Vahe 46

3 Nīfai 27–30

Talateú

ʻI he ofi ke ʻosi ʻa e ngāue fakafaifekau ʻa e Fakamoʻuí ʻi he kau Nīfaí, naʻá Ne tali e fehuʻi ʻa ʻEne kau ākongá ʻo kau ki he hingoa ʻoku totonu ke nau ui ʻaki e Siasí, ʻo Ne talaange ʻoku totonu ke nau ui ʻaki e Siasí ʻa Hono huafá. Naʻá Ne tokoniʻi kinautolu ke mahino ko Hono Siasí pē taha ʻe lava ke langa ʻi Heʻene ongoongoleleí. Naʻá Ne toki fakamatalaʻi kimui e ʻuhinga ʻo ʻEne ongoongoleleí. ʻI hoʻo faiako mei he ngaahi fakamatala ko ʻení, ʻokú ke maʻu ai ʻa e faingamālie ke fakamanatu ki he kau akó ko e Siasí mo e ongoongoleleí ʻa e founga ʻoku fakaʻaongaʻi ʻe he ʻEikí ke tokoniʻi kitautolu ke tau foki atu kiate Iá.

ʻOku laulōtaha ʻa e konga folofola ko ʻení he ʻokú ne talanoa ki he liliu ʻa e kau ākonga Nīfai ʻe toko tolú—kau ai mo ha fakamatala ki he niʻihi naʻe liliú ʻo lahi ange ia ʻi ha toe feituʻu he folofolá. Te ke lava ʻo tokoniʻi e kau akó ke mahino kiate kinautolu hono ʻuhinga ʻoku fili ai ʻe he ʻEikí ke liliu ha niʻihi ʻo ʻEne kau tamaioʻeiki ʻi he moʻui fakamatelié.

Fakaʻosí, ʻoku fakaʻosi ʻaki ʻe he 3 Nīfaí ʻa hono fakamatalaʻi ʻe Molomona ʻa e fatongia ʻo e Tohi ʻa Molomoná ʻi hono tānaki fakataha ʻo ʻIsileli ʻi he ngaahi ʻaho kimui ní. Te ke lava ʻo fakalotolahiʻi e kau akó ke nau toe fakatukupaaʻi kinautolu ke fakaʻaongaʻi ʻa e meʻaʻofa mahuʻinga ko ʻení ʻi heʻenau moʻui fakafoʻituituí pea ʻi heʻenau ngaahi feinga ke fakaafeʻi ʻa e niʻihi kehé ke haʻu ki he Fakamoʻuí.

Ngaahi Tokāteline mo ha Ngaahi Tefitoʻi Moʻoni

ʻOku ui ʻaki ʻa e Siasi ʻo Sīsū Kalaisí ʻa Hono huafá pea ʻoku langa ia ʻi Heʻene ongoongoleleí (vakai, 3 Nīfai 27).
Naʻe liliu ha niʻihi ʻo e kau tamaioʻeiki faivelenga ʻa e ʻEikí koeʻuhí ke nau lava ʻo hokohoko atu ʻenau ngāue ʻi he māmaní (vakai, 3 Nīfai 28).
Naʻe fakaʻilongaʻi ʻe hono ʻomi ʻo e Tohi ʻa Molomoná ʻa e kamataʻanga hono tānaki fakataha ʻo ʻIsilelí (vakai, 3 Nīfai 29:1–3).

