1 Ha ojehu Ñandejára heʼi chéve, upévare ajapo pláncha metal-gui ahai hag̃ua hiʼári che tavayguakuéra kuatiajehaipyre. Ha umi pláncha ajapomavaʼekue ári ahai che ru kuatiajehaipyre, ha avei ore guata pe taveʼỹre, ha che ru profesiakuéra; ha avei heta che profesíava ahai hiʼarikuéra.

2 Ha che ajaporamoguare umíva ndaikuaái Ñandejára heʼitahague chéve ajapo hag̃ua kóva koʼã pláncha; upévare, che ru kuatiajehaipyre, ha ituvakuéra genealogía, ha heta mbaʼe rojapovaʼekue pe taveʼỹme ojehai umi pláncha peteĩha che añeʼẽmahague ári; upévare, umi mbaʼe ojehuvaʼekue che ajapo mboyve koʼã pláncha, añetehápe, oñemombeʼuve umi pláncha peteĩha ári.

3 Ha ajapo rire koʼã pláncha ojejerure haguéicha chéve, Che, Nefi-pe, oñemeʼẽ tembiapoukapy, pe ministério ha profesiakuéra, pehẽnguekuéra hesakãve ha iporãvéva chuguikuéra, ojehai hag̃ua koʼã pláncha ári; ha umi mbaʼe ojehaíva oñeñongatuvaʼerã oñemboʼe hag̃ua che tavayguakuérape, oguerekótava pe yvy, ha avei ambue mbaʼe arandúpe g̃uarã, ha umíva umi mbaʼe Ñandejára oikuaa.

4 Upévare, che, Nefi, ahai peteĩ kuatiajehaipyre umi ambue pláncha ári, omeʼẽva peteĩ ñemombeʼu, térã peteĩ ñemombeʼupaite umi ñorairõ ha ñehundi che tavayguakuéra rehegua. Ha ajapo koʼãva, ha haʼe che tavayguakuérape mbaʼépa ojapovaʼerã che naimevéima vove; ha koʼã pláncha oñembohasavaʼerã peteĩ ñemoñareʼatýgui ambuévape, térã peteĩ profétagui ambuévape, Ñandejára omeʼẽ peve ambue tembiapoukapykuéra.

5 Ha amo gotyove amombeʼúta mbaʼéichapa ajapovaʼekue koʼã pláncha; ha koʼág̃a, péina ápe, ajapovéta pe añeʼẽ haguéicha; ha koʼãva ajapo oñeñongatu hag̃ua umi mbaʼe imarangatuvéva che tavayguakuéra kuaapyrã.

6 Upevére, ndahaíri mbaʼeve plánchakuéra ári ndahaʼéiramo chéve g̃uarã imarangatúva. Ha koʼág̃a, che ajavýramo, umi ymaguare ojavy avei; ndahaʼéi niko añeñyrõséva ambue yvypóra rupi, ha katu pe tekokangy aguerekóvagui chejehe, che rete rupi, añeñyrõ che jupe.

7 Oĩ niko umi mbaʼe yvyporakuéra omombaʼeguasúva, tete ha avei ángape g̃uarã, ambuévape katu ndahaʼéi mbaʼeve ha opyrũ hese. Heẽ, pe Israel-gua Tupãre jepeve umi yvyporakuéra opyrũ; che haʼe, opyrũ hese ha katu haʼéta ambue ñeʼẽme—ndojapói hikuái chupe mbaʼevérõ, ha nohendúi hikuái pe iñemoñeʼẽnguéra.

8 Ha péina ápe haʼe ouvaʼerã, pe ángel ñeʼẽ heʼi haguéicha, seiscientos ary ára che ru osẽ rire Jerusalén-gui.

9 Ha pe yvóra, hembiapovai rupi, ohusgáta chupe ndahaʼeiramoguáicha mbaʼeve; upévare ohavira chupe hikuái, ha haʼe ogueropuʼaka; ha ombyepoti chupe hikuái, ha haʼe ogueropuʼaka. Heẽ, ondyvu hikuái hiʼári, ha haʼe ogueropuʼaka, pe imborayhu porã ha ipyʼaporãgui yvyporakuéra raʼy ndive.

10 Ha ore rukuéra Tupã, ojeguerahavaʼekue Egipto mboypýri, oñeguenohẽvo ñeñapytĩmbýgui, ha avei oñeñongatuvaʼekue hese taveʼỹme, heẽ, pe Abraham Tupã, ha Isaac ha Jacob Tupã, oñemeʼẽ ijupe, pe ángel ñeʼẽ heʼiháicha, yvypóraicha, yvypóra iñañáva pópe, oñemopuʼã hag̃ua, Zenoc ñeʼẽ heʼiháicha, ha ojejuka hag̃ua kurusúre, Neum ñeʼẽ heʼiháicha, ha oñeñotỹ hag̃ua peteĩ ñeñotỹháme, Zenós ñeʼẽ heʼiháicha, oñeʼẽvaʼekue umi mbohapy ára pytũmbýpe rehe, ha koʼãva haʼéta peteĩ techauka iñemanógui oñemeʼẽtava umi oikóva islas del mar-pe, oñemeʼẽtava voi umi haʼéva Israel rogaguápe.

