1 Ha ojehu che, Nefi, aha jey añeʼẽ rire Ñandejára ndive, che ru ogaaópe.

2 Ha ojehu haʼe oñeʼẽ chéve, ha heʼi: Péina ápe che ahecha che képe, Ñandejára heʼíramo chéve nde ha nde joykeʼykuéra peho jey hag̃ua Jerusalén-pe.

3 Ha péina ápe, Labán oguereko judio-kuéra kuatiajehaipyre ha avei peteĩ genealogía che ypykuéra rehegua, ha ojehai pláncha bronce-guigua ári.

4 Ha upévare, Ñandejára heʼi chéve nde ha nde joykeʼykuéra pehovaʼerãha Labán rógape, ha peheka umi kuatiajehaipyre, ha pegueru koʼápe taveʼỹme.

5 Ha koʼág̃a, péina ápe nde joykeʼykuéra okaguai ha heʼi hasyetereiha pe mbaʼe che ajerurevaʼekue chupekuéra; ha péina ápe ndahaʼéi che ajeruréva chupekuéra, ha katu kóva haʼe peteĩ Ñandejára rembiapoukapy.

6 Upévare tereho, che raʼy, ha Ñandejára nepytyvõta, nderekaguaíri haguére.

7 Ha ojehu che, Nefi, haʼe che rúpe: Aháta ha ajapóta umi mbaʼe Ñandejára heʼivaʼekue, aikuaágui Ñandejára nomeʼẽiha tembiapoukapy yvypóra raʼykuérape, ombosakoʼiʼỹre pe tape ikatu hag̃uáicha haʼekuéra ojapo umi mbaʼe haʼe heʼivaʼekue chupekuéra.

8 Ha ojehu che ru ohendúvo koʼã ñeʼẽ oñeñandu porãiterei, oikuaágui haʼe Ñandejára cherovasahague.

9 Ha che, Nefi, ha che joykeʼykuéra rosẽ roho taveʼỹre, ore rogaao reheve, rojupi hag̃ua tetã Jerusalén-pe.

10 Ha ojehu rojupívo tetã Jerusalén-pe, che ha che joykeʼykuéra roñemongeta oñondive.

11 Ha roity poʼa—rohecha hag̃ua mávapa ore apytégui ohóta Labán rógape. Ha ojehu pe poʼa hoʼa Lamán ári; ha Lamán oho oike Labán rógape, ha oñeʼẽ hendive haʼe oguapy aja hógape.

12 Ha ojerure Labán-pe umi kuatiajehaipyre ojehaivaʼekue umi pláncha bronce-guigua ári, oguerekóva che ru genealogía.

13 Ha péina ápe, ojehu Labán ipochy, ha omosẽ chupe henondégui; ha ndoipotái haʼe oguereko umi kuatiajehaipyre. Upévare, heʼi chupe: Péina ápe nde haʼe peteĩ mondaha, ha che rojukáta.

14 Ha katu Lamán oñani henondégui, ha omombeʼu oréve umi mbaʼe Labán ojapovaʼekue. Ha roñepyrũ rojepyʼapyeterei, ha che joykeʼykuéra oĩma oho jey hag̃uáicha che ru rendápe taveʼỹme.

15 Ha péina ápe che haʼe chupekuéra: Ñandejára oikoveháicha, ha ñande jaikoveháicha, ndajaguejymoʼãi ñande ru rendápe taveʼỹme jajapo peve pe mbaʼe Ñandejára ojerurevaʼekue ñandéve.

16 Upévare, ñandejeroviarekóna ñaneñeʼẽrendúvo Ñandejára rembiapoukapykuérare; upéicha jaguejy katu pe yvy oñemeʼẽvaʼekue ñande rúpe, ha péina ápe haʼe oheja hiʼóro ha ipláta, ha opaite mbaʼe oguerekóva. Ha ojapo koʼã mbaʼe Ñandejára rembiapoukapykuéra rehehápe.