Ngaahi Fokotuʻu ki hono Akoʻí

3 Nephi 27. ʻOku Ui ʻAki e Siasi ʻo Sīsū Kalaisí ʻa Hono Huafá pea ʻOku Langa Ia ʻi Heʻene Ongoongoleleí

Kole ki he kau akó ke lau ʻa e 3 Nīfai 27:1–3 pea fakatokangaʻi e fehuʻi naʻe fai ʻe he kau ākonga ʻa Sīsuú. Kole ange leva ke nau vahevahe tautau toko ua ʻo nau ako fakataha ʻa e 3 Nīfai 27:4–9. Kimuʻa pea kamata ʻenau akó, kole ange ke nau kumi hake ʻi he lahi taha te nau lava ke maʻú ʻa e ngaahi ʻuhinga kuo pau ke ui ʻaki ai ʻa e Siasi ʻo Sīsū Kalaisí ʻa Hono huafá. Hili hono ʻoange ha taimi feʻunga ke aleaʻi tautau toko ua ai ʻeni ʻe he kau akó, kole ange ke nau vahevahe ʻenau ngaahi fakakaukaú mo e kalasí fakakātoa.

ʻEke ki he kau akó pe ko e fē feituʻu ʻi he folofolá ʻoku fakahā ai ʻe he ʻEikí ʻa e hingoa kakato ʻo Hono Siasí ʻi he kuonga fakakosipeli ko ʻení. Fakaafeʻi ha taha ke ne lau ʻa e Tokāteline mo e Ngaahi Fuakava 115:3–4. Hili ia pea hiki ʻeni he palakipoé:

Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní

Ko e =

Siasi

ʻo Sīsū Kalaisi =

ʻo e Kau Māʻoniʻoni =

ʻi he Ngaahi ʻAho Kimui ní =

Kole ki he kau akó ke nau aleaʻi hono mahuʻinga ʻo e konga takitaha e hingoa ʻo e Siasí.

Vahevahe ʻa e lea ʻa Palesiteni Kōtoni B. Hingikelī he peesi 386 ʻi he tohi lēsoni ʻa e tokotaha akó pe ʻi he DVD ʻoku ʻomai fakataha mo ʻení A. Fakamatalaʻi ange naʻe lea ʻaki ʻeni ʻe Palesiteni Hingikelī ʻi heʻene fuofua lea he konifelenisi lahí ki he kāingalotu ʻo e Siasí hili hono hikinimaʻi ia ko e Palesiteni ʻo e Siasí. ʻE ʻaonga e ngaahi fehuʻi ko ʻení:

Te ke fakamatala fakanounouʻi fēfē ʻa e lea ʻa Palesiteni Hingikelií ʻi ha sētesi pē ʻe taha pe ua?
Ko e hā e pōpoaki ʻoku tau ʻoatu ʻi he taimi ʻoku tau fakaʻaongaʻi kakato ai e hingoa ʻo e Siasí kae ʻikai ko ha hingoa fakatenetené?
Ko e hā haʻo lea ʻe fai ange ki ha taha ʻokú ne ʻeke atu pe ko e Māmonga koe? Ko e hā hono ʻuhingá?

Kole ki he kau akó ke lau ʻa e 3 Nīfai 27:8–11. Taki ʻenau tokangá ki hono toutou lea ʻaki ʻa e foʻi lea ko e ongoongoleleí.

Kapau ʻe ʻeke atu ʻe ha taha hoʻo ʻuhingá ʻi haʻo talanoa ʻo kau ki he “ongoongoleleí,” ko e hā hoʻo meʻa ʻe talaangé?

Lolotonga hono vahevahe ʻe he kau akó ha ngaahi tali ki he fehuʻí ni, hiki ʻenau ngaahi fakakaukaú ʻi he palakipoé. Fakakaukauʻi foki hano lau ʻo e fakamatala ko ʻení mei he Tuʻu Maʻu ʻi he Tuí pea fakamatala fakanounouʻi ia he palakipoé:

“Ko e ongoongoleleí ko e palani ia ʻa ʻetau Tamai Hēvaní ki he fiefiá. Ko e uho ʻo e tokāteline ʻo e ongoongoleleí ko e Fakalelei ʻa Sīsū Kalaisí. … ʻI he kakato ʻo e ongoongoleleí, ʻoku kau ai ʻa e ngaahi tokāteliné, ngaahi tefitoʻi moʻoní, ngaahi fonó, ngaahi ouaú, pea mo e ngaahi fuakava kotoa ʻoku fie maʻu ke hakeakiʻi ai kitautolu ʻi he puleʻanga fakasilesitialé” (Tuʻu Maʻu ʻi he Tuʻí: Ko ha Huluhulu ki he Ongoongoleleí [2004], 156–57).

