“Wase 38: Na Mataniciva Talei,” iTukuni mai na Vunau kei na Veiyalayalati (2002), 145–50
“Wase 38,” iTukuni mai na Vunau kei na Veiyalayalati, 145–50
Wase 38
Na Mataniciva Talei
E ivola vakalotu na Mataniciva Talei. E vukei ira na parofita na Kalou me volai na Mataniciva Talei. E tiki ni ivola tabu. E wasei va na Mataniciva Talei. Oqo na iVola i Mosese, na ivola nei Eparaama, na volavola nei Josefa Smith, kei na Yavu ni Vakabauta.
Na iVola i Mosese
Na imatai ni wasewase ni Mataniciva Talei e ivakatakila, ka soli vei Josefa Simici. E vakayacani me iVola i Mosese. E a dua na parofita ni Kalou o Mosese. Ka bula mai liu sara.
E tukuni ena iVola i Mosese na veika e tukuna na Kalou vei Mosese ena dua na ulunivanua cecere. Sa rau veiraimata ko Mosese kei na Kalou, ka rau veivosaki. Ka kaya vua na Kalou ni tiko e dua na itavi bibi nei Mosese.
Sa tevuka vei Mosese na vuravura na Kalou. Sa raica o Mosese na veika kecega ena yaco e vuravura. E raici ira taucoko na luve ni Kalou era na mai bula e vuravura.
Sa biuti Mosese na Kalou. Ka torovi koya yani o Setani. E vakaroti Mosese me qaravi koya. E sega ni via qaravi koya o Mosese. E kaya o Mosese, “Ko i au oqo e dua na luve ni Kalou.” Sa kere veivuke vua na Kalou o Mosese. Ka qai vakasevi Setani. Sa rarawa vakalevu o Setani ni sa sega ni muri koya o Mosese. Sa biuti Mosese o Setani.
Sa curumi Mosese na Yalo Tabu. Sa mai veivosaki tale kei Mosese na Kalou. Sa mai tukuna ni luve ni Kalou ko Jisu Karisito, na iVakabula. E tukuna na Kalou ni sa tu e levu na vuravura. Ena dau levu tiko ga na vuravura. Era na bula kina o ira na luve ni Kalou.
Sa vakaraitaki vei Mosese na veika e baleta na cakacaka ni Kalou. E dau saga na Kalou me ra vukei na tamata kecega me ra tiko kei koya me tawa mudu. Sa dau tovolea me ra ucui koya o ira na tamata. E tukuni talega ena iVola i Mosese na veika e baleti Inoke na parofita kei na koro o Saioni.
Na iVola i Eparaama
Na ikarua ni wase ni Mataniciva Talei na iVola i Eparaama. Ena dua na siga ena Jiulai 1835, e yaco mai ki Kirtland e dua na turaga, ka yacana o Mr Chandler. E vakaraitaka tiko o Mr Chandler eso na mami mai Ijipita. Ni ra dau mate na tamata mai Ijipita, e dau vivigi na yagodra ena isulu. Na yago oqori e vakatokai me mami.
Eso na ivolavivigi makawa e a tiko vata mai na mami. Sa vakasaqara o Mr Chandler me dua e vakadewataka na veika e volai tu kina. E rogoca sara ni rawa ni vakadewataka o Josefa Simici.
Sa raica matua o Josefa Simici na volavosa ena ivolavivigi. E rawa ni wilika na veika e volai tu kina. Sa qai tukuna vei Mr Chandler na veika e tukuni kina. Era qai volia eso na lewe ni Lotu na ivolavivigi mai vei Mr Chandler.
Sa vakadewataka ko Josefa na volavosa ena pepa. Ka rau vola o Oliver Cowdery kei William Phelps na veika e vakadewataka o Josefa.
Na veika ko ya e vola tu na parofita rogo o Eparaama. E bula mai Ijipita o Eparaama ena dua na gauna mai liu. E rau dau veivosaki o Jisu kei Eparaama.
E vakaraitaka o Jisu vei Eparaama na veika e baleta na noda bula e liu ni bera ni da lako mai ki vuravura. Sa kaya o Jisu ni sai koya na dauveibuli kei vuravura. E bulia na matanisiga, vula, kei na kalokalo. E bulia na veikau, manumanu, kei na tamata.
Sa vola o Eparaama na veika e baleta na kosipeli i Jisu Karisito. E veivuke na iVola i Eparaama ena noda kilai ira na parofita kei na matabete.
Eparaama 1:31
Na iVola i Josefa Simici
Na ikatolu ni wase ni Mataniciva Talei e vola o Josefa Simici. Ena Josefa Simici - Ai Tukutuku, e tukuna kina o Josefa na veika e baleta na imatai ni raivotu. E tukuna kina na sala e mai taura kina na peleti koula. Sa vakamacalataka talega kina o Josefa na nodra mai vakatikora vua kei Oliver Cowdery na matabete ko ira na agilosi mai lagi. Ena Josefa Simici - Maciu, e vakadodonutaka kina o Josefa Simici e dua na iwasewase ni iVola Tabu.
