Talateú
ʻI hoʻo hoko ko ha faiako ki he kalasi ko ʻení, ʻokú ke maʻu ha faingamālie ke tokoniʻi e kau akó ke ʻilo, maʻu ha mahino pea moʻui ʻaki ʻa e ngaahi moʻoni fakahaofi moʻui ʻi he Tohi ʻa Molomoná. ʻI hoʻo teuteu ko ia ke faiakó, muimui ki he naʻinaʻi ko ia ʻa e ʻEikí ke fekumi ki he tataki ʻa e Laumālie Māʻoniʻoní, “he ʻo ka lea ha tangata ʻi he mālohi ʻo e Laumālie Māʻoniʻoní ʻoku fakahū ia ʻe he mālohi ʻo e Laumālie Māʻoniʻoní ki he loto ʻo e fānau ʻa e tangatá” (2 Nīfai 33:1). Ko e ngaahi meʻa mahuʻinga taha te ke lava ke fai ʻi hoʻo teuteu ke faiakó ko e ako ʻi he faʻa lotu ʻa e ngaahi folofolá pea muimui ki he tataki ʻa e Laumālie Māʻoniʻoní. Ko e tohi lēsoni ko ʻení ko e fakalahi atu pē ia ki hoʻo teuteú. ʻOkú ne ʻoatu ha fakamatala talateu ki he potufolofola takitaha, ʻai ke ʻiloʻi e ngaahi tefitoʻi moʻoni ʻo e ongoongoleleí ʻi he potufolofolá, pea fokotuʻu atu mo ha ngaahi founga ʻe lava ke ke akoʻi ʻaki e ngaahi tefitoʻi moʻoni ko iá ke tokoni ke mahino pea fakaʻaongaʻi ia ʻe he kau akó. ʻE tatau ai pē pe ko e faiako taimi kakato koe pe tokotaha ngāue tokoni, ʻe tokoni ʻa e tohi lēsoni ko ʻení ke ke mateuteu ke faiako.
Anga Hono Fokotuʻutuʻu ʻo e Tohí ni
ʻOku ʻi he tohi lēsoni ko ʻení ha vehe ʻe 56 pea ʻoku fokotuʻutuʻu ia ke ngāue ʻaki lolotonga ha taʻu fakaako kakato ʻe taha. ʻOku kau ʻi he Kalasi Ako Fakalotu 121, ʻa ia ʻoku ʻi ai ʻa e 1 Nīfai ki he ʻAlamā 29, pea mo e Ako Fakalotu 122, ʻa ia ʻoku ʻi ai ʻa e ʻAlamā 30 ki he Molonai 10. ʻOku totonu ke akoʻi e lēsoni takitaha ʻi ha miniti nai ʻe 50. Kapau ʻokú ke akoʻi ʻi ha semesitā uike ʻe 14, te ke lava ʻo fai ha lēsoni ʻe ua he uike. Kapau ʻokú ke faiako tuʻo taha he uike, fakafeʻungaʻi e nāunaú ʻo fakatatau mo hoʻomou ngaahi tūkungá. ʻOua naʻá ke loto foʻi kapau he ʻikai ha taimi lahi ke akoʻi ai e meʻa kotoa ʻi he potufolofola takitaha pe ko e kotoa ʻo e ngaahi tokāteline mo e ngaahi tefitoʻi moʻoni ʻoku fokotuʻu atú. Fili pea akoʻi ʻa ia ʻokú ke pehē ʻoku mahuʻinga taha ki hoʻo kau akó.
ʻOku ʻi ai ha konga ʻe tolu ʻi he vahe takitaha:
-
Talateú
-
Ngaahi Tokāteline mo ha Ngaahi tefitoʻi Moʻoni
-
Ngaahi Fokotuʻu ki hono Akoʻí
Talateú
ʻOku fakamahino ʻe he talateú ʻa e ngaahi kaveinga fakalūkufua ʻi he potufolofolá.