Fakaafeʻi e kau akó ke kumi hake ki he 3 Nīfai 27:13–22. Fekau ke nau lau fakalongolongo pea laineʻi ʻa e ngaahi tefitoʻi moʻoni naʻe lau ʻe Sīsū Kalaisi ko e konga ʻo ʻEne ongoongoleleí. Hili hono ʻoange ha taimi feʻunga, fakaafeʻi kinautolu ke vahevahe ʻa e meʻa kuo nau maʻú. Tānaki atu ki he lisi he palakipoé kapau ʻe fie maʻu.

Hiki e ngaahi fakamoʻoni fakafolofola ko ʻení he palakipoé:

Vahevahe e kalasí ki ha kulupu ʻe tolu, pea vahe ha taha ʻo e ngaahi konga folofola ko ʻení ki he kulupu takitaha. Fakaafeʻi e kau akó ke nau lau fakavave pē ʻenau ngaahi konga folofola ne vahe angé ʻo kumi ha toe ngaahi ʻilo fekauʻaki mo hono ʻuhinga ʻo e foʻi lea ko e ongoongoleleí. ʻAi ke nau sio ki he lisi he palakipoé ke tokoni kiate kinautolu ke mahino ʻa hono mahuʻinga ʻo e ngaahi potufolofola ʻoku nau laú. Fakaafeʻi ha kau ako mei he kulupu takitaha ke vahevahe ʻa e ngaahi ʻilo ne nau maʻu mei heʻenau laukongá.

Poupouʻi e kau akó ke nau faʻu ha sēini folofola ʻaki ʻenau fakafekauʻaki ʻa e 3 Nīfai 27:13–22 mo e ngaahi potufolofola ʻe tolu ʻoku hiki he palakipoé. Hangē ko ʻení, ʻe lava ke nau tohiʻi he tafaʻaki hoko atu pē ki he 3 Nīfaí 27:13–22 ʻa e Vakai, 2 Nīfai 31. ʻI he ʻi he tafaʻaki ʻo e kamataʻanga ʻo e 2 Nīfai 31, ʻe lava ke nau tohiʻi ai ʻa e Vakai, T&F 20:8–36. ʻI he tafaʻaki hoko atu pē ki he Tokāteline mo e Ngaahi Fuakava 20:8–36, ʻe lava ke nau tohiʻi ai ʻa e Vakai,Mōsese 6:53–62. ʻI he tafaʻaki hoko atu pē ki he Mōsese 6:53–62, ʻe lava ke nau fakakakato ʻa e sēiní ʻaki hono tohiʻi ʻa e Vakai, 3 Nīfai 27:13–22. Pe ʻe lava ke nau vakai ki ha taha ʻo e ngaahi peesi ʻi muʻa pe ʻi mui ʻi heʻenau ngaahi Tohi ʻa Molomoná ʻoku ʻikai tohi ai ha meʻa pea hiki e ngaahi potufolofola ko ʻení ʻi he ʻuluʻi fakamatala hangē “Ko e Ongoongolelei ʻo Sīsū Kalaisí.”

