1 Pejapysaka ha pehendu koʼãva, O Jacob róga, peñehenóiva Israel réra rupi, ha pesẽvaʼekue Judá ykuéragui, térã pesẽvaʼekue y ñemongaraikuéragui, peñeʼẽmeʼẽva Ñandejára rérape, ha peñeʼẽ Israel-gua Tupã rehe, ha katu napeñeʼẽmeʼẽi añetehápe ni tekojojápe.

2 Upevére, haʼekuéra ojehero tavaguasu marangatuguávaramo, ha katu ndojepytasói pe Israel-gua Tupã ári, haʼéva Señor de los Ejércitos, heẽ, Señor de los Ejércitos haʼe pe héra.

3 Péina ápe, che haʼevaʼekue umi mbaʼe mboyveguáva iñepyrũmby guive; ha osẽvaʼekue che jurúgui, ha ahechaukákuri umíva. Ha ahechauka sapyʼa.

4 Ha ajapókuri aikuaágui ndepyʼahatãha, ha tajygue imbaretéva pe nde ajúra, ha bronce-guigua pe nde syva;

5 Ha che haʼevaʼekue ndéve iñepyrũmby guive; oiko mboyve ahechaukákuri ndéve; ha ahechaukákuri akyhyjégui eréramo g̃uarã—Che ídolo ojapo, ha che taʼanga yvyguigua, ha che taʼanga mbaʼe mboykúgui jejapopyre ojapouka koʼã mbaʼe.

6 Rehecha ha rehendupaitékuri koʼãva; ha neremombeʼusemoʼãi piko umíva? Ha che ahechaukahague ndéve mbaʼe ipyahúva, mbaʼe kañymby, ha ndereikuaáiva.

7 Ha umíva koʼág̃a ojejapo, ha ndahaʼéi iñepyrũmby guive, ni pe ára nde rehendu mboyve ojeʼe ndéve, ani hag̃ua ere—Péina ápe che niko aikuaamavoíkuri.

8 Heẽ, ha nde nerehendúi, heẽ, ha ndereikuaái; heẽ, upe guive nde apysa ndojeipeʼavéi; che niko aikuaákuri nderekojoavyetereitaha, ha tyeryepy guivéma voi reñehenói iñeʼẽrenduʼỹva.

9 Upevére, che réra rupi ambotapykuéta che pochy, ha che momorãrã, ajejokóta ani roikytĩ.

10 Ha, péina ápe, che romopotĩ, che roiporavo jeikoʼasy tatakua ryepýpe.

11 Che rehénte, heẽ, chéve g̃uarãnte ajapóta kóva, ani oñemoherakuã vai che réra, ha che verapy nameʼẽmoʼãi ambuévape.

12 Cherendu, O Jacob, ha nde Israel ahenoivaʼekue, chete voi niko haʼe; che haʼe pe iñepyrũmby, ha che haʼe avei pe ipaháva.

13 Che po avei omoĩvaʼekue pe yvy rendag̃ua, ha che po akatúa oipysovaʼekue umi yvága. Che ahenói chupekuéra ha haʼekuéra opuʼã oñondivepa.

14 Peñembyatýpa, maymáva peẽ, ha pehendu; Máva piko ijapytepekuéra omombeʼu chupekuéra koʼã mbaʼe? Ñandejára ohayhuvaʼekue chupe; heẽ, ha haʼe okumplíta iñeʼẽ hesekuéra rupi heʼivaʼekue; ha ojapóta ojaposéva Babilonia-pe, ha ijyva oúta Caldeo-kuéra ári.

15 Avei, heʼi Ñandejára; Che Ñandejára, heẽ, che añeʼẽkuri; heẽ, che ahenói chupe omombeʼu hag̃ua, ha agueru chupe, ha haʼe omoakãrapuʼãta hape.

16 Peju che ypýpe; che nañeʼẽñemíri; iñepyrũmby guive, oñemombeʼu ypy guive che añeʼẽ; ha Tupã Ñandejára, ha Espíritu imbaʼéva, chembouvaʼekue.

17 Ha upéicha heʼi Ñandejára, ne Rredentor, Israel-pegua Imarangatúva; Che ambouvaʼekue chupe, Ñandejára nde Tupã nemboʼeporãva, ha ndegueraháva pe tape reikovaʼerãre, haʼe ojapovaʼekue.

18 O rehendúrire che rembiapoukapykuéra—upéicharire nde pyʼaguapy haʼevaʼerãmoʼã peteĩ ysyrýicha, ha pe nde rekojoja haʼevaʼerãmoʼã umi yguasu opuʼãvaicha.

19 Ha ne ñemoñare hetavaʼerãmoʼã yvykuʼícha; ha umi heñóiva nde ryepýgui umi ikuʼikuéicha; pe héra noñeikytĩrivaʼeramoʼã ni ndojepeʼaivaʼerãmoʼã cherenondégui.

20 Pesẽ Babilonia-gui, pekañy Caldeo-kuéra apytégui, pemombeʼu purahéipe ñeʼẽ, pemombeʼu kóva, pegueraha yvy opaha peve; peje: Ñandejára orredimi hembiguái Jacob-pe.

21 Ha ndaijyʼuhéiri hikuái; haʼe ogueraha chupekuéra umi taveʼỹre; ha oguenohẽ umi itágui y chupekuéra g̃uarã; haʼe ojoka pe ita ha osẽ y.

22 Ha jepeve haʼe ojapopa opaite koʼã mbaʼe, ha hetave avei, ndaipóri pyʼaguapy, heʼi Ñandejára, umi iñañávape g̃uarã.