Ngaahi Tokāteline mo ha Ngaahi tefitoʻi Moʻoni
ʻOku ʻi he konga ko ia ʻoku ui ko e “Ngaahi Tokāteline mo ha Ngaahi tefitoʻi Moʻoni” ha lisi ʻo ha ngaahi tefitoʻi tokāteline mo e tefitoʻi moʻoni ʻi he potufolofola kuo vahe atú. Hangē ko ʻení, ʻoku hiki ʻi he vahe 23, ʻa ia ʻoku fakatefito ʻi he ʻAlamā 1–4, ʻa e ngaahi tokāteline mo e ngaahi tefitoʻi moʻoni ko ʻení:
-
Kuo pau ke fakaʻehiʻehi e Kāingalotú mei he ngāue fakataulaʻeiki kākaá (vakai, ʻAlamā 1).
-
ʻE fakamālohia kitautolu ʻe he ʻOtuá ʻi heʻetau fakafepakiʻi ʻa e koví (vakai, ʻAlamā 2).
-
ʻOku fakafepakiʻi ʻe he fakamoʻoni haohaoá ʻa e loto hīkisiá (vakai, ʻAlamā 4).
Makehe mei he ngaahi tokāteline mo e ngaahi tefitoʻi moʻoni ʻoku hiki atu ʻi he konga ko ʻení, mahalo te ke maʻu mo ha ngaahi moʻoni mahuʻinga kehe te ke ongoʻi ʻoku totonu ke akoʻi. ʻI he fakahinohino ʻa e Laumālie Māʻoniʻoní, filifili lelei ha toe ngaahi tokāteline mo ha ngaahi tefitoʻi moʻoni te ke loto ke fakakau atu. Neongo ia, manatuʻi kapau ʻoku ʻi ai ha tefitoʻi moʻoni pe tokāteline mei ha potufolofola ʻoku ʻikai fakamatalaʻi ʻi ha vahe ʻe taha, mahalo naʻa kau ia ʻi ha vahe ʻe taha mo ha potufolofola ʻokú ne akoʻi kakato ange ʻa e tefitó.
Ngaahi Fokotuʻu ki hono Akoʻí
Ko e konga ko ia ko e “Ngaahi Fokotuʻu ki hono Akoʻí” ‘oku ‘oatu ai ha ngaahi fakakaukau pau ki he me’a takitaha ‘oku hiki atu ‘i he “Ngaahi Tokāteline mo ha Ngaahi Tefitoʻi Moʻoni.” ‘Oku ‘i ai e ngaahi vahe ‘e ni’ihi ‘oku kau ʻi he konga ko ia ko e “Ngaahi Fokotuʻu ki hono Akoʻí” ha ngaahi fokotuʻu mahuʻinga ‘oku ‘ikai hiki atu ‘i he “Ngaahi Tokāteline mo ha Ngaahi Tefitoʻi Moʻoní.”
ʻOku kamata ʻaki e ngaahi fokotuʻu fakafaiako takitaha ʻaki e kiʻi fakatātā (icon) ko ʻení: . Neongo ʻoku fehokotaki ha niʻihi ʻo e ngaahi fokotuʻu ko ʻení, ka ʻe lava ke ke fakaʻaongaʻi mavahevahe pē kinautolu.
ʻOku hoko ʻa e ngaahi fokotuʻu ko ʻení ko ha fakahinohino lolotonga ko ia hono teuteuʻi hoʻo lēsoní, pea ʻe lava ke ke fakafeʻungaʻi kinautolu ki he ngaahi fie maʻu ko ia ʻa kinautolu ʻokú ke akoʻí. Manatuʻi, ko ho fatongiá ke faiako ʻo fakatatau mo e fakahinohino ʻa e Laumālié, ʻo tokoni ke mahino ki he kau akó ʻa e ngaahi tokāteliné mo e ngaahi tefitoʻi moʻoní. ʻOku ʻikai fie maʻu ia ke akoʻi kotoa e lēsoní. Ka, ke tokoni ke mahino ki he kau akó ʻa e ngaahi potufolofola ʻoku ʻi he fakangatangata ho tūkunga fakafaiakó pea fakatatau mo ʻenau ngaahi fie maʻú.