Fakaʻaongaʻi e saati mo e ngaahi fehuʻi ko ʻení ke tokoniʻi e kau akó ke nau aleaʻi pea ʻai ke hoko ko honau konga ʻa e ngaahi tefitoʻi moʻoni ʻi he ngaahi potufolofola naʻa nau laú:

Ongoongolelei ʻo Sīsū Kalaisí	Ngaahi Fakamoʻoni Fakafolofolá
Ko e Fakalelei ʻa Sīsū Kalaisí	3 Nīfai 27:13–14
Tui	3 Nīfai 27:19
Fakatomalá	3 Nīfai 27:16, 19–20
Papitaisó	3 Nīfai 27:16, 20
Laumālie Māʻoniʻoní	3 Nīfai 27:20
Kātaki ki he ngataʻangá	3 Nīfai 27:16–17
Toetuʻú	3 Nīfai 27:14, 22
Fakamāú	3 Nīfai 27:14–16

Fakatatau ki he ngaahi veesi ko ʻení, ko e hā e ngaahi tāpuaki ʻoku tau maʻu ʻi heʻetau moʻui ʻaki e ongoongolelei ʻo Sīsū Kalaisí?
Naʻe hanga fēfē ʻe hoʻo ako ʻo e ngaahi veesi ko ʻení ʻo fakaloloto ange e mahino ʻokú ke maʻú pe ko e hā ʻa e ongoongoleleí?
Ko e hā ʻoku tau fie maʻu ai ʻa e fakahā he ngaahi ʻaho kimui ní kae mahino ʻa e ongoongoleleí?

Tokoniʻi e kau akó ke nau sio ko hono fakamatalaʻi ko ia ʻo e ngaahi tefitoʻi moʻoni ʻo e ongoongoleleí ʻi he ngaahi folofolá pea ʻi he fakahā ʻi onopōní, ko ha fakamoʻoni ia ʻo e fakaʻanaua ʻa e ʻOtuá ke vahevahe ʻa e ngaahi tāpuaki ʻo e hakeakiʻí mo ʻEne fānaú.

Fakaʻosi ʻaki hono lau ʻo e 3 Nīfai 27:27 . Fakaafeʻi e kau akó ke nau fakalaulauloto ki he meʻa ʻe lava ke nau fai ke muimui kakato ange ai ki he naʻinaʻi ʻa e Fakamoʻuí ke hoko ʻo hangē pē ko Iá.

3 Nīfai 28. Naʻe Liliu ha Niʻihi ʻo e Kau Tamaioʻeiki Faivelenga ʻa e ʻEikí Koeʻuhí ke Nau Lava ʻo Hokohoko Atu ʻEnau Ngāue ʻi he Māmaní

ʻAi ke lau fakalongolongo ʻe he kau akó ʻa e 3 Nīfai 28:1–10, pea fakatokangaʻi e founga hono tali ʻe he kau ākonga Nīfai ʻe toko hongofulu mā uá ʻa e fehuʻi ange ʻe Sīsū, “Ko e hā e meʻa ʻoku mou loto ke u fai maʻamoutolú, ʻo ka hili ʻeku ʻalu ki he Tamaí?”

Ko e hā e tāpuaki naʻe talaʻofa ʻaki ʻe he ʻEikí ki he ʻuluaki kau ākonga ʻe toko hivá? Ko e hā e tāpuaki naʻá Ne foaki ange ki he toko tolu ko eé?

Tokoniʻi e kau akó ke mahino naʻe tuku ki he kau ākonga ʻe toko tolú ha tuʻunga ʻoku tau ui ko e liliú (translated). Tokoni ke mahino kiate kinautolu ʻoku kehe ʻeni ia mei he liliu pea toe foki pē ki hono tuʻunga naʻe ʻi aí (transfigured) pe toetuʻú. Ki ha fakamatala lahi ange, taki ʻenau tokangá ki honau ngaahi fakaʻuhingaʻí he peesi 388–89 ʻi he tohi lēsoni ʻa e tokotaha akó.

Kole ki he kau akó ke talamai mo ha niʻihi kehe ʻi he folofolá naʻe liliu (ʻe kau ʻi he ngaahi talí ʻa ʻĪnoke mo hono kakaí, Mōsese, ʻIlaisiā, mo Sione ʻOfeina). Fakamatalaʻi ange ʻoku hanga ʻe he ʻEikí ʻo liliu ʻa kinautolu ʻoku fie maʻu ke nau (1) moʻui ʻo lōloa atu ʻi honau taimi moʻui angamaheni ʻi hemoʻui fakamatelié pea (2) kei tauhi pē ʻa honau sino fakamatelié ke fakakakato honau misiona fakalangi kuo tuku kiate kinautolú.

