Palesiteni Lolenisou Sinou (1814–1901)

Neongo naʻe hoko ki mui ʻa Lolenisou Sinou ko e Palesiteni hono nima ʻo e Siasí, ka naʻe ʻikai fuʻu tokanga ia ke papitaiso ka ne taʻeʻoua hono fakaafeʻi ia ʻe hono tuofefine ko ʻĪlisá ke ne ʻalu ki he kalasi faka-Hepelū ʻi he Akoʻanga ʻo e Kau Palōfitá ʻi Ketilani ʻi ʻŌhaioó. Naʻe kau foki he ako ko iá ʻa Siosefa Sāmita mo ha kau taki kehe ʻo e Siasí. Naʻe vave pē ʻa e mahuʻingaʻia ʻa Lolenisou ʻi he ongoongoleleí pea naʻá ne kau ai ki he Siasí ʻi he ʻaho 19 ʻo Sune 1836. Naʻe ngāue fakafaifekau ʻa ʻEletā Sinou ki ʻĪtali, ʻOtu Motu Saniuisí (ko Hauaiʻi he taimí ni) pea mo Pilitānia Lahi, ʻo ne foaki ai ha tatau ʻo e Tohi ʻa Molomoná kia Kuini Vikatōlia.

Naʻe maʻu ʻe ʻEletā Sinou ha ngaahi meʻafoaki fakaofo ʻo ne fakaʻaongaʻi ke tokoni ai ki he ʻEikí. Naʻe talaʻofa kiate ia ʻi hono tāpuaki fakapēteliaké neongo te ne moʻui ʻo toulekeleka, ka he ʻikai ke ne ongoʻi e haʻahaʻa ʻo e hoholo ʻo motuʻá. Naʻe tupu mei heʻene longomoʻui heʻene toulekeleká, ʻa ʻene lava ʻo ngāue lelei pē ʻi heʻene hoko ko ha ʻaposetolo mo ha palōfitá. Naʻá ne toe ngāueʻaki ʻa e lakanga fakataulaʻeikí ke fokotuʻu foki mo ha niʻihi tokolahi mei he maté.

Lolotonga e hoko ʻa Palesiteni Sinou ko ha palōfitá, naʻe faingataʻaʻia e kakai ʻi he fakatonga ʻo ʻIutaá ko e lahi e laʻalaʻaá. ʻI ha lea ʻa Palesiteni Sinou ʻi ha konifelenisi ʻi he fakatonga ʻo ʻIutaá ʻi he kolo ko Seni Siaosí, naʻe ueʻi ai ia ke ne talaʻofa ki he Kāingalotú ʻe ʻuha pea te nau maʻu ha ututaʻu mahu ʻo kapau te nau totongi vahehongofulu. Neongo naʻe totongi vahehongofulu ʻa e kāingalotú, ka naʻe ʻosi ha ngaahi māhina mo e teʻeki ai pē ke ʻuha. Naʻe tautapa ʻa Palesiteni Sinou ki he Tamai Hēvaní ke tō mai ha ʻuha. Kimui ange ai naʻá ne maʻu ha mākoni ʻo fakahā ange ai, “ʻOku ʻuha ʻa Seni Siaosi.”

ʻOlungá: Laʻitā ʻo Lolenisou Sinou, fakafuofua ki he 1865. Lotó: Ko Palesiteni Sinou (ʻi lotó) mo hono ongo tokoni ʻi he Kau Palesitenisī ʻUluakí, ko Siaosi Q. Kēnoni (toʻohemá) pea mo Siosefa F. Sāmita (toʻomataʻú) ʻi he 1900. Laló: Ne faitāpuekina e Kāingalotú ʻaki ha ʻuha maʻa ʻenau ngoué hili ʻenau talangofua ki he akonaki ʻa Palesiteni Sinou ke totongi vahehongofulú.