“Wase 13: Josefa kei Ema: Jiulai 1830,” iTukuni mai na Vunau kei na Veiyalayalati (2002), 51–55
“Wase 13,” iTukuni mai na Vunau kei na Veiyalayalati, 51–55
Wase 13
Josefa kei Ema
(Jiulai 1830)
E rau vakakoro e Pennsylvania o Josefa kei Ema Simici. Ka rau laki taukena kina e dua na were lailai. Rau dau veilomani vinaka o Josefa kei Ema. Sa nodrau sasaga vagumatua me rau veivukei
E vuqa na leqa e donui Josefa kei Ema. Rau sa dravudravua sara. Ka rau gadreva tu me rau vakaluveni. Sa vakasucuma o Ema e dua na luvedrau tagane, e qai mate. Sa luvuci Ema na rarawa. Sa rau qai vakaluveni kei Josefa e muri.
Na lomaleqa nei Josefa e baleta tiko ga na nona vuvale. Sa dau gadreva me maroroi iratou. E vinakata tiko me tea na kedratou kakana.
Sa lomaleqataka talega na Lotu o Josefa. Ni sa levu tiko na nodra veivakararawataki na tamata ca vei ira na Yalo dodonu. E vakavuna na nodra vunitaki ira mai vei ira na tamata dauvakacaca ko ira na iliuliu ni Lotu. Sa gadrevi vei Josefa me gugumatua ena vukudra na Yalo dodonu.
E vuna kina me biuta na nona vale ena vuqa na gauna me vukei ira na Yalo dodonu. Sa dau rarawa na lomana ena vuku ni nona dau biuti iratou na nona vuvale. E levu talega na rarawa nei Ema ena gauna e dau biuti iratou kina o Josefa. Sa dau lomaleqataki koya.
Sa tarogi Jisu o Josefa se cava me cakava. E qai kaya mai o Jisu me kua ni kauwaitaka na nona leqa eso. Sa tukuna talega o Jisu me kakua ni lomaleqataki ira na tamata ca. Sa yalataka o Jisu ni na dau vukei Josefa.
Sa vakarota o Jisu me tea o Josefa na kedratou kakana na nona vuvale. Ka qai laki vukei ira na Yalo dodonu. E kaya vei Josefa o Jisu me kua ni leqataka na kakana, isulu, se ilavo. Era na solia vei Josefa na Yalo dodonu na veika gadreva.
Sa qai solia vei Josefa Simici o Jisu e dua na ivakatakila me baleti Ema. E kaya kina o Jisu ni o Ema Simici e dua na yalewa digitaki. Sa digitaki koya tu me qarava eso na cakacaka bibi.
Sa tukuna vei Ema o Jisu me dau lomani Josefa ena nona gauna ni nona rarawa. Me vukei koya tiko me dau yalomarau, ka me kua ni lomaleqa.
Sa tukuna o Jisu me dau veituberi o Ema vei ira na Yalo dodonu. Me dau vukei ira me ra kila na vosa ni Kalou. Sa kaya talega ni na vukei koya na Yalo Tabu me kila na veika me veituberi kina.
Sa vakarota talega o Jisu me dau taurivaka o Ema na nona gauna galala me vuli ka kina. Me vulica, ka vola kina na veika e vuqa.
E kerei Ema o Jisu me digia na sere me ra dau lagata na Yalo dodonu. Me qai tabaki e dua na ivola ni sere.
E dau rekitaka na Kalou na nodra seresere na Yalo dodonu. Na nodra sere e cavumasu ki vua. Era na kune kalougata ko ira na Yalo dodonu era seresere vua na Kalou.
Sa tautaunaka o Jisu vei Ema me dau yalomalua. E kaya talega me dau lomana na watina. E vakarota talega me dau yalomarau ka ni sa yalataka vei Josefa e vuqa na veivakalougatataki.
E tukuna vei Ema o Jisu me kakua ni leqataka na veika ni vuravura. Me vakarautaka ga na vuravura talei sa tu mai lagi. Me dau yalomarau ka vakamuria na ivunau ni Kalou. Ena qai vakaivotavota kina ena nona tikina mai lomalagi.
Sa kaya o jisu ni veika e tukuna vei Ema Simici, e baleti ira talega na marama taucoka.