11 Péicha oñeʼẽgui pe proféta: Añetehápe Tupã Ñandejára ohóta maymáva Israel rógape upe ára, peteĩvape iñeʼẽme, hekojojágui, tuicha ovyʼa ha ojesalva hag̃ua, ha ambuévape pe arasunu ha araguyguy ipuʼaka reheguáva rehe, ára pochýpe, tatápe, ha tatatĩme, ha tatatĩ ypytũme, ha pe yvy jejoka pypukúpe, ha yvyty opuʼãtavape.

12 Ha opavave koʼã mbaʼe añetehápe ouvaʼerã, heʼi pe proféta Zenós. Ha ojeka pypukúta umi ita yvy ariguáva; ha umi yvy pyahẽ rupi, heta rreikuéra islas del mar-peguáva ári Tupã Espíritu ombaʼapóta heʼi peve hikuái: ¡Pe naturaleza Tupã ohasaʼasy hína.

13 Ha umi oĩva Jerusalén-re, heʼi pe proféta, haʼekuéra ojehaviráta mayma tavayguakuéra rehe, ojuka haguére kurusúre pe Israel-gua Tupãme, ha omovã hikuái ikorasõkuéra, ha ombotove techauka ha mbaʼeguasu, ha pe Israel-gua Tupã puʼaka ha verapy.

14 Ha omovãgui hikuái ikorasõkuéra, heʼi pe proféta, ha omboykégui Israel-pegua Imarangatúvape, oikoreíta hikuái hetépe, ha omanóta, ha haʼéta hikuái peteĩ ñembohoryha ha peteĩ ojehayhuʼỹva, ha mayma tetãnguéra apytépe ndaijaʼemoʼãi hesekuéra.

15 Upevére, og̃uahẽ vove upe ára, heʼi pe proféta, nomovãvéi vove hikuái ikorasõkuéra Israel-pegua Imarangatúvagui, upépe haʼe imanduʼáta umi konvénio ojapovaʼekuére ituvakuéra ndive.

16 Heẽ, upépe imanduʼáta umi islas del mar rehe; heẽ, ha maymáva umi Israel rogaguápe, che ambyatýta, heʼi Ñandejára, heʼiháicha pe proféta Zenós ñeʼẽme, irundy yvy rendágui.

17 Heẽ, ha maymáva tetã ohecháta Ñandejára salvasiõ, heʼi pe proféta; maymáva tetãnguéra, avaretãnguéra, ñeʼẽnguéra ha tavayguakuéra ojehovasáta.

18 Ha che, Nefi, ahai koʼã mbaʼe che tavayguakuérape, ikatumbaʼéramo g̃uarã aipyʼamovã chupekuéra imanduʼa hag̃ua hikuái Ñandejára Irredentor rehe.

19 Upévare, añeʼẽ mayma Israel rogaguápe, ohupytýramo g̃uarã koʼã mbaʼe.

20 Ha péina ápe, añandu tuicha temiandu pe espíritupe, chejopýva omokangy peve che rete, umi oĩva Jerusalén-pe rehe; ha Ñandejára iporiahuverekópe ndoikuaaukáirire chéve hesekuéra rehegua, ojapo haguéicha umi proféta yma guare ndive, che avei amanovaʼerãmoʼã.

21 Ha añetehápe haʼe ohechauka umi proféta ymaguarépe opa mbaʼe hesekuéra reheguáva; ha avei ohechauka hetápe umi ñande reheguáva; upévare, tekotevẽ jaikuaa chuguikuéra, ojehaígui umi pláncha bronce-guigua ári.

22 Ha ojehu che, Nefi, amboʼe koʼã mbaʼe che joykeʼykuérape; ha ojehu amoñeʼẽ chupekuéra heta mbaʼe, ojehaíva umi pláncha bronce-guigua ári, oikuaa hag̃ua hikuái Ñandejára rembiapo ambue tetãnguérape, tavayguakuéra ymaguare apytépe.

23 Ha amoñeʼẽ chupekuéra heta mbaʼe ojehaíva Moisés kuatiañeʼẽnguérape; ha aipyʼamovã hag̃ua chupekuéra ojerovia hag̃ua Ñandejára Irredentor rehe amoñeʼẽ chupekuéra pe proféta Isaías ohaivaʼekue; amoĩ mayma escritura-kuéra ore rehe, haʼe hag̃ua oréve mbaʼe porã ha orehekomboʼe hag̃ua.

24 Upévare añeʼẽ chupekuéra, haʼévo: Pehendu pe proféta ñeʼẽnguéra, peẽ haʼéva peteĩ Israel rogagua rembyre, peteĩ yvyra rakã ojeipeʼavaʼekue; pehendu pe proféta ñeʼẽnguéra, ojehaivaʼekue maymáva Israel rogaguápe, ha pemoĩ pendejehe, ikatu hag̃ua peguereko ñehaʼarõ umi pende joykeʼykuéraicha pejeipeʼavaʼekuégui; ha upéicha ohaíkuri upe proféta.