ʻOku fakaʻilongaʻi ʻi he tohi lēsoní ʻa e ngaahi veesi fakataukei folofolá ʻaki ʻa e kiʻi fakatātā (icon) ko ʻení: . ʻOku ʻi ai ha lisi ʻo ha ngaahi potufolofola fakataukei ʻe 100 ʻi he peesi 5. Kapau ne ʻosi semineli e kau akó, ʻoku totonu ke nau ʻosi maheni mo e ngaahi potufolofola mahuʻinga fakatokāteline ko ʻení. ʻI hoʻo aʻu ki ha taha ʻo e ngaahi potufolofola ko ʻení ʻi hoʻo akoʻí, mahalo ʻe lava ke ke poupouʻi ʻa e kau akó ke vahevahe ʻa e ʻuhinga ʻoku ʻuhingamālie ai ia kiate kinautolú. Poupouʻi ke nau ako maʻuloto pe toe ako maʻuloto e ngaahi potufolofolá ni ke maʻu ha mahino ʻoku toe loloto angé kiate kinautolu. Ne akoʻi ʻe ʻEletā Lisiate G. Sikoti ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē: “ʻOku ou fokotuʻu atu ke mou ako maʻuloto ʻa e ngaahi potufolofola ko ia ʻokú ne ueʻi hake homou lotó pea fakafonu homou laumālié ʻi he ʻiló. Ko e taimi ko ia ʻoku fakaʻaongaʻi ai ʻa e folofolá ʻo fakatau ki he taumuʻa naʻe finangalo ʻa e ʻEikí ke tohi ia aí, ʻoku nau maʻu ha mālohi lahi ʻa ia ʻoku ʻikai lava ke fakahā mai ia ʻi he taimi ʻoku ngāue ʻaki ai ia ʻi hano fakalea keheʻi” (ʻi he Conference Report, Oct. 1999, 112; pe Liahona, Sānuali 2000, 106).
Ngaahi Tokoni Fakafaiako Kehe
Tohi Lēsoni ʻa Molomoná Tohi Lēsoni ʻa e Tokotaha Akó: Kalasi Ako Fakalotu 121–122 (nāunau fika 32506.900). ʻOku ʻi he vahe takitaha ʻo e tohi lēsoni maʻá e tokotaha akó ha konga ʻoku ui ko e “Ngaahi Meʻa ke Fakakaukauʻí” mo e “Ngāue ke Faí.” ʻe lava ke tokoni e ngaahi fehuʻi ʻi he konga ko ia ko e “Ngaahi Meʻa ke Fakakaukauʻí” mo e ngaahi ʻekitivitī ʻi he konga ko ia ko e “Ngāue ke Faí” ki he kau akó ke fakaloloto ange ʻa e mahino ʻoku nau maʻú pea fakaʻaongaʻi ʻa e ngaahi tefitoʻi moʻoni ʻo e ngaahi folofolá ʻi heʻenau moʻuí.
ʻOku ʻi ai ha ngaahi fakakaukau fakafaiako ʻi he tohi lēsoni maʻá e faiakó ʻoku talaatu ke ke vakai ki he tohi lēsoni maʻá e tokotaha akó. Fakakaukau ke fakaʻaongaʻi e tohi lēsoni maʻá e tokotaha akó ʻi he lēsoni kotoa pē ke fakatupulaki e ngaahi fakakaukaú, fehuʻí mo e ngaahi ngāue ke faí.
Companion DVD. ʻOku ʻoatu fakataha mo e tohi lēsoni ko ʻeni maʻá e faiakó ha DVD. ʻOku ʻi he DVD ko ʻení ha ngaahi ongo mo e vitiō ne hiki ʻo ha kau palōfita ʻo e ngaahi ʻaho kimui ní mo ha Kau Taki Māʻolunga kehe pea mo e kau ʻōfisa lahi ʻo e Siasí, ʻoku nau vahevahe ha faleʻi ʻa ia ʻoku ʻasi atu ʻi he tohi lēsoni maʻá e tokotaha akó pea mo e tohi lēsoni maʻá e faiakó. ʻOku fakaʻilongaʻi ʻi he tohi lēsoní ʻa e ngaahi lea ko ia ʻoku lava ʻo maʻu ʻi he DVD ʻaki ʻa e icon ko ʻení: A. ʻOku vahevahe ʻa e DVD ʻo fakatatau ki he ngaahi vahe ʻi he tohi lēsoní. Ko e mataʻitohi ko ia ʻi he icon ʻoku ʻuhinga ia ki ha track ʻi he DVD.
