“Wase 31: Na Vosa ni Vuku: Feperueri 1833,” iTukuni mai na Vunau kei na Veiyalayalati (2002), 119–22
“Wase 31,” iTukuni mai na Vunau kei na Veiyalayalati, 119–22
Wase 31
Na Vosa ni Vuku
(Feperueri 1833)
Sa tauyavutaka o Josefa Simici e dua na nodra koronivuli na turaga ena Lotu. Ka vakatokai me Koronivuli ni Parofita.
E tauyavu na korovuli oqo ena dua na rumu ni sitoa nei Newel Whitney e Kirtland, Ohio. Sa veituberi vei ira na turaga o Josefa me baleta na Lotu. E veidusimaki me baleta na matabete kei na vosa ni Kalou.
Era dau uturi paipo lase se sika e vuqa vei ira. Sa dau kubou walega na rumu. Eso era mama tavako. Era vakadukara vakalevu na fuloa. Dau vinakati saraga me samaki ni ra sa duisuka kina nodra veivale ko ira na turaga.
E dau qai sasamaki ena rumu o Ema, na wati Josefa, ni sa oti na nodra soqoni. Sa dau vakataroga voli e lomana o Josefa na kena dodonu na uturi se mama tavako.
Sa qai masumasu vua na Kalou o Josefa ka taroga kina na cava e dodonu. Ka qai solia mai kina o Jisu vei Josefa e dua na ivakatakila. Sa vakatokai me Vosa ni Vuku. Sa kaya kina o Jisu ni so vei keda na tamata era dau vakayacora na itovo ca. Era gadreva kina me ra vakayacora na ka eso ka sega ni veiganiti kei na yagodra. E tukuna ena Vosa ni Vuku o Jisu vei ira na Yalo dodonu me baleta na veika e vinaka ki yagodra. Ka kaya talega kina na veika e sega ni kilikili kina yagodra. Era na vakalougatataki na Yalo dodonu kevaka era vakamuria na Vosa ni Vuku.
E kaya ko Jisu ni sega ni vinaka kina tamata na alakaolo. Me ra kakua ni gunuva talega ni vaiwakivata kei na wai. Ka me dau taurivaki ga ena kuli ni yago.
E vakarota o Jisu me kua ni vakayagataka na tamata na tavako. Me kakua na uturi tavako, sika, se paipo. Me ra kua ni dau mama tavako. E kaya ko Jisu, “Na tavako tale ga sa sega ni yaga e na kete se ki na yago; io sa sega sara ni yaga vua na tamata.”
Sa dusimaka talega o Jisu me kakua ni ra gunuva ko ira na Yalo dodonu na gunu katakata. Na kofi kei na ti e wiliki talega me gunu katakata. Ena lako vakaca kina yagodra.
E vakaraitaka talega o Jisu ni vinaka kina yagoda na vuata kei na draunikau eso kei na lewe ni manumanu. Me dau vakavinavinakataki na Kalou ena vuku ni kakana vinaka.
E veidusimaki kina o Jisu me kua ni vakayagataki vakasivia na lewe ni manumanu. Me ra dau vakayagataka ga ena gauna ni batabata. Ka me qai laukana ga ni da sa dravuisiga ena kakana tale eso.
E kaya na Turaga ni vinaka sara ki yagoda na sore ni kauvuata. Me vaka na witi, raisi, sila kei na parile. Sa daumaka sara ki yagoda na witi. Na vuanikau kei na kakana draudrau e daumaka sara vei keda na tamata kecega.
E vakarota o Jisu me ra dau vakamuria ko ira na Yalo dodonu na Vosa ni Vuku. Me ra qai kalougata kina mai vua na Kalou. Ka me bulabula kina na yagodra. Me ra vakavukui. Ni ra sa kila e vuqa na ka. Era na kalougata tiko ni ra kania na kakana dodonu.