1 Ha ojehu romoñepyrũ jey ore guata pe taveʼỹre; ha upéguive roho haimete kuarahyresẽ gotyo. Ha roguata rohóvo ha rohasa heta jeikoʼasy pe taveʼỹme; ha ore kuñanguéra imemby pe taveʼỹme.

2 Ha tuichaiterei umi Ñandejára jehovasa ore ári, ha roikóramo jepe soʼo pýrare pe taveʼỹre, ore kuñanguéra heta ikamby hoʼuka hag̃ua imembykuérape, ha imbarete hikuái, heẽ, kuimbaʼéicha; ha oñepyrũ ogueropuʼaka hikuái iguata okaguaiʼỹre.

3 Ha upéicha jahecha umi Tupã rembiapoukapy oñekumplivaʼerãha. Ha yvyporakuéra raʼy iñeʼẽrendúramo Tupã rembiapoukapykuérare haʼe omongaru, ha omombarete chupekuéra, ha omeʼẽ chupekuéra umi mbaʼe oikotevẽva ikatu hag̃uáicha ojapo pe haʼe ojerurevaʼekue; upévare, haʼe omeʼẽ oréve roikotevẽva roĩ aja taveʼỹme.

4 Ha ropyta heta ary pukukue aja; heẽ, jepe ocho ary taveʼỹme.

5 Ha rog̃uahẽ yvy rombohérava Abundancia-pe, hetágui upépe yva ha avei eíra kaʼaguy; ha Ñandejára ombosakoʼi opa koʼã mbaʼe ani hag̃ua romano. Ha rohecha pe yguasu, rombohérava Irreantum, ha péva, ñamyesakãramo, heʼise heta y.

6 Ha ojehu romoĩ ore ogaao pe yguasu rembeʼýpe; ha jepeve rohasa heta jeikoʼasy ha heta jehasaʼasy, heẽ, hetaitereígui ndaikatúiva rohaipa, rovyʼaiterei rog̃uahẽ vove pe yguasu rembeʼýpe; ha rombohéra upe tendápe Abundancia, oguereko haguére heta yva.

7 Ha ojehu upe rire, che, Nefi, aĩ rire heta ára upe Abundancia yvýpe, Ñandejára ñeʼẽ ou chéve, heʼívo: Epuʼã, ha ejupi yvytýpe. Ha ojehu apuʼã ha ajupi yvytýpe, ha ajerureʼasy Ñandejárape.

8 Ha ojehu Ñandejára oñeʼẽ chéve, heʼívo: Ejapóta peteĩ yga, ahechaukataháicha ndéve, che agueraha hag̃ua nde tavayguakuérape koʼã ykuéra rupive.

9 Ha che haʼe: Ñandejára, moõpa ahavaʼerã ajuhu hag̃ua mineral amboyku hag̃ua, ikatu hag̃uáicha ajapo umi tembiporu pe yga ajapo hag̃ua nde rehechauka haguéicha chéve?

10 Ha ojehu Ñandejára heʼi chéve moõpa ahavaʼerã ajuhu hag̃ua mineral, ikatu hag̃uáicha ajapo umi tembiporu.

11 Ha ojehu che, Nefi, ajapo peteĩ fuelle ambojepota porãve hag̃ua tata, mymba pirégui; ha ajapo rire pe fuelle aikotevẽva, ambojepota porãve hag̃ua pe tata, ambota ojuehe mokõi ita oiko hag̃ua tata.

12 Ha upe ára peve Ñandejára ndohejáikuri romyendyeterei tata, roguata aja pe taveʼỹre; haʼe heʼígui: Che ambohéta peẽme pene rembiʼu, ani hag̃ua pembojy;

13 Ha che haʼéta avei pende resapeha pe taveʼỹme; ha ambosakoʼíta pe tape penerenonderã, peneñeʼẽrendúramo che rembiapoukapykuérare; upévare, peneñeʼẽrenduháicha che rembiapoukapykuérare pejegueraháta pe yvy ñeʼẽmeʼẽngue gotyo; ha peikuaáta che poguerahahague.

14 Heẽ, ha avei Ñandejára heʼi: Peg̃uahẽ rire pe yvy ñeʼẽmeʼẽnguéme, peikuaáta che, Ñandejára, haʼeha Tupã; ha che, Ñandejára, poipeʼahague ñehundígui; heẽ, che poguenohẽhague Jerusalén retãgui.

15 Upévare, che, Nefi, añehaʼã cheñeʼẽrendu Ñandejára rembiapoukapykuérare, ha añemoñeʼẽ che joykeʼykuérape ijeroviareko ha ojesareko hag̃ua hikuái.

