“Ivakamacala taumada: Ni Bera na Vunau kei na Veiyalayalati,” iTukuni mai na Vunau kei na Veiyalayalati (2002), 1–5
“Ivakamacala taumada,” iTukuni mai na Vunau kei na Veiyalayalati, 1–5
Ivakamacala taumada
Ni Bera na Vunau kei na Veiyalayalati
Eda a bula tiko mai lomalagi ni bera na noda lako mai ki vuravura. E a tevuka vei keda ko Tamada Vakalomalagi na yavu ni veivakabulai. Na yavu ni veivakabulai oqo ena vakarautaki keda me da laki bula tale kina mai lomalagi. Kevaka eda vakamuria na yavu ni veivakabulai, eda na laki bulavata kei Tamada Vakalomalagi, ni da sa tucake tale.
Eda a bula vata kei Jisu mai lomalagi. E gadreva tu ga ko koya me vakamuria na lewa nei Tamada Vakalomalagi. E digitaki kina ko Jisu me lako mai, ka me mai noda iVakabula e vuravura. Me vakayacora na cakacaka i Tamada Vakalomalagi.
E bula talega kei keda mai lomalagi ko Setani. Sa dau itovo ca. E sega sara ni vinakata me vakamuria na lewa nei Tamada Vakalomalagi. Sa qai vakasevi Setani ko Tamada Vakalomalagi mai lomalagi. Sa dau nakita tiko ko Setani me voroka na yavu ni veivakabulai. E vinakata me tarova na cakacaka ni Kalou.
Sa bulia na vuravura ko Jisu. Era sa mai bula kina ko ira na luvena na Tamada Vakalomalagi. Sa qai talai mai vei Jisu ko ira na parofita me mai tuberi ira me ra bula dodonu. E so ga vei ira na tamata era vakamuria na nodra ivunau na parofita.
E so na tamata e vuravura era sega ni rogoci ira na parofita. Era dau vakamuria ga na ivakaro nei Setani. Sa vu ni nodra itovo ca.
E tukuni ena Veiyalayalati Makawa na kedra itukutuku ko ira ka a bula ena gauna e liu mai Filisitia se Palesitaina. Era kilai Jisu. Era maroroya na nona kosipeli ko ira era ivalavala dodonu. Era vakaitutu ena nona matabete ko ira na turaga yalododonu. Era dau tukuna na parofita ni na lako mai ki vuravura ko Jisu. Ena mai nodra iVakabula.
E tukuni ena iVola i Momani na kedra italanoa ko ira era bula e liu mai Amerika. Era kilai Jisu talega. Era maroroya tu na nona kosipeli. Era vakaitutu talega ena nona matabete ko ira na turaga buladodonu. E veituberi talega na parofita vei ira e Amerika, ka yalataka ni na mai nodra iVakabula ko Jisu. Ena mai talevi ira ni sa tucake tale mai na mate.
E a mai bula voli e vuravura ko Jisu Karisito. E tukuni tiko ena Veiyalayalati Vou na veika me baleta na nona bula e vuravura. E vakatavulica na nona kosipeli vei ira na tamata ko Jisu. E tukuna vei ira me ra dau muria na ivakaro nei Tamada Vakalomalagi.
Sa digia ko Jisu e lewe tinikarua me ratou Apositolo. Ka qai lesi iratou kina matabete. Sa tauyavutaka kina na nona lotu. Era lewe vuqa sara na tamata era lomani koya. Era buladodonu tiko ka dau muria na nona ivakavuvuli.
E sega ni vinakata ko Setani me ra muri Jisu ko ira na tamata. Sa qai veitemaki ko Setani, era sa qai itovo ca na tamata. Sa dredre sara me ra vakabauti Jisu. Era sa sevaki Jisu ko ira na tamata. Era qai vakamatei koya.
Ni sa bogi tolu na nona mate, sa tucake tale ko Jisu mai na mate. Sa veivosaki kei iratou na Apositolo. Sa qai tukuna me ratou vakavulici ira na tamata ena kosipeli. E talevi ira talega na buladodonu mai Amerika ko Jisu. Sa qai lako ki lomalagi me laki bula vata kei Tamana.
Era a liutaka na Lotu i Jisu Karisito ko ira na Apositolo. Era lakova na veivanua. Sa vakatavulici ko ira na tamata ena kosipeli. E vuqa era vakabauti Jisu Karisito ka papitaisotaki. Era sa veilesi vei ira na buladodonu ko ira na Apositolo me ra vakaitutu ena matabete. Era sa lewe vuqa na lewe ni Lotu dina i Jisu Karisito.
Sa qai vinakata ko Setani me vakarusa na Lotu i Jisu Karisito. E temaki ira na tamata, ka ra qai rogoci koya ko ira na tamata. E vuqa na tamata era qai lako tani mai vei Jisu. Era sa qai vakamatei ira na buladodonu ena Lotu ko ira na tamata ca. Era vakamatei ira talega na Apositolo. Qai sega kina me dua e liutaka na Lotu. Sa sega tale e bula me lesi ira kina matabete.
Era qai veisautaka eso na tamata na ivakavuvuli ni Lotu i Jisu Karisito. Me veisautaki talega na ivunau ni Kalou. Sa yali kina vakadua na lotu dina, ka tauyavutaka ko Jisu. Era sa qai duibulilotu ko ira na tamata. Sa sega ga na lotu dina.
Me yacova ni sa sivi e vicanadrau na yabaki. Sa sinai ko vuravura ena duiduilotu. E sega ni dua vei ira me Lotu dina i Jisu Karisito. Ko ira na lewena era vakabauti Jisu Karisito. Sa sega ni tiko na kosipeli dina ena lotu taucoko oqo. Sa sega talega vei ira na matabete ni Kalou. Sa sega vei ira na parofita kei na Apositolo.
E tukuna ko Jisu ni na lesu tale mai ki vuravura. E tukuna ni na tiko tale na nona lotu dina ni bera na nona lesu mai. Me ra kila na tamata taucoko na nona kosipeli dina. Me ra vakaivotavota talega ena nona matabete. Me tu na parofita kei na Apositolo. Me vakaliuci talega na ivakatakila.
Na ivakatakila taucoko e cadra mai vei Jisu. E tukuni ena ivakatakila na veika e gadreva me da kila ko Jisu. E tukuni talega kina na veika e gadrevi me da vakayacora. E soli ivakatakila ko Jisu vei ira na nona parofita. Na ivakatakila oqo e baleta na nona lotu dina.
Na Vunau kei na Veiyalayalati e ivola ni vakatakila. E tukuni ena Vunau kei na Veiyalayalati na Lotu dina i Jisu Karisito. E tukuni kina na veika me baleta na matabete. E tukuni kina na veika e baleti ira na parofita kei na Apositolo. E tukuni ena Vunau kei na Veiyalayalati na veika me da vakarautaka kina vakavinaka na lesu mai nei Jisu.
Na ivola ko wilika tiko e baleta na Vunau kei na Veiyalayalati. E tukuni kina na ivakatakila eso. Sa tiko kina na itukutuku ni kena vakalesui mai ki vuravura na Lotu dina i Jisu Karisito. E tukuni kina na veika eso me baleti ira na tamata era bula donuya tiko na gauna ka tauyavu kina na Lotu.