Ngaahi lea ʻa e Kau Palōfita ʻo e Ngaahi ʻAho Kimui Ní, Kau Taki Māʻolungá, mo e kau ʻŌfisa Lahi ʻo e Siasí. ʻI hoʻo ako ko ia e ngaahi lea ne fai he konifelenisi lahí mo e ngaahi fakamatala ʻi he ngaahi makasini ʻa e Siasí, fekumi ki ha toe ngaahi akonaki ʻe lava ke tokoni ke toe mahino ange kiate koe mo hoʻo kau akó ʻa e folofolá pea fakaʻaongaʻi ia.
Ngaahi Pulusinga Kehe ʻa e Siasí. ʻOku faʻa fakaʻaongaʻi ʻi he tohi lēsoni ko ʻení ha ngaahi fakamatala mei ha ngaahi pulusinga kehe kuo fakangofua ʻe he Siasí, ʻo kau ai ʻa e Bible Dictionary, Fakahinohino ki he Ngaahi Folofolá (scriptures.lds.org), Tuʻu Maʻu ʻi he Tuí: Ko ha Huluhulu ki he Ongoongoleleí (nāunau fika 36863 900), mo e Ki Hono Fakamālohia ʻo e Toʻu Tupú: Ko Hono Fakahoko Hotau Fatongia ki he ʻOtuá (tohitufa, nāunau fika 36550 900).
Founga hono Fakaʻaongaʻi ʻo e Tohi Lēsoni ko ʻEní
Ko e ngaahi folofolá ʻa hoʻo ʻuluaki maʻuʻanga tokoní ʻi hoʻo teuteu e ngaahi lēsoní. ʻOku tokoni e tohi lēsoni ko ʻení ke ke akoʻi hoʻo kau akó mei he folofolá.
ʻE lava ke ke fakaʻaongaʻi e tohi lēsoni ʻa e faiakó ʻi ha founga lalahi ʻe tolu:
-
ʻE lava ke ke muimui ofi ki he fokotuʻu fakafaiakó ʻo hangē ko ia ʻoku fakaikiiki atú.
-
ʻE lava ke ke fakaʻaongaʻi e tohi lēsoní ko ha fakahinohino ako ke tokoni atu ke ke ʻiloʻi e ngaahi tefitoʻi moʻoni mo e ngaahi kaveinga ke fakatupulaki ʻi hoʻo lēsoní.
-
ʻE lava ke ke fakaʻaongaʻi e tohi lēsoní ko ha maʻuʻanga tokoni ke fakalahi atu ki he ngaahi fakakaukau ʻoku ke maʻu lolotonga ko ia hoʻo ako e ngaahi potufolofolá.
Fakapapauʻi e Meʻa ke Akoʻí
Fili mei he ngaahi potufolofolá ha ngaahi tokāteline, tefitoʻi moʻoni mo ha ngaahi meʻa ne hoko ʻoku mahuʻinga taha ke mahino ki hoʻo kau akó. Tuku ke hanga ʻe he ngaahi ueʻi ʻa e Laumālié mo e ngaahi fie maʻu hoʻo kau akó ʻo tataki koe ʻi hoʻo fakakaukauʻi ʻa e meʻa ke akoʻí. Ako fakamātoato ʻa e ngaahi potufolofolá, fakatokangaʻi ʻa e ngaahi tokāteliné, ngaahi tefitoʻi moʻoní, ngaahi meʻa ne hoko pea mo e ngaahi lea pe kupuʻi lea faingataʻa te ke tokoni ke mahino ki hoʻo kau akó. ʻE lelei kapau ʻe lahi ange ʻi he tuʻo tahá hoʻo lau ʻa e ngaahi potufolofolá.
ʻOku ʻikai ko ha meʻa pau ia ke akoʻi kotoa ʻa e ngaai tokāteline mo e ngaahi tefitoʻi moʻoni ʻoku fokotuʻu atu he vahe takitaha. Ko hono moʻoní, mahalo te ke ʻiloʻi he ʻikai hao taimi ke fai ia. Ne faleʻi ʻa ʻEletā Lisiate G. Sikoti ʻo pehē: “[Manatuʻi, ko e meʻa muʻomuʻa tahá, ke ʻoua ʻe feinga ke ʻosi kotoa e lēsoní kapau ʻoku ʻikai ke lava ʻo mahino. Fai ʻa e meʻa ʻoku malavá ʻaki ʻa e mahinó” (“To Understand and Live Truth,” lea ki he kau faiako fakalotu ʻa e CES, Feb. 4, 2005, 2, ldsces.org).
