“Balaang mga Dapit,” kapitulo 15 sa Mga Santos: Ang Istorya sa Simbahan ni Jesukristo sa Ulahing mga Adlaw, Volume 1, Ang Sumbanan sa Kamatuoran, 1815–1846 (2018)
Kapitulo 15: “Balaang mga Dapit”
Kapitulo 15
Balaang mga Dapit
Niadtong Agosto 1832, mapagarbuhong mitan-aw si Phebe Peck samtang tulo sa iyang mga anak gibunyagan duol sa ilang panimalay sa Missouri. Apil sila sa onse ka mga bata nga gibunyagan diha sa Zion nianang adlawa. Uban sa mga anak ni Lydia ug Edward Partridge ug Sally ug William Phelps, nalakip sila sa unang henerasyon sa batan-ong mga Santos nga nagtubo sa usa ka dapit nga gilahi sa Ginoo isip balaan.
Si Phebe ug ang iyang mga anak mibalhin ngadto sa Zion uban sa mga Santos sa Colesville usa ka tuig na ang milabay. Ang namatay nga bana ni Phebe, si Benjamin, igsoon ni Polly Knight, mao nga si Phebe adunay luna diha sa gipalapdang pamilya nga Knight. Apan gimingaw gihapon siya sa iyang kaugalingong pamilya ug mga higala sa New York nga wala magpasakop sa simbahan.
Wala madugay human sa bunyag sa iyang mga anak, misulat siya ngadto sa duha sa iyang karaang mga higala mahitungod sa Zion. “Dili ka maghunahuna nga lisud ang pag-anhi dinhi,” miingon siya sa iyang higala nga si Anna, “kay gipadayag sa Ginoo ang mga misteryo sa langitnong gingharian ngadto sa Iyang mga anak.”1
Bag-ohay lang, gimantala ni William Phelps ang panan-awon ni Joseph ug Sidney sa langit diha sa The Evening and the Morning Star, ug gipaambit ni Phebe kang Anna ang saad niini nga kadtong nabunyagan ug nagpabiling matinud-anon sa pagpamatuod ni Kristo makatagamtam sa kinatas-ang ang-ang sa himaya ug kahingpitan sa mga panalangin sa Dios.
Naghunahuna niini nga saad, giawhag ni Phebe ang laing higala, si Patty, sa pagpaminaw sa mensahe sa ebanghelyo. “Kon makasabut ug motuo lang ka sama kanako,” misulat siya, “ang paagi mahimong posible ug moanhi ka niini nga yuta, ug magkakita kita sa usag usa ug maglipay diha sa mga butang sa Dios.”
Mipamatuod si Phebe sa bag-ohay lang nga gipadayag nga panan-awon sa propeta ug sa kalinaw nga nahatag niini kaniya, miawhag kang Patty sa pagbasa sa mga pulong niini kon duna siyay oportunidad sa pagbuhat niini.
“Manghinaut ko nga mobasa ka uban sa mainampingon ug mainampoong kasingkasing,” misulti siya sa iyang higala, “kay importante kining mga butanga, ug tinguha nako nga imo kining tun-an.”2
Niana nga tinglarag, mibiyahe si Joseph uban ni Newel Whitney ngadto sa Siyudad sa New York aron sa pagsangyaw sa ebanghelyo ug sa pagpamalit alang sa United Firm [Nagkahiusa nga Kompaniya]. Gitawag sa Ginoo si Newel aron sa pagpasidaan sa katawhan diha sa dagkong mga siyudad sa mga kalamidad nga moabut sa katapusang mga adlaw. Miuban si Joseph kaniya sa pagtabang nga matuman ang sugo sa Ginoo.3
Bag-ohay lang, ang propeta mibati og nagtubo nga kadinalian sa pagsangyaw sa ebanghelyo ug sa pag-establisar sa dapit nga kapundokan sa mga Santos. Sa wala pa siya mibiya sa Kirtland, nakadawat siya og pinadayag nga ang mga naghupot sa priesthood adunay responsibilidad sa pagsangyaw sa ebanghelyo ug sa paggiya sa mga matinud-anon ngadto sa kasiguroan sa Zion ug sa templo, diin ang Ginoo misaad nga moduaw kanila uban sa Iyang himaya.