16 Ha ojehu ajapo tembiporukuéra metal itágui amboykuvaʼekue reheve.

17 Ha ohechávo che joykeʼykuéra ajapotaha peteĩ yga oñepyrũ okaguai cherehe, heʼívo: Ñande joykeʼy itavy, oimoʼã ikatutaha ojapo peteĩ yga; heẽ, ha avei oimoʼã ikatutaha ohasa koʼã yguasu rupive.

18 Ha péicha che joykeʼykuéra okaguai cherehe, ha nombaʼaposéi hikuái, ndogueroviáigui che ikatutaha ajapo peteĩ yga; ha ndogueroviái avei hikuái che añehekomboʼehague Ñandejárare.

19 Ha koʼág̃a ojehu che, Nefi, ajepyʼapyeterei ikorasõkuéra atãre; ha ohecha vove hikuái añepyrũha ajepyʼapy hory ikorasõkuéra, ha ovyʼaiterei hikuái cherehe, heʼívo: Roikuaavoíkuri nde ndaikatumoʼãiha rejapo peteĩ yga, roikuaágui nandekatupyryiha; upévare, ndaikatúi rejapo ko tembiapo guasu.

20 Nde rejogua ñande rúpe, ojeguerahaukavaʼekue umi vyrorei oúva ikorasõmere; heẽ, ha oreguenohẽ Jerusalén retãgui, ha roikorei taveʼỹre koʼã heta ary aja; ha ore kuñanguéra ombaʼapo, hyeguasu aja jepeve; ha oguereko imembykuéra taveʼỹme ha ohasa opa mbaʼevai, ha ñemanónte ndohasái; ha iporãvevaʼerãmoʼã chupekuéra omano osẽ mboyve Jerusalén-gui ohasarangue koʼã jeikoʼasy.

21 Péina ápe, roikoʼasýkuri heta ary aja koʼã taveʼỹre, ha umi ára ikatuvaʼerãmoʼã rohasa porã ore mbaʼekuéra reheve ha ore yvy jehejapyrépe; heẽ, ha ikatútakuri rovyʼa.

22 Ha roikuaa umi tavayguakuéra oĩva Jerusalén retãme haʼeha yvypóra hekojojáva; ojapógui umi Ñandejára rembipota ha huisiokuéra, ha avei opa hembiapoukapykuéra, Moisés léipe heʼiháicha; upévare, roikuaa haʼeha peteĩ tavaygua hekojojáva; ha ñande ru ohusga chupekuéra, ha ñaneguenohẽ ñahendúgui iñeʼẽnguéra; heẽ, ha pe ñande joykeʼy ojogua chupe. Ha kóichagua ñeʼẽme che joykeʼykuéra okaguai ha ochiʼõ orerehe.

23 Ha ojehu che, Nefi, añeʼẽ chupekuéra, haʼévo: Peguerovia piko peẽ ñande rukuéra, haʼéva Israel raʼy, ojeipeʼavaʼerãmoʼãha Egipcio-kuéra pógui nohendúirire hikuái pe Ñandejára ñeʼẽnguéra?

24 Heẽ, peimoʼã piko peẽ oñeguenohẽvaʼerãmoʼãha chupekuéra ñeñapytĩmbýgui, Ñandejára ndeʼíririre Moisés-pe oguenohẽ hag̃ua chupekuéra pe ñeñapytĩmbýgui?

25 Peẽ niko peikuaa Israel raʼykuéra oĩhague ñeñapytĩmbýpe; ha peikuaa oñemoĩha hiʼarikuéra tembiapo, hasyetereíva jagueropuʼaka; upévare, peikuaa iporãitereinehague chupekuéra, oñemosãsóramo pe iñeñapytĩmbýgui.

26 Ha peẽ peikuaa Moisés-pe oñemeʼẽhague tembiapoukapy Ñandejáragui ojapo hag̃ua upe tembiapo guasu; ha peikuaa iñeʼẽ rupi pe y Mar Rojo-pegua oñemopaʼũhague peteĩ ha ambue gotyo, ha ohasa hikuái yvy ikãva ári.

27 Ha peikuaa umi Egipcio-kuéra ojahogahague Mar Rojo-pe, umi oĩvaʼekue Faraón ehérsito apytépe.

28 Ha avei peikuaa Israel raʼykuéra oñemongaruhague mana reheve taveʼỹme.

29 Heẽ, ha peikuaa avei Moisés, iñeʼẽme Tupã puʼaka oĩva hese rupive, ombota pe ita, ha osẽ chugui y, Israel raʼykuéra ombogue hag̃ua ijyʼuhéi.

30 Ha jepeve oñeisãmbyhy chupekuéra, Ñandejára Itupã, Irredentor, oho henonderãkuéra, ha oisãmbyhy chupekuéra árape ha omeʼẽ chupekuéra tesape pyharekue, ha ojapo hesekuéra opa mbaʼe yvyporakuéra iporãva ohupyty, omohatã hikuái ikorasõkuéra ha omoypytũ iñapytuʼũnguéra, ha opuʼã hikuái Moisés ha pe Tupã añetegua ha oikovéva rehe.