Vahevahe e kalasí ki ha ngaahi kulupu tautau toko tolu pe fā. Ke tokoniʻi e kau akó ke mahino kiate kinautolu ʻa e ngaahi meʻa ne aʻusia mo e ngaahi tuʻunga ne ʻi ai ʻa e kau ākonga ʻe toko tolú ʻo hangē ko hono fakamatalaʻi ʻi he 3 Nīfai 28, kole ange ke nau lau fakalelei ʻa e veesi 6–40 pea vahevahe e ngaahi fakakaukau ʻoku nau maʻu kau ki he ngaahi vēsí ni. Lolotonga e ngāue ʻa e kau akó ʻi heʻenau ngaahi kulupú, ʻalu mei he kulupu ki he kulupu ʻo fakafanongo ki heʻenau ngaahi fakamatalá. Poupouʻi e tokotaha ako kotoa pē ke kau ki he fealēleaʻaki ʻa e kulupú. Fakaafeʻi e kau akó ke fakaʻilongaʻi ʻi heʻenau ngaahi folofolá ʻa e ngaahi ʻilo ne vahevahe ʻe heʻenau ngaahi kulupú. ʻOku totonu ke kau ai ʻa e Toko Toluʻi Nīfaí ʻa ia:

He ʻikai ʻaupito pē te nau mate ka ʻe liliu kinautolu mei he faʻa-maté ki he taʻe-faʻa-maté “ ʻi he kemo ʻo e matá” (vakai, veesi 7–8).
He ʻikai hoko kiate kinautolu ha mamahi tuku kehe pē ʻa e mamahi koeʻuhí ko e ngaahi angahala ʻa e māmaní (vakai, veesi 9).
Naʻa nau maʻu ha talaʻofa pau ʻo e hakeakiʻí (vakai, veesi 10).
Naʻa nau mamata mo fanongo ki ha ngaahi meʻa naʻe ʻikai faʻa lea ʻaki (vakai, veesi 13–14).
ʻE maluʻi ʻa kinautolu ke ʻoua aupito naʻa ʻi ai ha mālohi ʻo e kakai faikoví kiate kinautolu (vakai, veesi 19–22).
Te nau lava ʻo fakahā kinautolu ki he niʻihi kehé ʻo ka nau loto ki ai (vakai, veesi 30).
Te nau monūʻia he ʻikai maʻu ʻe Sētane hano mālohi kiate kinautolu (vakai, veesi 39).
Te nau ʻi māmani ʻo aʻu ki he ʻAho Fakamāú (vakai, veesi 40).

Fakamahinoʻi ange naʻe fakahā ʻe he Fakamoʻuí ki he Toko Toluʻi Nīfaí te nau ʻi he lotolotonga ʻo e kau Siú mo e kau Senitailé, pea he ʻikai te nau ʻiloʻi ʻa kinautolu (vakai, 3 Nīfai 28:25–30). Ko ia, ʻoku ʻikai moʻoni ʻa e ngaahi talanoa lahi kuo fanongo ai ʻa e kakaí ʻo kau ki he Toluʻi Nīfaí. Toe fakamatalaʻi ange foki ʻoku faʻa maʻuhala ʻa e kupuʻi lea ko ia “ ʻe ʻikai te mou teitei kātakiʻi ʻa e ngaahi mamahi ʻo e maté” (veesi 8) ʻo pehē ʻoku ʻuhinga he ʻikai teitei mate ʻa e Toluʻi Nīfaí. Hangē ko e akonaki ʻa Paulá, “ ʻoku mate kotoa pē ʻia ʻĀtama” (1 Kolinitō 15:22). ʻOku ʻuhinga ʻeni ki he kakai kotoa pē, ʻo kau ai ʻa kinautolu naʻe liliú. Neongo ia, ʻoku vave ʻaupito ʻa e fou atu ʻa kinautolu naʻe liliú ʻi he maté pea nau hoko ko ha niʻihi kuo toetuʻu. ʻOku ʻikai ke nau aʻusia ʻe kinautolu e mavahe ʻa e sinó mei he laumālié ʻi ha vahaʻataimi lōloa, ʻo hangē ko ia ʻe hoko ki hotau tokolahí. ʻE hoko ʻa e liliu ko ʻení ʻi he meʻa ʻoku ui ʻe he folofola “ko e kemo ʻo e matá” (veesi 8). ʻI heʻene peheé, he ʻikai te nau “ ʻilo ʻa e maté” (veesi 7).