Busa, ang priesthood nagdala og katungdanan sa pagpahigayon sa mga ordinansa ngadto niadtong midawat ni Kristo ug sa Iyang ebanghelyo. Pinaagi lamang niini nga mga ordinansa, mitudlo ang Ginoo, nga maandam ang Iyang mga anak sa pagdawat sa Iyang gahum ug sa pagbalik ngadto sa Iyang presensya.4
Hinoon, sa iyang pagbiya aron mobiyahe, adunay rason si Joseph nga mabalaka kabahin sa paningkamot sa pagtukod sa Zion didto sa Missouri. Naglambo ang simbahan sa Ohio, bisan pa sa oposisyon gikan sa kanhi mga miyembro sa simbahan, apan ang simbahan sa Missouri nanlimbasug sa pagmintinar og kahusay tungod kay daghang mga tawo ang mibalhin sa dapit nga walay pagtugot. Tungod kay ang dili maayong relasyon tali niya ug sa ubang mga lider sa Zion wala pa masulbad, kinahanglang dunay buhaton aron mahiusa ang simbahan.
Pag-abut sa Siyudad sa New York, nahingangha si Joseph sa gidak-on niini. Tag-as nga mga building ang nagbansiwag ibabaw sa pig-ot nga mga dalan nga modagan og pipila ka kilometro. Bisan asa siya motan-aw dunay mga tindahan sa mahalon nga mga butang, dagko nga mga balay ug mga building sa opisina, ug mga bangko diin ang adunahan nga mga tawo mipahigayon og negosyo. Mga tawo nga gikan sa lain-laing mga etniko, mga trabaho, ug mga klase magdali paglakaw agi kaniya, daw walay pagpakabana sa uban diha sa ilang palibut.5
Siya ug si Newel mipuyo diha sa upat ka andana nga hotel duol sa mga bodega diin nanghinaut nga makapamalit si Newel alang sa Nagkahiusa nga Kompaniya. Kapuyan si Joseph sa trabaho nga mamili og mga palitunon ug nasagmuyo siya sa garbo ug pagkadautan nga iyang nakita diha sa siyudad, mao nga kanunay siyang mouli ngadto sa hotel aron magbasa, mamalandong, ug mag-ampo. Wala madugay gimingaw siya sa iyang pamilya. Anaa na si Emma sa katapusang parte sa laing lisud nga pagmabdos, ug gusto ni Joseph nga makauban siya ug ang ilang anak nga babaye.
“Ang paghandum sa panimalay, ni Emma ug Julia, midasmag sa akong hunahuna sama sa usa ka baha,” misulat siya, “ug ako nakapangandoy og kadiyot nga unta ako kauban nila.”
Usahay mobiya si Joseph sa hotel aron mosuroy ug mosangyaw. Ang Siyudad sa New York adunay populasyon nga sobra sa duha ka gatus ka libo, ug gibati ni Joseph nga nahimuot ang Ginoo sa maanindot nga arkitektura ug talagsaong mga imbensyon sa mga tawo niini. Apan daw walay usa nga mihimaya sa Dios alang sa kahibulongan nga mga butang sa ilang palibut o mainteresado sa gipahiuli nga ebanghelyo ni Jesukristo.
