Ko e Kilisimasi Fakaʻosi ʻo Linitaá
J. Audrey Hammer, ʻIutā, USA
Lolotonga hoku taʻu hono ua ʻi he ʻUnivēsiti Pilikihami ʻIongí, naʻe ʻai ʻe he kau pīsopeliki ʻo e uōtí ke kau homau uōtí ʻi he polokalama Fakafofongaʻi-ʻo-Sanitā Kolosí, ʻa ia te mau foaki ai ha ngaahi meʻaʻofa ki ha fāmili faingataʻaʻia.
Ka ne ʻikai pē ke ʻasi e hingoa homau uōtí ʻi he lisi ʻo kinautolu ke tokoní. Naʻe ofi e Kilisimasí mo e ʻikai pē ha fāmili ke mau tokoni ki ai. Naʻe fakahā mai leva ʻe ha taha ʻo e ongo tokoni pīsopé ʻoku ʻi ai ha fāmili ʻe ʻaonga ki ai haʻamau tokoni. ʻI heʻemau fanongo ʻi he fāmilí ni, ne mau ongoʻi fakapapauʻi kotoa pē ʻoku totonu ke tuku ʻemau tokangá ʻiate kinautolu.
Naʻe ʻi ai ha fānau tangata tokolahi ʻa Linitā (kuo liliu e hingoá) kamata pē mei he taʻu 9 ki he 15, pea naʻá ne fāinga mo e kanisā ʻo e huhú. Lolotonga siʻene faingataʻa ʻi heʻene puké, naʻe ʻalu hono husepānití kae liʻaki ia. Naʻá ne toki hiki mai pē mei ha siteiti kehe ke ngāue ʻi Polovo, ʻi ʻIutā, ka naʻe mole ʻene ngāué pea ʻikai haʻane paʻanga hū mai.
Naʻa mau ʻofa lahi ʻia Linitā ʻi heʻemau fetaulaki mo iá. Ne mau monūʻia ke mamata kiate ia ʻi he anga ne mamata ʻaki ʻe he Fakamoʻuí kiate iá—ko ha laumālie maʻongoʻonga mo fakaʻeiʻeiki kuó ne ikunaʻi ha ngaahi faingataʻa lahi. Ne ʻikai pē ha taimi te mau pehē ko ha taha ia ʻoku mau fai ha ngāue ki ai; ka ko hamau kaumeʻa taʻengata. Naʻe foaki ʻe he mēmipa kotoa pē ʻo e uōtí ha meʻa ke tokoni kiate ia mo ʻene fānaú. Ko ha fānau ako ʻunivēsiti kei talavou pē kimautolu pea naʻa mau masiva, ka naʻa mau fiefia ke foaki he naʻa mau ʻofa ʻiate ia.
Naʻe haʻu ʻa Linitā ki heʻemau paati Kilisimasi fakauōtí, pea lolotonga e taimi ko iá ne ʻalu ai ha kāingalotu tokolahi ʻo e uōtí ki hono falé ʻo fakafonu meʻakai ʻene ʻū kōpaté mo e ʻaisí. Naʻa nau teuteuʻi ha fuʻu ʻakau Kilisimasi pea tuku takai ai ha ʻū meʻaʻofa maʻá e fāmilí kotoa. Naʻa nau tuku foki ai mo ha vaʻe kā foʻou ʻe fā pea totongi e ngaahi māhina lahi ki hono falé. ʻOku ʻikai ke u fakapapauʻi pe naʻe lava fēfē ʻe heʻemau fanga kiʻi foakí ʻo fai kotoa ʻeni, ka naʻá ku ʻiloʻi naʻe ngāue ʻaki ʻe he Tamai Hēvaní ʻemau ngaahi feilaulaú ke faitāpuekina ʻa Linitā.
ʻI he ʻosi ha taʻu ʻe taha mei ai ne u ʻi ha uooti fānau ako kehe au, ka naʻá ku foki he taimi Kilisimasí ke ʻaʻahi ki heʻeku kau pīsopeliki kimuʻá. Ne u ʻilo ai kuo foki mai e husepāniti ʻo Linitaá ki he fāmilí, pea kuo faingamālie ʻenau ngaahi meʻa fakapaʻangá. Ka ne toe foki mai hono kanisaá ʻo siʻi mole ai ʻene moʻuí. Ne u ʻiloʻi naʻa mau tokoni ke foaki kia Linitā hono Kilisimasi fakaʻosí.
ʻI heʻeku ongoʻi mālohi e “ʻofa haohaoa ʻa Kalaisí” (Molonai 7:47) ʻi he meʻa ko ia ne u aʻusiá, ne u ʻiloʻi ai ko e ʻofa faka-Kalaisi moʻoní ko ha meʻaʻofa fakalaumālie mahuʻinga lahi ia ʻokú ne ueʻi kitautolu ke tau fai e ngāue ʻa e Fakamoʻuí.