1 Ha péina ápe, ojehu Ñandejára oñeʼẽ che rúpe, heẽ, iképe, ha heʼi chupe: Rejehovasáva nde Lehi, umi mbaʼe rejapovaʼekue rehe; ha ndejeroviareko haguére ha remombeʼu koʼã tavayguakuérape umi mbaʼe che haʼevaʼekue ndéve, péina ápe, oñehaʼã hikuái oipeʼa ndehegui nde rekove.

2 Ha ojehu Ñandejára heʼi che rúpe, iképe, ojagarra hag̃ua hogaguakuérape ha osẽ taveʼỹme.

3 Ha ojehu haʼe iñeʼẽrendu Ñandejára ñeʼẽre, upévare ojapo Ñandejára heʼiháicha chupe.

4 Ha ojehu osẽ taveʼỹme. Ha oheja hóga, ha pe ijyvy ñeʼẽmeʼẽngue, ha hiʼóro, ha ipláta, ha imbaʼekuéra iporãva, ha ndoguerahái mbaʼeve hendive, hogaguakuéra añónte, ha hiʼupyrã, ha ogaaokuéra, ha osẽ taveʼỹme.

5 Ha oguejy Mar Rojo jere rembeʼýre, ha oguata taveʼỹre pe Mar Rojo rembeʼy mbykyveha ypýpe; ha oguata taveʼỹre hogaguakuéra ndive, oĩ che sy, Saríah, ha che rykeʼykuéra, haʼéva Lamán, Lemuel, ha Sam.

6 Ha ojehu oguata rire mbohapy ára taveʼỹre, omboguapy hogaao peteĩ yvytypaʼũ oĩva peteĩ ysyry rembeʼýpe.

7 Ha ojehu omopuʼã peteĩ altar itágui, ha ojapo peteĩ kuaveʼẽ Ñandejárape, ha omeʼẽ aguyje Ñandejára ñane Tupãme.

8 Ha ojehu ombohéra pe ysyrýpe, Lamán, ha péva hoʼa Mar Rojo-pe; ha pe yvytypaʼũ ojepyso pe ysyry rembeʼýre ha og̃uahẽ pe hoʼaha ypy peve.

9 Ha che ru ohechávo pe y ysyrypegua hoʼaha Mar Rojo ykuápe, haʼe oñeʼẽ Lamán-pe, ha heʼi: ¡Ha rejoguangaʼuraʼe nde kóva ko ysyrýpe, osyrymemévo ykua opaite tekojoja reheguápe!

10 Ha oñeʼẽ avei Lemuel-pe: ¡Ha rejoguangaʼuraʼe nde kóva ko yvytypaʼũme, hatã, ha nereñemovãiva, ha naneambuéiva neñeʼẽrendúvo Ñandejára rembiapoukapykuérare!

11 Koʼãva haʼe oñeʼẽ pe pyʼa hatã oguerekóvare Lamán ha Lemuel; ha péina ápe okaguai hikuái itúva rehe heta mbaʼépe, haʼégui haʼe peteĩ yvypóra ohecha pukúva, ha oguenohẽ chupekuéra tetã Jerusalén-gui, ha oheja ijyvykuéra ñeʼẽmeʼẽngue, ha hiʼóro, ha ipláta, ha imbaʼe porãnguéra, omano hag̃ua taveʼỹme. Ha heʼi hikuái haʼe ojapoha koʼãva umi vyrorei oúva rehe ikorasõme.

12 Ha péichakuri Lamán ha Lemuel, haʼéva ijypykue, okaguai itúva rehe. Ha okaguai hikuái ndoikuaáigui mbaʼéichapa ombaʼapo pe Tupã omoingovevaʼekue chupekuéra.

13 Ha ndogueroviái avei hikuái pe Jerusalén, táva tuichaitéva, ikatuha oñehundi umi profetakuéra ñeʼẽ heʼiháicha. Ha ojogua hikuái judio-kuéra oĩva Jerusalén-pe, oipeʼaséva hekove che rúgui.

14 Ha ojehu che ru oñeʼẽ chupekuéra pe yvytypaʼũ Lemuel-pe, puʼakápe, henyhẽgui Espíritugui, oryrýi peve hetekuéra henondépe. Ha omoypytũ chupekuéra, ha upéicha ndaikatuvéi oñeʼẽvai hikuái hese; upévare, ojapo hikuái pe haʼe heʼíva chupekuéra.

15 Ha oiko che ru peteĩ ogaaópe.

16 Ha ojehu che, Nefi, chemitãiterei gueteri, jepe che rete yvate, ha avei aguereko tuicha jeikuaase Tupã mbaʼeñemimbýgui, upévare, che ajerureʼasy Ñandejárape; ha péina ápe haʼe ou cherendápe, ha omokyrỹi che korasõ ha che aguerovia opaite ñeʼẽ heʼivaʼekue che ru, upévare, che napuʼãi hese ojapo haguéicha che joykeʼykuéra.

17 Ha añeʼẽ Sam-pe, ha haʼe chupe umi mbaʼe Ñandejára heʼivaʼekue chéve Espíritu Santo rupive. Ha ojehu haʼe oguerovia che ñeʼẽ.

18 Ha, péina ápe, Lamán ha Lemuel nohenduséi che ñeʼẽ; ha upémarõ ajepyʼapýgui ikorasõkuéra atãre che ajerureʼasy Ñandejárape hesekuéra.

19 Ha ojehu Ñandejára oñeʼẽ chéve, ha heʼi: Rejehovasáva nde, Nefi, nde jerovia rupi, chereka haguére jesarekópe, ha korasõ mirĩme.

20 Ha peneñeʼẽrenduháicha che rembiapoukapykuérare, peñakãrapuʼãta, ha pejegueraháta peteĩ yvy ñeʼẽmeʼẽnguéme; heẽ, peteĩ yvy che ambosakoʼivaʼekue peẽme g̃uarã; heẽ, peteĩ yvy ojeiporavóva opa ambue yvy árigui.

21 Ha opuʼãháicha nderehe nde joykeʼykuéra, oñemosẽta chupekuéra Ñandejára renondégui.

22 Ha neñeʼẽrenduháicha che rembiapoukapykuérare, romoĩta mburuvicha ha mboʼeháraramo nde joykeʼykuéra ári.

23 Ha péina ápe, og̃uahẽrõ ára opuʼãramo cherehe hikuái, che amoñeʼẽngáita chupekuéra tuicha ñeʼẽngáipe, ha ndoguerekomoʼãi mbaʼevéichagua puʼaka ne ñemoñarekuéra rehe nopuʼãiramo avei hikuái cherehe.

24 Ha opuʼãramo hikuái cherehe, haʼéta peteĩ tukumbo ne ñemoñarépe g̃uarã, omokyreʼỹ hag̃ua chupekuéra imanduʼa hag̃ua hikuái cherehe.