31 Ha ojehu pe iñeʼẽ rupi haʼe ohundi chupekuéra; ha iñeʼẽ rupi oisãmbyhy chupekuéra; ha iñeʼẽ rupi ojapo hesekuéra opa mbaʼe; ha ndojejapói mbaʼeve ndahaʼéiramo iñeʼẽ rupive.

32 Ha ohasa rire hikuái ysyry Jordán, haʼe omombarete chupekuéra omosẽ hag̃ua umi tetã raʼykuérape, heẽ, omosarambi hag̃ua chupekuéra oñehundipa peve hikuái.

33 Ha koʼág̃a, peimoʼã piko peẽ ko tetã raʼykuéra, oĩvaʼekue pe yvy ñeʼẽmeʼẽnguéme, ha oñemosẽvaʼekue ñande rukuérare, peimoʼã piko peẽ hekojojahague hikuái? Péina ápe, che haʼe peẽme, nahániri.

34 Peimoʼã piko peẽ ñande rukuéra ojeiporavovevaʼerãmoʼã chuguikuéra hekojojárire hikuái? Che haʼe peẽme, nahániri.

35 Péina ápe, Ñandejára ohayhu peteĩchaite maymáva tekovépe; hekojojávape Tupã ohovasa. Ha péina ápe, koʼã tavayguakuéra orrechasavaʼekue opa Tupã ñeʼẽ, ha hiʼajúmakuri tembiapovaípe; ha Tupã ñekoʼõi oĩkuri hiʼarikuéra; ha Ñandejára omoñeʼẽngái pe yvy hesekuéra, ha ohovasa ñande rukuérape g̃uarã; heẽ, omoñeʼẽngái hesekuéra iñehundikuérarã, ha ohovasa ñande rukuérape g̃uarã ipuʼaka hag̃ua hese.

36 Péina ápe, Ñandejára ojapovaʼekue yvy ojeiko hag̃ua ipype; ha ojapo itaʼyrakuérape ipuʼaka hag̃ua hese.

37 Ha haʼe omopuʼã tetã hekojojávape, ha ohundi umi iñañáva retã.

38 Ha ogueraha hekojojávape yvy iporãitereívape, ha ohundi iñañávape, ha omoñeʼẽngái pe yvy hesekuéra rupi.

39 Haʼe oisãmbyhy yvate yvagakuérape, haʼégui ijapykajegua, ha ko yvy haʼe ipyrenda.

40 Ha haʼe ohayhu umi oguerekóva chupe Itupãramo. Péina ápe, haʼe ohayhuvaʼekue ñande rukuérape, ha ojapo hendivekuéra konvénio, heẽ, Abraham, Isaac, ha Jacob ndive; ha imanduʼa umi konvénio ojavapovaʼekue rehe; upévare, oguenohẽ chupekuéra Egipto retãgui.

41 Ha ombohasaʼasy chupekuéra pe havira rupi pe taveʼỹme; omohatã haguére ikorasõkuéra, peẽ pejapo haguéicha avei; ha Ñandejára ombohasaʼasy chupekuéra hembiapovaikuére. Ombou mbói veve hendýva ijapytepekuéra; ha ojesuʼu rire hikuái omoĩ peteĩ mbaʼe omonguera hag̃ua chupekuéra; ha pe tembiapo oñemeʼẽva chupekuéra haʼe omaʼẽ hag̃ua; ha ndahaʼéigui mbaʼeve pe ojapovaʼerã hikuái, térã ndahasýigui, oĩ heta omanóva.

42 Ha omohatã jepi hikuái ikorasõkuéra sapyʼa pyʼa, ha ojahéi hikuái Moisés rehe, ha avei Tupã rehe; upevére, peikuaa pe ipuʼaka ijojahaʼỹvare ojeguerahahague chupekuéra pe yvy ñeʼẽmeʼẽngue gotyo.

43 Ha koʼág̃a, opa koʼã mbaʼe rire, og̃uahẽ ára iñañaha hikuái, heẽ, haimete peve hiʼaju; ha ndaikuaái ko árape oñehundipotaitémapa hína chupekuéra; aikuaágui añetehápe outaha ára oñehundivaʼerãha, saʼimi añónte katu nahániri, ojeguerahátava ñeñapytĩmbýpe.

44 Upévare, Ñandejára heʼi che rúpe oho hag̃ua taveʼỹme; ha judio-kuéra oñehaʼã avei oipeʼa chugui hekove; heẽ, ha peẽ avei peñehaʼãkuri peipeʼa chugui hekove; upévare, peporojuka pene korasõme ha peẽ haʼekuéraicha avei.

