Ko ʻEku Kaati Kilisimasi mei ʻOpekoní
Robert Ramos, ʻOlikoni, USA
Lolotonga ʻeku ngāue fakafaifekau ʻi Mekisikoú, ne ma fetaulaki mo hoku hoá mo ha tangata mei ʻOpekoni, ko ha kolo ʻi he feituʻu tokelauhihifo ʻo Mekisikoú, ʻofi ki he Kūlifa ʻo Kalefōniá. Naʻá ne fie fanongo ki heʻema pōpoaki kau ki Hono Toe Fakafoki mai ʻo e ongoongoleleí, ka ko e miniti pē ʻe 10 ʻe lava ke mau talanoa aí kae tali ʻene lēlué. Naʻá ma akoʻi ki ai e meʻa kotoa ne ma lavá ʻi he kiʻi taimi nounou ko iá pea ʻoange haʻane tatau ʻo e Tohi ʻa Molomoná mo e fanga kiʻi tohi tufa ʻokú ma maʻú. Naʻe ʻikai ha kau faifekau ia ʻi homau misioná ʻi ʻOpekoni he taimi ko ʻení.
Hili ha ngaahi māhina lahi mei ai ne u maʻu ha kaati Kilisimasi mei ha taha ʻi ʻOpekoni. Ne u sio hifo ki he kātí mo fifili pe ko e kaati nai meia hai. Naʻá ku toki ʻiloʻi ko e ʻomi mei he tangata naʻa mau talanoa pē ʻi he miniti ʻe 10. Ne u tautau e kātí ʻi homau falé fakataha mo e ngaahi kaati Kilisimasi kehe ne u maʻu mo e kau faifekau kehé.
Hili e Kilisimasí ne teu ke u lī e kātí mo ʻeku ongoʻi hake ke u tauhi pē muʻa. Naʻe ʻikai ko ha leʻo ʻeni naʻe ongo mai ka ko ha ongo naʻe ʻi hoku lotó. Naʻe ʻikai ke u lī e kātí ka ne u faʻo ia ʻi heʻeku kato letá.
ʻI he ʻosi mei ai ha ngaahi māhina siʻi lolotonga ʻeku lau ʻa e tohi fakamāhina mei he ʻapi fakamisioná, ne u fakatokangaʻi ha fanongonongo ʻe fakaava e ngāue fakafaifekaú ʻi ʻOpekoni. Ne u toe fakakaukau hake, “Ko e hā e fekauʻaki ʻa e kolo ko iá mo au?” Peá u toe manatuʻi hake ʻa e tangata mei ʻOpekoni ne mau feʻiloakí. Ne u hua hake ʻeku kato letá ʻo maʻu e kaati Kilisimasí. Ne u tohiʻi he kātí, “Ko hoku ngaahi kaumeʻa e kau ʻeletā ko ʻení, pea ʻoku ou fekau ke nau ō atu ʻo toe akoʻi lahi ange koe ʻo kau ki he ongoongoleleí.” Ne u ʻoange leva e kātí ki he kau faifekau ne vahe ke ngāue ʻi ʻOpekoní mo talaange ke nau ʻave ia pea nau ʻaʻahi ki he tangatá.
Ne taimi siʻi kuó u maʻu ha tohi mei he kau faifekau ʻi ʻOpekoní. Naʻe pehē hono fakaleá: “Siʻi ʻEletā Lamosi, naʻe faingataʻa ʻaupito e ngāué heni ʻo palani ai e palesiteni fakamisioná ke ʻave kimautolu mei heni mo ʻemau maʻu hoʻo kātí. Naʻa mau ō ʻo sio ki he tangatá ni, pea naʻá ne fiefia ʻaupito ʻi heʻemau pōpoakí ʻo ne ʻave ai kimautolu ke feʻiloaki mo hono fāmilí mo e kaungāmeʻá. Koeʻuhi ko e tangata ko ʻení, kuo mau kamata ai ha kolo.”
Kuo ʻosi atu ha ngaahi taʻu, pea kuo fokotuʻu ʻeni ha siteiki ʻe tolu ʻi ʻOpekoni. ʻOku ou loto fakatōkilalo ʻi heʻeku ʻiloʻi ne tupu mei heʻeku fakafanongo ki he ngaahi ueʻi ʻa e Laumālié, kuo faitāpuekina au ke u fai ha konga siʻi ke tokoniʻi hoku ngaahi tokoua mo e tuofāfine ʻi ʻOpekoní ke nau tali ʻa e ongoongolelei ʻo Sīsū Kalaisí.