Kole ki ha kau ako ʻe toko tolu ke nau takitaha lau ha taha ʻo e ngaahi potufolofola ko ʻení. Fakaafeʻi e toenga ʻo e kalasí ke nau fakafanongo ki hono fakamatalaʻi ʻo e ngāue mo e ngāue fakafaifekaú ʻa e kau Nīfai kuo liliú.

Ko e hā ʻoku tau ako ʻo kau ki he kau ākonga ʻe toko tolú mei he ngaahi potufolofola ko ʻení ?
Naʻe tokoni fēfē ʻa e tuʻunga liliu ʻo e kau ākonga ʻe toko tolú ke nau fakakakato ʻa ʻenau ngāué?

Kole ki ha toko taha ako ke ne lau ʻa e 3 Nīfai 28:9–10.

Ko e hā ne fie maʻu ai ʻe he kau ākonga ko ʻeni ʻe toko tolú ke nau kei nofo pē ʻi māmaní?
Fakatatau ki he ngaahi veesi ko ʻení, ko e hā e taha ʻo e ngaahi ola hono vahevahe ʻo e ongoongoleleí mo ha niʻihi kehé?

Fakaafeʻi e kau akó ke nau fakamatala ki he fiefia kuo nau ongoʻi ʻi heʻenau vahevahe ʻa e ongoongoleleí mo e niʻihi kehé. Te ke lava foki ʻo fakaafeʻi kinautolu ke nau fakamatala ki he fiefia naʻa nau maʻu ʻi he taimi naʻe vahevahe ai ʻe ha niʻihi ʻa e ongoongoleleí mo kinautolú.

3 Nīfai 29:1–3. Naʻe Fakaʻilongaʻi ʻe hono ʻOmi ʻo e Tohi ʻa Molomoná ʻa e Kamataʻanga hono Tānaki Fakataha ʻo ʻIsilelí

ʻAi ke ako ʻe he kau akó ʻa e 3 Nīfai 29:1–3 mo e Mōsese 7:60–62. ʻE lava ke ke hiki e ongo fakamoʻoni fakafolofola ko ʻení he palakipoé. Kole ki he kau akó ke nau talamai e ngaahi akonaki ʻoku faitatau ai e ongo potufolofolá ni. (ʻOkú na fakatou kikiteʻi ʻa hono tānaki fakataha ʻo ʻIsilelí mo hono ʻomi ʻo e Tohi ʻa Molomoná. Kapau ʻoku ʻikai ʻilo ʻe he kau akó ʻa e ngaahi fakamoʻoni fakafolofola ki he Tohi ʻa Molomoná peá ke taki ʻenau tokangá ki he kupuʻi lea ko e “ngaahi folofolá ni” ʻi he 3 Nīfai 29:1 pea ki he fakamatala “te u ʻohake ʻa e moʻoní mei he kelekelé, ke fakamoʻoniʻi ʻa hoku ʻAlo pē Taha naʻe Fakatupú” ʻi he Mōsese 7:62.)

Fakatatau ki he 3 Nīfai 29:1–2, ʻe kamata ʻa fē hono tānaki fakataha ʻo ʻIsilelí? (ʻI he taimi ʻe “fakahoko ai [“ ʻa e ngaahi folofolá ni”] ʻi he Tohi ʻa Molomoná … ʻo fakatatau ki heʻene folofolá.”)

