Ko ʻEku Paʻanga Ngāue Fakafaifekaú
ʻOku ou ʻiloʻi ʻe ongo ngali kehe nai ʻeni, ka naʻá ku tānaki pē ʻa e paʻanga ke totongi ʻaki ʻeku ngāue fakafaifekaú kimuʻa pē ia pea fāʻeleʻi aú. ʻI he ʻiloʻi pē ʻe heʻeku faʻeé ʻe ʻi ai ʻene pēpeé, naʻá ne ʻomai ha ngeʻesi kapa huʻakau ʻo tohi ai ʻa e “Paʻanga Ngāue Fakafaifekau.” Talu mei he ʻaho ko iá mo e fakahaofi ʻe hoku fāmilí ha paʻanga ki heʻeku ngāue fakafaifekaú.
Ko e meʻa fakafāmili ʻa hono tānaki ʻo e paʻanga ki heʻeku ngāue fakafaifekaú. Hili pē hono fāʻeleʻi aú, naʻe ʻaʻahi mai ʻa kinautolu ne u tamai ʻaki mo faʻē ʻakí, ngaahi faʻē tangata mo e mehikitangá, ʻo faʻo e peso Filipaini ʻi he kapa paʻangá. Pea ʻi he taimi ne hokosia ai e ngaahi ʻaho mālōlō hangē ko e Kilisimasí mo e Taʻu Foʻoú, naʻe foaki mai ʻe he kau mēmipa ʻo e fāmilí ha paʻanga ke u tānaki atu ki heʻeku paʻanga ngāue fakafaifekaú.
Taimi ʻe niʻihi naʻe foaki mai ai ʻe heʻeku ngaahi kuí ha paʻanga kiate au ko e lelei ʻeku akó mo e ngaahi feʻauhí. Naʻe ʻalu pē foki mo e ngaahi meʻaʻofa ko ʻení ki heʻeku paʻanga ngāue fakafaifekaú. Ne tuʻo taha ʻeku maʻu ha ʻū mētali lahi, pea naʻe lau kotoa ʻe he tokoua ʻeku faʻeé ʻa e ʻū mētalí peá ne totongi taha taha mai kinautolu. Hili ʻeku totongi vahehongofulú, naʻe toe ʻave pē foki mo e paʻanga ko ʻení ki heʻeku paʻanga ngāue fakafaifekaú.
ʻI he taimi ne papitaiso ai aú, naʻe toe lahi ange ʻeku fie ngāue fakafaifekaú. Naʻe fokotuʻu ʻe hoku fāmilí ha taumuʻa ke tānaki ha paʻanga feʻunga ke totongi kakato ʻeku ngāue fakafaifekaú. Kuo ʻi ai foki ʻeni hoku ngaahi tokoua mo e tuofāfine, pea naʻe tānaki atu foki e paʻanga ne mau fakahaofí ki heʻenau paʻanga ngāue fakafaifekau ʻanautolú.
Ko hoku taʻu hiva ʻeni he taimí ni pea kuó u mei aʻu ki he vaeuamālie ʻo e taʻu motuʻa ke u ngāue fakafaifekau aí. Kuo toe lahi ange ʻeku fakaʻamu ke u ngāue fakafaifekaú tupu mei heʻeku ʻiloʻi ʻoku tokolahi ʻaupito e kakai kuo nau fai e foaki ko e tokoni ki heʻeku paʻanga ngāue fakafaifekaú.
ʻE kei hokohoko atu pē ʻeku fakahaofi ha paʻanga ki heʻeku ngāue fakafaifekaú. ʻOku ou ʻiloʻi ʻe tāpuakiʻi au ʻe he Tamai Hēvaní ke u lava ʻo ngāue fakafaifekau Maʻana ʻi ha ʻaho.
Paʻanga Ngāue Fakafaifekaú
Tā fakatātaaʻi ʻe Brian Bean