“Wase 51: Na iSoqosoqo ni Veivukei ni Marama: Maji 1842,” iTukuni mai na Vunau kei na Veiyalayalati (2002), 186–89
“Wase 51,” iTukuni mai na Vunau kei na Veiyalayalati, 186–89
Wase 51
Na iSoqosoqo ni Veivukei ni Marama
(Maji 1842)
Era sa tara tiko na vale tabu mai Nauvoo o ira na lewe ni Lotu. Ka sa kakadresudresu na nodra isulu na turaga. Era sa vinakata o ira na marama me ra veivuke. Sa qai yalataka e dua na marama me cula na nodra isulu na turaga. Sa sega ga vua na ilavo me volia kina na isulu gutu.
Sa yalataka o Sarah M. Kimball ni na solia vei ira na marama eso na isulu gutu. Ka sa kerea talega o Sister Kimball me ra veivuke ko ira na marama. Era sa veivosaki o ira na marama ena vale nei Sister Kimball. Ka ra duavata me tauyavu e dua na isoqosoqo ni marama ena Lotu.
Era sa kerei Eliza R Snow me vola e so na lawa ni isoqosoqo. Ka qai vakaraitaka vei Josefa Simici na lawa oqori. Sa kaya o Josefa Simici ni sa daumaka na lawa ka sa volai tu ko ya. Me kaya kina ni sa tu e dua na lewa ni Turaga e vinaka cake me baleti ira na marama.
Sa veisureti o Josefa Simici me ra mai soqoni o ira na marama ena i ka 17 ni Maji 1842. Sa yalataka na nodra veivuke na vakaitutu ena matabete ena vukudra na marama. Eratou lewe tinikawalu na marama era soqoni tiko. Sa digitaki o Ema Semici me nodra iliuliu na marama. Era sa vakatoka na nodra isoqosoqo me iSoqosoqo ni Veivukei ni Marama.
Sa tataunaka o Josefa Simici vei ira na marama me ra dau qaravi tauvimate kei ira na vakaloloma. Ka dau veivuke ena veika era gadreva na tamata. Me dau veituberi o bisopi vei ira na marama ena veika me ra cakava.
Sa qai vakayacori na soqoni me ra vulica kina o ira na marama na nodra itavi. Era sa marautaka sara ni rawa ni ra veivuke vei ira na lewe ni Lotu.
Era sa cakava na marama na veika me baleta na vale tabu. Era sa cula isulu vei ira era tara tiko na vale tabu.
Era dau veivakani o ira na marama vei ira ka viakana. Ka dau raici ira na tauvimate. Era sa dau cakava na veika vinaka me baleti ira na Yalo dodonu.
O ira na marama kecega ena Lotu e rawa ni ra curu kina iSooqosoqo ni Veivukei. Me ra vukei ira na tamata. Ka vulica kina na kosipeli. Me ra dau tuberi tale ga ena veika me baleti ira mai na veivanua tani. Ka tuberi me baleta na ivola vinaka me ra dau wilika, na ivakatagi kei na sere, kei na cakacaka ni liga. Me ra kila kina na sala eso me torocake kina na nodra veivale.