Sa ikava ni wasewase ni Mataniciva Talei na Yavu ni Vakabauta. E dua na tamata e mai raici Josefa Simici ena dua na siga. Ka dau vola ivola. Sa qai vinakata me vakacuruma ena dua na tiki ni ivola eso na itukutuku me baleta na Lotu, ka tarogi Josefa Simici me vakamacalataka na tauyavu ni Lotu.
Sa tuvana o Josefa Simici na itekitekivu ni Lotu. Ka vakaraitaka kina na veika era vakabauta o ira na lewe ni Lotu. Sa vukei Josefa Simici na Kalou me vakauqeti ena veika me vola. Ni tuvai kina e tinikatolu na tikina bibi mai vei Josefa Simici. Ka vakatoka me Yavu ni Vakabauta.
Ena 1 ni Maji 1842, e tabaki kina ena so na niusiveva ni Lotu na Yavu ni Vakabauta. Era sa wilika o ira na Yalo dodonu na Yavu ni Vakabauta. Era sa vakabauta na veika e vola o Josefa Simici.
Na Yavu ni Vakabauta
Josefa Simici
Keimami vakabauta na Kalou na Tamada Tawamudu, kei na Luvena ko Jisu Karisito kei na Yalo Tabu.
Keimami vakabauta ni na cudruvi na tamata e na vuku ga ni nona i valavala ca, ka segai e na caka cala wale ga nei Atama.
Keimami vakabauta ni na vakabulai na tamata kece ga e na i soro nei Karisito, kevaka eda sa muria na vunau kei na i vakavuvuli ni i tukutuku vinaka.
Keimami sa vakabauta ni sa yavu ni i vakavuvuli ni i tukutuku vinaka na: ai matai: Mo vakabauta na Turaga ko Jisu Karisito; ai karua: Na veivutuni; ai katolu: Na papilaiso e na labadrornuci e wai me bokoci kina na i valavala ca: ai kava: Na i solisoli ni Yalo Tabu e na veitabaki ni liga.
Keimami vakabauta ni sa kilikili me lesia na tamata na Kalou e na parofisai, kei na veitabaki ni liga, me soli kina vua na kaukauwa me vunautaka na itukutuku vinaka ka vakayacora na veicakacaka tabu vakalotu.
Keimami vakabauta na i vakarau a taurivaki tu e na Lotu Taumada, ka ra a vakaitavi kina na i apositolo, na parofita, na i talatala, na i vakavuvuli, na dauvunau kei na vakailesilesi vakalotu tale e so.
Keimami vakabauta na i solisoli ni vosataka na vosa tani eso, na parofisai, na i vakatakila, na raivotu, na veivakabulai, na vakadewataki ni vosa kei na veika vakaoqori.
Keimami vakabauta ni sa vosa ni Kalou na i Vola Tabu, kevaka sa vakadewataki vakadodonu; keimami vakabauta tale ga ni sa vosa ni Kalou na ai Vola i Momani.
Keimami vakabauta na veika sa vakatakila oti na Kalou, na veika sa vakatakilai mai oqo, ka keimami vakabauta ni na levu tale na veika e na qai vakatakilai mai me baleta tiko ga na Matanitu ni Kalou.
Keimami vakabauta ni ra na vakasoqoni vata tale na Isireli, kei na nodra vakalesui mai na Yavusa e Tini; io ni na tara ko Saioni (Jerusalemi Vou) e na vanua ko Amerika; ni na mai veiliutaki sara ga e vuravura na Karisito; ka na vakavoui na vuravura oqo me na vaka sara na lagilagi kei parataisi.
Keimami vakabauta ni dodonu me soli na galala me da dui qarava kina na Kalou Kaukauwa me vaka na dodonu ni tamata yadua; ia me soli e na galala oqori me dui lewa kina na i vakarau ni nodra lotu, na vanua me ra sokalou kina kei na kalou me ra lotu vua.
Keimami vakabauta ni sa kilikili me da vakarorogo vei ira na tui, na peresitedi, na i liuliu kei ira na turaganilewa, io me da rokova ka muria na lawa.
Keimami vakabauta ni sa kilikili me da yalododonu, yalodina, talairawarawa, lomasoli, i valavala savasava, ka da caka vinaka vei ira na tamata kece ga. Sa rawa ni tukuni ni keimami sa muria na vunau nei Paula—Keimami sa vakabauta na ka kece ga, keimami sa vakanuinuitaka na ka kece ga; keimami sa vosota oti na ka e vuqa, ka keimami nuitaka ni na rawa me keimami vosota na ka kece ga. A ka kece ga e vinaka, na ka e totoka, se rogorogo vinaka, se daudokai se vakaturaga, keimami sa gadreva na veika oqori.