Wala mawad-i og paglaum, mipadayon si Joseph sa pagpaambit sa iyang mensahe. “Determinado ko nga mopataas sa akong tingog,” misulat siya kang Emma, “ug motugyan sa mga resulta ngadto sa Dios, kinsa naggunit sa tanang mga butang sa Iyang mga kamot.”6
Paglabay sa usa ka bulan, human nga nakauli na si Joseph ug Newel sa Ohio, ang trayntay uno anyos nga si Brigham Young miabut sa Kirtland uban sa iyang magulang nga lalaki nga si Joseph ug suod nga higala, si Heber Kimball. Bag-o sila nga mga kinabig gikan sa central New York, dili layo sa dapit diin nagdako si Joseph Smith. Gusto ni Brigham nga mahimamat ang propeta sukad sa una niyang pagkasayud mahitungod sa Basahon ni Mormon. Karon nga anaa na siya sa Kirtland, nagplano siyang lamanuhon ang kamot ni Joseph, motan-aw sa iyang mga mata, ug masayud sa iyang kasingkasing. Nagsangyaw na si Brigham gikan sa Basahon ni Mormon sukad sa iyang bunyag, apan gamay ra kaayo siyag nahibaloan kabahin sa tawo nga mihubad niini.
Si Joseph ug Emma nagpuyo na karon sa apartment ibabaw sa tindahan ni Whitney sa Kirtland, apan sa dihang ang tulo ka tawo mihapit didto, ang propeta tua sa lasang aron mamutol og kahoy nga igsusugnod mga usa ug tunga ka kilometro ang gilay-on. Miadto dayon sila sa lugar, dili sigurado kon unsay ilang makit-an inig-abut didto.
Milakaw ngadto sa kakahoyan, si Brigham ug ang uban miabut sa usa ka hawan diin si Joseph nagbugha og mga troso. Mas taas siya ni Brigham ug nagsul-ob og yano nga sininang pangtrabaho. Gikan sa hanas nga paagi sa paggamit ni Joseph sa iyang atsa, makita ni Brigham nga anad siya sa manwal nga trabaho.
Miduol si Brigham niya ug mipaila sa iyang kaugalingon. Gibutang ang iyang atsa, milamano si Joseph sa kamot ni Brigham. “Nalipay kong nagkita ta,” miingon siya.
Samtang nag-istorya sila, mitanyag si Brigham nga mobugha sa kahoy samtang ang iyang igsoon ug si Heber motabang sa pagkarga niini ngadto sa karwahe. Ang propeta daw malipayon, kugihan, ug mahigalaon. Sama ni Brigham, ubos ang iyang kagikan, apan dili bastos sama sa ubang mamumuo. Nasayud si Brigham diha-diha dayon nga siya usa ka propeta sa Dios.7
Pagkataud-taud, gidapit ni Joseph ang mga lalaki balik ngadto sa iyang balay aron mangaon. Sa ilang pag-abut, gipaila-ila niya sila ngadto kang Emma, kinsa naghigda sa katre, naggakos og himsog nga batang lalaki. Ang bata natawo pipila ka adlaw ang milabay, mga oras lang sa wala pa moabut si Joseph ug Newel gikan sa New York. Ginganlan siya ni Emma ug Joseph og Joseph Smith III.8
Human mangaon, mipahigayon si Joseph og gamay nga miting ug gidapit si Brigham sa pag-ampo. Samtang miduko siya sa iyang ulo, gibati ni Brigham ang Espiritu nga midasig kaniya sa pagpamulong gamit ang wala mailhi nga pinulongan. Nakalitan ang mga tawo diha sa kwarto. Sa miaging tuig, nakakita sila og daghang tawo nga misundog sa mga gasa sa Espiritu pinaagi sa pinatuyang nga linihokan. Ang gibuhat ni Brigham lahi.
“Mga kaigsoonan, dili gyud ko mosupak sa bisan unsa nga gikan sa Ginoo,” miingon si Joseph, nga nakamatikod sa ilang pagkadili komportable. “Kana nga pinulongan gikan sa Dios.”