Fakapapauʻi e Founga ki hono Akoʻí
ʻI hoʻo fakakaukauʻi ko ia ʻa e ngaahi founga te ke faiako ʻakí, manatuʻi ʻa e matuʻotuʻa fakalaumālie ʻa hoʻo kau akó. Naʻe lea a Palesiteni J. Lūpeni Kalake ko e Siʻí (1871–1961) ʻo e Kau Palesitenisī ʻUluakí ʻo pehē, “ʻOku ʻikai fie maʻu ke mou fakaoloolo atu ʻi he tuʻa ʻo e toʻu tupu ʻilo fakalaumālie ko ʻení ʻo fanafana atu ʻi honau telingá ʻa e lotú” (Ko e Taumuʻa ke Tulifua ki ai ʻa e Siasí ʻi he Akó, rev. ed. [tohitufa, 2004], 11).
Koeʻuhí kuo matuʻotuʻa fakalaumālie ha niʻihi tokolahi hoʻo kau akó, ʻe lava ke ke ʻamanaki atu te nau fakamātoato ʻi honau fatongia ko e kau akó. Palani ha ngaahi founga ke tokoniʻi ai kinautolu ke nau fatongia ʻaki ʻenau akó. ʻE ala tokoni atu e ngaahi fokotuʻu ko ʻení:
-
Poupouʻi ke nau lau e ngaahi potufolofola kuo vahé pea mo e nāunau ʻi he tohi lēsoni maʻá e tokotaha akó kimuʻa he lēsoni takitaha. Makehe mei aí, tokoniʻi kinautolu ke nau fakatupulaki hono ʻulungāanga ʻaki ʻo e lau folofola fakaʻahó. Poupouʻi kinautolu ke ako e Tohi ʻa Molomoná ʻi heʻenau moʻuí.
-
ʻOange kiate kinautolu ha ngaahi faingamālie ke nau fehuʻi pea tali ha ngaahi fehuʻi. ʻE lava ʻe he ngaahi fehuʻi leleí ʻo tokoni ke nau fatongiaʻaki ʻa ʻenau akó. ʻI heʻenau fakalaulauloto ki he ngaahi tokāteline mo e ngaahi tefitoʻi moʻoni ʻi he Tohi ʻa Molomoná, poupouʻi kinautolu ke nau fakamatalaʻi ʻa hono ʻuhingá, vahevahe ʻenau ngaahi fakakaukaú, pea fai ha fakamoʻoni ki he ngaahi moʻoni ʻoku nau akó. Fakatupu ha ʻātakai ʻe ʻiloʻi ai ʻe he kau akó ʻoku nau maʻu e faingamālie ke fakafanongo pea ke lea. ʻOange ha ngaahi faingamālie ke nau fefakamaamaʻaki ai (vakai, T&F 88:122).