17 Haʼe oikuaágui Jerusalén oñehundivaʼerãha, tavayguakuéra hekoñañágui.

18 Ha péina ápe, nohenduséi hikuái profetakuéra ñeʼẽ. Upévare, che ru opytárõ pe tetãme ojeʼe rire chupe osẽ hag̃ua pe tetãgui, péina ápe, haʼe omanovaʼerã avei. Upévare, osẽmantevaʼerã pe tetãgui.

19 Ha péina ápe, iñarandu Tupãme jahupyty koʼã kuatiajehaipyre, ñañongatu hag̃ua ñande raʼykuérape g̃uarã ñande rukuéra ñeʼẽ;

20 Ha avei ñañongatu hag̃ua chupekuéra umi ñeʼẽ osẽvaʼekue mayma profetakuéra imarangatúva jurúgui, oñemeʼẽvaʼekue chupekuéra pe Espíritu ha puʼaka Tupã oguerekóva rupive, yvy oñepyrũmby guive, kóva ko araite peve.

21 Ha ojehu koʼãichagua ñeʼẽ rupi péicha aipyʼamovã che joykeʼykuérape, ijeroviareko hag̃ua hikuái iñeʼẽrendúvo Tupã rembiapoukapykuérare.

22 Ha ojehu roguejy ore yvy rohupytyvaʼekuépe, ha rombyaty ore óro, ha ore pláta, ha opaite ore mbaʼe iporãva.

23 Ha rombyaty rire koʼã mbaʼe, roho jey Labán rógape.

24 Ha ojehu roike Labán oĩháme, ha rojerure chupe omeʼẽ hag̃ua oréve umi kuatiajehaipyre ojehaíva pláncha bronce-guigua ári, ha upévare ore romeʼẽtaha chupe ore óro, ha ore pláta, ha opaite ore mbaʼe iporãva.

25 Ha ojehu Labán ohechávo ore mbaʼekuéra, ha tuichaitereiha, haʼe oipotapaite imbaʼerã, upévare oremosẽ okápe, ha ombou hembiguaikuérape orejuka hag̃ua, ikatu hag̃uáicha opyta ore mbaʼekuéra reheve.

26 Ha ojehu rokañy Labán rembiguaikuéra renondégui, ha rohejámante upépe ore mbaʼekuéra, ha hoʼa Labán pópe.

27 Ha ojehu rokañy taveʼỹme, ha Labán rembiguaikuéra ndaorerupytýi, ha rokañy peteĩ ita kuápe.

28 Ha ojehu Lamán ipochyeterei chendive, ha avei che ru ndive, ha upéicha avei Lemuel, ojeguerahaukágui Lamán ñeʼẽ rehe. Upévare Lamán ha Lemuel oñeʼẽ heta ñeʼẽvai oréve, ijoykeʼy imitãvévape, ha orenupã hikuái peteĩ yvyrápe.

29 Ha ojehu orenupã jave peteĩ yvyrápe, péina ápe, ou peteĩ Ñandejára ángel, ha oñemoĩ henondepekuéra ha oñeʼẽ chupekuéra, heʼívo: Mbaʼére piko peinupã pende joykeʼy imitãvévape peteĩ yvyrápe? Ndapeikuaái piko Ñandejára oiporavohague chupe oiko hag̃ua mburuvicháramo pende ári, ha kóva penerembiapovaikuére? Péina ápe pejupi jeýta Jerusalén-pe, ha Ñandejára omoĩta Labán-pe pende pópe.

30 Ha oñeʼẽ rire oréve pe ángel, oho.

31 Ha pe ángel oho rire, Lamán ha Lemuel oñepyrũ jey okaguai, ha heʼi: Mbaʼéicha piko Ñandejára omoĩta Labán-pe ñande pópe? Péina ápe, haʼe peteĩ yvypóra imbaretéva, ha omondokuaa cincuenta-pe, heẽ, avei ojukakuaa cincuenta-pe; ha mbaʼe rehe piko nahanirimoʼãi ñandéve?