Namulong dayon si Joseph sa sama nga pinulongan, mideklarar nga mao kadto ang pinulongan nga gipamulong ni Adan sa Tanaman sa Eden ug midasig sa mga Santos sa pagtinguha sa gasa sa mga pinulongan, sama sa gibuhat ni Pablo diha sa Bag-ong Tugon, alang sa kaayohan sa mga anak sa Dios.9
Mibiya si Brigham sa Kirtland paglabay sa usa ka semana samtang ang malinawon nga tingtugnaw miabut sa gamay nga barangay. Hinoon, pipila ka adlaw sa wala pa ang Pasko, usa ka lokal nga pamantalaan mimantala og mga report nga ang mga lider sa gobyerno sa estado sa South Carolina misupak sa buhis sa gi-import nga kabtangan ug mihulga nga modeklarar og kagawasan gikan sa Estados Unidos. Ang ubang tawo gustong modeklarar og gubat.10
Samtang gibasa ni Joseph ang mga report mahitungod sa krisis, naghunahuna siya sa kadautan ug kalaglagan nga giingon sa Biblia nga mag-una sa Ikaduhang Pag-anhi sa Manluluwas.11 Ang tibuok kalibutan nag-agulo ubos sa pagkaulipon sa sala, misulti ang Ginoo kaniya bag-ohay lang, ug ang Dios hapit na moduaw sa mga dautan uban sa Iyang kasuko, mogun-ob sa mga gingharian sa yuta ug mopakurog sa kalangitan.12
Human mag-ampo aron masayud pa mahitungod niini nga mga kalamidad, si Joseph nakadawat og pinadayag sa Adlaw sa Pasko. Misulti ang Ginoo kaniya nga moabut ang panahon nga ang South Carolina ug ubang habagatan nga mga estado mosukol batok sa tibuok nasud. Ang mirebelde nga mga estado mangayo og tabang gikan sa ubang mga nasud, ug ang naulipon nga mga tawo mosukol batok sa ilang mga agalon. Ang gubat ug natural nga mga katalagman moapekto sa tanang kanasuran, nga mopakatap og kasakit ug kamatayon sa tibuok kalibutan.
Ang pinadayag usa ka bug-at nga pahinumdom nga dili na mahimong langayon sa mga Santos ang pagtukod sa Zion ug sa templo. Kinahanglang mangandam na sila karon kon naglaum sila nga makalikay sa umaabut nga kalaglagan.
“Barug kamo sa balaan nga mga dapit,” miawhag ang Ginoo kanila, “ug ayaw pagbalhin, hangtud ang adlaw sa Ginoo moabut.”13
Duha ka adlaw human madawat ang pinadayag bahin sa gubat, nakigkita si Joseph sa mga lider sa simbahan diha sa tindahan ni Newel Whitney. Nagtuo siya nga ang mga Santos sa Missouri nag-anam ka masinawayon sa iyang pagpangulo. Kon dili sila maghinulsol ug ibalik ang panag-uyon diha sa simbahan, nahadlok siya, nga mawad-an sila sa ilang mga kabilin sa Zion ug mawala ang ilang kahigayunan sa pagtukod sa templo.14
Human gisugdan ang miting, mihangyo si Joseph sa mga lider sa simbahan sa pag-ampo aron masayud sa kabubut-on sa Dios mahitungod sa pagtukod sa Zion. Ang mga tawo miyukbo sa ilang mga ulo ug nag-ampo, ang matag usa mipahayag sa iyang kaandam sa pagsunod sa mga sugo sa Dios. Nakadawat dayon si Joseph og pinadayag samtang si Frederick Williams, ang iyang bag-ong tigsulat, misulat niini.15
Usa kini ka mensahe sa kalinaw alang sa mga Santos, nga nag-awhag kanila nga mahimong balaan. “Ibalaan ang inyong mga kaugalingon,” misugo ang Ginoo, “aron ang inyong mga hunahuna mahimo nga ipahinungod ngadto sa Dios.” Sa ilang kasurprisa, misugo Siya kanila sa pagtukod og templo sa Kirtland ug mangandam sa pagdawat sa Iyang himaya.