-
Fakaʻehiʻehi mei hono fakaʻaongaʻi ʻo e fakamatalá ko e founga fakafaiakó pē ia. Ka ke hanga ʻo tuku ke ʻiloʻi ʻe he kau akó ʻa e moʻoní. Tataki kinautolu ke nau ʻiloʻi ʻa e meʻa ko ia kuó ke mamata ki ai mo e niʻihi kehé—pea aʻu pē ki haʻanau mamata ki ha ngaahi meʻa ne teʻeki ke ke fakatokangaʻi kimuʻa. Manatuʻi ʻa e ngaahi fakamatala ʻa ʻEletā Petinā ʻo e Kōlomu ʻo e Kau ʻAposetolo ʻe Toko Hongofulu Mā Uá: “Kuó u mamata ki ha ʻulungāanga ʻoku fai tatau ai e faiako kuo nau takiekina ʻa ʻeku moʻuí. Kuo nau tokoniʻi au ke u fekumi ki he potó ʻi he tui. Ne nau fakafisingaʻi ke ʻomi kiate au ha ngaahi tali faingofua ki he ngaahi fehuʻi ʻoku mamafá. Ko hono moʻoní ne ʻikai pē ke nau teitei ʻomi ʻe kinautolu ha tali. Ka naʻa nau fakahinohino ʻa e halá pea tokoniʻi au ke u fakahoko e ngaahi meʻa ko ia ke maʻu ai e tali pē ʻaʻakú. Ne ʻikai ke u houngaʻia maʻu pē ʻi he foungá ni, ka kuo hanga ʻe he ngaahi meʻa kuó u aʻusiá ʻo ʻai ke mahino kiate au ko e tali ko ia ʻoku ʻomi ʻe ha niʻihi kehé he ʻikai manatuʻi fuoloa ia, ʻo kapau ʻe manatuʻi. Ka ko e tali ko ia ne tau ʻilo pe maʻu ʻi heʻetau ngāue ʻaki ʻa e tuí, ʻoku faʻa manatuʻi ia ʻi he moʻui kotoa” (“Seek Learning by Faith,” lea ki he kau faiako fakalotu ʻa e CES, Feb. 3, 2006, 5, ldsces.org). ʻOua naʻa ʻoatu pē ha ngaahi fakamatala, fekumi ki ha ngaahi founga fakafaiako te ne tokoniʻi ke mahino ki he kau akó ʻa e folofolá ʻi heʻenau ʻiloʻi ʻiate kinautolu pē ʻa e ngaahi tokāteliné mo e ngaahi tefitoʻi moʻoní.
-
Poupouʻi ʻa e kau akó ke nau moʻui ʻaki e ngaahi tefitoʻi moʻoni ʻoku nau akó. Tokoniʻi kinautolu ke nau fakahoko e faʻahinga ako ko ia ʻoku fakamatalaʻi ʻe ʻEletā Petinā—ko e ako ko ia ʻoku “mahulu atu ia ʻi he mahino fakaʻatamaí pea mo hono pukepuke mo hono fakamanatu mai ʻo e fakamatalá” pea ʻokú ne ʻai kitautolu ke “[liʻaki] atu ʻa e tangata fakaekakanó (vakai, Mōsaia 3:19) [pea] ke liliu hotau lotó (vakai,Mōsaia 5:2)” (“Fekumi ki he ʻIló,” 3). ʻI hoʻo fakakaukauʻi ko ia ʻa e founga ke akoʻi ʻaki e ngaahi tokāteliné mo e ngaahi tefitoʻi moʻoní, fakakaukauʻi e ngaahi founga ke poupouʻi ʻaki e kau akó ke hokohoko atu ʻa ʻenau akó ʻo mavahe mei he loki akó.
Fakafeʻungaʻi ʻo e Ngaahi Lēsoní ke Tokoniʻi e Kau Ako ʻoku Faingataʻaʻia Fakaesinó
ʻI he taimi ʻokú ke akoʻi ai ha kau ako ʻoku faingataʻaʻia fakaesinó, fakafeʻungaʻi ʻa e lēsoní ke feau ʻenau ngaahi fie maʻú. Hangē ko ʻení, ʻoku lahi e ngaahi lēsoni ʻoku fie maʻu ai ke lau leʻo lahi pe fakalongolongo pē e kau akó pea ke nau tohi ʻa ʻenau ngaahi talí. Ke fakafeʻungaʻi e ngaahi ʻekitivitī peheé ki he kau ako ʻoku faingataʻa ke nau laukonga pe tohí, ʻe lava ke ke fakakaukau ke ke lau leʻo lahi ʻe koe, pe ʻai ke lau ʻe ha kau ako kehe, pe fakaʻaongaʻi ha ngaahi lea kuo hiki. ʻI he taimi ʻoku fie maʻu ai ke hiki ha ngaahi talí, ʻe lava ke ke poupouʻi haʻanau lea ʻaki atu pē ʻenau talí.
Ke maʻu ha ngaahi fakakaukau mo ha ngaahi maʻuʻanga tokoni lahi ange, vakaiʻi ʻa e konga ko ia ko e “Adapted Classes and Programs for Students with Disabilities” ʻi he tohi tuʻutuʻuni ʻa e Potungāue Ako ʻa e Siasí (CES).
Fakataukei Folofolá
|
Fuakava Motuʻá |
Fuakava Foʻoú |
Tohi ʻa Molomoná |
Tokāteline mo e Ngaahi Fuakavá |
|---|---|---|---|