ʻOku Mau Lea ʻia Kalaisi
Ko ha Tali ki he Foʻi Fehuʻi Kotoa pē “Fēfē Kapau Naʻe?”
“Pea [ʻe] hāʻele atu [ʻa Sīsū Kalaisi], ʻo kātakiʻi ʻa e ngaahi mamahi mo e ngaahi faingataʻá pea mo e ngaahi ʻahiʻahi kehekehe kotoa pē; pea ʻe fai ʻeni koeʻuhí ke lava ʻo fakamoʻoniʻi ʻa e folofolá ʻa ia ʻoku pehē te ne toʻo kiate ia ʻa e ngaahi mamahi mo e ngaahi mahaki ʻoku moʻua ai hono kakaí ʻAlamā 7:11
ʻI he ngaahi taʻu kuohilí ne u tō ai he loto halá mei heʻeku paikí. Ne tuai-e-kemo kuo tuiʻi au ʻe ha meʻalele kehe—mo lahi ange—ʻo ne tohoʻi au he halá. Naʻe hanga ʻe he kakai ne nau lipooti e fakatuʻutāmakí ʻo ui ia ko ha fakatuʻutāmaki fakalilifu.
ʻI hono ʻilo ʻe he kau fakahaofi moʻuí kuó u kei moʻuí, ne nau leleakiʻi au ki falemahaki ʻo u tokoto ai ʻi ha ngaahi ʻaho siʻi kae fai ha ngaahi tafa fakavavevave kiate au. ʻI heʻeku kei moʻui pē he tokoni ʻa e mīsiní pea teʻeki ai ke u aké, naʻe hilifakinima ʻeku tamaí mo ha niʻihi kehe ki hoku ʻulú pea nau faingāue kiate au ʻo fakafou ʻi he mālohi ʻo e lakanga fakataulaʻeikí. Talu mei he momeniti ko iá mo e fakaofo ʻa ʻeku fakaʻau ke moʻuí. Ka ko e meʻa ne mahuʻinga angé, ko e tatau pē e meʻa ne hoko fakatuʻasino mo fakalaumālie kiate aú.
Naʻe fakaava ʻe he meʻá ni hoku lotó ki he ivi tākiekina ʻo e Fakamoʻuí. Hili ha uike ʻe taha mei he fakatuʻutāmakí, ne u ake hake ʻo u toki ʻilo e meʻa naʻe hokó. Ne u ʻiloʻi naʻe maluʻi au ʻe he ʻEikí mo Ne tuku ke u toe nofo pē mo hoku uaifí mo ʻema fānaú ʻi he māmaní. Ne u maʻu ha fiemālie kuo ʻikai liʻaki au ʻe he ʻOtuá. Naʻe ʻikai ke u ongoʻi ne uesia mo lōmekina au ʻi heʻeku fakaakeaké, ka ne u maʻu pē ha ongoʻi nonga.
ʻI he ngaahi ʻaho ne hoko atu aí, ne toe lahi ange ʻa ʻeku ʻofa ki he Tamai Hēvaní mo Sīsū Kalaisí, pea mālohi ʻaupito ʻa e holi ne u maʻu ke u faivelenga ʻi hono kotoa ʻo ʻeku moʻuí. Ne u mamata he ʻofa ʻa e ʻEikí ʻi he kakai lelei ne u feʻiloaki mo iá. Pea ne u mamata ʻi he fanongo mo hono tali ʻe he Tamai Hēvaní ʻa e ngaahi lotu mo e ʻaukai naʻe fai maʻaku ʻe ha kakai ʻo ha ngaahi tui fakalotu lahi.
Naʻe ʻikai hano ngataʻanga ʻo e ngaahi fehuʻi “fēfē kapau naʻé?” ʻi he taimi ne u vahevahe ai e talanoá ni mo e niʻihi kehé. “Fēfē kapau [naʻá ke] mate?” “Fēfē kapau naʻe ʻikai te ke toe lava ʻo alu?” “Fēfē kapau naʻá ke feʻao mo e mamahi lahi ʻi he toenga hoʻo moʻuí?” Ko e konga naʻe fakaofo kiate aú ko e ʻomi ʻe he Fakaleleí ʻa e tali ki he foʻi fehuʻi kotoa pē “fēfē kapau naʻe?”
Tuʻunga ʻi he Fakaleleí, te u toetuʻu ai pea ʻe toʻo atu ha faʻahinga mele pe mamahiʻia fakaesino pē. Kuó u ʻosi sila mo hoku uaifí mo e fānaú ko ha fāmili taʻengata. Naʻe lava foki ʻeni koeʻuhi pē ko e Fakaleleí. Kapau te mau laka ki muʻa mo e tui ki hotau Fakamoʻuí ʻi he ngaahi faingataʻa ʻo e moʻuí pea kātaki ki he ngataʻangá, ʻe tofa mai ʻe he Fakaleleí ʻa e hala ʻoku fie maʻu ke mau muimui aí, pea fakatatali mai ʻi he ngataʻangá mo e talaʻofa nāunauʻia ʻo e moʻui taʻengatá.
“Pea te ne toʻo kiate ia ʻa e maté, koeʻuhí ke ne vete ʻa e ngaahi haʻi ʻo e maté ʻa ia ʻoku haʻihaʻi ʻa hono kakaí; pea te ne toʻo kiate ia ʻa honau ngaahi vaivaí, koeʻuhi ke fonu hono lotó ʻi he ʻaloʻofá, ʻo fakatatau ki he kakanó, koeʻuhí ke ne ʻafioʻi ʻo fakatatau ki he kakanó ʻa e founga ke tokoniʻi ai ʻa hono kakaí ʻo fakatatau ki honau ngaahi vaivaí.ʻ Alamā 7:12.
ʻA ʻEku Tamai, tā ʻe Simon Dewey