“Han-aya ninyo ang inyong mga kaugalingon,” miingon ang Ginoo. “Andama ang matag butang nga kinahanglanon; ug pagtukod og usa ka balay, gani usa ka balay sa pag-ampo, usa ka balay sa pagpuasa, usa ka balay sa hugot nga pagtuo, usa ka balay sa pagtulun-an, usa ka balay sa himaya, usa ka balay sa kahusay, usa ka balay sa Dios.”
Mitambag usab ang Ginoo kanila sa pagsugod og eskwelahan. “Sa ingon sa tanan nga walay hugot nga pagtuo,” mideklarar Siya, “pangitaa ninyo nga makugihon ug magtudlo sa usag usa sa mga pulong sa kaalam; oo, pangitaa ninyo gikan sa labing maayo nga mga basahon ang mga pulong sa kaalam; pangitaa ang pagtulun-an, gani pinaagi sa pagtuon ug usab pinaagi sa hugot nga pagtuo.”16
Mipadala si Joseph og kopya sa pinadayag ngadto kang William Phelps sa Missouri, mitawag niini nga “simbolo sa kalinaw” ug “ang mensahe sa Ginoo sa kalinaw” ngadto sa mga Santos sa Kirtland. Mipasidaan Siya sa mga Santos sa Zion nga kon dili nila ibalaan ang ilang kaugalingon sumala sa sugo sa Ginoo, mopili Siya og uban nga motukod sa Iyang templo.
“Paminawa ang nagpasidaan nga tingog sa Dios, aron dili mahugno ang Zion,” mihangyo si Joseph. “Ang mga kaigsoonan sa Kirtland kanunay nga nag-ampo alang kaninyo, tungod kay nasayud sa mga makalilisang sa Ginoo, hilabihan silang nahadlok alang kaninyo.”17
Pagka-Enero 22, 1833, giablihan ni Joseph ug ang mga Santos sa Kirtland ang Tulunghaan sa mga Propeta diha sa Whitney store. Usa sa mga klerk ni Joseph, si Orson Hyde, maoy gisugo nga motudlo sa klase. Sama ni Joseph ug daghan sa ubang estudyante, gigahin ni Orson ang dakong bahin sa iyang pagkabata sa pagtrabaho kay sa pagtambong sa eskwelahan. Usa siya ka ilo, ug gitugtan lamang siya sa iyang magbalantay sa pag-eskwela sa tingtugnaw, human sa ani ug sa wala pa ang sunod nga pagpananom. Hinoon, maayo og panumduman si Orson ug dali nga makat-on, ug nakatambong siya sa duol nga akademiya sa iyang pagkahamtong.18
Sa Tulunghaan sa mga Propeta, gitudloan ni Orson ang mga lalaki og espiritwal nga mga leksyon agig dugang sa kasaysayan, grammar, ug aritmetik, sigun sa sugo sa Ginoo.19 Kadtong nanambong sa iyang klase dili lang mga estudyante. Nakigsulti sila sa usag usa isip mga igsoon ug gibugkos ang ilang kaugalingon uban sa usa ka saad sa pakigdait.20 Dungan sila nga nagtuon, dunay mga diskusyon, ug nag-ampo isip grupo.21
Usa ka adlaw, gihangyo ni Joseph si Orson ug ang uban diha sa klase sa paghubo sa ilang mga sapatos. Misunod sa ehemplo ni Kristo, miluhod si Joseph sa tagsa-tagsa nila ka atubangan ug mihugas sa ilang mga tiil.
