“Wase 47: Kere Veivuke o Josefa Simici vua na Peresitedi: Maji–Noveba 1839,” iTukuni mai na Vunau kei na Veiyalayalati (2002), 176–79
“Wase 47,” iTukuni mai na Vunau kei na Veiyalayalati, 176–79
Wase 47
Kere Veivuke o Josefa Simici vua na Peresitedi
(Maji–Noveba 1839)
Sa dau volavola o Josefa Simici mai na valeniveivesu e Liberty vei ira na Yalo dodonu. E vakaroti ira na Yalo dodonu me ra vakavola na veika rarawa era dau vakayacora vei ira o ira na dauvakacaca. Ka kaya me vakau na ivola oqori vei ira na iliuliu ni matanitu.
Sa tukuna vei ira na Yalo dodonu o Josefa Simici me ra vola na yacadra ko ira era a vakasaurarataki ira. Me vakaraitaki kina na kena talaraki na nodra veivale kei na iteitei.
Eratou qai tokitaki ena dua na siga, o Josefa kei iratou na lewe va na nona ilawalawa mai vei ira na ovisa ni vale ni veivesu. Me ratou qai volia e rua na ose mai vei ira na yadra o Josefa kei iratou na nona itokani. Sa soli na nodratou isulu me saumi kina e dua na ose. Ka ratou yalataka me ratou qai sauma e muri na ikarua ni ose.
Sa ratou qai mateni e lewe va vei iratou na yadra ena dua na bogi, ka ratou lako sara ki moce. E qai vukei iratou e dua na yadra me ratou dro o Josefa kei iratou na nona ilawalawa.
Era sa vodo veivukevuke ena ose o Josefa kei na nona ilawalawa. Ka vakadodonu tiko na ilakolako ki Quincy e Illinois. Me tini na siga na dede ni nodratou ilakolako,
Eratou veisotari tale kei iratou na nodratou vuvale o Josefa kei iratou na nona itokani. Sa vuabale dina na nodratou marau ni ra sa veisotari tale.
Era sa qara na Yalo dodonu e dua na vanua e Illinois me tara kina e dua na koro levu. Sa kune rawa e dua na tikiniqele ena yasa ni uciwai na Mississippi. Sa rui qele suasua ka lolobo vakalevu. Eratou sa toki kina o Josefa kei ira na Yalo dodonu. Sa qai vakamamacataki na vanua mai na nodra saga vagumatua. Ka tara kina na nodra veivale ka teivaki na nodra were. Era vakadabera kina e dua na koro levu ka totoka. Sa vakayacani me Nauvoo. E ibalebale ni Nauvoo na koro totoka.
Sa qai lako e muri o Josefa Simici vua na peresitedi ni matanitu o Amerika. Sa talaucaka vua na peresitedi o Josefa Simici na veika e baleti ira na dauvakacaca e Missouri. E kaya vua na nodra cakacaka na dauvakacaca ena kena vakamai na nodra vale ka butakoci na nodra manumanu na Yalo dodonu.
E kaya o Josefa ni a mate kina eso na Yalo dodonu. Ka so na Yalo dodonu era biu ki valeniveivesu. Me qai vakaraitaka vua na peresitedi na veika era vola tu na Yalo dodonu. Sa kaya o Josefa ni ra sega ni veivuke o ira na iliuliu mai Missouri. E kerea na peresitedi me vukei ira na Yalo dodonu, ka me ra totogitaki na nodra meca.
E tukuna na peresitedi ni sa kila na nodra leqa na Yalo dodonu. Ka sega ga ni cakava e dua na ka me ra vukei kina. Ni kevaka e veivuke, era na rarawa kina o ira na lewe i Missouri.
E rarawa o Josefa ni sega ni vukei ira na Yalo dodonu o koya na peresitedi. Sa na vukei ira ga o Tamada Vakalomalagi.