ha peteĩ tuicha ha ivaietereíva yvykua huguaʼỹva omopaʼũ chupekuéra; heẽ, haʼéva pe Tupã Ijapyraʼỹva hustísia ñeʼẽ, ha pe Mesías haʼéva pe Tupã Cordero, omeʼẽvagui testimónio pe Espíritu Santo, ára ñepyrũmby guive koʼag̃aite peve, ha koʼág̃a guive tapiaite peve.

19 Ha pe ángel heʼi jave koʼã ñeʼẽ, amaʼẽ ha ahecha che joykeʼykuéra ñemoñare oñorairõramo che ñemoñare ndive, pe ángel ñeʼẽ heʼi haguéicha; ha pe che ñemoñare orgúllo rupi, ha aña jepyʼaraʼãgui, ahecha umi che joykeʼykuéra ñemoñare ipuʼaka che ñemoñarére.

20 Ha ojehu amaʼẽ, ha ahecha umi che joykeʼykuéra ñemoñare ipuʼaka che ñemoñarére; ha oñemosarambi hikuái atyguasúpe yvy ape ári.

21 Ha ahecha oñembyatýramo hikuái atyguasúpe; ha ahecha ijapytepekuéra ñorairõguasu ha ñorairõguasu terakuã; ha ñorairõguasu ha ñorairõguasu terakuãme ahecha ohasa heta ñemoñareʼaty.

22 Ha pe ángel heʼi chéve: Péina ápe koʼãva hoʼáta jeroviaʼỹme.

23 Ha ojehu ahecha, hoʼa rire hikuái jeroviaʼỹme, oiko chuguikuéra, yvypóra hũ ha ikyʼa ha oporombojeguarúva, henyhẽva ateʼỹ ha opáichagua tembiapokyʼágui.