Fakamanatu ki he kau akó kuo ʻosi fakamamafaʻi ʻe he kau palōfita ʻo e ngaahi ʻaho kimui ní ʻoku mahulu atu ʻa hono ʻomi ʻo e Tohi ʻa Molomoná ko ha fakaʻilonga pē kuo kamata ʻa e tānakí. Ko ha toe meʻangāue foki ia ke tokoni ʻi he tānakí.

Vahevahe ʻa e lea ko ʻeni ʻa Palesiteni ʻEselā Tafu Penisoní (1899–1994), ko e Palesiteni hono 13 ʻo e Siasí (ʻoku maʻu foki ʻi he DVD ʻoku ʻomai fakataha mo ʻení B

“ ʻOku hoko ʻa e Tohi ʻa Molomoná ʻi hono fakatahaʻi mo e Laumālie ʻo e ʻEikí, ko e meʻangāue maʻongoʻonga taha kuo foaki mai ʻe he ʻOtuá ke fakaului ʻaki ʻa e māmaní. Kapau ʻoku tau fie maʻu ha ututaʻu ʻo ha ngaahi laumālie … , pea kuo pau leva ke tau fakaʻaongaʻi e meʻangāue kuo fakataumuʻa ʻe he ʻOtuá ki he ngāue ko iá—ko e Tohi ʻa Molomoná” (ʻi he Conference Report, Oct. 1984, 6–7; pe Ensign, Nov. 1984, 7).

Ko e hā e ngaahi founga ʻoku tau kau ai ʻi hono tānaki fakataha ʻo ʻIsilelí, pe, ʻi hono fakalea ʻe tahá, ʻi hono fakaafeʻi ʻo e kakai kehé ke haʻu kia Kalaisí?
Ko e hā e ngaahi founga ʻoku tokoniʻi ai kitautolu ʻe he Tohi ʻa Molomoná ʻi heʻetau ngaahi feinga ko ia ke fakaafeʻi e kakai kehé ke haʻu kia Kalaisí?

Fakaafeʻi ha toko taha ako ke ne lau ʻa e 3 Nīfai 29:3 lolotonga ko iá ʻoku fakafanongo e toenga ʻo e kau akó ki he meʻa ʻoku talaʻofa e ʻEikí te Ne manatuʻí.

Fakamanatu ki he kau akó ʻoku hoko foki e kāingalotu ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ko e kau mēmipa ʻo e fale ʻo ʻIsilelí.

ʻI hoʻo hoko ko ha mēmipa ʻo e fale ʻo ʻIsilelí, ko e hā ha fakamoʻoni ʻokú ke maʻu naʻe manatuʻi ʻe he ʻEikí ʻa e ngaahi fuakava naʻá Ne fakahoko mo koé?
ʻE lava fēfē nai ke tākiekina ʻa e ngaahi meʻa ʻokú ke faí ʻe hoʻo ʻiloʻi ʻoku manatuʻi ʻe he ʻEikí ʻa ʻEne ngaahi fuakava mo koé?

Ka ʻi ai ha taimi pea ʻai ke lau ʻe he kau akó ʻa e 3 Nīfai 29:4–9 pea ʻai ke ʻiloʻi e ngaahi folofola ʻa e ʻEikí kiate kinautolu ʻe moʻui ʻi he ngaahi ʻaho fakaʻosí—ʻEne ngaahi fakatokangá mo ʻEne ngaahi tāpuaki kuó Ne talaʻofa ʻakí.

Vahevahe ʻa e ngaahi ongo ʻokú ke maʻu fekauʻaki mo e tokanga ongongofua ʻa e ʻEikí pea mo ʻEne ngāue ke fakahaofi ʻa kitautolu takitaha pea toe ʻomi ʻa kitautolu ki ʻapí.