Dihang nahuman siya, miingon siya, “Sama sa akong gibuhat, buhata usab ninyo.” Mihangyo siya kanila sa pagserbisyo sa usag usa ug nga himoon ang ilang mga kaugalingon nga limpyo gikan sa mga sala sa kalibutan.22
Samtang dunay klase ang Tulunghaan sa mga Propeta, mitan-aw si Emma sa mga estudyante nga nangabut ug misaka sa hagdanan ngadto sa gamay, huot nga lawak diin sila mag-abut. Ang ubang lalaki miabut sa eskwelahan nga bag-ong ligo ug limpyo og sinina agi og respeto sa sagrado nga matang sa eskwelahan. Ang uban usab dili mamahaw aron makatambong sila sa miting nga nagpuasa.23
Pagkahuman sa klase ug sa dihang ang mga lalaki mibiya na, si Emma ug pipila ka batan-ong mga babaye nga gikuha aron motabang sa paglimpyo sa klasehanan. Tungod kay ang mga lalaki manabako ug mag-usap og tabako atol sa mga leksyon, medyo asuhon ang kwarto ug ang salog napuno sa mga linuwa nga tabako sa ilang pagbiya. Mangnusnos si Emma kutob sa iyang mahimo, apan ang mga lama sa tabako nagpabilin sa salog.24
Mireklamo siya kang Joseph mahitungod sa kahugaw. Dili tiggamitan og tabako si Joseph, apan baliwala ra niya kon ang ubang lalaki mogamit niini. Hinoon, ang mga reklamo ni Emma nakapahimo niya nga mangutana kon ang paggamit og tabako maayo ra ba alang sa Dios.
Wala mag-inusara si Emma sa iyang mga kabalaka. Ang mga reformer sa Estados Unidos ug sa ubang nasud sa kalibutan naghunahuna nga ang pagpanigarilyo ug pag-usap og tabako, ingon man ang pag-inom og alkohol, hugaw nga mga gawi. Apan dunay pipila ka doktor nga nagtuo nga ang tabako makaayo og daghang sakit. Dunay susama nga mga pangangkon mahitungod sa pag-inom og alkohol ug init nga mga ilimnon sama sa kape ug tsa, diin manginom pag-ayo ang mga tawo.25
Sa dihang gipangutana kini ni Joseph ngadto sa Ginoo, nakadawat siya og pagpadayag—usa ka “pulong sa kaalam alang sa kaayohan sa mga Santos niining katapusan nga mga adlaw.”26 Niini, mipasidaan ang Ginoo sa Iyang katawhan batok sa pag-inom og alkohol, namahayag nga ang sinala nga likor alang sa paghugas sa ilang mga lawas samtang ang bino alang sa mga okasyon nga sama sa sakrament. Mipasidaan usab Siya kanila batok sa tabako ug sa init nga mga ilimnon.
Gihatagan og gibug-aton sa Ginoo ang himsog nga diyeta, nag-awhag sa mga Santos sa pagkaon og mga lugas, utanon, ug mga prutas ug sa ginagmay lang nga pagkaon og karne. Misaad Siya og mga panalangin sa kahimsog, kahibalo, ug kalig-on niadtong mopili sa pagsunod.27
Ang pinadayag gideklarar dili isip usa ka sugo apan isip usa ka pasidaan. Daghang tawo maglisud sa paghunong sa paggamit niining gamhanan nga mga butang, ug wala moinsister si Joseph og higpit nga pagsunod niini. Mipadayon siya sa panagsa nga pag-inom og alkohol, ug siya ug si Emma usahay moinom og kape ug tsa.28
Bisan pa man, human gibasa ni Joseph ang mga pulong ngadto sa Tulunghaan sa mga Propeta, ang mga lalaki diha sa lawak miitsa sa ilang mga hunsoy ug mga pudyot sa usapunong tabako ngadto sa kalayo aron mapakita ang ilang kaandam sa pagsunod sa tambag sa Ginoo.29
