Ko e Fuʻu ʻAkau Kilisimasí
Mei he Harriet R. Uchtdorf, “‘Der Weihnachtsbaum’: Memories Linger of Small Tree,” Church News, Dec. 12, 2009, 11.
Kuo toki ʻosi e Tau Lahi hono II ʻa Māmani, pea ko e tokolahi taha ʻo e kakai ʻi Siamané naʻe siʻisiʻi ʻenau meʻakaí pe paʻangá. ʻE hoko hoku ʻaho fāʻeleʻí ʻi ha ngaahi uike siʻi pē kimuʻa he Kilisimasí. Naʻe ʻikai ke u ʻamanaki atu ʻe ʻi ai haʻaku meʻaʻofa Kilisimasi pe ʻi hoku ʻaho fāʻeleʻí, he naʻá ku ʻilo lelei—neongo ʻeku kei siʻí—ne fāinga ʻeku ongomātuʻá ke feau ʻemau ngaahi tefitoʻi fie maʻú. Naʻe ʻi ai maʻu pē ʻa e fiekaiá ia ʻi homau koló. Ko ha taimi fakamamahi mo fakataʻelata.
Ne u ʻohovale mo fiefia ʻi he hoko hoku ʻahó ʻi he tuku mai ha meʻaʻofa fakaʻofoʻofa—maʻaku toko taha pē—ʻi he tēpile ʻi peitó. Ko e meʻaʻofa fakaʻofoʻofa taha ia ne lava ke u fakakaukau atu ki ai: ko ha kiʻi Weihnachtsbaum, ko ha fuʻu ʻakau Kilisimasi naʻe fute pē ʻe taha (30 cm) hono māʻolungá, pea teuteuʻi ʻaki e fanga kiʻi meʻa teuteu foila naʻe ngaohi nima pē. Naʻe tapa e maama ʻi homau loki talanoá ʻi he foilá ʻi ha founga naʻe fakaʻofoʻofa. ʻI heʻeku sio fakalelei ki he fanga kiʻi meʻa teuteu foilá, ne u ʻohovale hono fakatokangaʻi naʻe fakafonu ʻaki kinautolu ha lole suka kalamelo. Naʻe hangē ia ha maná. Naʻe maʻu nai mei fē ʻe heʻeku faʻeé ʻa e kiʻi fuʻu ʻakaú, foilá, mo e suká ʻa ia ne faingataʻa hono maʻú?
ʻOku aʻu mai ki he ʻahó ni mo e ʻikai te u ʻilo pe naʻá ne fakahoko fēfē ʻa e mana ko ʻení ʻi ha taimi naʻe ʻikai maʻu ai ʻe ha taha e ngaahi meʻa mahuʻinga ko iá. ʻOku kei toka ia ʻi hoku lotó ko ha fakaʻilonga ʻo e ʻofa mamae ʻa ʻeku ongomātuʻá kiate aú, ko ha fakaʻilonga ʻo e ʻamanaki lelei, ʻofa, mo hono ʻuhinga totonu ʻo e Kilisimasí.
ʻOku mau kei maʻu pē ʻi homau ʻapí ha fuʻu ʻakau Kilisimasi lolotonga e faʻahitaʻu Kilisimasí, pea ʻoku teuteuʻi ʻaki ʻeni ia e ngaahi maama ʻuhila mo e ngaahi meʻa teuteu kehekehe. ʻI he taimi ʻoku mau fakataha ai mo ʻema fānaú mo e makapuná, ʻoku hanga ʻe he fakaʻofoʻofa ʻo e fuʻu ʻakaú mo e fetapaki ʻa e ngaahi māmá ʻo ngaohi ke māfana hoku lotó pea fakafoki mai e ngaahi manatu fiefia ki ha momeniti fakafiefia he fāmilí naʻe tupu mei ha kiʻi fuʻu ʻakau mo hano ngaahi meʻa teuteu ngaohi mei he foilá.
Ngaahi tā fakatātā ʻa Taia Morley