“Wase 22: Na iSoqosoqo Lewe ni Lotu e Missouri: Jiulai–Okosita 1831,” iTukuni mai na Vunau kei na Veiyalayalati (2002), 84–88
“Wase 22,” iTukuni mai na Vunau kei na Veiyalayalati, 84–88
Wase 22
Na iSoqosoqo Lewe ni Lotu e Missouri
(Jiulai–Okosita 1831)
Eratou qai lako ki Missouri o Josefa Simici na Parofita, Sidney Rigdon, Edward Partridge, kei ira eso tale. Sa ka marautaki vei ira na nodra lako. Era sa gadreva me ra vakaivotavota ena kena tara o Saioni. Era sa nuitaka na Turaga ni na vakaraitaka vei ira na vanua me tara kina.
E tekivutaki na nodra ilakolako ena waqa. Ni ratou sa yaco ki Missiouri, sa qai lewa o Josefa me ratou taubale. Sa kila tiko o koya ni vanua tabu o Missouri. E vinakata kina me sarava na vanua.
Ratou qai taubale o Josefa kei iratou na nona ilawalawa me 300 na maile ki na yasana o Jackson County. Sa rui katakata vakalevu, ia eratou sega ga ni kauwaitaka. Sa dei tu ga e lomadratou me ratou tara cake na koro o Saioni.
E ratou qai lako na parofita kei iratou na nona ilawalawa ki Jackson County e Missouri. Sa tavaki iratou mai na daukaulotu mai Kirtland.
Ni oti ga e vica na siga, era sa lako talega ki Jackson ko ira na Yalo dodonu mai New York. Era marautaka na nodra tiko e kea.
Rau sa veivakaroti o Josefa Simici na Parofita kei Bisopi Edward Partridge vei ira e kea me baleta na ka me ra cakava. Me so e voli qele e Missouri. Me rau tauyavu koronivuli o Oliver Cowdery kei William W. Phelps. Ka vola talega na nodra ivola na lalai.
Sa gadreva o Josefa me kila na vanua ena tara kina o Saioni. Sa masu vei Tamada Vakalomalagi. E qai saumi mai vua na nona masu.
E qai kaya na Turaga ni na tauyavu o Saioni ena dua na tikina voleka ki na koro o Independence ena yasana o Jackson County e Missouri. Sa vakaraitaki na turaga vei Josefa na vanua me tara kina na vale tabu. E kaya ni na tara ena gauna e muri ko Saioni. Me ra na donuya mada na Yalo dodonu na veika dredre. Ena rawa ni ra tara na koro ko Saioni ke tiko vei ira na vakabauta.
E vakarota vei Josefa na Turaga me ra dau talairawarawa o ira na Yalo dodonu. Me ra dau muria na ivunau ni Kalou. Me ra vakayacora e vuqa na ka vinaka ni se bera ni ra vakaroti kina. Me ra dau veivutunitaka talega, o ira na Yalo dodonu, na nodra ivalavala ca. Sa na guilecava na Turaga na noda ivalavala ca kevaka eda veivutunitaka.
Sa vakarota na Turaga me vakatabuya na vanua o Sidney Rigdon. Sa tarogi ira na Yalo dodonu o Sidney Rigdon se ra vakavinavinakataka na qele. E tarogi ira talega se rawa me ra vakamuria na ivunau ni Kalou. Era sa kaya na Yalo dodonu, “Io.” Sa qai masu ko Sidney ka vakatabuya na qele koya.
Eratou sa qai veivosaki ena siga ka tarava, o Josefa Simici, Oliver Cowdery, Sidney Rigdonkei ira e so tale. Sa vakayacori na veivosaki oqo ena dua na vanua vakamareqeti mai Independence. Eratou wilika na vosa ni Kalou. Sa qai cabo na nodratou masu. Me qai vakatabuya o Josefa na vanua me tara kina na vale tabu.
Era sa lako taucoko na Yalo dodonu mai Missouri kina lotuvata. Era sa sa vakasinaiti mai na Yalo Tabu. Sa yalataka ko Josefa ni na vakalougatataki ira na Yalo dodonu na Kalou kevaka era maroroya na nodra veiyalayalati.
E solia vei Josefa o Jisu ena vica na siga ki muri e dua tale na ivakatakila. Me vakabibitaka kina na Siga Tabu. Me da dau cakava ena Siga Tabu na veika me da dau nanumi Jisu kina. Me kua na cakacaka ena Siga Tabu. Ka me da dau lako ki Lotu ka vakaivotavota ena sakaramede. Me da dau veivutunitaka kina na noda ivalavala ca. Ka dau sikovi ira na tauvimate. Me da vakavinavinakataka tikoga na noda kalougata. Ka dau talairawarawa tiko kina ivunau ni Kalou.
Ko ira na Yalo dodonu era cakava na veika oqo, era na lomani mai na veika vinaka era gadreva. Era na vakalougatataki ena kakana, isulu, vale, kei na iteitei. Era na bula marau. Me nodra tiko na vakacegu ena bula oqo. Ka soli talega vei ira na bula tawamudu.