Ang unang sesyon sa Tulunghaan sa mga Propeta natapos pagka-Marso, ug ang mga miyembro niini nanagbulag aron sa pagserbisyo og misyon o pagtuman sa ubang buluhaton.30 Sa kasamtangan, ang mga lider sa simbahan sa Kirtland naningkamot nga makapalit og himoanan og brick ug makatigum og kwarta sa pagtukod sa templo.31
Niining panahona, nakadawat si Joseph og sulat gikan sa Missouri. Human mabasa ang “simbolo sa kalinaw” nga pinadayag, si Edward ug ang uban miawhag sa mga Santos sa paghinulsol ug sa pagpakig-uli sa simbahan sa Kirtland. Misalir ang ilang mga paningkamot, ug mihangyo sila karon kang Joseph sa pagpasaylo kanila.32
Andam nga kalimtan ang panagbangi, nangita si Joseph og mga paagi nga matuman ang mga sugo sa Ginoo alang sa Zion. Pagka-Hunyo, nag-ampo siya uban ni Sidney Rigdon ug Frederick Williams aron makat-on unsaon sa pagtukod og templo. Samtang nag-ampo sila, nakakita sila og panan-awon sa templo ug misuhid sa gawas niini, miobserbar sa istraktura sa mga bintana, atop, ug panting [steeple] niini. Daw milihok ang templo ibabaw kanila, ug nakita nila ang ilang kaugalingon nga anaa sa sulod niini, nang-inspeksyon sa sulod nga mga hawanan.33
Human sa ilang panan-awon, mihimo og mga plano ang mga lalaki alang sa templo sa Kirtland ug sa Independence. Sa gawas, ang mga building makita nga daw dagko nga mga simbahan, apan sa sulod aduna kini duha ka hamugaway nga mga assembly room, ang usa diha sa ibabaw nga andana ug ang usa sa ubos, diin mahimong mag-abut ug magkat-on ang mga Santos.34
Sunod nga gitutukan ni Joseph ang pagtabang sa mga Santos sa Zion nga mahimong siyudad ang ilang pamuy-anan, diin sobra pa nga midoble ang gidak-on sukad sa iyang katapusang pagbisita.35 Uban sa tabang ni Frederick ug Sidney, mihimo siya og mga plano alang sa duha ug tunga ka kilometro-kwadrado nga siyudad. Tag-as, tul-id nga mga dalan nagkurus diha sa mapa, nga dunay mga balay nga hinimo sa brick ug bato nga nahimutang sa pataas nga mga lote nga dunay kakahoyan sa atubangan ug tanaman sa luyo.
Bahin-bahinon ang yuta ngadto sa mga lote nga tag-2,000 metro kwadrado ang matag usa, magparehas ra ang datu ug pobre. Ang mga mag-uuma mopuyo sa siyudad ug motrabaho sa mga umahan nga anaa sa mga daplin sa lungsod. Sa sentro sa siyudad mao ang templo ug ubang sagrado nga mga building alang sa pagsimba, edukasyon, pagdumala, ug pag-atiman sa mga kabus. Ang matag pangpubliko nga building kulitan sa mga pulong “Pagkabalaan ngadto sa Ginoo.”36
Ang siyudad makapahiluna og napulog lima ka libo ka mga tawo, nga makapahimo niini nga gamay ra kaayo kay sa Siyudad sa New York, apan sa gihapon usa sa labing dako nga mga siyudad sa nasud. Kon mapuno na ang siyudad, ang plano mahimong balik-balikon sa pagsunod, hangtud ang tanang Santos adunay kabilin diha sa Zion. “Pagplano og lain sa samang paagi,” misugo si Joseph, “ug sa ingon mapuno ang kalibutan niining ulahing mga adlaw.”37
Niadtong Hunyo 1833, si Joseph, Sidney, ug Frederick mipadala sa plano alang sa siyudad gikan sa Kirtland ngadto sa Independence, uban sa detalyado nga mga instruksyon kon unsaon sa pagtukod sa templo.
“Gisugdan na namo sa pagtukod ang Balay sa Ginoo dinhing dapita, ug paspas kini nga mipadayon,” mireport sila diha sa usa ka sulat nga gipauban sa mga plano. “Adlaw ug gabii, nag-ampo kami alang sa kaluwasan sa Zion.”38