45 Pendepyaʼe pejapo hag̃ua tembiapovai ha penembegue penemanduʼa hag̃ua Ñandejára pende Tupã rehe. Pehechákuri peteĩ ángel, ha haʼe oñeʼẽ peẽme; heẽ, ha pehendu iñeʼẽ sapyʼa pyʼa; ha oñeʼẽ peẽme peteĩ ñeʼẽguapy ha mbeguemíme, ha katu peẽ napeñanduvéima, upéicha rupi ndaikatúi peñandu iñeʼẽnguéra; upévare, oñeʼẽ peẽme ñeʼẽ arasunúicha, omboryrýiva pe yvy oñembojaʼotarõguáicha.

46 Ha peẽ avei peikuaa pe iñeʼẽ ipuʼakapáva puʼaka rupive haʼe ikatuha omboparei pe yvy; heẽ, ha avei peikuaa iñeʼẽ rupive haʼe ikatuha umi tenda ijojaʼỹva ombojoja, ha umi tenda ijojáva ojeka. O, mbaʼéicha piko, upéicharamo, pene korasõ atãite?

47 Péina ápe, che ánga ojepyʼapyeterei pende rehe, ha che korasõ hasy chéve; akyhyjégui peñemombóramo g̃uarã tapiaite peve. Péina ápe, cherenyhẽ pe Tupã espíritugui, upéichagui che rete naimbaretevéima.

48 Ha ojehu añeʼẽ rire koʼã ñeʼẽ ipochy hikuái chendive, ha chemombose hikuái yguasu ruguápe; ha oñemoag̃uívo cherehe chejagarra hag̃ua añeʼẽ chupekuéra, haʼévo: Pe Tupã Ipuʼakapáva rérape haʼe peẽme ani hag̃ua pepoko cherehe, cherenyhẽgui pe Tupã puʼakágui, che roʼo hendy peve; ha oimeraẽva omoĩramo ipo che ári ikãta peteĩ ñana pirúicha; ha opytáta mbaʼeveramoguáicha pe Tupã puʼaka renondépe, Tupã oipyʼajopýtagui chupe.

49 Ha ojehu che, Nefi, haʼe chupekuéra anive hag̃ua okaguai itúva rehe; ha nombotoveivaʼerãha hikuái chehegui hembiapo, heʼígui chéve Tupã ajapovaʼerãha peteĩ yga.

50 Ha haʼe chupekuéra: Tupã heʼírire chéve ajapo hag̃ua opa mbaʼe che ikatútakuri ajapo. Heʼíramo chéve haʼe hag̃ua kóva ko ýpe, toiko ndehegui yvy, oikóta chugui yvy; ha upéicha che haʼérire, upéicha oikovaʼerãmoʼã.

51 Ha koʼág̃a, Ñandejára oguerekóramo puʼaka tuichaitéva, ha ojapo heta mbaʼe techapyrã yvyporakuéra raʼy apytépe, mbaʼére piko ndaikatumoʼãi chemboʼe, ajapo hag̃ua peteĩ yga?

52 Ha ojehu che, Nefi, haʼe heta mbaʼe che joykeʼykuérape, amoapañuãi peve chupekuéra ha ndaikatúi opuʼã che rehe; ha noñehaʼãi hikuái omoĩvo ipo che ári ni opokóvo ikuãme cherehe, heta ára pukukue aja. Ha noñehaʼãi hikuái ojapóvo koʼãva okyhyjégui ikãramo g̃uarã cherenondépe, tuichaitereíkuri pe Tupã Espíritu puʼaka; ha péichakuri ombaʼapo hesekuéra.

53 Ha ojehu Ñandejára heʼi chéve: Eipyso jey nde po nde joykeʼykuéra gotyo, ha naikãmoʼãi nerenondépe, ha katu aityvyróta chupekuéra, heʼi Ñandejára, ha koʼãva ajapóta, oikuaa hag̃ua hikuái che haʼeha Ñandejára Itupã.

54 Ha ojehu aipyso che po che joykeʼykuéra gotyo, ha naikãi hikuái cherenondépe; ha katu Ñandejára oityvyro chupekuéra, pe iñeʼẽ heʼi haguéicha.

55 Ha koʼág̃a, haʼekuéra heʼi: Roikuaa porãma Ñandejára oĩha nendive, roikuaágui haʼehague pe Ñandejára puʼaka oreityvyrovaʼekue. Ha oñesũ hikuái che renondépe, ha haimete oñepyrũ otupaitũ chéve, ha che ndahejái chupekuéra ojapo, haʼévo: Che niko pende joykeʼy, heẽ, pende ryvy, upévare, petupaitũ Ñandejára pende Tupãme, ha pemombaʼe pende ru ha pende sýpe, ikatu hag̃uáicha pende ára ipukuve pe yvy Ñandejára pende Tupã omeʼẽva peẽmepe.